فنجان قهوة

مسا الخير ..بالمناسبة فينا اخونا مهند .......؟؟؟؟ نأسف للسؤال المتاخر ولكن والله كل الناس مبعثرون في دواخلنا نتفقدهم دون ترتيب ولكن باشواق .....

قال راشد........هكذا اخي عصملي تحتل المراءة دواخل الرجل فتصير له رمز للحياة وللوطن ...فالمراءة مخلوق يسترق الدخول لعوالم الرجل فتغير شكل البيئة النفسية له فتجعل منه فارسا وشاعرا وكاتبا ..و...و....................وناسكا


ولكن .........وتجعل البعض منهم حيرانا وقرفانا....كما انشد صالح جودة الابيات التالية:

قالت وفى القلبين جرح "الحب احسان وصفح ..
انى ظلمتك حين ضج بخاطرى القلق الملح
واهاب بى شك عنيد فصح لى مالايصح
خذنى فانك قمة وانا بغير هواك سفح""
فاجبتها متبسما " الحب مات فليس يصحو..
قد كان لى قلب كقلب النًور معطاء وسمح
قلب يزين لك الفصول فكلها عبقٌ ونفح
ويمد نحوك راحتين طلاهما امل وفرح
حتى تملكك الغرور فلم يعد يجديك نصح
فغدوت انثى فى ثغوب ضميرها افعى تفح
انى نسيتك فاذهبى الحب مات فليس يصحو""

قالت.. " اجل اذنبت فامحو الذنب ان الله يمحو""

فاجبتها.. "" وهل تطلبين من الضحايا ان يضحو..
خمد اللظى بجانبى فلم يعد للنار لفح
وخسرت فيك عواطفى الهوجاء والخسران ربح
واسود قلبى لم يعد فيه للَيل هواك صبح
انى نسيتك فاذهبى الحب مات فليس يصحو .""

مسا الخير اخي كركب (طبعا عرفت انك تحب اسمك الحركي هذا) ...لو كان الشاعر صالح جودة قد نسي الحب قلبه لما كان متمسكا بذلك الكبرياء ليأخذ بثأره ويرد الصاع صاعين ..انا دوما اتكلم عن الحب الروعة والعشق الإضافة الذي يوسع مساحات الفرح في دواخل الانسان فيعلمه كيف يسامع من جرحه وكيف يبكي لهفيف الورق وكيف يتصنت لصوت خرير المياه فيطرب له....إذا لم تتوفر الندية في الحب اخي كركب ينعدم الانسجام وينهض جسر من علامات الاستفهام : عن كيف ..وليش ...ومين ...؟الخ
.................
...........
بس سؤال صُوغنن (علي قول ود الزين) ....ايه الموقف المتشدد ده من المراءة ؟
من حقك ماتجاوب ... ده مجرد سؤال بدون انتظار اجابة
ولك كل الود

مسا الخير اخوتي الاعزاء....ذكرني المنتدي اليومين ديل بالمدرسة لما تنتهي الامتحانات والناس تكون منتظرة النتائج (يعني واحد يجي عشرة يغيبوا ...و....) شنو الحكاية ياخوانا ...؟ السؤال ده قلبه الافتقاد وقشرته اللهفة ...
والله ياو الاستاذ يبدولي الهجير ماخلا فجة...نحن قلنا الروب عدييييييييييييييييييل ...؟
تحياتنا لكل الاخواب المرابضين علي بوابات الرزق برا وبحرا ...
الجمل
ود حبيب
شلكاوي
سامتا ( الحاضر الغايب في المنتدي والغايب الحاضر في البال )............وينكم؟
..............
......
ووحشتنا للذين يشاركوننا فناجين القهوة ...والله خفنا تبرد عديل ...

راشد كتب:كعلاقته بالشغالة تنتقص للكثير من الاحترام ....
..............
.........
ولنا لقاء بإذن المولي

الحبيب ود راشد....وانا عامل مرور سريع على المواضيع الفاتت الواحد, استوقفنى الوصف اعلاه, ياخى ممكن تشرح لينا شويه عن العلاقات المقصوده هنا؟!!!!!!

ولك الود

هاهاهاهاها ...ياود عابدون يعني مريت ع السريع للكل ولما جات حتة الشغالة استوقفتك...ياسيدي عشان ابرد قلبك انا بقصد ان علاقة الاولاد الصغار مع الشغالة فيها نوع من عدم الاحترام وذلك بتذكيرها في كثير من المواقف بانها شغالة ...في حين من الممكن ان تسمو شكل العلاقة بين الابناء والشغالة فتكون نوع من العلاقة الاخوية (سطرين تحت الاخوية) ..دون تجريح او توبيخ ....
.................
..........
قالوا واحد صعيدي حب يشتري جزمة ( الله يكرمكم) فقام بتاع المحل اداه فردة عشان المقاس ..فلما طلع المقاس مظبوط قال الصعيدي لصاحب المحل: بكم الجزمة ؟ فقال ليه : خمسين جنية ....فرد الصعيدي : قول سعر كويس عشان نشتري منك الفردة التانية .....

الغالي ود الاستاذ...انا ماعارف دي اعراض زمهرة ولا تقليب جراب...؟ سمرقندية اخي خالد توزعتها عيون شهد وطيبة احمد وفوضوية راشد وحضور امهم الدهري ...واظنها هي كانت هُمْ .....وسعيد بك وبجرابك ....
............
......
بالمناسبة الكرة في الاكاديمية انا بالنسبة لي كانت اجتماعيات وليست رياضة ..وانت عارف انا فلاحتي في لساني (آنذاك) ولكني اسعد جدا بتلكم اللمة الاخوية التي نشتاقها كلما استفزت الدواخل لمة صحاب ...انت ,عمر موسي ,شكري,ضرس ,امجد,هاني ميشيل (حارس) ,المرحوم الجزولي ,حاتم طوني ,كيمو(كمال زمراوي) و....و...........وكثر سقطوا كاسماء لعوامل الزمن ولكنهم في الاعماق باقون ....
...............
.........
أسامة(السيمت,سامتا,معاوية) وينكم................؟؟؟؟

.............
......
امجد مرحبا بالعودة اتمني تكون جبت فار تجاب ابيض ...........ومنتظرين تفاصيلك ...
......................
..........
ودعكود منتظرين منتجات بيت الكلاوي .....
..........
وليكم وحشة

مسا الخير ود عكود وود عابدون ..شايفكم بقيتو تجوا اخر الليل ...ياود عكود, امجد عرفناه انت الجايبك بالليل شنو............؟
والله انا الجابني عندي تقرير مزنوق فيه وبس ...وجايل متحمل علي نفسي لاني (بعد الشر عليكم مصاب برشح تافه جدا لانو درجة الحرارة وسط النهار 49 درجة وبالليل 41 ) فشغالين حار بارد لما قلنا الروب ...

راشد كتب:
برشح تافه جدا لانو درجة الحرارة وسط النهار 49 درجة وبالليل 41 ) فشغالين حار بارد لما قلنا الروب ...

والله داخل احمدل ليك السلامة،، لكن شيطان الفضول استوقفنى
فلم اعرف اى الرقمين أبرد ؟؟؟؟
الدنيا جمعة وواضح انو مرقك الشديد القوى ،،الخبز يا أخى او كما قال ،،لك الف سلامة
امجد برضو رجع والله سلامات ،،،وشايفك جبت ليهو سيرة الفرفور ،،،غايتو هونج كونج دى الا يجيب منها فار ترانسيستور،،مشبوك مع بلو تووث
اما قالت العرب لكل مقام مقال ؟؟؟؟

هاي سيدها والله خرمان لقهوتك وونستك الرايعة وقالو حاسي شوية ياخي بعد الشر عليك ....اخذت كثيرا من الوقت لقراءة ما سبقني وذي ما قالت العرب الفاتك فوتو .هم قالو كده ولا لكل مقام مقال تحياتي لجوز اللوز وجميع الاحباب

الله يديك العافية اخي الجمل...شنو الحكاية ..؟ تقول لي جاي بكرة ومن ديك وعيك...؟ عليه كما قلت :الفاتك فوتو(لكن ما اظن ده قالوه العرب ..شكلو نجر سودانيين عدييييييييل)...عليه لن نعتب علي مافات لعشمنا فيما سيأتي ....
وفي انتظار جلسة وناسة علي الفرح...ولا غيرت رايك؟؟؟؟؟؟

فى فوانيس الضواحي
تملا نادي الحلة سيرتك
اسمك الخلانا نقدر فى ظلام الليل نعاين
والبتسأل عنو ده الخليتو شافع
لسه دابو
يا ما حيعجبك ، شنابو
صوتو رقان فيهو بحة
ود فلان اصرار وصحة
عندو قصة حب جميلة
جرب آلام الحراسة وحرض أولاد الدراسة
وهدّو حيل العسكرية
البنية أم طرحة كبرت
يا سلام الفنجرية
ليها راية وبى كلامها وبى اهتماماتها الجديدة
دقت أجراس القصيدة وشدت أوتار الصلابة
الكتوف اتلاحقت فى السكة يابا
واحلالي القبلي شال شبال لمع برق المهيرة
قيرة قيرة يا مطيرة يارزاز الدم حبابك
لما يبقى الجرح عرضة
ولما نمشي الحزن سيرة
...............
.....
تغني محجوب شريف للابطال القابعين في المعتقلات آنذاك ..وذهب الآنذاك ذاك ولكن معتقلات الغربة الطوعية تظل تشدنا طوعا لمراقدها ...نكتب للفضفضة لا للتعليق .....بعضنا يستثمر لحظات الحزن نتاجا يثري به الاجيال وبعضنا يضع راسه علي وسادة وينام علي حزنه ..وبعضنا يجتر الحزن حتي يذوي ...
............
....
مساكم بطعم الشهد اخوتي

الغالي ود الاستاذ ....شكرا ليك يارائع والشكر موصول لود عكود ايضا ...الحمد لله بلغنا الصحة ..بس عايز اقول انو الفرق مش بين الـ 49 والـ 41 انما فرق الاتنين مع بعض مع جو المكتب البيت السيارة ......وهذا ما اردت قوله ....
ولك وللاسرة محبتي

الاحباب لكم اطيب التحايا..واقل القول مشتاقيين عديل...

والله ياراشد قهوتك عاوزه انتكايه(انا قاصد اتكاله, بس البعرف معنه انتكايه اتحفنا ولا دى انا ناجره من راسى ساكت) عديل, مابنفع المرور الصباحى السريع ده....

الاخ الجمل سلامات...والله الواحد بقه يدخل على الصفحه الاخيره يعنى لوناس راشد ديل كبه الشمارات فيهو ما حابعرف, بس نقول شنو فى ايقاع الزمن السريع.

ود عكود مسجل غياب, اظهر وبان ولا نفك ليك فار صينى يجهجهك.

نواصل فى الفترة المسائيه....

راشد كتب:
...............
.....
تغني محجوب شريف للابطال القابعين في المعتقلات آنذاك ..وذهب الآنذاك ذاك ولكن معتقلات الغربة الطوعية تظل تشدنا طوعا لمراقدها ...نكتب للفضفضة لا للتعليق .....بعضنا يستثمر لحظات الحزن نتاجا يثري به الاجيال وبعضنا يضع راسه علي وسادة وينام علي حزنه ..وبعضنا يجتر الحزن حتي يذوي ...
............
....
مساكم بطعم الشهد اخوتي

راشد العزيز ،،قصيدة العظيم محجوب شريف دى مرقتها من وين ،،،جميلة فى يٌسر انيقة فى بساطة،،،،مبالغة فى الابداع
وكأنها السهل الممتنع ((انا والله عبارة السهل الممتنع دى ماعارف الشعب السودانى جابها من وين،،ده موضوع تانى)
اما اسطرك الفوق دى
فبطعم الشهد،،لا ادرى اشهداً سال منك ام سكبت على الاسطر الشهدا ؟؟
هل صدفة انو فى زول جميل بدأت ظهور جينات الفن فيه،، اسمو شهد راشد ؟؟
حفظ الله عليك والعابرين من هاههنا عيالهم ،،،ولشهد الصغيرة تحياتى

ود كرار كتب:الاحباب لكم اطيب التحايا..واقل القول مشتاقيين عديل...

والله ياراشد قهوتك عاوزه انتكايه(انا قاصد اتكاله, بس البعرف معنه انتكايه اتحفنا ولا دى انا ناجره من راسى ساكت) عديل, مابنفع المرور الصباحى السريع ده....

نواصل فى الفترة المسائيه....

وينك ياحبيب،،الفترة المسائية ما جات لسه؟؟؟
داخلين للسلام واتذكرت للصدفة انو محجوب شريف ،،،استخدم انتكاية بتاعتك دى ( بتصرف)
اغنية لوردى اسمها السنبلاية
وتتّكى سنبلاية على ضراعى وأميل ،،كأنى غٌنا الطبول العذب
كأن الدنيا طى القلب والمنديل
فهذه براءة لك من النجر من الراس
قول لى هو الراس ينجر شنو ولاشنو
الف سلام

مسا الخير الاحباب ود الاستاذ وود كرار ....قد نتاخر في الرد لظروف لقمة العيش ولحرارة الجو نصيب من هذا .....سعيد بقدومك وحضورك القوي مؤخرا ...طبعا شهد ياسيدي في الرابعة من العمر وشغالة رسم جامد (ده في اليوم بتعمل ليها اربعة رسومات...انا شخصيا مزين مكتبي بواحدة منها فلو داير تشتري لوحة نحن جاهزين)....
تخريمة:
طبعا ود كرار ود حبوبات ياود الاستاذ بس علي كل حال انتكاية اسهل ع الفم من اتكاءة والله اعلم ............بالمناسبة وين ود كرار والله من يوم ماسافر السفرة الاخيرة دي ماحدش قادر يكلمو يبدو لي الحكاية فيها سر............افتنا ياود عكود...
................
..........

ود الاستاذ لك يا سيدي القصيدة كاملة واسمها قزازة دم للرائع محجوب شريف:
قزازة دم
واحلالي القبلي شال شبال لمع برق المهيرة
قيرة قيرة يا مطيره
يا رزاز الدم حبابك
لما يبقى الجرح عرضة ولما نمشي الحزن سيرة
من دمانا الأرض شربت موية عزبة
كل ذرة رملة شربت حبة حبة
موية أحمر لونها قاني
فتقت ورد الأغاني
تهدي لى اسمك رمزاً للوطن كنز المحبة
قيرة قيرة يا مطيرة يا شهيد الشعب أهلاً
مش بتطلع كل يوم الشمس أجمل
وكل يوم النخل أطول زيدو قامة
وياما شفتك ياما ياما
لما شفت البدر طالع فى سما الوطن ابتسامة
إنتّ فى النهر البسافر جاري طول العمر صاحي
طبعو منك يا الملامحك من ضفافي
واللي شافك مرة شافو
واسمك الختيتو فرهد عشب أخضر فى الجناين
فى الشوارع نيمة نيمة فى مصابيح المدينة
فى فوانيس الضواحي
تملا نادي الحلة سيرتك
اسمك الخلانا نقدر فى ظلام الليل نعاين
والبتسأل عنو ده الخليتو شافع
لسه دابو
يا ما حيعجبك ، شنابو
صوتو رقان فيهو بحة
ود فلان اصرار وصحة
عندو قصة حب جميلة
جرب آلام الحراسة وحرض أولاد الدراسة
وهدّو حيل العسكرية
البنية أم طرحة كبرت
يا سلام الفنجرية
ليها راية وبى كلامها وبى اهتماماتها الجديدة
دقت أجراس القصيدة وشدت أوتار الصلابة
الكتوف اتلاحقت فى السكة يابا
واحلالي القبلي شال شبال لمع برق المهيرة
قيرة قيرة يا مطيرة يارزاز الدم حبابك
لما يبقى الجرح عرضة
ولما نمشي الحزن سيرة
.............
........
تحياتي لصبا وامها وكل الشباب..ولنا ملتقي انشاء الله

اول حاجه ازيك يا مرهف
تصدق بكتب لي ساعة وعملت ارسال وما لقيتها يكون زولكم الجديد دة (السيد لوبي) طايح في المنتدي شمال يمين وناس ADMIN مطنشين ؟
كيف قهوتك وخبارا لكن بيني وبينك الزول ده ما بكون (...... ) ؟

الاخ راشد والاخوة القاعدين في البنلبر والبقرو في هذه السطور كلكم ليكم سلام كتير والف حمدالله علي سلامة العودة بكبير المنتدي ود الزين ورغم انو غياب الحبيب الرشيد بعد ما متعنا بالدرر الغوالي وراح خلانا نتمني عودة (السيد لوبي) فالحوار جد كان مسلي وممتع وكركب قرب (يقبضو) طبعا التسجيل ضروري والتخفي يفقد المواضيع عنصر التوازن ويلهي الناس عن كثير من الاشياء ونبقي في الجري ورا ده منو؟ وعرفتو؟ فالاخ لوبي مننا ولديه اسلوب شيق ويا ريت يسجل.............و يبقي داخل بالباب.................كنت عاوز اقول فهمتني باللغة التونسيه عندي صديق هنا من تونس الكلمه والتانية يقول لي (فهمتني) بلكنة عجيبة لا يمكن تشكيلها فالعارف ينطقها يختها في مكان النقط اعلاه
اخونا ود عكود في حالة رحول الي سكن اخر وحيخش كان ما الليلة بكرة وكان ما .. .. و ما اكون طولت عليكم وارجو للجميع الصحة والعافية ودام التواصل

صباخ الخير اخي كركب.......شكرا حقيقي لفنجان القهوة الرائع طعما ومذاقا وجو شاعري ...ياخي الواحد من الانبساط لما حس بالهنبريب .....وطبعا ياكركب قهوتنا علي البنابر بس شايف الحكاية جابت ليها قعدة شواطيء بس يظل طعم حضوركم اروع ....
........................
............
طبعا غبت كم يوم لقيتكم مولعين انت والاخ الفاتح .....بس تذكروا دائما نحن هنا نختلف حول الاشياء من اجل ان نكون اكثر تماسكا واكثر قربا ...واطن ان كل واحد في هذا المنتدي له طعم يميزه عن الاخر عليه لا نود ان نفقد مذاق توليفة هذا المنتدي ولك وللاخ الفاتح كل المني ...(واخزوا ابليس)

اهلين اخي الجمل .............وين انت ...؟ شنو الغيبة دي ؟؟؟ والله الواحد بقالو زمن مااننصر في المود بتاع المنتدي ...جري ورا الفانية (المشغوليات وكمان جابت ليها مشروع رحيل من شقة لاخري ...وهلم جرا ..
عليه لك ولهم التحايا حتي افوق ليكم
..............
......

خلاص ياراشد حضروا البنابر وجهزوا الصحانة وهاك القدرة دى بعد تشربو قهوتكم
https://2img.net/r/ihimizer/img706/7866/7c6c2b56aa.jpg

الاخ مبارك واخونا ود راشد صاحب القهوة سلامات
حبيبنا كركب لكن القدره عندك والكمشه تعجب , تعرف دى مادايره بنبر دى عايزه الواحد يكفى ليها صندوق ببسى ويصنقر بى مزااااااج .
ودام التواصل
عاطف عكود