فنجان قهوة

سلام ياشباب ...
بالمناسبة اظن ان المشاركة بشكل عام في المنتدي باي شكل هي نوع من توثيق لحضور وفتح لنافذة تواصل بين الاخوان في آن ...الكلام ده لزومو شنو ...؟ حقيقي ده موجه بشكل شخصي للاخ محمد عبد الحفيظ وبشكل عام للجميع ..حيث انني من الذين شهدوا نشاط الاخ محمد كبداية وجلوسه علي منصة كبار الزوار لن اقول كنهاية ولكن لاجل مسمي ليس إلا....
.......
....
فللجميع اصدق الود

المهدى عثمان مصطفى كتب:
بعدين انا ساعتي في المنتدي ماعرفت اظبطها من وين فشلت كل محاولاتي ......
سنعود
مهدي شلكاوي

انت عندك مواعيد ،،؟؟الساعة والله حاولت اغيرها ليك مخصوص لكن لقيتها شغالة على قرينتش
مع شتات الناس فى كل قارات الارض
ولسبب ما اتذكرت سوكارنو ايامو السكند اوفيسر،،كل يومين ساعة لى قدام ساعة لى قدام،،كرهنا النوم ايام مشوار امريكا البعيد داك

اظبط نفسك على GMT واشتغل على كده وبطّل الاستعجال نحن لاقينك وين
اشواق بعرض الاطلنطى

والله القهوه عندكم, احبكم واحب قهوتكم ...

ياود راشد شايفك زغت من سوال اخونا الجمل واستفساره عن الفيران, وقام جاب سيرة البحر ...بالله قلت ليه قصة الفيران ده شنو؟

وبعدين خطك ده ياود راشد قرضه فار وله شنو؟ اتصل؟

لك الود

هاها ها كيفك ود عابدون ....والله ليك وحشة ..البركة في امسيسي ....
وينك.....؟
وشنو الحكاية ..؟ ماقلت جاي ...؟
طبعا الاخ الجمل سأل عن الفيران بعد الوضع هداء فقلنا احسن نغطي علي الموضوع ...وانت شايفك من ديك وعيك .....

ود الاستاذ ...كيف حالك
شكرا على المعلومه يا ظريف......بيني وبينك نحن هنا معروفين بعدم اهتمامنا بالوقت كان جي. ام. تي كان غيرو زمنا راقد والحمد لله.(شربشه ساكت).
شايف حرارتكم طلعت فوق الصفر .....نحن طلعت فوق الاربعين

لك ولكل اهل المنتدى التحيه
مهدي شلكاوي

ود شلكاوي ياظريف كيفك....؟ انت لما حرارتكم فوق الاربعين مالك ومال الساعة ..؟ولا روحك محرقاك ساكت... قلت تفشها في الساعة ....؟
وبالمناسبة يبو لي ساعة الجماعة ديل (ناس الصفر) اتعودت علي الجو الظريف فلما تضربه شمس الضهرية يازول دي الحمد لله ادتك اي زمن ..انا منها كنت كضمتَ مرة واحدة..

السلام عليكم ....
سعداء جدا بمداخلات الاخوة الاعزاء بشجب فتح قنوات للاتصال من خلال سكايب ( ود الزين ووعكود) خارج نطاق المنتدي وانا اعتبر هذا في حد ذاته ولاء لهذا المنتدي والحق يقال اصبت بحزن لمجرد اجترار الفكرة رغم اني ناصرتها كفرة واعود واعتذر حبا لاهل هذا المنتدي ..ويظل تواصلنا عبر عبر ابوابه وإن ضلت لنا خطيً سنسلك نفاجاته ....جميل ان نطرح مابداخلنا علي الطاولة الاسفيرية وهي ليست مائدة مستديرة بل ذات ابعاد ثلاثية ,وكل الافكار ملك كاصحاب قرار لاهل هذا المنتدي واكيد كل الطرح مقبول ماعدا فكرة قيام اي مسافات جغرافية او نفسية بين اهله.....
...................
............
ولكم كل الحب

ود شلكاوي كيفك...؟ شنو الحكاية ماقلت علي محجوب حيجي علي المنتدي وبقية الشباب الحلوين في لمة الاسكلا ...

راشد كتب:السلام عليكم ....
سعداء جدا بمداخلات الاخوة الاعزاء بشجب فتح قنوات للاتصال من خلال سكايب ( ود الزين ووعكود) خارج نطاق المنتدي وانا اعتبر هذا في حد ذاته ولاء لهذا المنتدي والحق يقال اصبت بحزن لمجرد اجترار الفكرة رغم اني ناصرتها كفرة واعود واعتذر حبا لاهل هذا المنتدي ..ويظل تواصلنا عبر عبر ابوابه وإن ضلت لنا خطيً سنسلك نفاجاته ....جميل ان نطرح مابداخلنا علي الطاولة الاسفيرية وهي ليست مائدة مستديرة بل ذات ابعاد ثلاثية ,وكل الافكار ملك كاصحاب قرار لاهل هذا المنتدي واكيد كل الطرح مقبول ماعدا فكرة قيام اي مسافات جغرافية او نفسية بين اهله.....

اسه ياود راشد جنس التنفج ده الواحد عاوز ليه مش اسكاى بي ده عاوز ليه مستر قوقل بذات نفسه, طبعا قصدى من طرح الموضوع بتاع التواصل السريع واضح بالنسبه ليك ولودعكود لانوبرضو استخدمنا ادوات مثل (الموبايل,الاسكاى بى,الماسنجر) للتوصيل الاعمق للفكرة, بس ذلت القلم كانت فى اضافة التواصل خارج المنتدى وبرضو القصد منها فى النهائيه تواصل اجتماعى كاالفكرة والهدف الاساسى من انشاء هذا المنتدى العامر ....

والله من وراء القصد.

المتواصل الاممى....ودكرار

الغالي المتجهجه الاممي.....
والله كل الناس لها نفس الفكرة وهي عملية تعميق صلة التواصل وإن اختلفت الافكار بس المقصد في نهاية الامر سيان ...
بس في النهاية سعداء بالكل والله ...
سمعت قالوا البحلف بالله كتير كضاب فاغفروا لنا زلاتنا إن اكثرنا من الحليفة...
............
....
ود عابدون قلت شنو اخبار امسيسي....؟
تخريمة:
من هنا واعوووووووووووووووووووك بحجم قرص الشمس للغالي الغائب الموجود جني
ليك وحشـــــــــــــــــــــــــــــــــــــــــــــة....

راشد كتب:ود شلكاوي كيفك...؟ شنو الحكاية ماقلت علي محجوب حيجي علي المنتدي وبقية الشباب الحلوين في لمة الاسكلا ...

سؤال وجيه،،، حسع بقينا فى ود شلكاوى ذات نفسيهو!
واديك من القصيد كمان بيت،،،،اقرا ما كتب بدر الدين الجاك لزمنٍ مضى

بدرالدين مبارك الجاك كتب:السلام عليكم ورحمة الله وبركاته
الاخوان الاعزاء .. اخباركم كيف عساكم بخير .. شنو الحكاية .. اعتقد انو في بعض التقصير الغير مقصود لانو انا شايف الشباب الواحد يسجل ويرسل موضوع واحد بعدين ينقطع .. وانا اعتقد انو الفرصة اتيحت لينا في القاء مرة اخري ودي فرصة ماساهل الواحد يضيعها من ايدو بدليل انوانا استطعت الاتصال والتواصل مع اكثر عضو وكانت فرصة كبيرة ما كنت متوقعة عشان كدة بضم صوتي بشدة لاخونننننننننننندا سعودن انوحقو كل واحد يضع عنوانه في المنتدي ورقم التلفون وبعض التفاصيل حتي يكون التواصل اوسع ...وشايف ود كرار كالعادة سباق في تنفيذ الوصايا والمقترحات وانشاءالله دايما..

بدرالدين مبارك الجاك

تحايانا لمن كان ومن لم يكن فى الاسكلا

وطالما الكلام عن حبيبنا ود الجاك،،، ممثلا عن ناس الاسكلا الغايبن
انظر لهذه المفارقة!!!

بدرالدين مبارك الجاك كتب:يا شباب انتو وين مهدي شلكاوي

اما على محجوب ،،يعنى اكتر من تلفون ما عندنا غير مهدى للدفرة

اخيرا يا راشد لك شوقين ،،واحد لك والتانى أن حرّكت فينا الحنين للمذكورين وللاخرين
فى انتظار طلتك

الغالي ود الاستاذ....كعادتك دوما تشق خبايا دواخلي فتُحيل سكونها عطاءاً ...والحق يقال لا انا ولا غيري انقطع عن المنتدي متعمدا انما هي حالة إحباط ليس من قضاء الله عز وجل شأنه فقد مات أعز البشر عليه افضل الصلاة والسلام وإنما احباط عن امكانية التواصل والفضفضة عن مكنون الدواخل ...وسبق وقراءت مداخلتك السابقة واثنيت عليها صمتا ...
ومشكور حقيقي للمجهود الكبير في اعادة طرح المشاركات السابقة من الاخوة الاعزاء بداءاٍ من عصام وانتهاءاٍ بود الجاك وغيرهم كثر...والمشاركة كما سبق وقلنا ليس كتابة محترفة او منمقة او او انما هي اثبات وجود وحضور وفتح قنوات ومساحات معرفة بالذين سبقونا عطاءاٍ وتجربة او الذين سبقناهم عطاءاٍ وتجربة او الذين عاصرناهم حياة وتجربة وفرقت بيننا سبل العيش هرولة في بقاع الارض ولن يحس الاعزاء بروعة هذا المنتدي حتي يصيروا قلما منه وفردا يطبطب علي اوسدة اصحابه قبل نومهم إطمئنانا عليهم وبهم ....
تخريمة:
ود شلكاوي اكيد شهر هرولتو بدا...وحقيقي بقي عضو اصيل يعني مجرد مايجي مابقصر ....
وتحياتي لكل الاحباب بشوق يفوق غيابهم عن المنتدي ...

بعد أن يئسنا من طلته اتانا الاخ الغالي اسامة عثمان (ســـــــــــــامتا ) طوعا من تلقاء نفسه فمرحبا به مقاتلا سابقا في متاهات العصافرة واروقة خالد بن الوليد ..وهو شخصية ملاء بالحكاوي والقصص .
فمرحبا به علي صفحات المنتدي واقلامه

راشد كتب:بعد أن يئسنا من طلته اتانا الاخ الغالي اسامة عثمان (ســـــــــــــامتا ) طوعا من تلقاء نفسه فمرحبا به مقاتلا سابقا في متاهات العصافرة واروقة خالد بن الوليد ..وهو شخصية ملاء بالحكاوي والقصص .
فمرحبا به علي صفحات المنتدي واقلامه

الف مبروك ياسامتا....بيتك ومطرحك خليك داخل ابو عيلوه بقطع فى الخضار طرنشات.

ياود راشد
صاحبك ساماتا دخل بعد شق الانفس, ساعه انا معاه على التلفون عشان يسجل, فى النهايه فقدته الامل فى تسجيله وقلت ليهو كتر خيرك بننقل ليك الاخبار بالتلفون.

لكم الود

الله يديك العافية ود كرار فدوما سباق بالخير واهو الراجل استجاب طوعا لطلبك بقدومه فحقيقي مرحبا به ....والظريفة اخر مرة اتصلت عليه العيد الفات وسالتو مالك ماظهرت قال انو بيرتب في اوراقو...والله ياسامتا سؤال بريء علي الماشي الزمن ده كلو بترتب في اوراقك..؟ دي اوراق تمهيدية للدخول للمنتدي ولا للبيض الابيض....؟
(ومعذرة لابناء العم سام إن تجراءنا بذكر بيوتكم البيض فنحن ناس جالوص ساكت (يعني بعيدين عن السياسة))...
........
...
تخريمة :
بالله يامبارك تحياتنا لجني ....
بس جني سافر بحثا الذهب ولا البترول ....؟

الاعزاء الكرام..تحية واشواق..يبدو لى عندما يغيب جنى وعبدوس بتنوموا
وانا يوميا بتصفح المنتدى مع قهوة الصباح قبل ان ابدا اعمالى بالمكتب وحقيقة ادمنت الاطلاع على البوستات واحيان برد على بعض الاخوة فى محاولة للتواصل..
طبعا انا على اتصال مع جنى بالتلفون وقبل اسبوع نقلت ليكم فى البوست بتاعو تحاياه
لكن يبدو لى ما لاحظتو ليها .. وقبل يومين طلبت منه بعض النفحات ووعدنى وسوف ارسلها لكم انشاء الله ... تحياتى

الاخ الغالي مبارك ...مساك الله بالخير ...لا والله في الحقيقة الغيبة هذه المرة مغفورة من الجميع ولن نلوم من غاب ابدا لظروف كلنا يعلمها وهذا لن يقلل قطعا من روعة وحضور الغاليين جني وود الزين فهما عضوان اصيلان في هذا المنتدي واعزاء علي القلب والقلم معا ....فلهما وللكل وحشة بحجم غيبتهما .....
تخريمة:
ود كرار ماصدقنا مرة من دوامة امسيسي عايز تدخلنا دوامة سم الفيران ....؟

راشد كتب:
والله في الحقيقة الغيبة هذه المرة مغفورة من الجميع ولن نلوم من غاب ابدا لظروف كلنا يعلمها

الغالى ود راشد كب وكمان تانى فنجان وبعد غيبة .
ودام التواصل
عاطف عكود

راشد..الدرة...بعدك يقلقني..لم نعهد ان نراك تغيبت منذ ان شرفت هذا المنتدي...اذا غلط اي منا في حقك فلك العتبي حتي دون ان نعرف السبب..وان كان غيابك بسبب الاحزان فهذه محمده ولكن الدنيا لا تدوم لكائن...
لم اصدق اني عدت بكل الشوق لاجد ان الشوق لا يعادله شوق...
اين انتم .. اين انت يا رشدي...عظموتي نمبر ون اند تو...عبحميد..ناس بورتسودان جميعا..ماجداب..
كابتن احمد..ماسوره الاصلي..الكاتب الكبير الاديب معاويه...حتي الرخا راح واختفي...
غايتو جنس غايتو..
محبتي مودتي
اعاهدكم ساظل اكتب حتي لو لم تردوا
لكن في المرات القادمه ساكتب خواطر.. شعر.. ادب ..قصص وكل ما يدور بخلدي..مش ما في واحد حيقرا ..انا خسران ايه...
عمكم

الغالي جدا ود الزين...ابدا انشاء الله لن تسكن ضغينة او زعل دواخلنا تجاه شخوصكم الادمية الخلقة والاخلاق ..ولا اكاد ابالغ ان قلت اني احملكم معي انما حللت فرحا منشرحا حتي في قمة تعاستي ولكن دبيب من الحزن اصاب منابت الفرح والعطاء منا فالجم مخارج الحروف ولكنا عائدون ولم ولن نغيب فدوما أُجي في لحظات الخلوة متسللا متفقدا الحضور واشاهد الجديد في صمت ولكنه فرح مبهم ....
وسعداء جدا بعودتك الحميدة يا اخلاق ...
..............
........
ولكم مودتي

عبد الرحمن الزين كتب:
محبتي مودتي
اعاهدكم ساظل اكتب حتي لو لم تردوا
لكن في المرات القادمه ساكتب خواطر.. شعر.. ادب ..قصص وكل ما يدور بخلدي..مش ما في واحد حيقرا ..انا خسران ايه...
عمكم

عمنا عبدالرحمن حانقراء كل ماتكتب , وحانرد كمان , ومافى اى خسارات انشاء الله , وفى انتظار الخواطر والشعر والادب وكل مايدور بخلدك , لك العتبى حتى ترضى واكيد الكل عائدون للكتابة الشغلانية عامل وقت ليس الا , وعربون خواطر كدى دى رسالة وصلتنى ماعارف كاتبها الاصلى منو (للحق الادبى) لكن قلت اشارككم فيها وعذرا على الاطالة طولوا بالكم معاى شوية عليكم الله .
عاطف عكود
أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: بلة ، الطريفي ، أب جيبين ، التجاني الخزين، عجبين ، الزبير، أب كساوي ، الصديق، فضل المولى ، فتح الرحمن ، عبد الجبار، البشير،عكاشة، الجنيد ، تيراب ، الريّح ، الماحي ، حمد النيل ، حسب الله، حسب الرسول , جبارة الله ، أب سقرة ، البي كيفو، تميم الدار، جبر الدار، عمسيب , الجاك، الجزولي باشكار ,وغيرها.. عليْ النعمة تحاول تدلع أي واحد من الأسماء الفوق ديل إلا ضهرك كع ينكسر، لأنها أسماء قوية زي الخرسانة... أسماء مضببة ضد التدليع زي العكاكيز.. أسماء أهلنا زمان أسماء رجال وما في أي طريقة لتمييعها أو تدلعيها،
حتى النسوان عندنا كان أسماهن صلبة ومحتشمة، وتنافس أسماء الرجال! في قوتها وخشونتها، فنلقى أسماء مثل ست النفر، الساتر الله ، أم حقين ، البتول ، سكينة ، التاية ، نفيسة، النخيل ، أم زين ، بت الجقمتها وغيرها، والواحدة حتى لو أهلها كانوا متحررين، بالكتير يسموها الصندلية ، ومع ذلك ما تقدر تشوفها أو تشم ريحتها، النسوان كانن بنات خدور...
والراجل ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك آآآ ام زين .. أنا ولدك آآآ البخيتة.. هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رنا؟
أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..
عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء
أب كريق في اللجج
سدّر حبس الفجج
عاشميق حبل الوجج
أنا أخويا مقلام الحجج
أبشر آ جنا .. حررّم تبشر.. أبشر آ جنا التقدْ مركوبك..
مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد ويبقى اسم رجال.
شوفوا الأسماء دي: وائل ، وضاح ، وحيد ، وليد ، وديع ، ربيع ، مازن ، تامر، لؤي ، راني، هاني ، حمادة ، طلال ، أيمن ، مهند ،وغيرها..
والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها...
وكذلك غناهم كان غناء رجال وأصواتهم كانت أصوات رجال،
كان المغني يغني الليل كلو بدون مايك وصوتو تلقاهو زي الجبخانة
يا ليل أبقالي شاهد على نار شوقي وجنوني
وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. والآن جابوا لينا الكعك المايع بشتى أنواعو تدخل القطعة في خشمك تجي تلوكها تلقاها عملت (سواح) وما تعرف ! نفسك هل أكلتها ولا ما كانت في قسمتك..
نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في مصاريف البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل ذاتو من كترة الولادة، ما بعرف أسماء أولادو ومنو الأكبر ومنو الأصغر فيهم.. الراجل يسأل مرتو: إنتِ آآآ الزينة دحين كبير ضيف الله ولا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن...
بنات الزمن ده الواحدة إلى أن يتخرج ولدها منkg2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد باطل ومنعّم ومرخ رخ ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. نحن ناس بتعيش حياتها بالكمونيّة والنيّة السليمة)..
أهلنا الزمان كانوا متباشرين وحنينين، بكاهم شهر وعرسهم شهرين، والواحدة لما يموت راجلها من شدة الحزن والأسف والإخلاص، بدل أربعة شهور وعشرة يوم، تتحبس عليهو ثمانية شهور وعشرين يوم، لأنو أصلنا ما كنا بنعرف الشوية
عليْ الجزيمة في الزمن المايع ده حتى شطتنا بقت مايعة وما بتحرق.. ونحن والله شعب لو ما حس بالشطة في جوفو تسوي تح تح، الأكل ما ينفعو. أنا ود التور البتنتّح ومن الشطة ما بقول أحححححح الزمن ده بقى زمن الكيتشاب والمايونيز، أما الشطة الخضراء وشطة القبانيت فزمنهم فات وغنايهم مات.. الناس هجرت المطاعم وبقوا مستعجلين وما عندهم وقت للقعاد عشان كده اتجهوا للكافتيريات، الأكل كلو بقى عبارة عن بوفتيك وطعمية وبرجر وما شابه، والناس بقوا زي المجانين تلقاهم ياكلوا ماشين ويتكلموا ماشين وكان قلت لزول سلام عليك لا بسمعك ولا برد عليك.. مشيت السودان قبل سنة ما لقيت زول يتونس معاي وفي النهاية جيت راجع وشنطتي مليانة ونسة وشوق للناس الزمان...
وكلابنا برضها بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ، ولو بقى نشيط خلاص، يقوم ينبح فيك بتهوهوة واحدة تاني ما يزيدها، كأنو عامل ليك مس كول.. مرة ناقشت مسألة عدم مبالاة كلاب اليوم مع واحد كلب، فقال لي: زمان كان بيطغى الحماس والانفعال على أدائنا ككلاب، وكنا بننبح في الفاضية والمليانة، لكننا لما شفنا الحكومة ما بتدفع لينا مواهي وحاولت تستملحنا، قلنا ما لنا ومال المشاكل والعباطة الفي الفارغ.. ونحن الآن في ظل نظام عالمي جديد ولن ننبح ببلاش لأنو في حاجة اسمها الملكية الفكرية وأصواتنا دي لازم تقيّم التقييم المناسب واللي عاوز ليهو (هوت دوق) يشوفوا بعيد مننا، نحن خلاص ودعنا عهد العباطة والتهور.
فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن نبيحهاذاتو بقى مشروط.. زمان تجي ماشي تلقى الكلب منتظرك في الطريق مليان جسارة وعنفوان ولسانو حالو يقول يا دنيا ما فيك إلا أنا، أما الآن فالكلاب بقى مغضوب عليها وضالة ومهمشة وبتعيش على حافة النسيان ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل ليها حركة تمرد وممكن تسميها حركة تحرير الكلاب وتختصرها في كلمة (حتك..
يا جماعة الكلام ده عيب في حقنا وما بصح في حق شعب عاش (علماً) بين الأمم .. ويا جماعة كفانا تمييع أسماء وتمييع كعك وتمييع وحم وتمييع فحولة وتمييع قضايا وتمييع مياعة وخلونا نرجع لقديمنا ونخلي في البنسوي فيهو ده، الكلام ده بالحيل ما سمح في حقنا ..
حليل زمن الصبا الماضى حليل زهر الحياة الزاهر
حليل زمن الحبيب راضى وحليل زمن الهوى الطاهر
حليلو الأبلج الباسم حليلو الكاحل الناير
حليل قمر السما القاسم لياليه وصبح داير
آه لو آه تفيد مجروح والمثل القديم ساير
رهاب ماحصلو الجاري وسماك ما حصلو الطاير
ودام التواصل

قطعا اخي ود عكود ليس لمثلي ان يحرم احدا ان يبكي علي الماضي ..ولكن لا يمكن ان نتحسر علي هذا الزمان فقط لاننا ندلع الاسماء او لاننا ننجب طفلا واحدا بدلا من اربعة عشر..مع احترامي للكلس الذي ارسل اليك الرساله ومع تقديري لتمكنه من اللغة وحتما لن اقدر ان اجاريه وكم كنت اتمني لو استخدم موهبته في المفيد فقد قرات ما كتب اربعه مرات ولم اخرج بطائل- مع تقديري لك وله يا عاطف- ولكن من رائي ان تنجب طفلا واحدا او طفلين بل قل ثلاثه في هذا الزمان وتهئ لهم تربية حسنه او قل معقوله -في رايئ - خير الف مره من ان ان تنجب عشره وتتكل علي الله ان يرزقهم..عارف حتنطو لي في حلقي الله قال...وقال..والله عارف وبرضو سيدنا عمر قال اعقلها وتوكل..عارف حتقولو نقول ليك الله قال تقول سيدنا عمر..اقول لكم احتكمو الي عقوللكم..هدانا الله واياكم..ياالو الالباب..ثم ما المشكله في تمييع الاسماء انا ود عمي لزم اسمو عبد الرازق من حلة ودبانقا معقل الشيخ صالح ودبانقا ابوه بدلعو بقول ليه الرزوقه وامو بتقول ليهو الضبيعه
دعونا نبكي علي النخوة والكرم والامانه والاخلاص والشهامه واغاثه الملهوف واعانة الفقير وصلة الرحم
ولكن ليس قطعا علي الانجاب والفتونه والشطه الحاره والكلاب الضاله...
محبتي
عبودي..وبدلعوني يقول لي بودي
ايع ياالجعلي...

الاعزاء ودعكود وود الزين...ماقصر كاتب الرسالة وصدق ود الزين....بس الشيء الملاحظ هو تناسب الاسماء وتماشيها مع الواقع يعني اسماء رجال زمان قوية وغير قابلة للدلع والتبريد والتجميد ولكن كانت اسماء النساء لا تقل قوة عن اسماء رجالهم ..والان تغيرت اسماء الجنسين ولكن بنفس التناغم يعني في هارموني في الاسماء بين الجيلين ودي محمدة وشي جميل يعني لو واحد اسمو ابوسقرة اتزوج واحدة اسمها حنين يبقي في شيء ماطبيعي في الحسبة دي او واحدة اسمها ام حقين اتزوجت واحد اسمو إيمان اكيد اتزوج حبوبتو....عليه الاسماء بتدينا الاحساس بالزمن والفترة العمرية المعاش فيها الاسم وحامله .....
تخريمة:
والله ياود عكود زمان كان الكلاب بتنبح لما كان الحرامية بيطفروا وينطوا بالحيحطان لكن حرامية الزمن ده بقو بيسرقوا من خلال الانترنت ومن قوت الشعب المسكين قبل مايصل جيبوبهم ..فلماذا ينبح الكلب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عبد الرحمن الزين كتب:
دعونا نبكي علي النخوة والكرم والامانه والاخلاص والشهامه واغاثه الملهوف واعانة الفقير وصلة الرحم
ولكن ليس قطعا علي الانجاب والفتونه والشطه الحاره والكلاب الضاله...
محبتي
عبودي..وبدلعوني يقول لي بودي
ايع ياالجعلي...

يا جماعة الكلام ده عيب في حقنا وما بصح في حق شعب عاش (علماً) بين الأمم .. ويا جماعة كفانا تمييع أسماء وتمييع كعك وتمييع وحم وتمييع فحولة وتمييع قضايا وتمييع مياعة وخلونا نرجع لقديمنا ونخلي في البنسوي فيهو ده، الكلام ده بالحيل ما سمح في حقنا ..

وما الفرق هنا بين مايدعو له كاتب الرسالة وماتدعوا له عزيزنا عبدالرحمن كلو عند العرب صابون (كامى او فنيك ) وكلو بكى على الماضى !! والله اعلم
ودام التواصل
عاطف عكود