(بعض من أجمل ما سمعت)

الرحمة لكل من قتل طلما ولم يرتكب اثما ولا جريرة..والعزاء لاهله..كلمات سبدرات ابكتني بحق...احسن الله عزاؤكم ال سبدرات واسكن شهيدكم الجنة..
رشدي العزيز..نتمي لك سفرا مريحا واقامة طيبة ..املين الا تحرمنا من طلتك...اهو انا حطي دايما كدة اذ اني ساصل دبي فجر السبت 13 ولكن ساغادر في نفس اليوم ليلا..
املي ان نلتقي في السودان ان امد الله في الاجال..
مودتي
عبدوس

وهذا المبدع هاشم صديق وآخر قصائده ... تستحق أن تكون من أجمل ما قرات مؤخراً فإلى هاشم :-

الرشيد شمس الدين
--------------------------------------------------

هاشم صديق

بكرة بنمرق كلنا برة شعر:



اتوكلت عليك
يا الله
بكرة بنمرق
كلنا بره
من كلِ مدينة
من كلِ حواري
من كُلْ حِلة
بكره بنمرق
كُلْ خلق الله
ما نخلى منافق
طار بالزانه
ما نخلى معولق
داسنا اذانا
ما نخلى الباعو
النيل وهوانا
ما نخلى العقروا
لناقة صالح
وحشّوا وريدها
وبالجبخانة
ما نخلى السووا
الدين تلجين
والعرقى مدوّر
عن عشمانه

اتوكلت عليك
يا الله
بكره بنمرق
كلنا بره
من كّلِ مدينة
من كل حواري
من كْلِ حِلة
نقوقى نصفق
للحرية
غُبننا كاسر
ميه الميه
ندوس الكاتل
والف سريه
نقلع حقنا
بالزنديه
ناخد تارنا
وتبرد نارنا
ونبنى بلدنا

وهذا الرائع المبدع شاعر ( من غيرنا يعطى لهذا الشعب معنى أن يعيش وينتصر ) محمد المكى ابراهيم فى اخر قصائده ....
ارجو ان تستمتعوا مثلى بها .....
________________________


قصيدة للمبدع محمد المكى ابراهيم : حيث السعادة أغمق لونا..وأجمل قال عصفورُ قلبي:سنرتحلُ الآنَ
January 1, 2013
____________________
حيث السعادة أغمق لونا..وأجمل
قال عصفورُ قلبي:سنرتحلُ الآنَ
عن هده الدوحة المقفرة
سوف نترك أشلاء من قتلوا
وسلاسلَ من وقعوا في الإسارْ.
سوف نتركُ فوجَ الصبايا
وأعشاشنا في ضواحي النهار.
سوف نتركُ للبربر المنتصر
ما تبقى على ساحة المجزرة:
الخواتيمُ والإسورة
والبخور اليساري والجثث المنذرة
للبرابرة الظافرين سنتركُ
أجداث أحبابنا
ومفاتيح أبوابنا
ثُفل قهوتنا
ومعالمنا الداثرة.
للبرابرة الظافرين
نتنازل عن كل شيء
سوى هده الدوحة المقفرة
إنني آخر الذاهبين
انشرُ الآن أجنحتي ذاهبا عن بلادي
وأشياء قلبي
وأبناء سربي
وقافيتي المزهرة.
إنني ذاهب فاهنأوا أيها الظافرون
في الفراغ تجلجلُ حكمتكم
وتروجُ حوانيتكم:
انتمو العارفون
أنتمو – ليس غير كمُ – المؤمنون
فانظروا ما فعلتم بنا
وبأنفسكم
والإله الرحيم
*
إن صقرا عجوزا مليئا بحكمته
وغبارات أيامه يذهبُ
في نهايات أيامه يتغرب
عن حبه الأيدي
ويخرج من غابة الطلح
حيث تنوح القماري
ومن ربع عزة
حيث السعادة أغمق لونا
وأجمل.
“قيلت ساعة الخروج من الوطن وعلى أبواب المجهول الذي ينتظر كل نازح عن وطنه كقول الشاعر القديم:
أواه للنازح المعذب مادا بنفسه صنعا
فارق أحبابه فما انتفعوا ببعده عنهمو ولا انتفعا.

مبـــــــــــــــــــــــــــــــــــــــالغة فى الابداع
هذه الكلمات القليلات فى تقديرى من احسن ما كتب فى تلخيص حال البلد والهجرة والارتحال، قصيدة تستاهل تتعلق فى استار قلوب كل من تغرّب
قد نعود فوالله هزتنى هذى الكلمات الى درجة الحيرة
تأمل فى بلاغة وصف السعادة، بانها أغمق لونا
لك الله يا ربع عزة
حاشية
تساءلتُ حين مقال، هل يصلح هذا الوطن للمعاش؟
لعل الاجابة بين طيات القصيدة
ولا كيــــــــــــــــــــــــــــــــــــف؟

عام جديد وكل سنة طيبون2013
وردد الناس كما كل عام،، لن ننس اياما مضت.....
فاستعنت بالاخ قوووقل العجيب فوجدت الاتى
-----------
نشيد الوداع شعر : روبرت بيرنز (1759 – 1796م)

ترجمة الأستاذ أحمد محمد سعد (بخت الرضا 1951م)

و هاهو ذا نص الترجمة للقصيدة كاملاً:

هل ننسى أياماً مضت

هل ننسى ذكراها

هل ننسى أياما مضت مرحاً قضيناها.

من أجل أيام مضت من أجل ذكراها

فلنرفعن علم الوفا من أجل ذكراها

كم قد رتعنا في الربى فرحاً بمثواها

كم قد قطفنا من زهور من ثناياها

كم قد مشيناها خطى كم قد مشيناها

فلنرفعن علم الوفا من أجل ذكراها

كم قد سبحنا في الغدير معا

صباح مساء

واليوم يفصل بيننا بحر به هوجاء

من أجل أيام مضت من أجل ذكراها

فلنرفعن علم الوفا من أجل ذكراها

هذي يدي يا صاحبي قدم إلي يدا

ولنخلصن نياتنا ولنصدق الوعدا

من أجل أيام مضت من أجل ذكراها

فلنرفعن علم الوفا من أجل ذكراها

كم قد مرحنا كم طربنا إذ طويناها

أيام أنس زاهيات كيف ننساها

من أجل أيام مضت من أجل ذكراها

فلنرفعن علم الوفا من أجل ذكراها

الاستاذ سبدرات والابداع والادب زي ما قال ود الاستاذ لا تعليق . السياسه بحيرها وشرها اطفات كثيرا من شموع بلادي ادباء وشعراء ورواة لم تترك لهم وقتا للابداع..................

شكرا وافرا لأحبابنا خالد وعبد الرحمن على جمال المرور والحقيقة إستوقفتنى مثلك تماما ياخالد بل والله لقد أبكتنى كلمات ود المكى الرائعة وهو يقف فى هذا العمر متأهبا للإغتراب بفعل هولاكو وتتار أخر الزمان ... أنظر إليه وهو يردد :-

“قيلت ساعة الخروج من الوطن وعلى أبواب المجهول الذي ينتظر كل نازح عن وطنه كقول الشاعر القديم:
أواه للنازح المعذب مادا بنفسه صنعا
فارق أحبابه فما انتفعوا ببعده عنهمو ولا انتفعا.

هل هناك بكائية أو مناحة أكثر من هذه وهل نحن ننوح على أنفسنا أم على وطننا الذى تمّ إختطافه و بالكاد نكاد نتعرّف عليه !!!!!
ثمّ ومازال سؤالى القديم قائما :- هل الوطن هو الذى يسكننا أم هو الذى نسكن فيه ؟؟؟؟

الرشيد شمس الدين

اخي الغالي الرشيد ...امدك الله الصحة والعافية وعمر دواخلك الخضراء بما يحب ويرضى ...
جدوا لي عذرا إن انا بدأت حيث انتهيتموا انتم ...
اعتذر عن الغياب بالهم الذي يسكننا ..
الوطن الذي نسكن فيه نتعايش معه والوطن الذي يسكننا يدمينا الماَ ...الوجع الاكبر اخي الرشيد عندما يكون الوطن الذي نسكنه ويسكننا هو الوطن نفسه....
.......................
............
اشوفك عافية


راشد

يا مرحى بك ومرحبا راشد العزيز ، حللت أهلا ونزلت سهلا ... آدام الله التواصل بلا انقطاع ان شاء الله .

الرشيد شمس الدين

اعزائي اعجبتني كلمات خالد الباشا هذه
ياارض تِتبلبل عرق ..
تنضري واشواقك جواب ..
وتتكشحي بيضا علي الشفق
ساعة المغارب قراقراب ..
يااا ارض قلبتك طرق ..
يالسنسنايي سحااب سحاب ..ِ
ساعة اطرأ ساعتي وكت مرق ..
والدنيا قاجي عفو وحباب ..
لملمت احزاني وطبق ..
في سري اشواقك كتاب
والعبرة دار تقسمني طق ..
او دار تشقق قلبي طاب ..
ومن جوووه جوف الناس لبق
مفتوح علي حلتنا باب ..
ندخلبو دااافي علي القلوب
نمرقبو غادي هبوب هبوب
والدنيا كلها زي شتول ..
فجة وشي واطاتنا داااب
يااا ارض والاشواق عبق
فواح علي البلد اليباب
يالمامرقتو وكت مرق ..
نفس المنافي عذاب عذاب
يا بتنا الفي إطن البيوت
متحزمي وحارسي العقاب
يايمة وكت اليوم يفوت
لامانا في حضنك قُرااب
يااايابا قبال ماتموت
دسيتني في بطن التراب ...
......
يااا ارض ااسفين والدموع ..
مندلقي زي نيلك تسيل ..
والدنيا حمراء قفا البيوت ..
شمش الله نازلي خيوت خيوت
غرقاني في حزنك نبيل
صوتك مجرح بالبكا
وصبرك متل لونك جمييل ..
ونحن المرقنا وراء حلم
فاكرنو في هجرك جميل ..
يا ارض والله العظيم
يااا ارضي شايلنك جميل ..
يا اي حتي من البلد ..
ياحتي حتي من الشرق
من عندي لاعند الغرب
للنقعة والدرب الطويييل
لي شاي صباحاتنا الدفُو ..
ولي نص نهاراتن غفُو ..
لي ليلنا وكت اللحب نزل
بااارد علي ارضك عفُو .
يارض .. اسفين بالجبر ..
ماكنا قايلنو الضياع ..
في بعدك القاسي الاليم..
من اي حتي بنغرفو ..
لاحتى حزن الدنيا يوم ..
ما كنا فيكي بنعرفو ..
.....
...ياا ارض يوم كناك كاان
حسك بيدخلنا وقريبب
يوم كنا شقيناكي عيش
فرهدنا في وشك سبيب
بتقنا في اي مِحل غنا
وعبًقنا عالم غيرنا طِِيب
وبقًينا في الوطن أمنيااات
تنداح علي الناس همبريب
وكتبنا للعشق أغنيات
مافات بلاد شوقنا الحبيب
يااا ارض نحن مِحل نرِك
في الحال جروح الناس تطيب
يااا ارض نحنا ولانُا ناس
زي باقي ناس كونُا الرحيب
نحن النمد ..بيناتنا والتانين صلات
ونحن النبق ..بي نورنا طول الأمسيات
يااا ارض نحنا بشر عجيب
...
يااا ارض إشتقتك قمر
مشرور سماحة علي الرمال
شفع مغارب الدنيا عووووووك
الحجي قايمي النوم تعاال
البركة في حس البهم ..
طعم اللبن طيب حلااال
والخلوة بسم الله تضج ..
والفاتحي جد فاتحة رجال..
والحلي قاجي غنا وتَرِج ..
وحريم كُبااار وجنس بنات
ياااا الله من هذا القمر ..
يااا الله من هادي الجمال
...
ياااا ارض احفظي ما عليك
يااا ارض نيلك لايجف
يااا ارض كلما الشوق يذيد
قلب المحبين عاد يخف ..
وتراها روحي علي البيوت
سااارحابي طول الليل تَلِف
وكل ما انفتح باب الكلام ..
عيني براهااا تقوم تَرِف ..
ــــــــــــــــــــــــــــــــــــــــــــــــــــ
خالد الباشا

وقعت فى يدى اليوم قصيدة معبّرة فى رثاء الراحل المقيم حمّيد لشاعر إسمه حمزة بدوي لم أسمع به من قبل وقد رأيت إشراككم فيها بعد إذنكم :-

• كل البلد حميد..
في رثاء حميد للشاعر/ حمزة بدوي
----------------

يامعلم الناس الوفا
...
مادام مصر... قبالنا توصل مصطفي

أقلو كان تتأني شان...مانودعك

اخترت ليه سفر الجفا

قطعاً فراقك مستحيل

ماالشيل تقيل...وإنت القبيل

تالا الهموم تالا الوطن

تالا العري وتالا الحفا

(حميد) مرقدنا القفا

**** *** ***

نخلاتك الفوق

لقحن شجر الهشاب لوز القطن

طافن بلادنا ركن ركن..كل المدن

غشن الجروف سمسم دخن..باباي وبن

ياماد بعيد حد البصر

غيمات تبشر بالأمل

كتفاً يشيل فوق الدبر

ماهاب كجر

قدامنا يوت متلافي شر

*** *** ***

محجوب شريف.. دكتور طلال

ياأزهري ..القدال.. سؤال!!

صح إنكسر ضهر النضال؟؟

وقبرتو وإندفن الضراع الياما شال الياما عال؟؟

ذاك الضراع

ذاك الشجاع

الما إنكسر ساوم وباع

حب الحزب.. حتي النخاع

ذاك الشعاع الياما فوق للمستطاع

بي حسو فج الليل غنا

وفجر ينابيع الصراع

*** *** ***

ياالتربال العرق الطاهر

عين الشمس الدايماً ظاهر

آه.. ياظرفي.. وحظي العاثر

آه.. ياوجدي الما كت حاضر

كنا قعدنا.. كنا نضمنا

وكنت بقولك( أنا ود أبرق )

البتحبها والبتريدها

وكان سمعتك حاجة جديدة

( عمك وردي.. تجاني الطيب )

كان حتقولي الموت ما بغيب

كنا ضحكنا و كان قهقهنا

وكان كالعادة دوام تسألني

(كيف المصنع والعمال حالهم لسع نفس الحال )

تقول إشمعنا! شنو الحارسنو وما جمعنا؟؟

كنت صرخت وكان دمعنا

آه يارفقاء كان تنتظرو

بيني وبينو باقي حكاية

المنقاش والإبرة معايا

نفسي أنضف من كرعينو ضريسا.. وشوكة.. وكل قشايا

كنت حلبتلك الغنماية

وكان ختيتلك حبة طماطم.. بصلة.. وفجلة.. وحتة كسرة

وكان صلحتلك الخرتايا

مافي تأسف.. ببقي عزايا

الآلاف الخرجت ماجة.. الداجة حفايا

سدت غيبتي دموع البسطا

سد الغيبة حضور التاية

نوم مطامن

ياتيراب الليلة وبكرة

وود السترة

*** *** ***

حميد حنين وشفيف.. في الشدة فحلاً كيك

عضمك قوي وتريان.. مليان ديالكتيك

يانصرة المظلوم.. موزون تملي مشيك

وفيت وجد كفيت.. رفيقي نعم سعيك

عدو الغبش والضي.. ضوقتو نوم الديك

يوم عذبك ونفاك.. خرجت ضاوي وشيك

لا خوفك سجان..لا سوط مسقي دميك

مرقت أصلب عود.. قويت وزاد الفيك

سمسار وتاجر دين.. والماقدر إشريك

والشامت المرعوب.. الماقبل ينعيك

قولو الفكر مابموت.. تب مني مافي فكيك

كل البلد حميد

سيك..سيك.. معلق فيك

ياسلام عليك حبيبنا عاطف القوز ... هذا والله شاعر فخم ... كيف لم نسمع به قبلا ؟؟؟ يبدو أننا لم نسمع بالكثير من مبدعى بلادنا الشباب الذى إستفاد من المدنية والإسفير فخرج حداؤهم مترعا بالتجربة رغم صغر السن ... بالمناسبة فى هذه اللحظة وأنا أتحدث عن المبدعين الشباب , تذكرت حبيبنا أسامة معاوية فهو أيضا مبدع كما حمزة بدىى هذا حذوك النعل بالنعل , فى نتظار مجهوداتك المعهودة يا عاطف القور ..

الرشيد شمس الدين

ولأنّ إبداع الشاعر حمزة بدوى حجازى صاحب القصيدتين السابقتين كان إبداعا فوق الوصف , ولأننى لم أسمع بهذا الشاعر الفحل أبدا من قبل رغم تميّزه الشعرى الذى لا تخطئه العين .... فقد اثرت السؤال عنه من بعض المهتمين بالشعر فلم يكونوا بأحسن منى حالا .. عندها توكلت على الحى الذى لايموت واستعنت بالصديق صاحب الكتاب الذى عنده الحل ... ذهبت إلى العم العزيز قوقل فكانت المفاجأة الكبيرة والتى أعادت لى الأمل فى أن هذا السودان وطن لا يشبه بقية الأوطان .... قد تستغربوا مثلى إذ يقول قوقل الاتى :-
الشاعر حمزة بدوى حجازى , عامل بأحد مصانع النسيج فى مدنى ... تصوروا هذا الشعر البديع يخرج من عامل بسيط فى أحد مصانع نسيج بلادى .... يقول إنه يكتب من معاناة عمال السودان وأنّ شقيقه كان قد فاز بجائزة القصة القصيرة فى أحد المهرجانات ...
الا تسترعى هذه الظاهرة الكثير من الملاحظات ... هل للإبداع جينات تتوارث من الاسرة وهل موهبة الشعر بل شيطانه يتنزّل هكذا على من يريد عفو الخاطر... لقد اعادنا حمزة بدوى إلى أيام العمال النضيرة فى سكك حديد عطبرة وإتحاد نقابات عمال السودان أيام الشفيع والحاج عبد الرحمن , وماشّين فى السكّة نمد من سيرةك للجايين , شايفينك ماشّى تسد وردية ياقاسم أمين ..

الرشيد شمس الدين

سلامات يا الرشيد

التحيات للشاعر المبدع حمزة حجازي.

عدم تقدير البلد لعمالنا البسطاء ذكرتني قصة واحد عامل في ورشة في المنطقة الصناعية في شندي في السبعينات.

العامل قام بتصنيع صاروخ صغير في الورشة الشغال فيها و قام بتجربته و فعلا الصاروخ طار في السماء ووقع بدون خسائر.

المسكين لمو فيهو ناس البوليس خبِت شديد و ودوه المحكمة و افتكر جلدوه و سجنوه و بهدلوه و طيروا ليه الفي راسو .... مافي واحد من المسؤلين - حفظهم الله - فكًر في انو البلد ممكن تستفيد من زول عنده موهبة زي دى.

مع التحايا لكل الموهوبين في بلدنا و طيروها ليهم من راسهم.

كنت بشاهد برنامج فى رمضان اسمو ريحة البن فيهو شباب شعراء رائعين .. وكثيرون هم المبدعون فى بلادى أمثال الشاعر حمزة وكثير الذين لم يصلهم الاعلام .
كتفاً يشيل فوق الدبر
ماهاب كجر
قدامنا يوت متلافي شر

---
أصلو الغياب لحظة تساب.. فليسمع الناس العمي
تتبخر الرغوة الزبد..ويبقي في الأرض الطمي

الاء كتب:
كنت بشاهد برنامج فى رمضان اسمو ريحة البن فيهو شباب شعراء رائعين .. وكثيرون هم المبدعون فى بلادى أمثال الشاعر حمزة وكثير الذين لم يصلهم الاعلام .

صدقتى آلاء أنهم فعلاً شباب مبدعين بكل ما تحمل الكلمة من معنى ، برنامج لا يمل وكنت من متابعينو ولو فاتنى انتظر الاعاده ، شعر ، إلقاء ، مواضيع ومضامين حاجه ماتخلص ، وحتى طريقه التقديم حاجه مبتكره والكراسي فناجين ابداع ،وحتى هم يسمون نفسهم حبات البن ،ووووووو وحاجات كتيره
يا ضل مفروش
جوات الحوش
مقشوش ونضيف
من قول الزيف
مرشوش بى مويه ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت في ذاك الحوش
المامعروش

http://reihtalbun.sudanforums.net/

هذه وجبة خفيفة مع المبدع الفاتح جبرا فى ساخر سبيل , رأيت إشراككم - مشكورين - فيها , فإليكموها :-

الرشيد شمس الدين

________________________________________

دي السرقة وللا بلاش

February 20, 2013

الفاتح جبرا..

elfatih.gabra@gmail.com

نفسي اعرف) .. مقولة يطلقها أهلنا وحبايبنا في شمال الوادي كلما تعذرت عليهم المعرفة وإنعدمت أمامهم (الإجابات) والعبدلله يجد اليوم نفسه يردد ذات المقولة (نفسي اعرف) والسؤال العاوز أعرف إجابتو هو : (من أين أتي هؤلاء) الخواجات الكفار بكل هذه الشفافية ومحاسبة النفس والضمير المتيقظ ؟ ففي كل يوم تحمل لنا الأخبار إستقالة لمسئول (خواجة طبعن) يقوم بتقديم إستقالته فقط لأجل (إتهام) يمس شخصه تتقاصر معه (جلطات) مسؤولينا الـ (بالثابتة) !!

في الأسبوع قبل الماضي إستقالت وزيرة التربية الألمانية، أنيت شوافان، من منصبها ليست لأنها (جنبت قروش الوزارة) وفتحت بها حساباً شخصياً في أحد البنوك .. وليس لأنها أشرفت على بناء عمارات سرعان ما خرت (ساجدة) لخالقها ولا لأنها قامت (في شكل تعاون) بتشغيل زوجها مديراً لمكتبها ولا لأنها سرقت من منزلها ملايين من العملات الصعبة (خليك من الساهلة) ولا لأنها قد قامت بإنشاء شركات يإسمها تتاجر في كل شئ بينما الدستوروالقانون الألماني (طبعن) يمنع ذلك !

هذه الوزيرة (الملحدة) يا سادتي الأماجد فعلت ما هو أبعد من ذلك بكثير إذ تجردت من كل إنسانيتها وتناست في لحظة ضعف أنها لا لدنيا قد عملت فقامت بتسبيب الأذي لغالبية مواطني الشعب الالماني (الفضل) وذلك بنقلها لمادة علمية ونسبتها إلى نفسها دون الإشارة لمصدرها وذلك في أطروحتها لنيل درجة الدكتوراة من جامعة (هينريك هين في دوسولدوف) والتي نالتها قبل نحو ثلاثين عاماً !

والله خواجية (حرامية) وعينك قوية تسرقي ليكي كم صفحة وتنسبيهم لي روحك؟ إنتي ما عارفة السرقة حرام و(القبر قدام)؟ أها بعدين موقفك شنو يوم القيامة وإنتي شايلة (العمارتين) أقصد (الصفحتين) ديل فوق ضهرك؟

أيه الفساد وعدم الضمير ده ؟ ألا تعلمين أنك بفعلتك الشنعاء هذي قد أضريتي بالبلاد شر ضرر وأنك بذلك قد أسهمتي في زيادة نسبة التضخم وإرتفاع سعر الدولار مقابل (الشنو ما عارف) مما يؤثر على مستوى الإنتاج والاستهلاك الشئ الذي من شأنه أن يعيق التنمية الاقتصادية مما يؤثر على مستوى رفاهية الفرد (الألماني) المسحوق؟

ثم ألا ترين انك بفعلتك هذه قد أوصدتي أبواب الإستثمار (بالضبة والمفتاح) مما يضر مصلحة البلاد العليا والسفلي وما بينهما ؟ يعني هسي منو ح يجي يستثمر ليهو في بلد الوزير فيهو بيسرق ليهو (صفحتين)؟
ثم بعدين الشلاقة والتسرع ليكي شنو؟ ما تخلي (نوام الشعب الألماني) يعملو للموضوع (طلب إحاطة) و(إستجواب) وشنو ما بعرف .. ويقوم البرلمان (الألماني طبعن) بمناقشتها وعمل لجان تحقيق وبعدين يحولوها للنائب العام (الألماني طبعن) و (تحتل ليها هناك كم سنة) لحدت ما (كاتب صحفي) في صخيفة (الفرانكفورتر الألمانية) يعمل ليها (كسرة ثابتة) ويقول فيها :

- (أخبار ملف سرقة الوزيرة للصفحتين العند النائب العام حصل فيهو شنوووو) !

كسرة:
قال أيه صفحتين … دي السرقة وللا بلاش !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)؟

وشهد شاهد من اهلها , هذا الكاتب الإسلامى خالد التيجانى النور يتحدث عن فساد دولة الخلافة الراشدة فى السودان ...

___________________________

ما هو أسوأ من الفساد

February 19, 2013

.. بقلم: خالد التيجاني النور

khalidtigani@gmail.com

يا لتصاريف القدر, أخيراً مجلس شورى المؤتمر الوطني يوصي ببذل المزيد من “الجهود في مكافحة الفساد”, نرجو ألا يكون ذلك من تأثير حمى الانتخابات. حسناً ليس مهماً كيف يتم ذلك, أو إن كان الجهاز التنفيذي الذي استشرى الفساد تحت بصره سيأخذ التوصية بحقها, المهم حقاً هنا هذا الاعتراف المتأخر جداً من أعلى سلطة للحزب الحاكم بأن “هناك فساداً يجب مكافحته”.
أهمية هذا الاعتراف في وثيقة رسمية أنه ينهي حالة إنكار طويل, وفي أحسن الأحوال تعاطي حكومي خجول ومتلجلج في اتخاذ إجراءات حاسمة لمكافحة الفساد المستشري. صحيح أن مسألة الاعتراف هذه تحصيل حاصل بالنسبة للرأي العام المستقر في وعيه صورة ذهنية سالبة للغاية في شأن نزاهة الحكم واستقامة محسوبيه, لم يختلقها من عدم ولم تسر بذكرها الركبان وأحاديث المجالس من فراغ, بل لأن هناك من الشواهد والدلائل المحسوسة ما يغني عن اختلاق قصص عن فساد مزعوم, و”قد أبت الدنانير إلا ان تطل برأسها”.

ويا وزير العدل, الذي يبدو أن نفس حملته المفاجئة قصير للغاية, السؤال الصحيح من أين لكم هذا؟, وليس أين إقرارات الذمة التي تذكرتموها فجأة بعد ربع قرن, على طريقة “التصفير” التي اشتهر به الرئيس اليمني السابق علي عبد الله صالح.

ظل أهل السلطة شديدي الحساسية تجاه إثارة أي موضوع حول الفساد, وما أن يثار حتى يعاجلونك “هات الدليل”, في خفة تنم عن ورع ديني غائب ومرؤة وطنية مفقودة, إذ يبدو أن ما يزعج هؤلاء حقاً هو الخشية من جود دليل دامغ يكشف ما يجري, أكثر من الحرص على تأكيد نزاهة الحكم بممارسة مصدقة للشعارات المرفوعة.
والاستقامة الأخلاقية قبل الأدلة القانونية هي ما ينبغي أن يجعل السلطان الحريص على طهارة حكمه يسارع لإزالة أية شبهة فساد تحوم.

وعلى كثرة ما سودت الصحف من تحقيقات ساقت من الأدلة ما يكفي لهدم جبال الفساد الرواس إذا توفرت نية حقيقية وإرادة فعلية لمكافحة الفساد, كما أن في تقارير المراجع العام التي امتلأت بتجاوزات فاضحة ما يكفي, لكن المنهج السائر عند الطبقة الحاكمة هي البحث عن سبل التستر تحت ذريعة الحفاظ على هيبة الحكم, وعدم توفير ذخيرة لخصوم الحكم لرميه من تلقاء إدانة محسوبين على النظام, وفي ذلك أية في الخطل وفساد الطوية والسياسة معاً, اللهم إلا إذا كان الغرض من ذلك الخشية من فتح صندوق بنادورا, وتساقط حجارة الدومينو, فتظهر سوءة الفساد بصورة تتسع على الراتق, وخشية بروز السؤال الكبير من يحاسب من؟!.

من عجب أن قصة الفساد في عهد الحكم الحالي ليست حديثة عهد, فقبل عشرين عاماً وسلطة الإنقاذ لا تزال في سنواتها الأولى انتبه طائفة من “الإسلاميين” مبكراً إلى بدايات الانحراف حيث رفعوا أول مذكرة احتجاجية في سبتمبر عام 1993, وللمفارقة كان من بين أهم بنودها الإصلاحية مكافحة الفساد الذي بدأ منذ ذلك الوقت يطل برأسه, وكان ردة فعل القيادة على فعلتهم أن تم تفريقهم شذر مذر, ومنذ ذلك الحين أخذ الفساد يتمدد ويتوسع وتتعدد مظاهره متجاوزاً حالات فردية ليصبح فساداً مؤسسياً سائداً محمياً ومقنناً بحصانات وامتيازات وتحيزات لا حدود لها. “وحليل زمن البسرق ملاية ومخدة .. وذاك الذي يسرق خروف السماية” وما في داعي نتم الباقي…….!!!

يشكك الرأي العام في جدية مكافحة الفساد ليس افتئاتاً, ولكن لأن العدالة لا تطبق ولا أحد يراها تطبق, فالاعتراف وإبداء حسن النية لا يكفيان, والمكافحة التي تكتفي باصطياد الفئران الصغيرة المغلوبة على أمرها, وتترك القطط السمان لا يمكن تصنيفها إلا في دائرة تصفية الحسابات الداخلية واالبحث عن كباش فداء, أو محاولة يائسة لذر الرماد في العيون.

مأزق العهد الإنقاذي, أن الرأي العام يحاكمه تحت طائلة الشعارات التطهرية التي ألزم بها نفسه وهو يحاول كسب قلوب الناس برفع شعارات دينية توفر مكاسب سياسية عابرة, غير أن ثمن ذلك باهظ جداً فقدان المصداقية فوراً حال انكشاف المستور وعندما يفترق المثال والواقع المعاش, إذ أن تبني القيم الإسلامية الحقة تستلزم استقامة أخلاقية صارمة وممارسة نظيفة لا تشوبها أية شائبة, وهو ما يتطلب أن يحاسب المرء نفسه قبل ان يحاسب, فمن الغفلة والجرأة على الله أن يظن أحدهم إنه إن استطاع أن يستغفل الخلق, فلن يستطيع بالتأكيد أن يستغفل الخالق.
بصراحة ليس أسوأ من الفساد إلا التلاعب والتظاهر بمكافحته.

هذه آخر قصائد المبدع هاشم صديق عن الغناء الهابط ، اليكموها فضلا مع تحياتي :-

-----------------------------------------------------------------------

اخر قصيده للمبدع استاذي هاشم صديق
..............................................................
تراجيكوميديا

( أغنية هابطة )

ضَلعة ... ضَلعة
كلمات : كوكو أبو تكة غناء : عشمانة العرضة

هاشم صديق

حبيبي
عندي حُمي
في عُضَامي
جُوه جُوه .
...........
داسة مِنك حالي
خايفة
( وانت دايماً
زول حِنْين )
في خُدودك
القي دَمَعة
أصلِي ما بحمل
عذابك
وياما مرضك
سوي لوعَة .

.................
لِسة بتذكر زمان
لما جاتك مرة وعكة
وانت راقد
وللسوائل حتي فاقد .
................
لا بِتَاكل
لا بِتَشرب
بس تهضرب
لما خفت
الراس ده فكه .
صدرك العريان
يحنن
يا ما عديت ليك ضلوعك
ألف مرة
ضَلَعة ضَلعَة.
وبين كلو
ضَلعة وضَلعة
شارِع
وسيد كوارع
ولمة شكلة .
لون عيونك
يا حبيبي
وانت عيان
حمرا شطة .
..............
وكلو ما ألمس ضلوعك
ألقي قلبي
الحاني نَطّ
الله يديك يا حبيبي
سلام وصحة
ورقشة خضرا
وبرضو ورشة
وديمة نوقد
ليلنا شمعة
واعد ضلوعك
يا حبيبي
ضلعة ضلعة .
.................
.................
يا حبيبي الدنيا
ديّا
شمار وطبلة
وحالة زنقة
الجوع كتلنا
و ( بِشّة ) سيْدْنا
ومك بلدنا
( ديك مبغبغ )
كلو يوم
ينقز ويعوعي
في ضلوعنا
وفي أضانّا
لما هدانا وكتلنا
لاضلوعو
زي ضلوعك
معدومة لحمة
لا ملاريا
تزورو تهرس
لا بْتهِدَ لي حيلو
حُمي.
...........
وشفت ( نافع ) ياحبيبي ؟!
اسمو (عكسي )
شتايمو ( أفقي )
وجنو ( رأسي )
وشوفتو غُمة .
يا حبيبي
السرقة لافة
أصلو ما خلت وزارة
( ديل جونا من وين ) .
يا حبيبي
حتي بختلسو بعوارة
كلو واحد شال
وسفّ
وانت مسكين يا حبيبي
غير ( صعوطك )
مافي سفة .
................
................
يا حبيبي
عندي حُمي
في عضامي
جوة جوة .
................
الجوع كتلني
والهم عصرني
وداسة منك
خايفة تِتْدَيّن قروش
وتجيب حبيبي
موز وبوش
كفاية دين
سدادو كيف ؟!
فك رِيقنا وين ؟.
...............
كافي البلا
لودرت بس
زي بوش وموز
الا تسرق
أو تسف
أو تبقي كوووز ؟!! .
...............
يا حبيبي حياتنا
صعبة
ننساها بس
بي ضحكة لعبة
انت تحسب
لي ضلوعي
وأعد كمان
أنا لي ضلوعك
ضلعة... ضلعة
13/3/2013

وهذا بابكر سلك فى اخر ماكتب لوالى الخرتوم :-

·وكان شفت يا والينا


·في اتنين بتاعين بحر بتونسوا


·واحد قال للتاني


·اي شئ بقي مغشوش


·مافي منقه


·يكبوا ليك روح منقه


·وبقت في روح اناناس وروح سمن وروح جوافه


·التاني قال ليهو


·السنه الجايه بيأكلونا روح سكر وروح ملح وروح لحمه وروح مويه وروح كتاحه ويدونا روح ماهيه


·الاول قال ليهو ويلقوا ليهم زول فيهو روح بالطريقه دي وين ؟؟؟


·جوازك في


·التاني قال ليهو في , ليه ؟؟


·قال ليهو بكره نمشي نجدد ويا روح مابعدك روح


سلك كهربا


ننساك كيف وكلما نكب روح في اكلنا تمرق روح من جسدنا



والي لقاء


سلك

سلامات ايها الرائعون والله اخير الواحد يغيب طوالي عشان يجئ يلاقي الدرر دي لكم كل الود وصادق الدعوات

لعمري كم هم كثر مبدعي بلادي ومعذره القبطان عكود النغير الكورس 5 يمين ومختارات من المبدع خالد شقوري
وطنا سعيد وعندالباري مافى بعيد

اتعملنا من الليل
نضارى حزنا بالفرحة
وإتعلمنا من النيل
نفسنا يطول مع السرحة
من الصبح النسيمو عليل
نخلى وجوهنا منطرحة
ومن الوطن الرحيب وجميل
نفوسنا وسيعة منشرحة

نشيل فى يمينا إلفة وريد
وفى الاييد الشمال جمرة
زنوج وعرب..مزيج راقى
نباهى الدنيا بالسمرة
بنرضى العيشة..بس بالعز
وبينا بنقسم التمرة
ولو حتى الشمس غابت
عيونا بتقنعة القمرة

قمـــاري الــــدغـشي -- كلمات: خالد شقـوري
قماري الدغشي يا حليلن اريتو يفج ضلام ليلن
الملم شوقي واترنم مع البياح اغنيلن
عارفو قليبي ماسورن بشوفو دوام يناديلن
عشق لونن عشق قولن عجيب من عشقو راتيلن
قماري الدغشي يالساجعات مناي اشرب تراتيلن
اغني انا ويغنن هن وكل الكون يغنيلن
يطيرن فــر قليبي يطير اخاف من يهجرن نيلن
واخاف صيادن الحيران يحسبن قلبو حانيلن
وماعارفات عن الصياد كل القاصدو تضليلن

والله ما احلي الوصول -- كلمات: خالد شقـوري
والله ما أحلى الوصول ممزوج حنين و أمان وخوف
وقتين تقرب للبلد وتشوف هناك جبل أبنعوف
خاصة إن بقيت غايب سنين وصالاكا نيران المدن
لا لاقي شبال النخيل لا باقي ليك القيف حضن
وتعود يلاقوك الصغار بالشوق يمين مابتفرزن
ويقالدك الزول الكبير زي قلدة النيل للجروف
وكتين يجيك حس البهم وسط المراح ينضايرن
وهناك طويرات جني فاض شوقن بقن يتنافرن
تلمح بنيات الفريق في الغيبة جن يتقافرن
واللحظة ميلاد القمر فجالو غيمة عشان يشوف
عن يابا شوالات تمر بي عفة دافرات الفقر
وقمحا متل لون البنية المازحت شمس العصير
طعم المواسم في القداحي المارقي للحيران نذر
الغنية والشتلة البكر يتكاملن ضد الظروف

الاخ الاديب عبدالرحمن
كيف اخبارك وبحارك علها هادئة حمدالله على السلامة
عجبنى شديد هذا الوصف المحير .............
--------------------------
قماري الدغشي يالساجعات مناي اشرب تراتيلن
اغني انا ويغنن هن وكل الكون يغنيلن
يطيرن فــر.. قليبي يطير اخاف من يهجرن نيلن
واخاف صيادن الحيران يحسبن قلبو حانيلن
وماعارفات عن الصياد كل القاصدو تضليلن

عبدالرحمن محجوب يوسف كتب:
لعمري كم هم كثر مبدعي بلادي ومعذره القبطان عكود النغير الكورس 5 يمين ومختارات من المبدع خالد شقوري
وطنا سعيد وعندالباري مافى بعيد

لعمرى أنها 5 شمال حيث إلابداع ، تسلم يا هندسه الحبيب عبدالرحمن محجوب وليك الف سلام والسلام ملح المشاعر ، وهاكم ملح المشاعر وحاجات تانى عاجبانى !!!!!! واسألوا النيل ؟
عاطف عكود
https://www.youtube.com/watch?v=gmssZ6iBOmg