حكا يا ت من زمن سودانلاين الجميل

الله يجازي محنك انته ما ممكن تفوت ..... لكن صحي يا توحة رشدي مالو مسجل غياب يعني خلاني البوست وطفش اوعك تكون هبشبتو انته ما عندك امان
محبتي
بودي

أخر حاجه هبشته فيها موضوع الديون للأخونا سوحى وانا عايذ اساعده دى ما حاجه بطفش البطفش موضوع المسكين حبيبنا بانقا .
بالمناسبه دى الجمعه الرابعه وما وصلنى أى دعاء من النتو اوعى يكون رجع لحكاية Hi my name is Alan الجماعه قالوا ليه بلا مى نيم بلا رومانسيات arepa .
اليوم اتلمينا مجموعه حلوه جداً من الزملاء الفاضل محمد الفاضل الرشيد بادى بابكر يوسف نصز الدين ورستم بتاع لبن الابل فى منزل الغالى عبدالرحمن محمد الحسن وكانت وليمة فطور شهيه .
جمعه مباركه

بالهناء والشفاء يا توحه
الدعاء وصلني كالعادة اربعه صباحا بتوقيتنا وطبعا ما بقدر اقراهو وانته عارف ليه
دعاء الجمعه دي كارب اظنها ام سماح امبارح كانت في الخط علي كل حال رسلتو ليك بس ما تشيل حالي
شايف اخونا حمد النيل بقي يجدع من بعيد الزول ده وقفوهو مني والا بفتح كل الفايلات من
من كنته ابحث عنه وجدته في الدار
مرورا
ياخوانا الراجل ما صلع
فقلت له ايا غلام
وبعدين بدري و بدري وما تتاخر ياود المبشر
وساختمها بي يابت رييكا
ولو انتو نسيتو نحنا ما بننسي
مش كفايه الفاتح
قال ليه كوستي نفر وجاري عكازو وراهو مشا الفقرا
والله جد جد غايتو جنس غايتو
لكن عليك الله هبشته رشدي في شنو ما بصدق حكاية الديون والسوحي انته ود حرام مصفي
حبي
عبودي

والله يا عبدوس أنا ما مسجل إى غياب ...متابع بشدة وفرحان بالسجال الطيب بينك وبين ماسورة ... اللهم أنعم وزد وبارك ...لكن نصيحة لله ما تفتح جبهة جديدة مع حبيبنا حمد النيل لإنك حينها ستتوزع وتفقد التركيز فيتوزع دمك الغالى بين قبائل ماسورة الشرسة...وإنى لك يا عبدوس من الناصحين ....( الصمت فى حرم أوزون جمال ) ...لكم الود ..

الرشيد شمس الدين

كابتن قاسم
رحمه الله رحمة واسعه

قاسم او ابو القاسم علي عثمان من ابناء شندي رغم انه نشا وترعرع في الخرطوم والدته كانت- كما يحكي عنها- بت ريف اي مصرية الاصول وكان رحمه الله لا يحب الحديث عن اهله الا عن والدته والتي كان يكن لها حبا عميقا الي ان اختارها الله الي جواره
في اخر ايامه كان يود لو يعوض عايلته ويتقرب اليهم واختار اسرة شقيقه الاصغر المرحوم سيف الدين علي ما ادكر ومنح طفليه وزوجته كل اهتمامه وتلك رواية طويله

المهم
قاسم علي عثمان لا شك كان اول قبطان سوداني يقود باخرة سودانيه رغم ان هناك من سبقو ه وحازوا علي شهادة قبطان اعالي البحار ولكن للتاريخ هو اول قبطان سوداني يتولي قيادة باخره
قاسم علي عثمان درس العلوم البحريه في اليونان وتخرج في احدي كلياتها المتعدده وقبل دلك درس في كلية فيكتوريا جامعه الاسكندريه
كان رحمه الله يجيد التحدث بالانجليزيه وكثيرا جدا ما تحدي ا لانجليز بانه يعرف الانجليزي احسن منهم
كان قارئا ممتازا وكان يحب الموسيقي خاصة موسيقي الجاز الاميريكي وكان يعزف علي البيانو والاورغن
كان حاضر البديهه دكيا طيب القلب لا تفارق الضحكة شفتيه
يبدو انه عاني كثيرا من معاملة اليوغسلاف لدلك كرهم بشده وتحداهم وانتصر عليهم وقد اعانه في دلك صداقته وايمان عمنا اسماعيل وسيد صلاح وصداقته للسيد شحاته والمرحوم يحي زكريا وعمر قمر ومعاملته الطيبه لي ناس عمنا محمد حامد وعلي حبيب
اقول بكل الصدق ان قاسم عاش قبل زماننا باكثر من خمسين عاما
كان يتحدث ويناقش مواضيع سمعناها منه ولم نفهمها ساعتها والان هي مواضيع الساعه
الحديث عن قاسم يطول لدلك سافرده علي حلقات علما بان هناك من يعرفون الكثير عن قاسم اكثر مني ولكنها مجرد اجترار للدكري
نواصل

والله اهلا بيك يا رشدي عندما تغيب ولو للحظات نشتاقك
استادنك والعزيز ود البشير وكل الاخوة ان يكون لقاؤنا من خلال هدا البوست الدي عدله الاخوة المشرفون ليكون دكريات الخطوط البحريه
حبي لا تحده سواحل
عمكم عبدوس

يا الرشيد وياماسورة السلام عليكم
يا حبيبنا علي النور السلام عليكم
عبدالرهمان قال ليه 40 سنه عمل ساكت وهو عمره 50 سنه أقول حكاية
عبد العزيز داوؤد ولا مافي داعى شكرا لك ابننا محمد فقد أخرجت لنا الدرر
captain Hamad Elnil


عدد المساهمات : 8
سجّل في : 19 نوفمبر 2008

عارف يا رشدي حمد النيل بقدر عليهو واكان غلبني تؤام روحي عليوه حافظ فايلتو لكن الله يلعن النسب الخلت عليوة يسكت علي مضض مع انو عارف وانته عارف والله عارف
الله يسامحك ويرحمك يا عم النور هملته واحدة من اعز بناتك اللهم اجعلها في ميزان حسناتك يا رب
حبي
الليله جمعه وانا اتفسح ساكت
بودي

أخي الحبيب الرشيد تحياتي لك وللجميع وطبعا بموافقة الجميع أنت الحكم
صاحبك أبدوس يلجأ دآئما للمديدة حرقتني يعني عمي عليوة الدخله شنو الراجل ماشي
جنب الحيطة وبعدين أبدوس ماله ومال عمنا النور عليه رحمة الله يودي بنته مطرح ميودي أنحنا مالنا بعدين عليوة ما فاضي
أخي الفاتح ياخي اختصر الموضوع الراجل عندك عزومه خروف وشوية جيم دال من
الهمه وكله ينتهي
زكرتني ياأبدوس بحكاية عليوة قصة (هسه العبد دا سألك)وتلك الأيام الجميلة ولكم كل مودتي

شكراً يا ابونيل يا عظيم انا والله مسبتنى على والرشيد ولولاهم كنته عملته ذى صاحبنا الاكرمناهو فى بورتسودان ولمن مشينا الخرطوم صاحبنا قام بالواجب وعمل عازومه كبيره فيها أى حاجه وانتهت بصاحبنا طلع المسدس بتاعه ولولا تدخل اولاد الحلال كان بودى بقى شهيد الدناوه.

يا بودى وين صاحب بدلة سوار الدهب وصاحبه ابو مرض القلب اكيد حيكون مات لأنه سوار الدهب عايذ ماسوره او ماجداب.

اخ انا خلاس دخلتو رشدي وعليوة وانتو الاتنين عارفين دي نقطة ضعفي
ابو النيل عارف نفسو قصير لكن الما بستحي ده البحلني منو شنو
جد جد مشتاق نقعد ونتفتو
تخريمه ياود الناس كابتن البشير وحاتك لمن شفته الصوره والعربيه قلته ما شاء الله بعد ده كلو عاوز تعزمني في امواج
ياخي قوم روح ما سمعته بي الساحه ولا جاد ولا قراند كافي ولا سمر لاند ولا دريم ايس ولا رياض سنتر ولا ... ولا... خليك من رستورانات شارع النيل
شكرا انا صحي شاب ولسه بكتل العوينات وبحب الخدره البارده
الم تسمع قول غارسيا ماركيز
الناس مخطئون لو ظنوا انهم يتوقفون عن الحب عندما يتقدمون في السن الحقيقه انهم يتقدمون في العمر عندما يتوقفون عن الحب
محبتي بحر لا تحده سواحل
عبودي

يا على ويا حمد النيل الراجل ده بسمع كلامكم حب شنو بعد ده الاخ فات الستين زمان المفروض اكون شهر بين الحرمين وشهر بين أحفاده ويا الرشيد ما تقعد تضحك وتلبد .

أولا أشهد والله إنك ود حرام صحيح يا ماسورة ...عرفتنى كيف قاعد أضحك ؟ لأنه فعلا والله كنت قاعد أضحك على جمال المساجلة يا ماجداب ( عفوا يا ماسورة ... ) ... ( كلام , ما أخدش منك غير الكلام ) ... إذا كان حبيبنا خالد يقول ( الصمت فى حرم الجمال جمال ) ... فليسمح لى أن أقولها بتصرف كتيل العيون فى حرم أوزون , خيال)
أما أنت حبيبنا عبدوس فلم يعجبك من كل ما قاله غارسيا ماركيز فى حياته العامرة سوى هذا ؟ أدام الله لك شبابك الدائم يا أيها الشاب الأنيق المعطر ....ويا ماسورة موت بغيظك ...الما بتلحقو حاول لو تقدر تجدعو ..ما بتقدر ...
غايتو جنس غايتو ... لكم الود وليدم أبدا مابيننا ...

الرشيد شمس الدين

انته تتبارك يارشدي دايما ترفع معنوياتي
اما انته يانته عندي ليك نصيحه خليك من لبن البل والوصفات اللا بتودي ولا بتجيب
سافر الخرطوم وفكها شويه اخد ليك ايس كريم في اوزون وقبل ما تسوق الرادووتمشي البيت عرج علي شارع 41 في كافيه اسمو ستار كافي اطلب ليمون وشيشه وحاتك ياتوحه خدمه تسعه نجوم وامشي البيت والله تلقي روحك مش ماجداب والله بس عبد الرحمن الزين ..جرب وما حتندم وحتشكرني بس ما تسكن هناك عارفك دني
قال ايه امش جاور في الحرمين حاضر بس الحقني
زمان مشيت الحج قلته لي عبد الله جاه الرسول انته ما بتبارك لي الحجه ضحك قال لي عليك الله دي منو السكيته من هامبورج لي مكه
محبتي
عبودي

زمان الناس هداوة بال
احلي الكلام يا قاشورة
احب الصالحين ولست منهم لعلي ان انال بهم شفاعه
واكره من تجارته المعاصي وان كنا سواء في البضاعه
تخريمه
في اولاد سغار هنا ما عارفين ماجداب دة منو ولا انا..... ممكن ياعمو الفاتح ويا خالو الرشيد تشرحوا لينا
ابنك
عبودي

اليوم تفقدت البوم الدكريات
صورة تجمع
الرشيد بن شمس الدين انبل من خلقت حواء بعد المصطفي يشهد الله ينقصنا عليوه واصيل و سورج ولكن ما كان بامكان الباخره ان تحمل اكتر من دلك النفر
كان هناك التنو والعزيو ماسوره والسوحي طبعا علي الحاج تخليت اوي جالس بينهم
وكان ود الشيخ والعزيز اسامه مكي كان هناك طيف كابتن صدقي وكان علي البعد انسي ومامون قبيله والعزيز هباني والصادق
وصدفوني كان هناك عصام مختار ما بالكم لا تدكرونه كان والله علي ما اقول شهيد من انبل الناس
كان هناك العزيز طويل القامه باسم الثقر جلال عثمان محجوب الف رحمه ونور علي قبره
كانو هناك المرحوم عبد العزيز المرحوم ود الصول المرحوم عبد العاطي المرحوم
كانوا كلهم هناك الصوره جمعتهم وسرحت انا في خيالي بعيدا بعيدا بعيدا
احبكم
اه لو نتواصل
عبدوس كما كان يحب ان يناديني رحمه الله

إن كانت الباخرة ما كانت لتحمل اكتر من المذكورين وما كان لصورة أن تجمع الكل
فلعل هذا المنتدى يحمل من الاكارم ما عجزت الباخرة،،، ويجمع الأحبة ممّن لم تستطع الصورة،، لعل!
التخريمة:
نحن مع الجـارّين بنابرهم فى حضرتكم نمتع نفوسنا بالدهشة .. او كم غنى وردى،،،
ما عارف ليه اتذكرت الكاشف فى،،،، انا ما بقطف زهور خدودك بس بعاين بعيونى ،، أحسب أن كل العظماء بكتلوا عيونهم
دام الحب بحارااا

الاحباء
معى بالمكتب العزيز التجانى غريب الله قره كلام عبدالرحمن عن الحب وعن كتيل العوينات قال لى ده اسمه مرض الشيخوخه المرض ده كان عند عمه وعالجناهو بالحجبات وعندى كميه من الحجبات دى لكن نرسله ليه كيف وسألنى عن أوزون دى وين قلته ليه فى شنقلى طوبايا.
معتصم دفع الله سيف مصطفى اسامه مكى القوصى عوض الكريم وبابكر عبد الغنى قضو نهار امبارح كله مع الحاج عثمان فى مزرعته.
النتو وصل الخرطوم امس وقال عايذ ليه شوال حطب سألته اسامه قلته ليه عشان اسوى بيه شنو قال لى اظنهم فى شمبات بقو ذى الهنود احرقو الجنايز. سمير قلق استقره بالقاهره

يا ماسورة العزيز تسلم رغم تفاهتك ...لكن أرجوك تبلغ إبن أختى التيجانى العبد إنه ما عشان داير يشتغل معاكم وياخد بوشك يقوم يشتغل فى حبيبنا عبدوس بالشكل دا , صحى العنده مصلحة فى قرد بيقول ليهو ياسيدى , خصوصا إذا كان إسمو العبد ... وبرضو يا ماسورة شباب عبدوس الما بتلحقو جدعو كان تقدر .. تحياتنا لللعزيز الحاج عثمان وسعيدين باللمة الجميلة فى مزرعته وبالمناسبة يا ماسورة عشان أغيظك شوية وأخليك تبدر جيتك لدبى كانت عندنا لمة جميلة قبل أيام هنا فيها الأعزاء نورانى وأحمد محمد أحمد ومحمد طاهر وعبد الرءوف بابكر وقابلوا الجماعة المهمين كلهم ...
للمزيد من التفاصيل يرجى الإتصال بأحمد محمد أحمد ... وليدم مابيننا ....
الرشيد شمس الدين

ساكتفي بتعليق رشدي فقد كفاني وزاد وقول للتيجاني اختاني فايلاتك كلها معاي
واهملتك يا عبودي
اخر الحكي لو بتفهم

الحب ليس رواية شرقيه بختامها يتزوج الابطال
لكنه الابحار دون سفينة وشعورنا ان الوصول محال
وليدم حبنا ابد الدهر عبدوس

احبتي فات علي ان اقول ان الكلمات لنزار ولكن قطعا لم يفت عليكم
واهديها لخالد لانه يستعير بيتا منها
قل لي ولو كدبا ..كلاما ناعما قد كاد يقتلني بك التمثال
مازلت في فن المحبة طفلة بيني وبينك ابحر....وجبال
لم تستطيعي بعد ان تتفهمي ان الرجال جميعهم اطفال
اني لارفض ان اكون مهرجا قزما ..علي كلماته يحتال
فادا وقفت امام حسنك صامتا.. فالصمت في حرم الجمال جمال
كلماتنا في الحب تقتل حبنا ان الحروف تموت حين تقال
قصص الهوي قد اتعبتك فكلها غيبوبة ..وخلاافة وخيال
الحب ليس رواية شرقيه بختامها يتزوج الابطال
لكنه الابحار دون سفينة وشعورنا ان الوصول محال
هو ان تظل علي الاصابع رعشة وعلي الشفاه المطبقات سؤال
ما اروعك يا نزار
اما انت فقطعا لم يعجبك في كل هدا الجمال سوي كلمة الاصابع
ما عارفك
حبي بلا حدود

ما عاش اليهملك يا عبدوس وأنا أستطيع أن أحلف جازما أن ماسورة قد بهت التيجانى العبد لأن التيجانى عمره ما ممكن يقول الكلام دا ...بل وأجزم إن ماسورة ما فرأ هذا البوست هذا إذا كان يتعامل مع الكمبيوتر أساسا ولكن ،ت تعرف ماسورة وقدراته الخارقة ..( هو أنا حا أقولك ؟ ) ...تصور إتصلت به قبل قليل وسألته قال لى ( التيجانى العبد بيعرف قدر دا ؟ ) ...الغريبة إنه قال لى عبودى داير يشغلنى بنزار قبانى عشان أخلى الحاجات التانية لكن هيهات ...
لكم الود ودمتم ...

الرشيد شمس الدين

والله يا الرشيد انا تفاهتك بعرفه لكن ما قايله قدر ده الله يسامحك. أنحنا يا عبودى ما عندنا وقت أحنا بتاعين AREPA ذى أستاذك حسن.............

والله يا رشدي وانته الصادق وانا متاكد انو تجاني ما مكن يقول كلام فيني حتي اكان عينو محل رستم والا قام ليهو من كرسيهو لكن نقول شنو فاقد الشئ.....
بعدين يا توحه انا بكتب ليك شعر نزار عشان منك ومنو ما نخدش غير الكلام..اهو كلام والسلام ...
اخر الحكي لعبد المعطي حجازي
يا ويله من لم يحب
كل الزمان حول قلبه شتاء

وطبعا انته فته الخريف بي هناك قال لبن ابل قال
هاك الوصفه دي مجربه ومدكوره ونتيجتها مضمونه للصداع المزمن الدي تعاني منهو شفاك الله ولو ما خارجتك انصحك ما تحاول اي وصفه تانيه واستسلم والمرض فيه اجر كبير باجماع العلماء
200 جرام دم نمل ابيض تخلطهم ب150 جرام لعاب باعوض ضكر مع 100 جرام بول ضكر النمتي اخلطهم جيدا واشرب كل يوم معلقه علي الريق في بعض الحالات يتم الشفاء في شهر بادن الله ولكن يبدو لي زي حالاتك امكن بعد سته شهور والله اعلم
اعانك الله وشفاك وسنساعدك بالدعوات..عسي بل لعل
محبتي

والله والله التجانى قال الكلام ده وقال لى المرض ده وداك عنده من زمن الباخره دنقلا وانا جبته ليه حجبات للمرض داك لافيها بعوض ولا نمل ووعدنى بأشياء كتيره لو اتعالج من المرض داك وكنته ضامن الترقيه لكن للاسف الترقيه الترقيه طارت.