حكا يا ت من زمن سودانلاين الجميل

يا مراحب يا اوتش دعواتنا لك بالتوفيق وتحياتي لكل الرفاق بالخرطوم والله تاسفت اني لم اقابلهم لكن اعمل شنو مع ناس مامون ما ادوني فرصة
انته موت بيغيظك يا الما بحب اجيب اسمو
وياحاج خالد لك مودتي وتقديري وشكرا لكلماتك التي تخجلني ياريت لو كنا عملنا مع بعض كان يكون لي الشرف بحق وحقيقه
ود كرار مسجل غياب
باقي الاخوة الكرام هدا منتدي ادخلوا قولوا اي كلام وما تخلوا ماسوره يتفسح فينا ويملطشنا ... البوست تم تغيير اسمو لي حيكيات من زمن سودان لاين الجميل ومن منكم بلا دكريات
ومن كان منكم بلا دكريات فليكن الله في عونه
ومن كان منكم بدكريات ولا يود ان يجترها.................. فليكن الله في عونه
محبتي عمكم عبودس
تخريمه
لمن اوي قال الشباب انا عارفو قاصدني انا تشكر اوي انا بفهمها وهي طايره

ابا عابر يا قصيدة شعرٍ تقال فيخضّر منها المداد...
نحن من يشكر التاريخ لا الجغرافيا أن سمحتم لنا ان نكون بعضُ من هذا...
اشاركك الحب لنزار الاسطورة منذ " طفولة نهر!" بعد ان تحرف الاسم كما تعلم
كليك هنا
http://nizar.ealwan.com/

آوى مراحب متجددة،،، ابهجتنا طلتك
والتخريمة : انا لما جيت امريكا دى ال" اوزون" كان خرم ،،، اظنو طولنا الغيبة خالص

قلت يا عبدوس ( ناس مامون ما خلوك ؟ ) .. حيرتنى معاك ولخبطت معلوماتى المتواضعة !!! إنت قصدك مامون قبيلة ولا يمكن مامون إمبريك ؟ له الرحمة .....إن غضبت منى فأنا أعلم أن ( غضبك جميل ذى بسمتك ! ) لا تظن أن هذا بداية تحالف مع ماسورة !!! مرحبا ألف يا اوى العود أحمد ( محمد أحمد كمان ) ... حبيبنا خالد لك الود ... ماهذا التواضع الجميل أيها الجميل بلا حدود ... قلت لى أوزون فى زمنكم كان ثقب ؟ يبدو أنك كبرت فى السن وتركت هذه الأمور الشبابية لعبدوس , بهذه المناسبة , أرجو أن تسمحوا لى بالتصرف فى كلمات نزار الملهمة لخالد العزيز حد الدهشة ( كتيل العيون فى أوزون , مع ناس مامون أجمل فنون ... لم أقل بداية جنون ) ....لكم الود ودمتم ..

الرشيد شمس الدين

أو كتيل العيون فى أوزون لابو ستين لم أقل بداية جنون لكن والله أقول خرف خرف.

تشكر اخي خالد علي اللنك وكلماتك المعطرة ..حفظك الله من كل سؤ........ معقولة بس يا رشدي اني اشك لحظة واحدة انك تكون في صف الما بتوصف انته راجل حقاني ونعم الصديق انت

سلام علي الدنيا ان لم يكن بها صديق صدوق صادق الوعد منصفا

اغيظك واقول ليك وعندي شهود في احد الامسيات كنت جالس- كعادتي- شفته كعادتي دي- في اوزون اتصفح ديوان نزار - كل عام وانت حبيبتي- والدي ورد فيه بيته الشهير ليس اجمل من عينيك سوي عينيكوطبعا كنت اتناول- كعادتي- برضو- كوبا من الايس كريم بالفانيلا وفي الطاوله المجاوره كن اربعه من الحسان يرتشفن المبردات
ويتناغمن في مودة وانبساط وضحكات لم تستطع كتب اللغه ان توصف رنتها.... المهم اتت المضيفه او النادلة وقالت .... خليك كده بكره اقول ليك قالت شنو لانو خايف عليك من الصدمه لانك برضو نسيب حبيبنا المختفي
محبتي وساعود لاهريك
عبودي

ده كان شرك عشان تدفع الحساب.

عارفك ما بتقدر تصبر لمن ارجع ليك.... المهم مغرود فيك ومحتاج ليك عشان كدي ما برد عليك.... ياخي اتدكر لمن انته كنته ضابط تاني مشيت مع ماجداب للدكتور وكتب ليهو دواء لتخفيف الام الظهر الحاده التي كان يعاني منها .. ياخي انا لي سنين محتاج للدواء ده ما القي عندك صوره من الاورشته فعلا محتاج ليه وجزاك الله عني خيرا
مودتي وشكري مقدما

والله على ما اذكر دواك ده انته كنته قبل كده عامل ليه دعايه فى الجرائد السودانيه. والايام دى بعلنو عنه فى التلفزيونات .

الأعزاء الأحباب عبدوس وماسورة
يا جماعة الله يجازيكم ويجازى محنكم .... خففوا علينا شوية ...كتلتونا بالضحك والله ...رحم الله ماحداب اليابانى , أما عن ماحداب التايوانى , أهو كلام ..ما ناخدش منكم غير الكلام .... لكن حسادتك عينة والله يا ماسورة ...لكن شايف سياسة عبدوس فى إنه يشغلك يالفاتح قد نجحت حتى الان , بإمتياز .... غايتو جنس غايتو ...لكما الود ..

الرشيد شمس الدين

شفته ليك ذول عنده هبوط حاد عايذ اهبطه ذياده ده انتحار وعبودى غالى علينا.
اليوم الخميس عندى حله كاربه وحيشاركونى فيها حمدان والنميرى وطبعاً ديل عندهم الدرر ويا ويلك معاى يا عبودى مع درر نميرى انا عارفه حافظ ليك كتير وجايك

aawa كتب:الشباب والشياب

والله طولت عليكم الغيبة وانا مش بس دا متنيل بنيلة

جميع الأحباب والله مشتاقين شوقا كتيييييييير بالحيل

عموما في طريقي للسودان عشان أحصل سيف الكبير والريس عشان تسجيلات المؤسسة وسوف نزودكم من هتاك بالنتائج

لكم جميعا كل الود والى لقاء قريب من البلد الحبوب

العزيز اوى....الف حمدلله على السلامة ...

والله فرحتنا بعودتك لاتوصف مكانك شاغر....

فى انتظار الدرر

لكم الود

شفته يا رشدي التافه قنع من مصطفي حسب الرسول بقي يفتش في ناس حمدان والنميري والله خسارة حلتك لانو الاتنين ديل ما بتدكروا امبارح اكلو شنو وبارك الله في الزهايمر
مودتي

شايفو برضو بقي يستعين بي صديق- اصدقاء- بس ان شاء الله يكون للرد علي وبس.........
انا قلته ليك يا رشدي
سقف بيتي من حديد
ركن بيتي من حجر
اقصفي يا رياح
واهطلي يا مطر
لم اعد
اخشي الخطر
بتصرف
قال عامل حله لي نميري وحمدان وليه نسيت عابدون و مامون قبيله
علي فكره وانا عارفك ما عندك امان بكره البرادو بكون واقف قدام صينية عثمان دقنه
قبيله دو اول زول نشل جزلاني في رييكا وهو عارف وانا عارف والله عارف ما تشوف الغره ديك والهروله للجامع انا لسه ما غفرته ليهو
لكن اكان عاوز زول يفتو ليك جد جد فدونك محمد سعيد الشغال مع مامون
شايف انا كيف بساعدك بالباصات
عليك الله قصرته معاهو يا رشدي
معزتي
ابدوس

كابتن عبدون وصل بورتسودان من القاهره وكان من المفروض اعمل فيها عملية الغضروف لكن قرر عدم اجراء العمليه بالقاهره وقرر اعمله بألمانيا قريباً تليفون 0912362560.
والله مامون قبيله ما عنده اى ذنب لكن السمعته من الاحباء والله احير وجايلك.

انا غايتو ما بخش اكان رشدي ما خشه جد جد بقيت اخاف الزول ده يا ربي امبارح كان قاعد مع الوالي والا شنو
والله منو خوف
ما تقولو قلته الروب لكن العينه دي ممكن تضرب تحت الحزام وانا عندي عيال بخاف علي سمعتهم وقالو الما بخاف الله خاف منو
بلا توقيع

اليوم زرنا عابدون والحمد لله بخير واتضح انه عمل قصطره ودعامت للقلب لتقوية العضله وبعد شهر حيمشى المانيا لعملية الغضروف نتمنى ليه الشفاء.
اليوم العشاء مع نميرى أخوانه وصلوا من القضارف سألته حمدان أوعى يكونوا نفس الاستايل قال لى لالالا ديل متوضين اليوم كله.

الف الف مليون سلامة لكابتن عابدون
ارجوك يا توحه بلغه تحياتي وامنياتي الطيبه حاولته اتصل به بلارقم المسجل عندي 0912361560 هناك جرس طويل ما في زول برد
واليوم ارسلت له رساله بدات الرقم
دعواتي من القلب رغم انو عارف ناس مسجد حي الخليج يبتهلون كل ليله وخاصة عند الختمه
اللهم الطف بعبدك عابدون كل ساير المسمين
امين يا رب
عبد الرحمن

علي فكره شايفك يا توحه بقيت اجتماعي يوم حله ويوم عزومة لانو اخوان نميري- الفضلو- جو ويوم تزور عابدون عشان تكفر ليهو ويوم تمشي مع حسن رستم للدكتور
ويوم مع حمدان عشان تورق الملوخية لي ماريتسا وسمعته انك قاعد توصل مولانا محمد كمال لجامع حي الخليج وبتحنس فيهو انو يعزموك للختمة لانو الزلابية مندكله وقالو تحت تحت انو لمن عابدون يحضر الختمة بجو معاهو كبار رجالات الدولة ودي انته ما بتوفتة.. وقالو اقصر الطرق امكن نميري وفي رواية اخري حمدي
يا خي ما تنسي اخوك حسن حماده ما اهو برضو ملح وملاح
وان عدتم عدنا
واحد جاتو معلومات

الأعزاء الأحباب
معذرة للغيبة الطويلة وذلك لظروف طارئة ..أمس إتصل بى مساء مشكورا , العزيز ماسورة للإطمئنان على صحتى ...لست أدرى يا عبدوس هل سعد أم حزن حين علم أنى بخير .... فى كلا الحالتين سعدت بإتصاله والله وطبعا ( البخلى عادته ) , حكى لى حتى كدت أموت بالضحك والله أن التيجانى العبد قد حضر إليه حزينا وقال له :-
( إنت حتودينى فى داهية والله يا ماسورة مع كابتن عبد الرحمن )... رد ماسورة :- ( يالتيجانى إنت خايف من شنو عليك الله ؟ تانى لا فى لجنة ترقيات ولا حتركب معاهو فى باخرة ! ) ... لكنه بجدية قال لماسورة :- ( لا .. لا إنت مافاهم حاجة خالص يا ماسورة ..الزول دا واصل وإيده لاحقة وزمان كان عنده صاحبه شديد مدير جهاز الأمن (( لعله يقصد ألعزيز مصطفى حسب الرسول )) وإنت عارف مدير جهاز الأمن داك لسه بتكون عنده إتصالات قوية مع الجماعة الهسع ديل لأنه كان رئيسهم أكيد وما بعيد يكلمهم يقوموا يدخلونى مع ناس العدل والمساواة الدخلوا أمدرمان بالسلاح وهسع كلهم فى السجن وأصلوا الزول ما ناقص (( التيجانى العبد .. العبد ..العبد )) ....
حكى لى ماسورة أيضا قصة ( أخونا ) الجمل مع لجنة الترقيات زمان ولكنى قلت ليهو دى تحكيها براك .....
لكم الود وليدم أبدا مابيننا ....

الرشيد شمس الدين

اسمها مسرحية الجمل الحزين . الجمل فطوهو فى الترقيات مرتين وره بعض لضابط ثانى وطبعاً زعل شديد ومن حقه ومشى الشركه عشان اعرف الحاصل شنو وعند باب الشركه لاقى ابو الكباتن صديقه وحبيبه العزيز اتظلم ليه وعارف انه حبيبه يده لاحقه وخاصة لامن أفرد معاها الأنامل الذهبيه بتصل بعيد شديد الله لا وراكم وين وبكل شهامه ابو الكباتن أتبنى الموضوع وقال للحزين أصلو ماممكن و مامعقول و Impossible وووو واخد الحزين من ايده وطاف بيه كل المكاتب شئون الافراد والاداره الفنيه ووصل بيه لحدى عمنا عبدالله ويردد ماممكن ما معقول وما بصدق واخيراً الحزين لقى نفسه واقف فى الشارع وأبو الكباتن داخل الفولفو الما خمج ولازال مندهش .
الحزين صحى من السكره وقال لصديقه وحبيبه شكراً لكن لو كنته بذلته نصف المجهود ده أثناء انعقاد اللجنتين أنا كنته اترقيت لكابتن على طول مش لضابط ثانى لأنه يا ابو الكباتن يا صديقى ويا حبيبى انته كنته رئيس اللجنه الاولى و رئيس التانيه.
غايتو جنس غايتو يا الرشيد.

اخوانا الصعايده بدارفور لسه برجفو قايلين صلاح نصر حى.

والسلام

يا خونا شفتو الزول ده بولع فيني النيران كيف

يشهد الله والله علي ما اقول شهيد لم تكن تهمنا الا الكفاءه وما دون ذلك فلا
اللهم اغفر لي ان ظلمت احدا
ولو كنت اجامل لكنت انت انت يا ماسوره - احب الضباط الي- قبطانا في النيلات او علي الاقل ضابط اول والجمل معاك تاني والعب كديت وانا اتشرف اكون كارقو اوفسر علي شرط يكون السر بكري مهندس اول والنتو او الن لا دي ما بقدر اقوله ناس خالد بسحببو الباس ورد حقي
ولكني راعيت الله والحق والحق اقول
عمك ابوس

وفى محاولة لإيقاف المناقرة الظريفة بين ماسورة وعبدوس ولزيادة الحيوية فى المنتدى , أسمجوا لى أن أقوم اليوم , بنشر خطاب الإستقالة التى كان قد تقدم بها عبدوس من سودانلاين فى أبريل 2008.
______________________________________________________________________________________________________________________
بسم الله الرحمن الرحيم وبه نستعين الخرطوم 30ابريل 2008

السيد الاخ المدير العام لشركة الخطوط البحريه السودانيه
عناية الاستاذ النوراني يوسف دفع الله........... الموقر
تحية واحتراما وتقديرا

بداية- سيدي المدير- ارجو ان تسمحوا لي بان اسدي جزيل شكري وتقديري لشخصكم الكريم لثقتكم الغاليه في شخصي الضعيف واختياري مديرا تنفيذيا لشركة الخطوط للتوكيلات الملاحيه ببورتسودان وقد كنت امل ان اهبها عصارة الاربعين عاما التي تقلبت وتجولت خلالها في عالم الدراسه والسفن والبضايع ما بين كرواتيا وبحار الدنيا الواسعه ومكاتب المانيا وبلجيكا....حقيقة كنت انوي ان اكون عند حسن ظنك واكثر...كنت انوي ان اضع لشركة الخطوط نهجا ومنهجا...نظاما ونظما..طريقا ودربا لن يضلوا ان سلكوه وبوصلة يهتدوا بها دون الحاجه لربان ماهر او حتي مديرا كفؤا في قادم ايامهم ولكن تاتي الرياح بما لا يشتهي السفن.....

لقد ابي بعض صغار النفوس الا ان يكدروا اخر ايامي في هذا الصرح العتيد...ابي نفر قليل او فرد واحد الا ان ينضح بما فيه قيحا وصديدا وابرزوا لكم في حقارة ونذالة وخسه اوراقا تمنوا من خلالها ان يثبتوا لكم اني اشارك في شركة اخري تنافس الخطوط البحريه وقد برروا لك تصرفهم وحقارتهم ووضاعتهم-ولو لا احترامي لك وانت تقرا كلماتي هذه لسمحت لقلمي ان ينحط الي مستواهم - اقول برروا ذلك بحجة خوفهم وحفاظا علي مصلحة البحريه وحمايتها مني وبئس الحجة والتبرير...!!!!.

سؤالي لماذا احتفظوا كل هذا الوقت بهذه الاوراق ولم يقدموها لك من قبل؟؟؟؟؟؟؟؟؟ واجيبك انا علي سؤالي- سيدي المدير- ابدا لم تك مصلحة الشركه تهمهم ولكن مع صدور القرار –فقط- تضررت مصالحهم الشخصية وضربت بعضا من مواقعهم فاخرجوا الاوراق من اضابيرها التي اخفوها انتظارا لمثل هذا اليوم حتي يحموا مصالحهم ولكن ليس ابدا مصلحة الخطوط البحريه-حماها الله من اجل ابنائها البررة.

حمدا لله... هذه الاوراق كشفت لي وربما لك – سيدي المدير- اي معدن واي سرطان ينمو من حولنا ومن تحتنا واي عفونة تفوح تحت تبن نري خارجه سليما ومن تحته نتانة يعف اللسان عن وصفها ...رحمتك اللهم والشكر لك فلقد عرفت اصل


من كنت اظنهم زملاء مهنه ورفقاء درب..اعوذ بالله ان اكون زميلا لمثل هولاء فاحذرهم –سيدي المدير-
سيدي المدير.....
اقولها لك صادقا وبالفم المليان انه ليس لي مصلحة تجاريه او علاقه بشركة اطلانتك لا من قريب او بعيد ولو كان لدي مثل هذه المصلحه او لو شعرت للحظة واحده اني ازاول او اشارك في اي عمل تضرر منه او انافس به الخطوط البحرية لاخطرتك علي الفور ولما اخفيته عنك ولذكرته لك فبل ان تصدر قرارك..علما بان لدي تصريحا من السيد المدير السابق بان الا اترك اعمالي الخاصه كشرط وافق عليه لعودتي للخطوط البحريه بعد ان استقلت عام 97 . ورغم ذلك لم اشا ان اقوم باي عمل سوي عملي في الخطوط البحريه وكان يمكن ان اكون ممن يشار اليهم بالبنان لو فعلت. وللتاريخ اقول لك هنا انني عندما اوقفت العمل بشركتي عام 2000 كان في حسابها بالبنك ما يوازي ال 200 الف دولار تبخرت كلها خلال سنة ونصف وانا ارتب اموري للعوده للعمل مجددا في البحريه دون راتب يدفع في حينه كما تعلمون جميعا...

صحيح اني ساعدت الاخ هشام – بناءا علي رجاء والحاح من صديق مشترك- بان اجد له شريكا اجنبيا يدعمه ماديا ويشاركه حتي يقف علي رجليه بعد ان قرر ترك شركائه . وهشام ليس اول ولن يكون اخر من امدد لهم يد العون- اذا اعانني الله علي ذلك- الصديق البلجيكي واسمه فريدي ساهم في تاسيس الشركه مع هشام ولصعوبة اجراءت تسجيل الاسهم للشريك الاجنبي ساعدته في ذلك وحررت له تنازلا امام محاميه وحضور مندوبي الغرفه التجاريه البلجيكيه وبذلك يصبح هو الشريك الفعلي لا انا يا سادتي الكرام .

سيدي المدير
بامكاني ان اتشبث بموقفي وابرهن لكم سلامة موقفي وارد كيدهم في نحرهم ولكن سبق السيف العزل ولم يعد يهمني ولم اعد اتشرف وافتخر بانتمائي لرفاق مثل هولاء... واعذرورني لكلماتي الجافه هذه ففهي قطعا ليست من شيمي ولا اسلوبي ولكن لو فجعتم متل فجيعتي لوجدتم لي العذر...وارجو ان يقدرني الله كي لا ينزلق قلمي الي اكثر من ذلك في اخر خطاباتي اليك.
اخي المدير...
يشهد الله الذي لا اله الا هو اني كنت اتطلع الي اليوم الذي اغادر فيه بكل العزه والشموخ باكيا علي صدور رفاق الدرب الطويل والذين – لا شك - يعرفون ويقدرون معادن الرجال ولكن يبدو ان الوقت قد حان ودنت ساعة الرحيل وان لي ان اترجل والاسي يملا جوانحي....



سيدي المدير
كلما ارجوه من سيادتكم التكرم بمنحي المعاش الاختياري من اول مايو هذا العام—2008- لا سيما وانه قد تبقت لي اشهر قليلة واستحق المعاش الاجباري.. كما ارجو ان تتكرموا وتصدروا توجيهاتكم بدفع استحقاقاتي و متاخراتي طرفكم والتي تربو علي الثمانين مليونا - بالقديم- وارجو ان يتم ئلك علي وجه السرعه فلم يعد بامكاني ان اتردد عليكم كما كنت افعل من قبل فلا زلت املك نفسا عزيزة وهبني لها خالقي وصقلتها الخطوط البحريه خلال مسيرتي معها –جزاي الله القائمين علي امرها مني خير الجزاء...
اخي السيد المدير...
انا الان فعلا في حاجة لمعاشي لاني اود ان ابدا عملا يخصني بعيدا عن البحر وسفنه وبعيدا عن مجالي في بلاد تموت من البرد حيتانها ولكن قطعا لن اجد فيها من يحاول ان يطعنني من الخلف ويحفظ لي ملفا في خزاين منازله ومن يدري ربما بين طيات ............ بئس الخزنة انتم يا من كنت اعتقد انكم زملائي وارجو ان يكون في ذهابي فرحة تغمر صدوركم وعائدا يملا جيوكم كي لا تطروا للتنقيب في اضابير مخازنكم عن اوراق لسواي.....

سيدي المدير عزائي كل عزائي انهم نفر قليل لا يشبهون الخطوط البحريه لا من قريب او بعيد....اعانك الله اخي النوراني وسدد خطاك....



المخلص - بكل ما تحمل هذه الكلمه من معان-
اخوك
عبد الرحمن عبد الرازق الزين احمد
______________________________________________________________________________________________________________________

لكم الود وليدم مابيننا أبدا

الرشيد شمس الدين

الاخوة الاعزاء
محبتة تقديرا واحتراما
قد تعرفون عني القليل ولكن لا شك ان كثير منكم قد سمع عني
صحيح انا بمثابة عم وجد لاكثركم ولاضعكم في الصورة انا سافرت من السودان في فبراير 67 وديك يا غربه

قبل سنوات ثلاث كتب الي رشدي البرتكانه يا عبدوس ما كفاية غربة الم تزهج من الحياة في بلاد تكاد تموت من البرد حيتانها
اتصلت بصييق ورفيق العمر نوراني مدير سودان لاين وقلته ليهو يا خي انا عاوز استقيل او عليكم الله اعفوني
الراجل قال لي كدي خليها علي انا بلقاليك مخرج لكن قصة انك تفارق البحريه دي ما وارده
الراجل ما قصر وعرض علي ان احضر وافتح مكتب في السويس
حضرت الي السويس علي نفقتي الخاصة ومكثت شهر ونصف ولكن وصلت الي قناعه انو مافيش فايدة
وكتبت تقريرا مطولا عددت فيه الاسباب
الراجل برضو ما اقتنع قال اقعد في الخرطوم مستشارا قلته ما المستشار باعلم من من يطلب المشورة قال طيب مساعد المدير العام ببورسودان قلت له ناس بورسودان لا عايزني ولا عايزنك عاوزين زول منهم
قال لي احتار دليلي معاك اعمل شنو طيب.... قلته ليه يا نوراني عليك نور... ارسلني لمعاشي الاختياري وبارك الله فيك
قال لي ما بقدر وما بهون علي... خلاص امسك لي التوكيلات تلاته اشهر بس ولو اتممتها ستا فلك الشكر وبعد داك ساحيلك الي المعاش
صدقوني لم اقتنع وانا اساسا لا اتخيل نفسي في اي موقع في السودان الحبيب حتي ولو رئيس جمهورية-لا قدر الله-
استخرت الله وكانت الخيرة الا اسافر الي بورتسودان باي حال
حضرت الي المكتب بعد تلات ايام وقابلته السيد المدير واعتذرته له بانهم لم يجدوا لي حجزا ولكنه بكل رقة قال لي انتظر هناك مستجدات هاك اقرا الكلام ده لكن ما تشتغل بيهو
............................ رحمتك اللهم استجبت لدعائي وشهد شاهد من اهلها ولكن بالزور
وكان ما كان
اسفي ولكن فقط لاقول لكم ولرشدي الا تعتقد ان وجودي في بلاد تموت من البرد حيتانها اكرم وارحم
عمكم عبد الرحمن