فنجان قهوة

لامن نرجع بى مهل ،،،تحت الحساب من اشعار عبقرى الدارجة السودانية ود بادى
فى امر ذو صلة
ده كلو كوم وتاني ام العيله كوم
الوليه الفنجريه حلاوه نبق
الوليه الغجريه ودايره دق
البطن منفوخه ديمة طبق طبق
يجيها الحول وحول بي زول
ومره تديها الهواده وترمي زي زولين زياده
الله اريت الزول يزاول
ياحكم صفر دا فاول
رصتن بت الذين ودايرا تعمير القبايل
اب شنب تعبان وعرقو يسيل جداول
يلحس الكوع رغم انفو وكان مقاول

شايله فوق الصفحه سوسو واحد الله
باليمين مقيوده سيسي مالو تاني
اب شنب شايل اماني تلاته بركه
وكل حركه معاها بركه
وفي البطن بنجوسه فرفر
والقطر بي وراها صفر
والله يستر
شوف كمان جنس الفصاحه
والفتاوي الماها صاحه

والله ما شقالو حنكاً ضيعو
والله ما سوالو طفلاً ما سقاهو ورضعو
الا اسمعو يا رفاقا
الرضاعه خشم بيوت
والربايه خشم بيوت
والمعايش ماها توت


يا خلق يا عقل صبه
تلحسو الرز بالمربه
وتلدو كبه وراها كبه
عشان تقيف ما تاخدو حبه
انت يا جاموسه دري
هو اليكتح وانت ضري
الليله يقطعو حبلي سري بكره يظهر حبلي سري
العداد ماسكاهو سري
لا تحدثي لا تقري
الا تنشري وتدري
ويله يا دايتنا جري
انه قول المعري:خفف الوطئ خليلي ههنا قبر سليلي
جمي جمي وبكره تمي
ويلا يا نخلايه رمي
ارمي ارض الفول وسمسم وخلي ملك الموت يلملم
حبه يا اهل المحبه
حبه واحده مع العشيه
حبه في جوف الوليه
والمطايب هيه هيه
لا بطوناً كالخيامه
لا ولادة ولا قياما
لا سمايا ولاكرامة
لا شرابا ولا طعاما
قد تقولون حراما
لست مفتي
ولماذا لست افتي لست افتي

ونساوينو الحواري لا تغيب عن قلبو ابداً
حاجه سعده لجنه خرده حاربت في المهديه
وهي آلت لجلافط وكراضم عن قريب ستزور الابدبه
واحيلت للمعاش فاستراحت واراحت
ثم تاتي علويه وهي رهن الخدمات
ومفاخر ومباخر وعيوناً فاهمات
تعرف الوقت المناسب وتحاسب وتحاسب
ليس في الدين حرج
آخر العنقود ليلى اصغر الزوجات ليلى افخم العينات ليلى
شيخنا ود الشايقي افلح اشترى ليلى مكعكع فتصلح
وتصبين وتلحلح وهو شيخ متصوف في هزيع الليل يمدح
يا ليلى ليلك جنا معشوقك نوح وانا
وتجيب المدح ليلى وتهرول غير هدنه
وتزيد الشيخ قرباً قاب قوسين وادنى
انها دنيا المقالب باسم ليلى من يطالب لست ادري
ذات مره والممرات كثيره شيخنا صلى الصبح نافله وبآيات قصيره
وتحوقل وتعوذ ودعا الله بان لا يتجوز
ثم ترجم ثم تمتم وبراس السبحه طقطق وتشهق وتمنطق ثم نقنق
ومضى يتلو الكتاب
مر بالمال والبنون فتبسم وتنسم
ثم آيات الطلاق فتجهم وتعسم
ثم آيات الزواج فترنم
فاذا ما لاقى مثنى وثلاث ورباع
وقف الشيخ طويلاً مثل ما فحل الضباع
وبكى ملئ الجفون البقريه
وشهيقاً كالدجاجه البطريه
قال يبكي وهو يرخي بالحبال الوتريه
انها عين الشماته فانا لا املك غير تلاته
انني قصرت في حق الكتاب
ساعاني ما الاقي من عذاب
اين مني زوجةً بكراً فتيه
اين مني المحلبيه والعطور الاجنبيه والعطور البلدية
في نقاء كبحيرة طبريه
ثم قال استغفر الله وطفر وتحفحف وتعطر وتقيف يتبختر
يسال الله عروسه ثم حشش بعبايه وزنادا وكدوسا يمشي من غير فرامل وتروسا
خطفاها خطفاها خطفاها
جاب ضحيه سمينه هايله ومدهنه
جزار وفالح في تجارة القرصنه
خلف الكراع فوق الكراع وكدوسو زي المدخنه
بين كفتين زي الخشب حرق شباب السوسنه
وتفوت سنه وتدخل سنه
شيخنا خلى الميضنه
يوم هناك ويوم هنا
وبقى في الحرد والطنطنه
وهو زاتو عجز وانتنى
شيخنا ياالشيخ البجم
خلف زرازير السجم
وحدين اساميهم عرب واحدين اساميهم عجم
بدا بي محمد ثم زوجات الرسول العشره
وكل الذين تجمهرو في البيعه تحت الشجره
طلحة الخير والزبير ثم سعد وسعيد
ثم سته مبايعين
وكمل اسماء الصحابه والكرام التابعين
وتابعين التابعين
والنجوم البارزين واسامي الخالدين
ثم عبد ما يشاء من البنين
عبد المقيت عبد المجيد عبد الحسيب عبد الجليل عبد المعين
ثم سمى في الختام عبد مالك الملك ذو الجلال والاكرام
ثم نوع في القوافي وتبحر في تراكيب المضافي
شمس الدين ونجم الدين وقمر الدين وقمر صناعي الدين وسيف الدين وزحل الدين وبحر الدين وعاد لاوين
وآخر الدور بقت الوحده تفقس في تمانيه شهور
ولده اناتي جوز فوق جوز وولده ضكور
الراجل تقول مسحور
ومابخليلو مرةً بور
وزرعتو ماب تقع واطه
قصدنا لمس موضوع الاسماء،،،فنقلنا اكتر من نص القصيدة
ونعووووود بإذن الله

حاج خالد حفظك لك ورعاك قربته اقول ليك شرفته بيتك ومطرحك
ثم سمى في الختام عبد مالك الملك ذو الجلال والاكرام
والله ضحكت كثيرا واستعدت بعض الذكريات لدي صديق احبه جدا اطلق غليه والده اسم عبدالباقي كنت اناكفه واقول له انت ابوك دة من اسماء الله الحسني ال 99 ما لقي الا الباقي وكان يضحك ويقول لي مش الكويسه ما سماني عبد مالك الملك ذو الجلال والاكرام كان الخواجات قوقلو عشان يعرفو اسم العايله وينو فيهم
بمناسبة اسم العايله الي متي ندفن رؤوسنا تحت الرمال العالم يتغير ونحن نطالب بالاسم رباعي
وبكره خماسي ويتشابه علينا البقر
متي يكون لنا عنوان بريدي اسم الشارع ورقم المنزل
مجرد تساؤلات
محبتي

صباح الخير ود الزين....عنوان بريدي واسم شارع ورقم منزل ..ده كلو موجود لكن حتي اللحظة مافي واحد رسل لي خطاب وصل يعني المسالة مارقم وبس الحكاية اكبر بكتير ..علي كل حال البركة في العنوان البريدي email

الاخوة الافاضل ..الموضوع جميل والردود اجمل..الزمن يتغير والناس كمان بتتغير..لكن يبقى سؤال واحد عاوز اجابة صريحة لانو المساْلة واضحة شديد ما بين جدودنا زمان الكانو بتزوجو مثنى وثلاث ورباع ويلدو دستين اولاد ودستتين بنات ..ثم جاؤا اولاادهم واكتفوا بزوجتين ودستتين..ثم جئنا نحن وسويناها واحد مع نصف /ربع دستة ومن جو جو عايزين تانى واحدة لكن ماقادرين وقلنا الروب........ثم اصبحنا فى زمن عجز فيه الشباب عن الزواج حتى صارت نسبة البنات الان ثمانية اضعاف الاولاد....:
لماذا تتغير احوال الناس الى الاسواْ ...ودايما نبكى على الماضى ..واحوال الناس تشمل جميع الاوضاع الاقتصادية..الاجتماعية..الثقافية..الرياصية..والفنيه الخ...!!!؟؟؟
هل من مجيب..

كركب/ ودلعى كرك..وكراكيبو..وكركرك..وكريكى..

الاخ العزيز مبارك (مبيريك) بصراحة اكتشفت كل اسماء الدلع بتاعت اسماءك اكبر من الاسم نفسه عليه اناديك مبارك وبس ...لا والله دي مش حقيقة ..عارف ليه الناس دايما بتقول زمان اجمل من هسه..؟ لانو ناس زمان هم البيكتبوا وناس هسه بيكونوا بيستمتعوا بالحياة...فما بيقيفوا علي عملية مقارنة الحياة سابقا وانيا ولاحقا.....انا بصراحة بشوف اي زمن بيجي اجمل من اي زمن مضي بالنسبة للحياة ..واي زمن مضي اجمل من اي زمن بيجي علي صعيد الافراد لان المسالة بتبقي متعلقة بالذكريات وكما لا يخفي عليك فالانسان ذكريات.....
.................
..........
عليه في كلا الحالتين زمن يركض قدماً لاجل مسمي
ولكم كل الود

فرفرت بعض خواطر اثناء النهار عمّا كتب حبيبنا امجد الشهير بود كرار
في شأن ام سيسى والفار ،،،وذكرت حينها ود بادى ،،وقلت لعلها نبوءة هذا العبقرى
حين قال فى القصيدة اعلاه

آخر العنقود ليلى اصغر الزوجات ليلى افخم العينات ليلى
شيخنا ود الشايقي افلح اشترى ليلى مكعكع فتصلح
وتصبين وتلحلح وهو شيخ متصوف في هزيع الليل يمدح

انظر لهذا التشابه فى الامرين،،وما احتاج امر ود الشايقى لمعامل وبلاطى(جمع بالطو)
بيضاء وفيران منمقة نظيفة تحسبها هظار للوصول لنفس نتيجة امجد كرار
تأمل البيت ال فى النص ،،،،،،،
للدقة انظر للجملة الفعلية
اشترى ليلى < ..وقفة..> مكعكع ! فتصلّح
من الذى تصلّح ؟؟؟ يقول العرب ،،،الفاعل مقدّم مستتر وتقديره هو
ولاتفوتنك بلاغة ( مكعكع) حيث ما احتاج الشاعر التنويه للاعمار كما ظهر فى قصة امجد التى كغمامة اختفت تماما لكن اثار البلل وبقايا دعاش منها لازالا يعطران جو المنتدى
تخاريم كلام ،غفر الله لنا ولكم
من شوقنا نتواجد ونتواصل
وقد نعود وقد لانعود لهذا الموضوع الذى يأبى الا ان يفور كما اللبن

انشاء الله تقدر علي الكلام ده ياود الاستاذ.......ليس تهديدا فانت في ناصية الحرف اكف تطبطب عليه فيأتلق ....ولكن العودة لام سيسي وايامها كمن وطاء لغما ويبحث عمن يصافحه ..........
تخريمه:
ود كرار اظنه جر واطي وسحب الموضوع من زمان دون ادني مسئولية...
..............
........
ولكم الود

علوية

كانت تمني نفسها ابدا ان تنجب بنتا بعد اربعة ذكور اصغرهم في الرابعة عشر من عمره...ورغم تخوف الاطباء وتعليقات زوجها وقفشات ابنها البكر الذي صار ابا للمرة الثانيه الا انها كانت تصر ان تكون لها ابنه تراعيها في كبرها واهم من ذلك بكثير ان تحمل اسم امها الغالية ...علويه...
ونواصل

راشد كتب: دبيب من الحزن اصاب منابت الفرح والعطاء منا فالجم مخارج الحروف ولكنا عائدون

ولكم مودتي

جملة بليغة ورشيقة مرّة (على قول السعوديين)
عجبتنى لدرجة الاقتباس
الاقتباس الحرارى..؟؟
انها بدايات عودة

عبد الرحمن الزين كتب:علوية
ابنها البكر الذي صار ابا للمرة الثانيه الا انها كانت تصر ان تكون لها ابنه تراعيها في كبرها واهم من ذلك بكثير ان تحمل اسم امها الغالية ...علويه...
ونواصل

والله حبوبة علوية دى كان ولدت تانى....يكون فلم
غايتو ادى بنبر ،،،الموضوع ده شكلو حيولع

الغاليين ود الزين وود الاستاذ...حاسس اني داخل بدون احم ولا دستور في موضوع علوية ...المراءة مخلوق مجبول علي العطاء بغض النظر عن نوعه ..واروع احساس تمارسه المراءة هو الامومة ..فلماذا يحلم الرجل بام سيسي ويسخر من حلم المراءة بالامومة ..؟ويبدو لي مادام ام علوية عندها القدرة البيولوجية والاستعداد النفسي فلماذا نحرمها العطاء ..؟
تخريمة:
لك وحشة ياود الاستاذ وانت رباط يشد الوسط (ليس تذكيرا بالرجيم ولكن للاحساس بالاشباع حتي في الجوع)....

عبد الرحمن الزين كتب:علوية

كانت تمني نفسها ابدا ان تنجب بنتا بعد اربعة ذكور اصغرهم في الرابعة عشر من عمره...ورغم تخوف الاطباء وتعليقات زوجها وقفشات ابنها البكر الذي صار ابا للمرة الثانيه الا انها كانت تصر ان تكون لها ابنه تراعيها في كبرها واهم من ذلك بكثير ان تحمل اسم امها الغالية ...علويه...
ونواصل

كبيرنا ودالزين....والله علويتك ده دايره ود سيسى عديل.....

لك الود...احنا منتظرين تحت الشجره جنب مستشفى الدايات

الغالي ود عكود ..تناولت موضوع الاسماء وهي القشرة وخلينا نديك شوية من لب تكوين فرسان زمان عبر الفارس ود دكين :
الحلقة السادسة
اشعار سودانية الحلقة الاولى
ود دكين الحلقة الاولى
قال طه
أخوك يا ريا وكت الخيول بدبكن
أخوك يا ريا وكت الرماح يتشبكن
أخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا :
وراك أسود علي ما نمت اسع طيب
قال طه :
بسم الله قولي أخو طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس أنا ما بخافو لقاهو
ياليت الحلم في صحيا كان بلقاهو
قالت ريا :
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه
قال طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه
قالت ريا:
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت ريا تبكي:
رد عليها طه وقال :
ما بفيد البكاء وكلامي احسن تنسي
قالت ليه ريا :
كيف ما أبكي وكيف أفوت مراتع أنسي
افقد كل شي عزي ورجالي وانسي
تطلق فوقي نار عقبان تقول لي أنسي
كنا في سيرة لقاء طه وريا وهم بيحكوا لي بعض قصة الحلم
قال طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت
قالت ريا :
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك
قال طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا :
وريني الحلم التورك مذهول
قال طه :
أصبري لي أروق حبل الفكر مبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن
قالت له ريا :
عارض ومات خلاص لي الليلة يمكن عفن
بعد ان بدأ طه يطمئن ريا اراد ان يقطع الشكوك والمخاوف من تحقق هذا الحلم بالزواج من بنت عمه ريا فقال :
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه
طبعاً ريا ما قبلت الكلام ده لانو ابوها عبد الله المعروف بابو كبس ما تمّ سنه من وفاته والناس في حالة حداد فقالت :
ده الاعوج تراه والشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو
إن كان في الفريق ماتت مريه ذليله
لي الحول يرفعوا العرس الدخلتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال
رد عليها طه وقال ليها :
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً تجي الفترانا
هادة الحد ندوس والناس عقب تبرانا
بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد :
فقالت :
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم
رد عليها طه :
تاني امضي حول وانا بالحسا اتالم
علي حكمك صعب انا قابله ما بظلم
نستني السنة قاسية وصعيبه علينا
ردت عليه ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو
وتقوم ريا فايته علي الفريق وطه يعاين فيها وهي ماشه ويقول :
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال :
بالضيفان تمري لا لام لا كلام
صدقوا اهل المثل توب العرب صح لام
قامت ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف
قام العربي قال ليها :
من وين في الاهل كفاك فخر يا بنية
ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
قام رد عليها ود دكين طبعاً عرفها انها هي زولتوا العاوز يعرس زاته فقال :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا
فردت عليه ريا قايله :
كما يسد مكانن قدموا ليش يوطاها
( يعني ماشي في الواطه ليشنو غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه
رد عليها و دكين :
ما دخل التراب البركه في الذريه

.................
............
وللحديث بقية في تكملة ود كين...ونعتذر عن الاسهاب

راشد كتب:
الغالي ود عكود ..تناولت موضوع الاسماء وهي القشرة وخلينا نديك شوية من لب تكوين فرسان زمان عبر الفارس ود دكين :
أخوك يا ريا وكت الخيول بدبكن
أخوك يا ريا وكت الرماح يتشبكن
أخوك جبل الثبات وكت القواسي بحبكن
كم بكيت وكم قشيت دموع الببكن

العزيز ودراشد
الجزء الطافى من جبل الجليد , وانت الصادق
وفى انتظار البقية ودام التواصل
عاطف عكود

راشد كتب:
اشعار سودانية الحلقة الاولى
ود دكين الحلقة الاولى
وللحديث بقية

الغالى ودراشد
شنو الحكاية خليتنا مشرورين فى انتظار طه ود دكين قدر ده ؟
وينك يا راجل اظهر ؟
ودام التواصل
عاطف عكود

الحبيب الغالي ودعكود....والله مشتاقين جدا جدا وهذه المرة الغياب قهري بسبب نزلة برد قاسية القلب لانها حرمتنا من حضوركم الرائع وتافهة جدا لانها ازاقتني الامرين...امتد زمانه اكثر من اسبوع ودخلنا في التاني علي مهل .....
فنسألكم المعذرة وشكرا للسؤال ......
تخريمة :
ود دكين بكرة يكون عندك.............

الاخ الغالى ود راشد كفارة وسلامتك و1000 عزيز كرامتك , وانشاء الله اجر وعافية .
ودام التواصل
عاطف عكود

الاخ الحبيب ودعكود شكرا حقيقي للمتابعة وهي نزلة وعدت بس يبدو لي انو النزلة اسهل وارحم من الطلعة ...وخلينا نكمل ود كين وبرضو له بقية انشاء الله (قلت احسن تكون جرعات عشان ما تفركوا من الاستطالة)...
شعر سوداني الحلقة2
تابع -قصـة ود دكين 2
كانت العرب لا تمتنع عن تناول طعام قوم الا لوقع امر جلل وامر هام فيحاول اهل الدار واهل القبيله تلبيه ذلك الامر مهما كلف ومهما كان ثمينا
فقام عبدالله وقال:
ياشيخ العرب امرك خلاص همانا
قول غرضك عديل خصصنا او عمانا
عسع نقضى ليك في محلنا اللمانا
كان بي مالنا كان بي دمانا
رد ود دكين " شيخ العرب: "
عندكم الغرض لا بدور قلم لا ورقه
ماغرضاً تسافرو لو وتقيسوا الفرقه
يقضي ان قولتوا خير مابدورلو سيف لا درقه
وان قلتوا لا يروح شمار في مرقه
ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه
رد عليه عبدالله :
خير سميها
رد ود دكين:
في بت ابكبس لي نيه
قال عبد الله :
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هاد قبالك
من دون ريا قول الدايروا في بالك
ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الضغار وان كان قصدت صغيره
قام شيخ العرب قال :
إن مال الشجر ما بكسرن فراعو
وقمحان الطلب لي المابجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو
قام عبد الله قال :
حبل المهله يربط انت ارتاح بيت
بكره نمر سوي ونلفي البيوت بيت بيت
سمي الدايره ولوم البقولك ابيت
رد عليه شيخ العرب :
يمين بالله غير الغايه مالي مبيت
هنا طه حز الكلام في نفسه لانه شيخ العرب بينوا ليه انه ريا مخطوبه وبعد ده هو بصر وبجادل فقام طه وقف وقال :
يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيت وقاره
خبرك هادا ما دايرلو دق نقاره
قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كما تهدو
بعنادوا الفريق خايف يسبب هدو
هنا جو المجلس توتر وقام طه قال :
انا المالح الكارب خريفي وصيفي
المثلك تبيع ما بطول فوق قيفي
كما الليله في بيتي وبعدك ضيفي
في الشي السمعتو برد عليك بي سيفي
هذه الابيات تمثل قيم وجدانية راقية جدا
الحلم عند الغضب( فليس القوي بالصرعة، وإنما القوي هو الذي يملك نفسه عند الغضب، )
علو منزلة الضيف عند العرب
هنا قال شيخ العرب :
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه
في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه
قام عبد الله عاوز يرضي شيخ العرب ود دكين فقال :
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو
رد عليه شيخ العرب :
ضيف الغابه حالف ده الفريق ما أجاورو
قام عبدالله قال :
سمح ارجانا يمكن طه نحنا نجبروا
رد عليه شيخ العرب :
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا
رد طه علي شيخ العرب و قال :
سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو
هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب …… قام واحد من البطاحين اسمه احمد مسك طه وقال :
أقيف يا طه عندي نصيحه ليك ابداها
العقده الصعيبه العاقل بيتعداها
الشكريه كثره نحنا مانا لداها
انا عندي العرب بريا أخير نفداها
رد عليه طه :
ده راي السديد يا احمد تراك بي فكرك
روح لي ود دكين وريهو يسمع شكرك
يديك مال كثير وقبيلتو ترفع ذكرك
تصبح عمده فوق روسينا تخلف حكرك
قام رد علي طه عمه عبد الله فقال :
ليه أحمد تهينوا نصيحتوا ما ضاراك
ما حق النقص وانت بتعرفوا براك
وكت بتسوي عوسك وما بتشوف بي وراك
نشاور ريا ممكن ريا ما دايراك
رد طه وقال :
صدق القالوا خربانا البلد بكباراه
ديك ريا أسألوها واعرفوا خباره
من غير السفر ما عندي تاني دباره
نحنا وانتو بي دي الحاله ما بنتباره
.....................
..............
وللحديث بقية

مساء الخير ايها الرائعون ...ها نحن نعود للصمت غير المبرر هذه المرة علي الاقل من وجهة نظري الفقيرة حتما للصواب ولكن للشوق ظروف لا تعرف التبرير.....
منذ الامس والشوارع غارقة في مياه الامطار والناس في هذا البلد تفرح لهطول الامطار وتحتفي به....حينما كنت يافعا كنت امارس عادة رائعة وهي المشي وسط الامطار بلا توقف .....والان صرنا نختبئ خلف كل ماياتي ولو بقليل الدفء...

راشد كتب:مساء الخير ايها الرائعون ......

مساء النرجس النشوان يا نغم الهوى الاطهر
مساءا حرّك الاجواء وللمنتدى عطّر
الشطرة الاولى من قصيدة قديمة فعل بها الزمان فعله
اما التانى فمن ريحة قهوة راشد
ايقظتنا بعد ان حبسنا الشديد القوى

راشد كتب:
حينما كنت يافعا كنت امارس عادة رائعة وهي المشي وسط الامطار بلا توقف .....والان صرنا نختبئ خلف كل ماياتي ولو بقليل الدفء...

ما كانت خرطومنا حينها سخية فى امطارها ...وارضها كانت عطشى لحد امكانية المشى ولا ادرى ماروعة المشى وسط المطر
لكن احساس اروع من الروعة ذاتها وهو روعة المشى على واطة الله ديك بعد المطر وتتشقق الارض الى جزيئيات صغيرة محدبة مقعرة وشويفعين المدارس (والتعبير لاسامة) فى حالة من التكسير لهذه الجزيئيات ،،،، الانا نسيت حتى اسمها ان كان لها اسم من اساسو
وهنيئا لكم امطار خير وبركة،،،
هى نفسها نزلت فى الخرطوم السنة الفاتت ولازالت الدنيا جايطة
تخريمة مطرية::حينما تصب المطرة هنا فعينك ما تشوف الا النور،،،يومبن تلاتة وانت طالع

الغالي ودالاستاذ ...قد تستكين الاقلام لبرهة ولكنها حتما لن توقف التدفق ...فهي تعبر عن احساس وتواصل مأصل بين نفوس اهل المنتدي ووجدانهم ...عليه حثنا علي التواجد من شوقنا لهم ...انا تكلمت عن المشي تحت المطر بصفة عامة وحيث انك انت السائل لك التفصيل :كنت حين يبداء هطول المطر ابداء المشي من عند صيدلية الرياض(ناصر) واواصل المشي بشارع الرياض مرورا بمحطة سبعة (ولكني لا اخذ المنحي يمنة في يسرة....) بل اوصل المشي حتي (ونجي تبنجي)(المعمورة)واعود ادراجي....صراحة لا اعرف عن متعة المشي علي الارض المتشققة ولم امارسه واظن ان تشقق الارض يكون علي الجروف علي شاطيء النيل والنيل الازرق بحكم طبيعة الارض وحين انحسار الماء عن الارض (طمي) (واكيد ناس الجغرافيا اشطر مني في الموضوع ده)فانا علاقتي بالجغرافيا لا تتعدي تحديد الشوارع وكمين بلد جيران كمين بلد ....فائدة هذا المشي فهو غسل النفس من الهموم والذنوب ماامكن فالماء نقي وطاهر يأتي من السماء ..(احذر ماء السبلوقات ) فليس كل ماياتي من السماء طاهرا .....
.....................
...............
سعيد بك والعائلة الكريمة

اهلا ود عكود ......عارفك ماتسكت علي الكلام ده ؟؟؟
...ود الزين اعرف ان صوتك لم ولن يبح من النداء فنحن نستجيب متي ماطرفت لك عينا ....ولكن تيقن اننا ننتظر حضورك علي كل ابواب ونافاجات المنتدي شوقا للقيا ولهفة لجديد واطمئانا علي صحة وربنا يحفظك واهلك من كل شر...
...............
...........
ولكم كل الود

ود الاستاذ ...عفوا للعودة بس عايز اقول :
انا اتكلم عن الخرطوم واسامة الرائع يحكي عن الدامر فلا غرو ان احسست بروعة الجروف ودفئها فالواصف هو قلم اسامة المبدع وانا انسان فقير الجيب والفطنة الملم بعض الحروف بعضها بعض لتعبر عن حبي للخرطوم ولكن لا وصف روعتها ...
عليه العفو قبل وبعد...
ولك حبي ولاسامة الغايب الحاضر

every morning I use to drink your tastefull coffee please keep on

الحبيب ود حبيب ....والله سعيد جدا باطلالتك الرائعة وليك وحشة ...والله اخي محمد هذا المنتدي اذاب صفة القسوة الموجودة في النفس البشرية من ساكني واهل هذا المنتدي ونظل كلنا ولن اقول انا في حالة من الفوضي الداخلية لن تترتب حتي نجلس علي ارض نحن رملها وخضرتها ومفرداتها واجندتها ....
بالله لا تكتروا الغيبة وحضورك من اجمل اشيائي لهذا الصباح لك الشكر
.................
............
ولن لقيا