فنجان قهوة

صباح الخير ايها الاحباب....نعتذر عن الغياب نسبة لزنقة شغل جامدة علي قول اهلنا المصريين ...والشكر موصول للاخ الغالي ود عكود لاتصاله الهاتفي الذي احزنني عدم تلقيه وافرحني سؤاله الدائم الاخوان...

مرحبا بكم ايها الرائعون............
فينكم ...؟ اتمني ان يكون الغياب مبرر ....وشنو الحاصل لمهدي شلكاوي ...؟الم يأتي شهر الاستكانة بعد؟....ود كرار مهدي عرفناه شهر ليك وشهر عليك يعني شغال بنظام شريحة زين بس انت وينك ؟؟؟؟؟؟؟؟؟؟
طبعا المدينة اليومين ديل امطار شديدة وجو ظريف جدا فمرحبا بالقادمين...
تخريمة :
عوووووووووووووووووووووك للكل من بنابر فنجان قهوة
...............
..........
ولكم وحشة

كيفك راشد .صراحة في حالة انكماش وانزواء تقريبا من الكل ..
خالد وينك ابو صبا ليك اشواق كتيره
يلا سخنوا القهوة الناس جاياكم ..... ااااااااااااه يا حليل القهوة وايامها
تحياتي للكل

ياااااااااااااااه مرحبا بالرائع الجمل ....وسعيداء جدا بعودتك التي ستكون سببا قويا لعودة الكل وانا اولهم ...والله كلنا في حالة انزواء من انفسنا قبل الكل ..
....................
...........
فشلت في الاتصال ولكن ساحاول الكرة (ليس مشكلة شبكة الاتصالات بل شبكتي انا)
..........
.......
فمرحبا بك
 

ود عكووووووووووووووووود فينك ؟؟
وشنو اخبار اخونا الغالي ود الزين.....؟
واخبار الغالي جني....؟
.....و...و
...........
والله للجميع وحشة أد كد هو ( علي قول المصريين)

الاخوان الاعزاء ودراشد ومحمد الجمل وبقية العقد الفريد والله مشتاقين عدييييل والواحد متقريف لفناجين قهاويكم والشوق موصول لكل المسجلين غياب مع مشاغيل الحياة وفعلا دى مامكن نصفها بحاله كسل ولكن على قول اخونا محمد الجمل حالة انكماش وانزواء (انكماش دى نقول عكسها واضح لكن انزواء دى يعكسوها كيف ؟) ربنا يجمع الشمل ويعود النشاط والمشاركات والنفافيج ذى اول واكتر شويه .
ودام التواصل
عاطف عكود

اهلين ود عكود...والله النشاط الحيوية دبت في اطراف الواحد بعد ظهور اخونا الجمل وكل الاحباب والله في البال ولم ولن يغيبوا ابدا ....
...........
.....
ولكم كل الود والحب

شكرا راشد .......وين اخونا وود حلتنا ود كرار ..وبقية الاخوان......سؤال لو ممكن
هل الحزن جميل ؟ ايه رأيكم انا لقيت فيهو كتير من الاونس والروعة والجمال
يعني يا راشد تحفظ الاحزان جوه الجوه وتعيشها ذكري حلوة في مقطع اغنية... في خيالات عابرة ... في مكان قعدت فيه مرة ......... ولحظتها ما اجمل الاحزان ولا ايه رأيك ............و ( اّه .....لو كمل الكلام .) كب القهوة

الغالي ود الجمل ...والله ياجمل معاك ومامعاك عشان عمر الحزن مابيكون جميل ..لان بعض انواع الحزن تصيب الانسان بنوع من التبلد فلا يستطيع ان يكتب ولا ان يبكي فقط احساس بجبل موضوع علي صدرك لا تستطيع ازاحته فترتاح ولا هويخسف بك الارض فترتاح ايضا ...ويبدو لي لو في حزن جميل يبقي هو الحزن الذي يجعلك تُبدع فيوقظ في دواخلك ملكة الكتابة والتصالح مع الكلمة ...وبصراحة انا شايف الغربة في الخليج تقتل ملكة الابداع ليس بسبب الغربة او البلدان انما بسبب وتيرة والتزامات الحياة ..انظر الي اروع مبدعينا عندما اغتربوا ماذا اضافو ...؟ لا شيء بل هم خسروا حتي رصيدهم القديم وهاك منهم : الكاتب المبدع الطيب صالح فشل تماما في الكتابة وانتهي به المطاف في عمود بمجلة المجلة ولم ينجح العمود (لان الاعمدة نجاحها في الايجاز والقاص ابداعه في الاسهاب والاعمدة لا تستحمل الاسهاب)...الحلنقي كتب في غربته ياجميلة ومستحيلة ووقف عليها باقي الانتاج لا يتماشي مع عطائه وملكته الفذة ...النور عثمان ابكر الشاعر المرهف (انا لم اجد له جديدا بعد سفره سوي ماضي فقط) ...التاج مكي و..و....و وكثر تساقطوا عبر ثقوب ذاكرتي الخربة .....
................
.........
تخريمة:
ممكن الحزن الجميل هو الذي يعيد الانسان لتيارالحياة بعد فقد عزيز ..فتتغير نظرته للناس وتقديره لكل من يمشي علي قدمين وانا جربت هذا النوع من الحزن
................
............تخيريمة:
ود كرار موجود والحمد لله بس شكلو مزنوق واكيد ح يرد عليك ...........

ود الجمل .....وينك؟ كبينا القهوة وشايفك كبيت الزوغة...

والله مشتتتتتتتتتتتتتتتتتتتتتتتتاقين.....

بس دخول اخر الليل بخلى الواحد يلخبط فى الكلام ويجيب سيرة الفار تانى....
اعزرونا على الانقطاع....
اخونا العزيز الجمل ...والله كتبت ربع صفحه عن جمال الحزن وحزن الجمال...بس النت وسنينوه...برجع ليكم بس متين ماعارف...

لكم الشوق

ونحن ايضا مشتاقوووووووووووووووووووون

بخلى الواحد يلخبط فى الكلام

امجد ليك وحشة الف،،، ياخى لخبط فى الكلام
حد حيقيس؟؟؟
انا اظنى داخل مش اخر الليل ده بكره ذاتووووو
الجمل الحبيب ،،،،انا للامانه ما كتبت سطر لكن تناوشني افكار تملا صفحة وربع
وكميات من ابيات شعر ورد فيها الحزن
لها ولرحلة التواصل الحنينة هذه إن شاء الله لنا عودة
وفنجان جبنة بى شمالو
وتحية محبة لى صاحب الكافيه ولكل المتوسدين اركان القهوة وضيوفها العابرين
ونعووووووووووود

الاعزاء ود كرار وودالاستاذ...لا عليكم تعالوا متي ما احببتم الحضور والفضفضة فانا يسعدني قبض بعضٍ من أثركم استزود به ليوم يأتي بعده ..وشحناً وشحذاً للدواخل التي عمارها بكم..طبعا سعداء جدا أن ينضب معين التعبير عن الحزن فهو ابدا ولم ولن يكن محمدة او احساس يعتاد المرء العيش معه وإن كان قصراً فالناس تتعايش معه ...
تخريمة:
ود عابدون شنو الحكاية ؟ والله مشاوير الليل نحن ماعندنا فيها مشكلة بس خلي بالك من ناس الدوريات....
ود الاستاذ طبعا حجتك الابدية فرق الوقت ...ياخي يقطع الوقت ويقطع سنينه الكان السبب في تغيبك عنا...
......
....
ولكم محبتي

صبحكم الله بالخيرات....
.....
...
كيف ارتحالك في العشيِّ
بلا حقائب أو لحاف ؟
ترتاد أقبية المكاتب والرفوف السود
والصحف العجاف
زمنا يمصّّ الضوء من عينيك
يصلب وجهك المنسيّ في الدرج العتيق
أثرا كومض شرارة تعبى على خشب الحريق
كيف ارتحالك أيها المصلوب مثل شواهد الموتى
بزاوية الطريق
سكن السحاب ومرّ طيفك من جديد
نثرته كفّ البرق حين تلاحق الإيماض
وانعتقت شرارات الرعود
أرخى وأزهر ثم طار زنابق كالفجر لامعة الخدود
حلق المرايا رنّ كالناقوس
وانفرطت ملايين العقود
فإذا هممتُ توارت الألوان
وانتصبت شبابيك الجليد
أنا في الرياح مسافر يلقى على الأبواب
جارحة الردود

البحث عن الحزن كمصادر احبتي اسهل عن البحث عن الفرح ربما السبب أن الحزن يقعد علي مخارج النفس ويسكن في دواخلها فلا مفر إلا الحديث وفي نظري الفرح احساس مهما تم تعميمه فهو يتصف بنوع من الخصوصية داخل جدران النفس وتحاول او نحاول جاهدين استبقاءه في الدواخل لانه يزين جدرانها فرحا ويكسو الملامح زهاءاً...
تخريمة:
الشاعر الفذ مصطفي سند اظنه اخر الشعراء القابضين علي نواصي الحروف والمُشتوُن بلهبها ..وبرضو ياود عكود ام درماني ..لا اود العودة لعنصرية المدن بقدر حرصي علي حفظ الحقوق ...
..........
.....
وصباحكم برائحة البرقوق وطعم الفرح

راشد يا رائع
صدقني راجع ليك بكل فرح الدنيا وجمالها ...............وحزنها وعذاباتها.........
وبهجتها وسرورها

ونحن نلتقيك علي بوابات الدنيا ونفاجات المنتدي فاتحين الازرع والاكف ممدودة للصفح والتصافح ...
وفنجال قههوتنا
وتبروقة دروشنا
....و...
...و...و
وحتي عليوة وامسيسي
....
..
ابقوا داخلين

راشد كتب:صبحكم الله بالخيرات....
تخريمة:
الشاعر الفذ مصطفي سند اظنه اخر الشعراء القابضين علي نواصي الحروف والمُشتوُن بلهبها ..وبرضو ياود عكود ام درماني ..لا اود العودة لعنصرية المدن بقدر حرصي علي حفظ الحقوق
وصباحكم برائحة البرقوق وطعم الفرح

العزيز الراقى ودراشد
ومن حفظ الحقوق ايضا امدرمان حقت الجميع يعنى مدينة كل سودانى وهى السودان المصغر فلم تكن ملكا لفكر ادبى او حزب سياسى او لونا فنيا او رياضى او قبيلة بعينها فهى بوتقة انصهر فيها كل السودان ( فكانت هى امدرمان) .
وصباحك بطعم البرقوق ورائحة الافراح
ودام التواصل
عاطف عكود

صباح الخير ود عكود ....شايفك عشمان في طعم البرقوق ..؟ بس اجمل برقوق هو المصري (طعما ورائحة ) ....أي والله ام درمان حفنة من طين كانت اساس كل العواصم الاخريات ...ففيها من كل قبيلة أثر ومن كل عادة حميدة وموهبة نصيب ويكفيها فخرا ان من رحمها ولد النيل العظيم.....
فكانت ثمرت هذا التزاوج والتلاقح جيل من الافذاذ يعدُ ولا يُحصي ..
............
.......
والحديث يبداء و لاينتهي

Hi whenever I open this forum I found myself in the coffe net if it is not the high blood i Will stay in it forever and I am afraid that most of the members do not want to share a cup of coffee due to high blood age With my best Rgds

الغالي ود حبيب ....ولو بيدنا لاستبقيناك دهرا من الزمن دون كلل او ملل علي بنابر قهوتنا وتسعدني مشاركاتك الفاعلة علي الصعيدين الاجتماعي والمهني في المنتدي وحقيقي مجهود تشكر عليه ...
تخريمة:
ساهمس لك سرا ود حبيب انا لا احب القهوة كثيرا ولكن اعشق طقوسها ..
.............
.....
ولك كل الود

* صوت مجلجل هاتفنى البارحة او قبلها ،، العزيز حامد محمد حامد من بورسودان الحنينة،،لازال يملأ الاثير بضحكة عالية رنانة،، طمأننا الرجل على والده وسعدنا بسماع الصوت،،ايام يا حامد ولازلت فى حالة من الفشل فى جر كراعو لى هنا
** السائلين عن مهدى ،،،من المتوقع رجوعه للخرطوم اخر الشهر إن شاء الله ونشتاق من حسه لظهور مهدينا اون لاين،،،،عقبال رجوع جنى
** وصل الديار حبيبنا بابكر يوسف،،، فى زيارة تفقدية للجالية البحرية فى الولايات المتحدة
ودام التواصل بايتها شكل ومن ايتها بوست ،،،

شكرا خالد لحضورك المبكر لفنجان قهوة فإنت عندك ماستر كي ..والله سعداء بجملة الاخبار دون تخصيص ...نعم ايام لا تنسي في صحابة مجموعة من الحلوين اصطفاهم الزمان لنكون بينهم في مكان واحد نسعد بمصاحبتهم ....
هو فين بابكر يوسف ...؟ اخر مرة شفتو كان مع حاتم في صورة واحدة ...
مهدي شلكاوي يبدو لي بقي دوامو شهرين هناك وشهر هنا..
............
....
شنو اخبارك ابوصبا ...؟ (علي كل الاصعدة)..

العزيز راشد....
جذبتني رائحة قهوتك هذا الصباح فقلت كدي النبنبر - ونحي اولا ضيوفك الكرام وناخد لينا رشفه رشفتين من البكري علها تعدل هذا المزاج ...الخرب وكما ذكرت هناك ركود وانتظار وترقب فهما تاني بنفسك عن السياسه ولكن لا تستطبع ان تبعد نفسك عن هموم الوطن.علي كل الحياة تمضي والامس مضي والمؤمل غيب فقط اتمني ان يسود الؤئام ولا تتحكم في افعالنا شريعة الغاب فكفانا حروبا ودماء رجاء واحد اطلبه من من يؤل اليه الامر ..افرح واحكم غني وارقص ماشاء الله لك فقط اعيدوه لنا وطناواحدا كما استلمتموه واتركو للاجيال القادمه ان تقرر المصير...
اسفي لكنها زفرات ..
اعد باني لن اعود لمثلها فما تخافو
عبدوس....

الغالي ود الزين ....والله انا سعيد بتلكم الشفافية التي تكلمت بها وهذه الزفرات هي القيمة الحقيقية لجوهر هذا المنتدي وماهذه الزفرات إلا فضفضة تُثقل الدواخل ....واريد ان اؤكد ان حضورك ابدا لم يكن ولن يكن ثقيلا علي القلب بل كثيرا ما اجوب نفاجات المنتدي علي اقبض علي أثرك او اقله اعرف اخبار أين ؟ وكيف؟ ومتي؟ وكل علامات الاستفهام التي تشغل البال....
....................
....
تخريمة:
نعم والله حلمنا وطن واحد نتقاسم همه ...دون حلم بجاه او سلطة...
تخريمة1:
فين جني يااخوانا ..؟ ليه وحشة
عليه بنابرنا تزدان محيطاتها بحضوركم الحلو فأنتم اصحاب الدار واهل الدار وضيوفها في آن..
ولكم وحشة

ود راشد
اهل المنتدى الاحباب
كيف حالكم علكم طيبين .....والله ياود راشد عرفتها الشغلانيه بقت شهرين وشهر . وشهرين والله عينك ما تشوف الا النور ما علينا اهو قربت اسبوع تاني وبرجع انشاء الله ومن نفاجات الجبل ببدا التواصل تحياتي لك ولكل الاخوان ..

مهدي شلكاوي