شخبط شخابيط لخبط لخابيط..غايتو جنس غايتو

تسلم جدنا الحبيب ..والله سعدت كثيرا بلقائي بعابر وربنا يوفقه ..
الحبـــــــــــــــــــيب ود فراج يا لروعة قلمك وما يسطر ويا لحرقة القلب عندما تغيب دهورا هي كذلك لانو حساباتنا معاك (الثانية ب سنتين) منور يا سيدي وفي انتظار الدرر
الحمد لله رغم ان عدد المشاركين قليل الا اننا نجد في التواصل منافعه التي تعرف وبارك الله في اخوانا ابراهيم خير واحمد محمد لحركتهم الكتابية وتناولهم لشتي المواضيع
عودا حمديدا ..يلا وارح داخل

كسرة ما ثابتة
انتو موضوع خط هيثرو العند الكابتن داااااااااااااااااااااااك اخبارو شنووو؟

عزيزنا وحبييبنا ود فراج..تشكر يا امير وكله من ذوقك يا اصيل..كان لقلمك وتواجدك في هذا المنتي وحشه..
نتمني ان ندوام جميعا ولو بهمسه...
الجمل تسلم يا حبيب..عطبره مولعه ما تزيدها حطب...اجتهد لينا في راشد..بعد داك نكوسهم نفر نفر...
عبدوس

كل الود لك عمنا الكابتن عبدالرحمن الزين ..

حبيبنا كابتن الجمل .. كيف لي أن أجافي قوم يكون الحب والأحترام مبادئهم ..!! وأعظم لك التقدير وأنت تسهم بشكل كبير في لم شتاتنا وشعثنا .. وهذا حال النفوس الجميلة , فهي لا تحيا ولا تعيش الا في جو الألفة والود .. حفظك الله ورعاك

محمد احمد علي فراج كتب:

حبيبنا كابتن الجمل .. كيف لي أن أجافي قوم يكون الحب والأحترام مبادئهم ..!! وأعظم لك التقدير وأنت تسهم بشكل كبير في لم شتاتنا وشعثنا .. وهذا حال النفوس الجميلة , فهي لا تحيا ولا تعيش الا في جو الألفة والود .. حفظك الله ورعاك

الاخ الفاضل ود فراج شكرا ليك يا حبيب بان لبيت نداءنا وعدت الينا بكلماتك الجميلة النابضة بالمحبة والتقدير والاحترام ولكننا ما زلنا نمني النفس بكثير منك .
هناك الكثير من الصفحات التي هجرناها وانت منشئها خاصة تلك التي كنا نتناولها في رمضان...وبمناسبة رمضان (الما) شربنا فيهو الجبنة مع ود راشد فيا ود راشد اين انت ......... ممكن نستعين بحبيبنا خالد للاجابة
ود عكود عووووووووووووووك ليك ولكل الرواد

كتب حبيبنا الجمل...
فيا ود راشد اين انت ......... ممكن نستعين بحبيبنا خالد للاجابة....

خالد ظهر اخيرا...ود راشد باين عليهو حنً..بتشديد النون- لي ايام الغياب..والا يكون معتكف يا ربي زي صاحب الدكتور صاحب ود عكود... حد جاب سيرة الكاف هنا..
مشتاقين لي طلتك.....وبس
عبدوس

عبد الرحمن الزين2 كتب:
خالد  ظهر  اخيرا...ود  راشد  باين عليهو  حنً..بتشديد النون- لي ايام الغياب..والا يكون معتكف يا ربي  زي صاحب  الدكتور  صاحب  ود عكود... حد  جاب  سيرة  الكاف  هنا..
عبدوس

قلت لى ، هو بالله صاحب الدكتور معتكف ، عشاااااان كدا!!!!
وأنا أقول شايفو وين ؟ شاااايفو وييييين ؟؟
ودام التواصل
عاطف عكود

عاطف عكود كتب:

عبد الرحمن الزين2 كتب:
خالد  ظهر  اخيرا...ود  راشد  باين عليهو  حنً..بتشديد النون- لي ايام الغياب..والا يكون معتكف يا ربي  زي صاحب  الدكتور  صاحب  ود عكود... حد  جاب  سيرة  الكاف  هنا..
عبدوس

قلت لى ، هو بالله صاحب الدكتور معتكف ، عشاااااان كدا!!!!
وأنا أقول شايفو وين ؟ شاااايفو وييييين ؟؟
ودام التواصل
عاطف عكود

اللهم إني صائم .. اللهم إني صائم ... اللهم إني صائم ... أعود إليكم بإذن الله مع آخر نصائح صديقي الدكتور لكم بعد إنقضاء العشر الأواخر من الشهر الفضيل .. جعلها الله أياما مباركة ودعواتنا لكم في الحل والترحال أن يهديكم الله إنه نعم الهادي ونعم النصير ...

الرشيد شمس الدين

رشدي  حبيب الملايين...طلتك  براها   بالدنيا...ليك وحشه  يا  امير...ود عكود  الدنيا  اعتكافات وعقاب  شهر  بالله ارفع رجلك  من الابنص  شوية..كلها  عشره ايام.. شايف الجمل  بولع  في النيران  ما   صدق  مرق  منها  سالم...

جدو ابراهيم...مستشار المنبر لشئؤن الإكتئاب...في اي  علاقه  بين الاعتكاف  والإكتئاب  ؟؟؟غير  الالف واللام وحرف الكاف  ؟؟؟؟
محبتي.. متنمنيا  للجميع  اعتكافا مستجاب الدعووات... مع تحيات زاكيات..
عبد الرحمن

عبد الرحمن الزين2 كتب:
...ود عكود  الدنيا  اعتكافات وعقاب  شهر  بالله ارفع رجلك  من الابنص  شوية..كلها  عشره ايام..
عبد الرحمن

وانت الصادق ..
انا عشان الكلام دا مشغل الابنص شمومه بس يعنى بالعربى كدى Touch-move
وتقبل الله منا ومنكم صالح الاعمال
ودام التواصل
عاطف عكود

[quote="الرشيد شمس الدين عبدالله"]

اللهم إني صائم .. اللهم إني صائم ... اللهم إني صائم  ... أعود إليكم بإذن الله مع آخر نصائح صديقي الدكتور لكم بعد إنقضاء العشر الأواخر من الشهر الفضيل .. جعلها الله أياما مباركة ودعواتنا لكم في الحل والترحال أن يهديكم الله إنه نعم الهادي ونعم النصير ...
الرشيد شمس الدين

لينا وليك
عزيزنا رشدى تقبل الله صيامك وقيامك وصالح أعمالك . وما تنسانا من صالح الدعوات
ودام التواصل
عاطف عكود

شخبطتات في شكل  قصة  أو  قصة في شكل شخبطات...............
                        المنحوس                                    
في يوم  ولادته  توفيت الداية وماتت جدته بعد أسبوع ..  وأصيب   شيخ الحلة  بالشلل....وقيل ان بقرة العمدة اللبونه المحبوبة   ماتت في نفس اللحظه التي اصدر فيها صرخته الاولي ..
..المنحوس..المنحوس ..المنحوس ..النحس المنحوس  ... كان يسمعها ليل نهار..مرات قليله يسمع اباه يقول يا  ناس  تفاءلوا   بالخير تجدوه
...مع كثرةالحديث عن نحسه اقتنع انه  فعلا نحس و  منحوس...
دارت الايام ونحسه يلاحقه....اخيرا تخرج في الجامعة..وعزي الكثيرين ذلك لأن إدارة الجامعة خشيت من تواجده...فقد قيل ان أغلب الاساتذة الذين درسوه  في مراحل التعليم المختلفه قد انتقلوا الي رحمة مولاهم..
حتي المشرف علي رسالة تخرجه صدمته عربة وهو في طريقه الي الكلية..                                                                  
في طفولته حاولت امه ان تقنعه انه غير منحوس...وأستسلمت اخيرا عندما ارسلته وهو ابن العاشرة  ليجلب لها لبنا من الجيران..في تلك الليله قرص  ثعبان معزة الجيران   ...واسلمت الروح..
بعد تخرجه..حاول  ان يجد عملا  ..حفيت قدماه..دائما.. في اخر لحظة. يعتذرون اليه.. ...اخيرا  بعد اربعة  سنوات مع العطالة ..جاءه الفرج..تاشيرة راعي للسعودية   دفع فيها ابوه كل ما يملك  ...
انهالت عليه التهاني..اغلبها من اناس ما صدقوا  انه  ..اخيرا..سيغادرهم يحمل نحسه الي خارج الديار..علق احدهم الله يستر علي الكعبة..وقبر   النبي ..عليه الصلاة والسلام .                                            
هذه المره..أناخ له القدر سرجه ..سافر  ..كد وأجتهد... من ريع أربع سنوات أستطاع ان يوفر  ثمن  حافلة من نوع الهايس   ..أرسلها  بالباخرة  وصعد علي ظهرها....ارسل الي ابيه وامه ليحضرا الي لقائه  ويسافروا جميعا بالهايس  إ لي الخرطوم......
سارت الامور كما يشتهي...كم كان ابوه  سعيدا...تحفظت امه ولكن لم  تبد قلقها  حتي لا تحرمه  فرحته...
في طريق العودة حمل معه بعض الركاب..علي أساس انهم من العائلة...حتي يغطي بعضا  من  نفقات الطريق....
..انطلقت الحافلة...  وعلي مشارف الخرطوم...انفجرت  احدي إطاراتها وانقلبت لاكثر من ثلاث مرات.........
..............................................................................
قال له الطبيب المعالج في مستشفي الخرطوم بحري بعد ان افاق من اثر المخدر...... ..  يؤسفني  يا أ بني  ان ابلغك  لقد  مات كل ركاب الحافلة ..امك ..ابوك..والركاب جميعا... كلهم ماتوا....انت الناجي الوحيد. انت محظوظ حقا محظوظ.....                                              
يا الله هذه اول مره يسمع هذه الكلمة...نعم انت محظوظ رددها الطبيب المشرف...انت حقا محظوظ ...فقط يؤسفني ان اقول لك اننا اضطررنا ان نبتر رجلك اليمني من الفخذ وقدمك اليسري من الكعب..  ويدك اليمني من مفصل الكتف.. لان العظام مهشمة تماما.....انت  حقا محظوظ......  عمرا جديدا  قد  كتب لك.....حظك من السما...

عبد الرحمن......

ياخ ......دي الفتها براك ولا لقطها من وين يا كبتانو ....والله العظيم دي قصة تعمل اسهال وانتفاخ في اللابوريا ..ياخ ده منحوس لدرجة انو انحس من النحس ذاتو
اقترح ان يعدم في ميدان عام بعد حادث السيارة الذي اصابه وان يقطع ما بقي له من لحم وتنشر عظامه ويقسم للكلاب
زعلان منو شديد
تسلم يا كبيتانو اختيارك ما بناباهو لكن ...........
دام الوصل

العزيز الجمل تسلم من كل سؤ ببركة العشر الاواخر...
بكل اسف من تأليفي في لحظة زهج وعدم موضوع..زي ما بقول عابر...
معزتي..
عبد الرحمن

كل عام وانتم بخير .....
لا والله ياود الزين ...مافي أدني فكرة عشان الواحد يحن للغياب ...وانت اعرفنا بالشوق الذي يدب بأطراف المشاعر قبل الدواخل ..والفرد منا بينكم يتلمس ملامحكم خوفا من شبح الغياب ...............
......
وتقبل الله منا ومنكم الصيام والقيام

يا هلا يا هلا بالعزيز ابن راشد..رأيت هالة من نور تشع من جنبات الحاسوب حتي قبل ان ادخل المنتدي فقلت قطعا حلت علينا بركة العشر الاواخر وشرفتنا ليلة القدر حتي قبل موعد حلولها..ولم يكذب ظني دخلت فوجدت اثار كي بوردك فهتفت من اعماقي.. حلت بنا ولا شك بركة الشهر العظيم واستجاب ابن راشد..
نكرر الترحيب بك في ديارك وننتهز-ما انا انتهازي وكده- ننتهز لنسال فقط مالو طول الغياب..زول جرسي الجديده..
محبتي..
عبد الرحمن..

ولا زاال الادمن  مسجل  غياب..حتي مع سفر ود عكود للسودان..يعني خلونا قاعدين في السهله مع   الامطار اللي  اقل حاجه  محتاجه اعلان حالة طوارئ..لكن من يسمع مين يقدر..
ونهدي- بتصرف- الادمن القصيده التي وجدتها في منتدي الراكوبة ولا ادري من كاتبها..له التحيه...

•
•
•
•
.رئيس المنتدي ده وينو ؟
ﻻ بان وﻻ طله
ﻻ جانا يتفقد
ﻻ زارنا في الحله
ﻻ شاف وقع كم بيت
... ﻻ جاب طحين ﻻ زيت
ﻻ كفن الميتين
الماتو جوا السيل
ﻻ جابلو طوريا
ساعدنا شد الحيل
وأصبحنا نص الليل
ما جانا منك زول
وﻻ طله منك زول
فاطر في كافوري
وشعبك فطورو أنين
نايم وتتقلب
وشفع كتار صاحيين
متوسد الموكيت
وشعبك رقد في الطين
ﻻك البفرج الهم
وﻻك العلينا أمين
وﻻك البجير مظلوم
ساعة تدوربو سنين
ﻻ بتنجد المسكين
ﻻك العلينا حنين
هسه أكان تصويت
أو حتى انتخابات
كان جيتنا تترقص
تقدل مع الخايبات
خاميها مليارات
وراكبها عربيات
وعاديها سفريات
عصابة شلليات
ونحن لينا الله
عادنها بس بكيات
ﻻ عﻼج وﻻتعليم
ﻻ سكنه زي الناس
أحﻼمنا زي ركشات
وساكانا دوم كشات
ﻻ قروش وﻻ كاشات
شعبك مرق بلبوص
ﻻ خلقه ﻻ أخﻼق
ﻻ عمه ﻻ مركوب
ﻻ لحمة ﻻ طايوق
شعبك مرق ماينص
وحشاهو دوم محروق
صابر وعايش الويل
ما نصو في الغربة
والباقي شالو السيل

سلام من ارض الوطن بطعم الخريف ، الشوق مطر وناسف للانطاع لاسباب فنيه من المصدر ، لانى داخل بالتلفون والحروف عايزه ليها فحيص عديييييل على المموم مقدما كل عام والجميع بخير
كسره على قول المثل الفيتنامى البقول لو الكاتب عميان على ان القارى ان يكون مفتح او تفتيحه فى رواية اخرى ( يعنى لو فى اي اخطاء املائيه انتو اقروها صاح ) والطشاش فى بلد العمى شوف
ولحين ميسره استحملوا حتى الواحد يحل مشكله الاى باد مع شركات اااتصالات
ودام التواصل
عاطف عكود

ود عكود بلغ تحياتي لكل ال عكود..لهم محبة وبيناتنا نسب..علي فكرة...اسأل الكبار..
بلغ رسالتي الي .............

لقيط حسنات....في الخيال..


ليلة البارحة ..اصابني ارق بسبب النزلة اللعينة والتي لم تشا ان تفارقني منذ عدة ايام..نهضت من فراشي وقررت ان اشرب شيئا دافئا واعود الي فراشي.. لم يتحسن الحال فقررت ان اضيف بعضا من الممنوعات الي شرابي من باب ولكم فيها منافع...
ما بين اليقظة والدروخة ومفعول المابتسماش..رأيت ان اتصل بسيادة الرئيس..فقط اردت ان اقول له لقد حكمتنا لاكثر من عقدين من الزمان وبلادنا تتراجع اما ان الاوان لتسلم الحكم لشخص اخر...؟؟؟؟
قلت في نفسي كفاني جبنا لماذا لا احاول ان اقل له ذلك باي وسيلة .. علي الاقل لي اجر المحاولة خاصة وانا في هذه الايام - من ارزل العمر- احاول ان القط الاجر والحسنات باي طريقة ممكنه ..ومن باب- كلمة حق في وجه سلطان جائر...ومن باب من هم بسيئة ولم يفعلها فله اجر ...و احيانا لاسباب لا استطيع البوح بها .. ما تحكوها...عارف تبته غصبا عن عين اللخلفوني..ما علينا..
اترك السئيه و لكن دائما اعتقد بانها ستكتب لي حسنة..امكن واحدة ما عشرة لكن برضو احسن من سئيه..
....
لا اطيل عليكم...تحصلت علي الرقم..رن الهاتف لاكثر من عشرة رنات..قلت لن يرد علي احد..وانا أهم بوضع السماعة واتبسم في سري انه علي الاقل هناك حسنة واحدة قد كتبت لي..اذا ..هناك من يقول هالو هالو..
ايوه..
هذا مدير مكتب سعادة السيد القائد المشير رئيس الجمهورية ورئيس مجلس الوزراء و..............
.....و............و..................
قاطعت المتحدث..- وهذا ليس من عادتي -..معذرة انا اتحدث من كندا ...اجر المحادثة .ووقت السيد الرئيس...
يا اخي ممكن اكلم السيد الرئيس...
ليه لا ؟؟؟؟ لم اصدق نفسي ثواني وساتحدث مع الريئس شخصيا .. ساخاطبه سيادة الريئس..ما انا برضو بفهم في الاصول..

هالو.. اي ..اي ..ايوه قول ليهو المواطن السوداني.. سامي عبد الجبار من كندا......
هالو هالو أستاذ سامي..باين عليك نسيت فرق التوقيت......سيادتو نايم.....لكن لو اديتنا نمرة تلفونك اول ما يصحي حنتصل بيك
- اكيد حتتصلوا علي..؟؟؟؟. اكيد استاذ سامي.. ليه لا بكل سرور بس كان مفروض نسالك عاوز تتكلم معاهو في اي موضوع لكن سيادة القائد المشير رئبس الجمهورية ..........و.....و...
طلب منا الا نسال المتكلم عن الغرض من المكالمة....
هالو استاذ سامي نمرة تلفونك؟؟؟
اندهشت..وترددت هل اعطي رقمي؟؟
لم؟؟؟ لا ليس لدي ما اخشاه فانا اقطن في دولة قطعا ستحميني...
نمرتي...اكتب عندك.......................01
تمام استاذ سامي عبد الجبار.... سنتصل بك باذن الله...
وعملت السموم عمائلها.....واسيقظت ما بين الحالم والنائم واليقظان....علي رنين التلفون...
هلو....
هلو..استاذ سامي عبد الجبار...
نعم منو معاي؟؟؟؟؟
معاك مساعد مدير مكتب مدير مكتب سعادة السيد المشير ريئس الجمهورية.....
القائد.......و...و... بعد دقايق قاطعته..عارف.. عارف...ارجوك ممكن اكلم السيد الرئيس......... لحظه لحظه.. ليه لا... بس حسب البروتكول لا بد ان تتحدث مع السيد مدير مكتب السيد المشير ريئس الجمههورية سيادة ال..................................................................................
طيب طيب حولني.....
لا الخط مفتوح معاك ...نحن حنسكر انت ما عليك الا الإتصال بالرقم الظاهر عندك..نعدك لن نسجل محادثتك حسب تعليمات معاليه...
جدا...جدا بكل ممنونية...

وادير الرقم...ويرن الجرس.......... يرن يرن اربعة عشرة رنة وانا احسب في حسناتي لا شك اان سيادتو مشغول... واتحسر علي قيمة المكالمة.... قطعا لن يحسبوها علي ..سيادتو لم يرد..
اخيرا ها الو..
الو..سعادتك انا سامي عبد الجبار من كندا..سيادة الريئس انا عاوز اقول ليك.......
..معذرة استاذ سامي هذا مكتب مدير سعادة المشير................
مقاطعا...............................
يا اخي انا عاوز اكلم الرئيس ..
...الريئس مرة واحده....علي كل حال نحنا عاوزينكم ..يا مغتربين- تعرفوا انو تلفوتنا مفتوحه وانو اي واحد منكم ممكن يكلم سعادة السيد المشير السيد رئيس الجمهورية ......... وان باب السيد المشير........الخ... الخ... مفتوح لاستقبال كل من لديه مظلمه وقد اصدر تعليماته ان كل المحادثات تحول اليه شخصيا وانه سينظر في اي مظلمة من اي مواطن ولن ينام حتي بتاكد ان كل جائع قد........ وكل مريض سوف..... واستمرت هذه المحاضرة لعدة دقايق واخيرا ولمن فاض بي... صرخت ياا خي ممكن اكلمو ولو لدقيقة..
ليه لا لحظه...استاذ سامي.... هالو هالو...
واذا بعاملة السنترال في القصر تدخل في الخط و تقول سيادة السيد مدير مكتب سيادة المشير.............. ارجو ان انبهك ان الوقت المحدد لهذا المواطن وهي عشرة دقايق لكل مواطن حسب المنشور رقم...الصادر بتاريخ....... قد انتهي... ابعدت السماعه عن اذني ولكن سمعت ان . سعادة السيدمدير مكتب الريس... يقول..
معذرة سيد عبد الجبار ..بختك يا راجل .. ده انت اول مواطن اتيحت له خمسة عشرة دقيقة كامله من وقت سيادة السيد الرئيس المشير ال...........................اغلقت الهاتف..تحسرت علي دراهمي وخيبة املي ان القط بعضا من الحسنات ...
يا ربي ما بدوني حسنات اجر المحاولة رغم اني تعاطيت المكروه من باب ..العلاج...ثم الشجاعة فقط من اجل تعويض قيمة المحادثة....
ورجعت للمكروه وتعاطيته- هذه المره - عمدا....
عبد الرحمن
في الطائرة اول فبرائر 2013

معذرة سيد عبد الجبار ..بختك يا راجل .. ده انت اول مواطن اتيحت له خمسة عشرة دقيقة كامله من وقت سيادة السيد الرئيس المشير ال...........................اغلقت الهاتف..تحسرت علي دراهمي وخيبة املي ان القط بعضا من الحسنات ..

يعنى ما كلمتو    وانا حالتى  عائزة اوصيك  ليهو  
  مبروك  الالاف  الدرجن  يتربن فى عزكم  و كل سنة ، انت والاسرة  ، الاخوة  والاخوات  بالمنتدى  بخير

وأخيرا جدا وبعد طول غياب , آلاء العزيزة تظهر في الشخابيط !! أبسط ياعم ..  ياصاحب الريّس والبتعمل ليهو تليفونات أنصاص الليالي .. غايتو جنس غايتو ..
حمدالله علي السلامة آلاء وأرجو ألا تنقطعي ثانية ...

الرشيد

الاء العزيزة...طلتك علينا بالدنيا..ريس مين وبتاع مين...ده كان محظوظ بشكل انو عمل نايم...حيزوق مني ومنك ومن رشدي..الحاسدني علي مداخلتك..لاكين..اكرر لاكين..حيزوق..من سبحانه كيف؟؟؟ اقصد الريس- ما رشدي...رشدي قطعا معانا - من ضمن جملة من يدخلون الجنه بغير حساب...امين
تسلمي وكل سنه ومن تحبين بالف خير...ويدخلكم معانا الجنة بإذن الله..
عبد الرحمن

تسلم عبدوس وهذه آخر إبداعات الفاتح جبرا في ساخر سبيل :-


وفقًا لقاموس علم أصول الكلام على الإنترنت فقد تم استخدام مصطلح البنية التحتية بالإنجليزية (infrastructure) منذ عام 1927 على الأقل، وكان هذا المصطلح في الأصل يعني “المنشآت التي تشكل أساس أي عمليات أو أنظمة” والكلمة مكونة من كلمتين، الأولى هي بادئة باللغة اللاتينية وهي “infra”، والتي تعني “تحت”، وكلمة “structure” والتي تعني البنية .
البنية التحتية يمكن تعريفها بصفة عامة على أنها مجموعة من العناصر الهيكلية المترابطة التي توفر إطار عمل يدعم الهيكل الكلي للتطوير. وهذا المصطلح يشير في الغالب إلى الهياكل الفنية التي تدعم المجتمع، مثل الطرق والجسور وموارد المياه والصرف الصحي والشبكات الكهربية والاتصالات عن بعد وما إلى ذلك من مكونات توفر السلع والخدمات الضرورية اللازمة لتمكين أو استدامة أو تحسين ظروف الحياة المجتمعية وهي تمثل مؤشراً هامًا للحكم على تنمية الدولة أو المنطقة.
وفقاً للتعريف (الفوق ده) يمكننا أن نسأل أنفسنا (المسؤولين ديل خليك منهم) : هل لدينا بنية تحتية؟ ما هي نسبة ما تم إنجازه من بني تحتية خلال ربع قرن بالنسبة إلى ما نحتاجه فعلياً؟ الواقع يقوب (بدون دراسات ولا يحزنون) أن ما لدينا من بنى تحتيه لا يتجاوز الخمسة في المية مما نحتاجه فعلياً (5%) وهذه النسبة ما كان لنجنيها لولا الطفرة الملموسة في مجال الإتصالات أما بقية المجالات فحدث ولا حرج فالطرق جميعها غير صالحة للسير عليها ولا تتفق مع أبسط المواصفات العالمية (والشارع كان قعد ليهو خريفين) بعد تشييده يكون (ما خلى حاجة) ومثال واضح لذلك إمتداد شارع الزعيم الأزهري من ناحية بحري والذي تم تشييده قبل حوالي ستة أشهر فقط فهذا الشارع قد إمتلأ عن آخرة بمياه الأمطار الأخيرة إذ يبدو أن شركة (الأيسكريم) الذي وقع لها العطاء (نست) أن هنالك شيئاً يسمى (تصريف) !
أما الطرق (السفرية) فقد أصبحت تزاحم (الملاريا) والسرطان و(الفشل الكلوي) في أعداد من ترسل بهم إلى الرفيق الأعلي وذلك من فرط ما عليها من حفر ومطبات ونتؤات و(ضيق) يجعل من مسألة (التخطي) موتاً محققاً لا شك فيه .
أما الصرف الصحي فحدث ولا حرج إذ أننا كما يبدو العاصمة الوحيده في العالم التي لا يوجد بها صرف صحي (علمي) بل أن كثير من أحياء (وسط العاصمة) لا زالت تقضى حاجتها في (حفر) مما يفضي إلى آثاراً بيئية سالبة .
أما موارد المياه وخاصة مياه الشرب فلا زلنا نشرب (كدراً وطيناً) مخلوطاً بما تيسر من (الطحالب) وبعض الديدان ولا زال المسؤولون يوقعون اللوم على (العكورة) والشنو ما عارف مما يجعلنا نسأل (في غباء) : الناس في العالم دي بتشرب كيف؟
أما مجال الكهرباء فعلى الرغم من أنه يعد من أبرز مكونات البنى التحتية إلا أن مسؤولينا يريدون له أن يكون من البنى (الفوقية) حيث لا تزال عمليات توصيل الكهرباء للمنازل والمنشئات تتم (هوائياً) عبر الأعمده على الرغم من أن العالم قد تجاوز هذا الأمر من (زماااان) لأسباب واضحة للجميع .. ولأن المسألة الأساسية ليست التوصيل الأرضي أو الهوائي بل إنتشار التوصيل والإمداد (ذات نفسو) ووصول الكهرباء (المستدامة) لمعظم (إن لم يكن كل) المواطنين فنجد للأسف الشديد أن الرقعة التي تغطيها خدمة الكهرباء صغيرة للغاية (وبرضو بتقطع) !
طيب إذا كانت البني التحتية هذه تمثل مؤشراً هامًا للحكم على تنمية الدولة أو المنطقة وأنها تقوم بتحسين ظروف الحياة المجتمعية ، فإن السؤال الذي يطرح نفسو : وكت وجود بني تحتية شئ لابد منه (هل تشييد بنية تحتيه قوية) هو من أولويات الدولة؟ عشان ما تجينا أمطار وسيول ذي دي ونمنى بخسائر في الأرواح والممتلكات ؟ للأسف الأسيف فإن التوجه الكلي للدولة يقول غير ذلك فما نلحظه من (بذخ) وإسراف و(نعمة)
ومكاتب وثيرة وعربات فارهات ووظائف (ترضيات) وعقود (مليارية) وإستباحة للمال العام وعدم نية الدولة للتعامل مع قضايا الفساد بالحزم اللازم .. كل ذلك يقول أن عشمنا في أن تكون لدينا (بنية تحتية) كعشمنا في محاكمة (لصوص) خط هيثرو !
كسرة ثابتة :
لم يعترف مسؤول واحد بالتقصير الذي أفضى لكوارث الأمطار الأخيرة .. أكيد ديل (المواطنين) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

ومثال واضح لذلك إمتداد شارع الزعيم الأزهري من ناحية بحري والذي تم تشييده قبل حوالي ستة أشهر فقط فهذا الشارع قد إمتلأ عن آخرة بمياه الأمطار الأخيرة إذ يبدو أن شركة (الأيسكريم) الذي وقع لها العطاء (نست) أن هنالك شيئاً يسمى (تصريف) !
غايتو  يا  رشدي دي عمك جبرة  قلب فيها  هوبه عديل..قال ايه شركة الايس كريم..

كتب احدهم...


لقد نجح البشير الجاهل ان يخلق منا شعبا متسولا بلا كرامه وبلا مبادئ ومن الذي كان وطنا..بلدا يتزيل اي احصائية كانت حتي في لعب البلي وشليل وينو...السودان وينو اكلو الدودو..هذا البترول كان ملكا لكل السودان..صبرنا سنينا وطفحنا المر حتي يخرج..وعندما حان القطاف..سرقوه  وحولوا الاموال  الي بنوك ماليزيا   وسويسرا في حسابات خاصه..ولما فطن اخوة لنا في جنوب الوادي للسرقه...ابت نفسهم الا يتركونا وياخذوا الجمل بما تبقي من -حمل- ولا  تثريب عليهم..الان نحن نستجدي منهم  رسوم حق المرور واتمني ان يجد اهل الجنوب لهم مخرجا اخر ويحرمونا حتي من  هذا الفتات..

لعنة الله علي كل من تسبب فيما صرنا اليه

اذا صار ديدن رب البيت الرقيص......فما علي الرعية الا لبس القرمصيص

وكفايه  كده  ما تودوناش في داهية...و قبل ما الادمن يوقفنا  عند حدنا...

لسبب لا ادريه..لم اتمكن من الدخول..بعد عدة محاولات ..نجحت..ادونا فرصة نعمل فيها بطولات... رغم انو الكثير منكم حمد الله انني- تحجبت- اي تحجبت- لكني رميت القناع وساعود لاهريكم...خليت ليكم المنبر عملتو شنو..
بس قلتو بلا وانجلا...

اخر ما كتبت في الشخبطات....وغدا اعود...بإذن الله

لقد نجح البشير الجاهل ان يخلق منا شعبا متسولا بلا كرامه وبلا مبادئ ومن الذي كان وطنا..بلدا يتزيل اي احصائية كانت حتي في لعب البلي وشليل وينو...السودان وينو اكلو الدودو..هذا البترول كان ملكا لكل السودان..صبرنا سنينا وطفحنا المر حتي يخرج..وعندما حان القطاف..سرقوه وحولوا الاموال الي بنوك ماليزيا وسويسرا في حسابات خاصه..ولما فطن اخوة لنا في جنوب الوادي للسرقه...ابت نفسهم الا يتركونا وياخذوا الجمل بما تبقي من -حمل- ولا تثريب عليهم..الان نحن نستجدي منهم رسوم حق المرور واتمني ان يجد اهل الجنوب لهم مخرجا اخر ويحرمونا حتي من هذا الفتات..

لعنة الله علي كل من تسبب فيما صرنا اليه

اذا صار ديدن رب البيت الرقيص......فما علي الرعية الا لبس القرمصيص

وكفايه كده ما تودوناش في داهية...و قبل ما الادمن يوقفنا عند حدنا....