شخبط شخابيط لخبط لخابيط..غايتو جنس غايتو

التحايا للأعزاء مهدى , عاطف , خالد ولصاحب البوست عبدوس ... أتابع هذا الجدل الدكاكينى الجميل ... هل كنا نحن جزء من المشكلة ... أم كل المشكلة وهل يمكن لمن كان جزءا من المشكلة أن يكون جزءا من الحل ؟؟؟؟
أتمنى أن يسعفنى الزمن يوما لأدلى بدلوى وأؤيد هنا إقتراح خالد بعمل بوست منفصل ونريد فيه إعترافات نقدية حتى لو كانت جلدا للذات ...
عنقريب جمعها عناقريب ياخالد ولاأدرى لماذا تذكرت هنا قصة فرّاشة داخلية البنات فى جامعة الخرطوم حين سألتها الطالبة : أين ذهب سريرها ( الصحيح عنقريبها ) ... حينها أجابتها الفرّاشة :-
مرقنبو قرنبو
وللترجمة المهمة لى ناس عبدوس الفافى :-
البنات مرقو سريرك برّه عشان يقروا فيهو ......
وليدم أبدا مابيننا ..

الرشيد شمس الدين

هي لا حولا.....

رشدي البرتكانة المصنف عندنا...سابقا......حنكوش...- شفت رفع المعنويات دي كيف يا رشدي-

عاوز يشرح لي واحد متربي في ود بانقا وشرك السمك بالصارقيل في ترعة التجارب واكل ملوخية الخلا..ولسان الطير وشرك لي ود ابرق وقدوم احمر وقدوم اصفر...وكل ما يعرفه عن البحر هو ترعة الابحاث الزراعية...سافر الي يوغوسلافيا في العام 67 وكل ما يحمل في شنطته المتهالكة..بطانية مهترئة..قميص اجاد به عليه احد اصدقاء ابيه..وبنطال كان لاخيه تم تعديله حتي يغطي اسفل رجليه...

اول شي هي يا رشدي البرتكانة.. قالت مرقنبو يقرنبو...
وبعدين ما يقروا فيهو..لكن يقعدوا عليهو ويقروا

ما علينا..حبيت بس اناكفك---كعادتي--لكن الترجمة دي حقو ترسلها لي ناس العزيز الباشمهندس حيدر عليش...الله يطراه بالخير و البركة..علي فكرة قابلته في مطار الخرطوم وانا في طريقي لهولندا..ما شاء الله نيو لوك...

علي فكرة وذكر النيو لوك..يسعدني جدا عندما اقرا مداخلة لعزيز ما... اتامل الصورة... فكرة جميلة حكاية الصورة..علي يسار المقال.. اسرح بعيدا.. واتذكر... كيف كان.. مواقف له.. اجتر بعضا من الذكريات.. واحيانا كثيرة اجد انني سرحت اكثر مما يلزم... ويتم سحب المداخلة...
ولكن اصدقكم القول تلك اللحظات...من اسعد لحظات حياتي.. وكما اردد دائما اعتقد انها اخر ما تبقي لنا من لحظات سعيدة..فلقد تباعدت المسافات..وصار اللقاء اصعب مما نتصور....
اسامة العزيز..مدن ومدن.... وكتابة للحنين.. يبعد عني ليس اكثر من اربعين كيلومترا...
لا زلت اقلب مفكرتي لاجد..وقتا....واتمني..ان اجد...

معليش سرحت اوافق علي الاقتراح.....
وسابدا به الاسبوع القادم...
لنكتب
الخطوط البحرية السودانية المحدودة صندوق بريد 426 بورتسودان
رشدي ما تزعل مني..اشتاقك..
تحياتي لجميع المتداخلين...نفر نفر...
عبد الرحمن

سلام عبدوس وحنكوش منك مقبولة ... بالله كله دا عملتوا فى طفولتك فى ود بانقا ونحن طيلة هذه المدّة قايلنّك مولود فى نمرة إثنين أو حتى نمرة واحد .... غايتو جنس غايتو ... وينك ياآلاء تلحقينا وتنجدينا ...
العصفورة أخبرتنى ياعبدوس أنك ربما تأتى إلينا فى الأمارات لأيام ... أىّ ريح طيّب ؟؟؟؟؟؟
بالمناسبة ياعبدوس نحن فى إنتظار إفتتاحك للبوست الذى إقترحه خالد ونعد بالمساهمة إن مدّ الله فى الآجال ......

الرشيد شمس الدين

حبيبنا وحبيب الكل العزيز... عبد المنعم جنيدابي... اطال الله عمرك وابقاك....
خلينا نسمع عنك ومنك بانك بالف خير...كنت اتصفح قبل لحظات...نعي لسمي لك..
قطعا مثل هذا الخبر قد يزعج العديد من محبيك.. رغم ان الفقد واحد ولكن يبدو لي ان الفقيد
قد يكون من عائلتكم الكريمة...
عل كل لا نملك الا نترحم عليه ونرجو ان يتغمده الله برحمته ويلهمكم جميعا الصبر وحسن العزاء..
ارجوك راجع سودانيز اون لاين...وطمنا انك بخير
عبد الرحمن


http://www.sudaneseonline.com/cgi-bin/sdb/2bb.cgi?seq=msg&board=380&msg=1325897887

حمدا لله علي السلامة يا كابيتانو و سلامات يا الرشيد و باقي الاخوان الاعزاء.

شفت البوست في سودانيز اون لاين قبل كم يوم و بيني وبينك ما قلقت كتير فالسكند اوفسر البري دة مشروع ملياردير و الله اعلم يفارق السودان.

غايتو عشان يطمئن قلبي و بمساعدة من الاخوان عبد الرحمن محمد حسن و كركب لميت فيه بالتلفون و وجدته في اتم الصحة و افادني بان المرحوم - عليه رحمة الله - ابن عمه.

تحياتي للجميع.

سلام الى كل المحبين للسلام

وتحياتى للجميع بالمنتدى العامر

الأخ \ جنى سلامات وتغمد الله الفقيد بالرحمة

لما قريت الخبر قلت قلت أكيد فى حاجة غلط

ده جنى وأكيد عمر مديد - والعارفين ببواطن الأمور بيقولو

اليومين دى بيعمل أكيد ليهو فى عملة - تحياتى

العزيز... قبطان احمد..رشدي البرتكانة والاستاذ صلاح محمد عثمان والاخوة المتداخلون جميعا...


بيني وبينكم في الاول صدمت...وجريت علي المنتدي ولقيت الجو رائق...
بقيت امشي واجي راجع...لكن ما قدرت اعرف ولا انوم والوقت كان متاخرا جدا...
اتوكلت قلت اكيد ما هو لكن خليه علي الاقل يطل علينا يطمنا ومنها يواصل معنا المشوار..نفس الوقت نقدم له وللاسرة الكريمة تعازينا ومواستنا...اللهم ارحم
عبد المنعم جنيدابي -ابن عم عبد المنعم جنيدابي- الميلياردير- زميلنا والهم اله الصبر وحسن العزاء...
ولا حول ولا قوة الا بالله...
وليدم ما بيننا..
ونعود لنشخبط...

كما نردد دايما بدا..
العود احمد....
وهل غادر الشعراء من متردم...
كالعهد ابدا الشوق لكم لا تحده حدود..
انغرس وانبعج..والتصق بالدواخل..لا فكاك...
شوق لا تحده حدود..تابعت او بالاصح حاولت. ,واجتهدت....ونلت فتافيت اجر لا اظن انها تساعدني
ولكن قطعا لن اكون ادني منزلة..ممن سرقوا قوت هذا الشعب الصامد...
اشتاقكم..
كثيرا ما اعد ان اعود..اعلق..اكتب... وكثيرا ما اخلفت الوعد..عذري لنفسي انه لا زالت لدي خصلتان حتي اعدو منافقا خالصا...اوعدكم- ها ها..ها- ان احاول..الا اتصف بهما..
العزاء لكل من فقدنا..ولكل من فقد عزيز لديه...
التهنئه..للزيجات المباركة باذن الله..
اتمني ان يشفي الله احب الناس الي نفوسنا...اسامة والمختار..كم نحبك يا سمسم ومختار ونتمني ان يمتعكما الله بالصحة والعافية..
ساعود لدي الكثير ابني فراج..احمد.شلكاوي..الجمل..خلدي..عاطف..رشدي.. محمد عبد الحفيظ.. اسامة..ود كرار..الن.. جني..وجميع الاعزاء الذين طرحوا مواضيعا متميزة تحتاج التعليق وذلك اضعف الايمان

((((عودا حميدا كابين عبدالرحمن
عودا حميدا اخونا رشدى
عودا حميدا اخونا الجمل
عودا حميدا اخونا عبدالعظيم
عودا حميدا اخونا كابتن سيف
عودا حميدا اخونا ديجانقو
عودا حميدا اخونا ودكرار
عودا حميدا اخونا خالد عبدالحميد
عودا حميدا اخونا احمد محمد احمد
عودا حميدا اخونا يوسف
عودا حميدا اخونا ودفراج
وعودا حميدا اخونا (انا) عاطف عكود ))


رشدي اوعي فاكرني نسيت....
جدك عبودي..شفتني متشبث كيف...منكم نتعلم
قول واحد
اضافة...
هاتفني عمي العزيز من ود بانقا وهو يتابع ما يكتب في المنتدي..الم اقل لك ان الراسمالية يمكن ان تسمح لك بالاطلاع علي اسعار البورصة في نيو يورك وانت في ود بانقا...ولكن قطعا لن يعطوك ماءا صافيا ولا طريقا امنا..او كهرباء نقية...

ما علينا..
قال لي عمي ..بنتهم قالت..شالو العنقريب-السرير-..شالنو...مرقنمبو..صنقرنمبو..يقرنقمبو...
اي اخذن السرير...حملنهو...وخرجن به...وجلسوا عليه..كي يذاكروا عليه......
الذ ما في الموضوع انهن صنقرنمبو..اي جلسن عليه..يعني ما رقدنمبو..والله اعلم..
ان عدتم عدنا
بحبك في الله

عمنا العزيز....كابتن عبدالرحمن

متعك الله بالصحة...إفتقدناك كثيرا...الف مرحب بي عودتك....وفي انتظار مداخلاتك المشرفة ... مع احترامي وتقديري

عمنا العزيز جدا ....كابتن عبدالرحمن .....
ألف حمدا لله على سلامة الرجعة ... رجعنالك وكيف نرفض رجوع القمرة لوطن القمارى ؟ وإنت واحش نيل وطنّا , علينا شمتّ الصحارى !!!
نحن ياعمّنا العزيز فى إنتظار : الخطوط البحرية السودانية , ص.ب . 426 , التى كانت والتى نأمل أن تعود ... وهل من الممكن أن يعود السودان وقد تناقلوا النبأ الأليم على بريد الشمس فى كل المدينة إذ غيّب الموت الفاجع مساء البارحة الهرم الضخم وفنان أفريقيا الأول الدكتور الموسيقار ...[u] الفنان الفنان محمد ردى[/b] ... ألف رحمة ونور تتنزّل على قبره .... كيف لنا أن نتخيّل السودان دون قيثارته النبيلة ؟؟ ياللوجع القاتل !!!!

الرشيد شمس الدين

الرشيد شمس الدين عبدالله كتب:الموسيقار ...[u] الفنان الفنان محمد ردى[/b] ... ألف رحمة ونور تتنزّل على قبره .... كيف لنا أن نتخيّل السودان دون قيثارته النبيلة ؟؟

اللهم ارحمه رحمة واسعه وتغمده برحمتك.

الرشيد شمس الدين عبدالله كتب:
غيّب الموت الفاجع مساء البارحة الهرم الضخم وفنان أفريقيا الأول الدكتور الموسيقار ...[u] الفنان الفنان محمد وردى[/b] ... ألف رحمة ونور تتنزّل على قبره .... كيف لنا أن نتخيّل السودان دون قيثارته النبيلة ؟؟ ياللوجع القاتل !!!!

انا لله وانا اليه راجعون
لحن وطن وصوت امة
الا رحم الله محمد وردى واللهم اسرته والشعب السوداني الصبر الجميل
وانا لله وانا اليه راجعون
عاطف عكود

ونواصل الشخبطة فى بوست عمّنا عبدوس العائد الغائب فى الركائب ... وهاهو بابكر سلك ثانية فى حديثه المهضوم لوالى (الخرتوم ) ...
فإلى سلك مع صادق التحايا ..

الرشيد شمس الدين

____________________________________________________________


• نجي لشمارات والي
الخرتوم
• كان شفت يا والينا برد امس واول امس ده طير الباعوض
• الناس كلها مبسوطه من الوﻻيه الجابت البرد الطير الباعوض
• مجهوداتكم مقدره يا والينا
• كل شئ جائز يا والينا
• وكان شفت يا والينا بقينا نستغرب في مواهينا
• بتكفينا
• كيلو اللحمه بتسعه وعشرين
• وكيس العيش بنحشيهوا لطفل في الروضه يعمل بيهو سنده
• ومواهينا بتكفينا يا والينا
• تقول لي حاوي يا والينا
• حاوي رب اﻻسره
• والينا يا والينا .... داير اقول ليك كﻼم سرّي
• شفت ................
• والله العظيم
• الله يكتلني
• وحيات كتاب الدين
• لكن منو البقول البغله في اﻻبريق !!!!!
سلك كهربا
ننساك كيف والبغله طلعت من اﻻبريق وقفلت
الطريق الخوف تقطعوها ايصال يا والينا
والي لقاء
سلك

متعك الله بالصحة واتم عليك نعمته اخي القاريء ..الف سلامة علي عودة الاخ الربان
بالله يا الطير المهاجر للوطن ..زمن الخريف..
هو جيل يعرف ماذا يكتب
لا حول ولا قوة الا بالله ..انا لله وانا اليه راجعون

الاعزاء..جميعا...
اعاهدكم الا تطول غيبتي..الا ..الشديد القوي...ودي ما فيها مباصرة...
نعم يا رشدي..رحل..نعم يا عاطف...احمد الكابتن..اضف هذا اللقب الي cv هل لا زلت صامدا لله درك ..
ابني محمد فراج شكرا لكلماتك النظيفة..
الجمل..كم اشتاق اليك...
نعم رحل يا رشدي..رحل الذي علم هذا الشعب ان يهتف من اعماقه...
ابدا ما هنت يا سوداننا..سوداننا يوما علينا...
رحل وغاب الذي نجلس في حضرته في غرفة الضابط التاني عبد الرحمن الزين في اوائل السبعينات علي ظهر الميمونة شندي..ادخل غرفتي بعد نهاية الوردية الساعة الرابعة بعد الضهر لاجد عبد اللة جاه الرسول والمرحوم عبد العزيز وعلي النور..جالسين بابرولاتهم في ارضية الغرفه... اقول لهم- وانا لا اعني اي كلمة اقولها...دي وكالة من غير بواب...يلا..عرض اكتافكم... والله عندي شغل لازم اقفل حسابات الشهر...
يقول لي المرحوم عزيز وهو يدري اني لن اخزله.... بس عبد الله نفسو يسمع واسفاي....
واسفاي...
..تنطلق من المسجل الكبير ذو الاطارات....ارادة المولي ارادتني وبقيت بحار..العشاء يا جماعة...ونصل الصفرة..ونعد عم احمد باننا لن نتاخر غدا...
الف رحمة ونور...كنا نتمي ان تغني لربيعنا القادم..باذن الله..سنتذكرك..
محبتي
عبدوس

تحيتى للجميع دون فرز
نبدأ من وين من ساعة مرقنبو ولا بعد دخلوه وان شاء الله نجحن .. ودا المقصود
وكلوا عرفتو دون قاموس الا قدوم أصفر وأحمر ( انجليزى يا مرسي )

ثم نعود للحزن الذي لم يبارح افئدتنا وكاد يدميها .. وآخرها رحيل وردى الوطن .. وردى السامق كنخيل بلاده .. والذى ظل قوياً برغم المرض .. مودعاً جمهوره فى حلقات توثيقية رائعة .. وداعاً يا سحاب صيف مرت .

متعكم الله بالصحة والعافية جميعاً

آلاء، شخصيا!!!
ايه النور ده،، بركة المشاغيل انقضن، اسعدتنا الطلة والبركة فيكم فى وردى
تحياتى،،لولا المعايش لكنت قاعد

طلة صغنونة بس عشان نرحب بعودة الاء...يا مراحب..
عبدالرحمن

قدوم اصفر واحمر دي انوع طيور طارت وما عاد ترجع زي ما طار كثير من سوداننا الحبيب اختنا الاء انشاء الله ادوم التواصل بين اهل المنتدى....حمد الله على السلامه

العزيز الكابتن..سيف..متعك الله بالصحة والعافية.. اتمني من المولي القدير ان ينعم علي المارشال ملك البحار..العزيز مختار بالصحة والعافية..هاتفته اول امس وهو بحمد الله في معنويات عالية كعهده ابدا...
اما بخصوص حبيبنا رشدي فهو مقتنع انو اصغر مني بكتير..وانا احب ان اتركه يعيش هذا الوهم..لكن يا ابو السيوف 62 دي كتيرة شوية انا يا دوبك الشهر الفات احتفلت بعيد ميلادي الاربعين..وبالهجري كمان لانو يوم الميلاد مكتوب في المصحف..يعني ممكن تتطرح كمان 450 يوم الفرق بين الهجري والميلادي وما تنسي كمان تتطرح SUNDAYS AT SEA


العزيز المهدي..ده انت طلعت عجوز بشكل..لسه فاكر قدوم احمر وقدوم اصفر وود ابرق ومرت ود ابرق و كداد الدواك..هذه الطيور كانت الغذاء للالاف من اهل بلدي في الخريف عندما كان كل شئ جميلا واخضرا وصفيا ونقيا وطيبا طيبة اهل بلدي..

الف رحمة ونور علي قبره..قد علمت ان فنان الشرق الكبير ابو الحسن مدني انتقل الي رحمة مولاه..اللهم ارحمه وتغمده برحمتك فقد كان يرحمه الله نقيا وطيبا ومخلصا..
احب فنه ووطنه..هكذا يرحل المبدعون في صمت لا يوازي العطاء..
لك الله يا بلدي وليدم ما بيننا كما يقول صديقي..
فات علي ان اقول يا كابتن سيف..ان اشد ما يؤلمني عندما اطالع الصورة المذكوره..كم كنا نتمني ان يكون معنا المرحوم كابتن عثمان عبد الله..الكابتن عمر داود الخليفة..علي فكرة كابتن سيف الصوروة اخذت عندمنا حضرنا لرييكا لامتحانات قباطنة اعلي البحار في يونيو 1975 وليس 1972
وبرضو تقول لي زهايمر..
محبتي
عبد الرحمن الزين

زمنكم زمن الخير والبركه والله كبتنا العزيز شن جاب لى جاب ...لكن والله كان طرحنا
فرق السنه الهجريه والصن داييز بتبقى زولنا عديل كده انت قريت سادسه ما كدي, والله الباشمهندس الرشيد ما ليه حق شاني عليك حمله ساكت هو من زمن رابعه اوليه زمن ناس
الكشكول وسليمه بائعة اللبن والفيل والخياط وطه القرشي مريض...الله ادوم الود بينا وبينكم واديكم الصحه والعافيه..

وكما قال حبيبنا مهدى عثمان شلكاوى :- ( زمنكم زمن الخير والبركه والله كبتنا العزيز شن جاب لى جاب )
أرجو ياكابيتانو بعد أن تتذكر وتنتهى من كتابة بوست ألخطوط البحرية السودانية .. ص.ب. 426 .....
أن تتحفنا ببوست جديد عن :- زمنكم .. زمن الخير والبركة ... وأنا متأكد أننا سنستمتع بالعجائب لأنه ماكنا نسمعه عن زمنكم يشيب له الرأس .. أرجو ألا تبخل علينا ياعمّنا ..

الرشيد شمس الدين

المهدى عثمان مصطفى كتب:

الكشكول وسليمه بائعة اللبن والفيل والخياط وطه القرشي مريض..

مهدى!!!!!!! عرفت الحاجات دى من وين؟؟
اذن ياخوى انت لا دفعتنا ولا قريب ذاتو،،،حسه خليت لى صلاح الزيداب شنو؟
بكرة تقول لى لبسنا جلاليب فى الاولية
وفى القولد التقيت بالصدّيق**ياله من فاضل،صديقى