شخبط شخابيط لخبط لخابيط..غايتو جنس غايتو

الحبيب الجمل ( وين مسجل غياب من المنتدى ومقفل القزاز للطيش )حلوه الرواد وحلوه بركة الأكباد والتذكرة التانيه ليك ، إها قصرت معاك
عاطف عكود

في وداعك يا الحنينه
الا ثنين 4 مارس 2013
ميناء رابغ- غرفة الماكينات- 11:30 ليلا
الناقله شيبه
اصلي منك وانت مني يا نميم ليلي وحجايا
ويافرح غطي الاماسي ويانسيم عبق سمايا
ومن سفر ليلي الطويل ياك مرسي الهم معايا
كت بجيك والدنيا هاجعه واشكي ليك المي وعنايا
انت لي قلبك يواسي والقي في حضنك دوايا
وانت يا الطيبه الحنونه كنت دايما لي مرايا
كم صبرت وكم سهرت في سبيل ابلغ منايا
لا تعبت ولا فترت وبيك ما خارت قوايا
السيده بت عبد رحماااان انسانه لي حد النهايا
معجونه من طينة حنان ورافعه توب العفه رايا
مفروده للفرح امنيات منداحه زي عطرالصبايا
فيك براءة اطفال وعزه وفيك تتقال كم حكايا
مين دا شافك ولا عرفك الا وافتقدك معايا
يوم فراقك ويوم رحيلك عمت الاحزان دنايا
مافي يوم ذكراك غابت من خواطري ومن رؤايا
ولا طيف لقياك مره وكم تمنيناهو غايا
الله يجزيك كم بزلت لينا من معروف سجايا
ما قبيل قالوها كلمه وجاتنا في اصدق روايا
من يبر والديهو فاز ونال من الرحمن عنايا
ومن يبر بي امو فاز ونال من الرحمن عنايا

السلام عليكم ورحمه الله عفوا القبطان عبد الرحمن اضفت شخبطاطي عندك للك وكل المنتدين عاطر التحايا وخالص الود

حبيبنا عبدالرحمن محجوب , لك صادق التحايا والبركة فيكم فى فقد الوالدة الحاجة الراحلة ولقد أبكتنى أبياتك وذكرتنى فقد أمى الجرح الذى لا ولن يندمل , رحم الله أمهاتنا واباءنا ... فقد الأم هو أن تفقد نفسك وتفقد البوصلة ويموت فيك كل أمل فى الحياة فقط تنتظر متى تلحق بها ليضمكما نفس المكان وتلك تصبح هى السعادة الوحيدة ....
لك الود عزيزنا وجعلها الله اخر الأحزان ...

الرشيد شمس الدين

ابن بار يدعوا لهم
لهم ألرحمه والمغفرة ، اللهم ارحمهم واغفر لهم وأدخلهم فسيح جناتك وارحم كل امواتنا وأموات المسلمين .
عاطف عكود

الابن عبد الرحمن ود ام عبدرحمااان...التحايا العطرة..بيتك ومطرحك وتشرفني طلتك..
لها الرحمة ولا تنساها وتنسانا من صالح دعواتك..اجرا ورحمة ومغفرة باذن الله..
عبد الرحمن..

دمتم احبتي وبكم كان العزاء ولكن يظل السؤال عزيزي الرشيد ماذا تبقي من ضياء الفجر في عين المدينة؟ وانه والله لم تخطئك النائبات اذا هي اصابت من تحب........ ولكن لا نقول الا ما يرضي الرب اللهم اغفر لهم وارحمهم واجعل الجنة دارا لهم يارب العالمين. مع فائق الود

كان صديقي وصديق الكل ابن امي وابي..الراحل الخالد اصيل.. يندهني وهو يضحك..عبداااراحمااان.. اخيرا حولها ل عبدوس...و حولها عليوة ومختار الي راخو...
ابني عبدرحمن محجوب يوسف مالك يا ابني تقلب علينا المواجع....
الرحمة لمن اختارهم الله الي جواره...ونعم الجوار..
محبتي احتراماتي ودوموا ل..من يحبكم ابدا...

عبدوس ؟ راخو..عبدرااحمان الشهير بعبد الرحمن الزين..في هذه الديار يطلقون علي ابي...ABBY ابدل.. ABDEL ولا اجد لها طعما...

عبدالرحمن أبى .... حلوة والله !!!! ....كنت أعتقد إنك عمّو عبدوس ولكن أبى احلى مارأيك حبيبنا عاطف حمد خوجلى ؟؟؟

الرشيد

الرشيد شمس الدين عبدالله كتب:
عبدالرحمن أبى .... حلوة والله !!!! ....كنت أعتقد إنك عمّو عبدوس ولكن أبى احلى مارأيك حبيبنا عاطف حمد خوجلى ؟؟؟

الرشيد

عبد الرحمن الزين2 كتب:
يبدو يا صديقي رشدي ان الرماد بهدل حماد..معلومات عمنا الصادق صحيحة مية المية واقدم اعتذاري...
بس اظنو لمن الصادق التحق بالبحرية انا كنت في الروضة class A كمان بتذكر يا رشدي انك كنت قدامنا class B وكمان كنته قاعد تدقنا وتاكل فطورنا..وعاطف ممكن يؤكد هذه المعلومة..
محبتي وتقديري...عبودي..ابي..

الغالين رشدى وعبدوس الشباب شباب الروح ( كسير تلج وكدا ) و Class A ام Class B فذلك لا يفسد للود قضية كلو دفع رباعى حتى وان كان ديزل ولا بنزين ، وحتى البنزين منو سوبر ومنو عاده ، وزى ما قلنا المهم الروح الشابه حتى ولو اكل عليها الدهر وشرب وأنا على يقين بان العطار يصلح ما أفسده الدهر غسباً عن عين حماد ورمادو ، وطه واماتو ( والله أنا زاتى مافاهم إى حاجه من الكلام الفوق دا والله على ما أقول شهيد ) وجدو اونلاين وكلنا فى الهوى شرق وبالمناسبة دى انتو اول Class A ولا Class B ومسؤولين من الخير اين حبيبنا الغالى جنى الماسورة ؟؟؟؟؟؟
عاطف عكود

عاطف انت شارب حاجة ولا جنيت عديل ؟؟؟ ربنا الشافي..

الرشيد

عبدالرحمن محجوب يوسف كتب:في وداعك يا الحنينه
الا ثنين 4 مارس 2013
ميناء رابغ- غرفة الماكينات- 11:30 ليلا
الناقله شيبه
اصلي منك وانت مني يا نميم ليلي وحجايا
ويافرح غطي الاماسي ويانسيم عبق سمايا
ومن سفر ليلي الطويل ياك مرسي الهم معايا
كت بجيك والدنيا هاجعه واشكي ليك المي وعنايا
انت لي قلبك يواسي والقي في حضنك دوايا
وانت يا الطيبه الحنونه كنت دايما لي مرايا
كم صبرت وكم سهرت في سبيل ابلغ منايا
لا تعبت ولا فترت وبيك ما خارت قوايا
السيده بت عبد رحماااان انسانه لي حد النهايا
معجونه من طينة حنان ورافعه توب العفه رايا
مفروده للفرح امنيات منداحه زي عطرالصبايا
فيك براءة اطفال وعزه وفيك تتقال كم حكايا
مين دا شافك ولا عرفك الا وافتقدك معايا
يوم فراقك ويوم رحيلك عمت الاحزان دنايا
مافي يوم ذكراك غابت من خواطري ومن رؤايا
ولا طيف لقياك مره وكم تمنيناهو غايا
الله يجزيك كم بزلت لينا من معروف سجايا
ما قبيل قالوها كلمه وجاتنا في اصدق روايا
من يبر والديهو فاز ونال من الرحمن عنايا
ومن يبر بي امو فاز ونال من الرحمن عنايا

عب رحمااان يا محجوب
تتضاءل الحروف فى حضرة حروفك الصادقات
لها الرحمة ولكل الامهات احياءا او بين يدى مليك مقتدر،،
وما تحرمنا من طلّاتك
----
قصيدتك من جيد الشعر قطعا،،وذكرتنى قصيدة التجانى حاج موسى التى اخدت كتير شهرة عندما غناها ترباس
للدقة ترباس غنى بعض من القصيدة، وهى ايضا من جميل القصيد الذى كتب عن الام

تشكرات العزيز خلدي ولك والاسره الكريمه خالص التحايا

اختلف المهاجرون والانصار كل يقول سلمان منا فقام النبي صلي الله عليه وسلم فقال سلمان منا ال البيت فكان هذا بمثابة مدح ووسام علي صدر الرجل علي الملاء اردت ان اشير بما تقدم انه يجوز ان يمدح الرجل في وجهه ان كان يستحق ذالك وو الله ان مقصدي ليستحق ما اقول واكثر . لازلت اذكر رقم التلفون واحتفظ به حتي اللحظه اخره 6666 اربع ستات وجاء بعده الخير عشرة من السنين قضيتها بشركة فال للملاحة انقضت عجلي كيف والله لا ادري احتضنني وغيري من السودانيين من غير سابق معرفه ثالثا وثانيا ثم كبيرا للمهندسين شملني بتوجيهه ورعايته حتي خلتني احدا من اهل بيته الكرام ,تجمعنا عنده بعد ان تفرقت بنا السبل وتشتت بنا المضارب فتحققت الاحلام ونيلت الاماني نسال الله ان يجمعنا به في جنات ونهر في مقعد صدق عند مليك مقتدر.
استاذنك القبطان الكبير عبد الرحمن ان اشخبط هذه الابيات التي هرفت بها العام المنصرم في حق صديقك وخليلك الرشيد شمس الدين او كما يحلو لك مناداته رشدي ......
الهند-مومبابي
البحيره 06. سبتمبر 2012
حاشاهو يقول او يعمل شين ود شمس الدين اب خلقا زين
هين ولين وطيب معشر وفوق الحق مسلول سيفين
لي اخوانك ديما تحاجي وفارد لينا ضراك جنحين
ربنا يعلم كم ردناك وفجينالك جوه العين
عشره سنين قضيتا معاهو كتر فوق اعناقي الدين
ابوك يا امنه رجل حوبااات ابوك شاهندا فراسه ودين
ضوء القمر في عين النقعه عشا البايتات رضاي ام زين
رشيد الخير كم كنت الفرحه وكنت النور تهدي الضالين
كم ايتام انهد سماهم وكم عشاق قاسوهو البين
وكم مغبون طالت احزانو ومن غير منه تشيل وتعين
صعيبه طريقك وحل وزلالق وتاه باريك شمال ويمين
ربي يبارك في ايامك وعندو جزاك مرضي الوالدين

رشدى وان كانت شهادتى فيه مجروحه ، فوصف صادف أهله يسلم فاهك والله يكتر من أمثاله وامثالك عزيزنا عبدالرحمن محجوب وربى يبارك فى ايامكم سوا .
عاطف عكود

عبدارحمااان الحبيب..يسلم فمك وقلمك..ورشدي جدير بالوصف والشكر...بارك الله فيك وفيه ..وحقا من لا يشكر الناس ينسي حتي شكر الله...
يا رشدي عاطف ما شارب لكن انت زي ماهو قال مرات ما بتكون عارف الطفا النور منو..وتشوت ضفاري..عاطف قرا بوستين وعلق عليهم في بوست واحد تقليلا للجهد..والوقت....
تسلموا جميعا..
عبدوس

أول حاجة ياعبدوس طفى النور لزومو شنو ؟ إذا كان النور مولّع نحن ماشايفين كويس ثانيا عاطف القوز لو رد على بوست واحد يدخل بيك بى حمد ويطلع بيك بى خوجلى , يقوم يدمج بوستين ويرد عليهم مرّة واحدة دى حتتفهم كيف بدون فهّامة ؟؟؟ وبعدين عاطف مستعجل لى شنو ولاحق شنو مش الدوحة الكلها قدر حوش بانقا دى ؟ هى دخلت فى السياسة !!!

الرشيد شمس الدين

عبدالرحمن محجوب يوسف كتب:

حاشاهو يقول او يعمل شين ود شمس الدين اب خلقا زين
..
..
..

وتستمر الابيات الناصعات فى حق الرجل القامة
شكرا عبدالرحمن
وفى كل كيان فى الدنيا هناك نجوم واقمار يضيئون
ومن حسن حظ البحرية السودانية كأمّة، ان هيأ الله لها رشيدنا
هنيئا للقبيلة بك ولا نزيد للمعلوم بالضرورة من قصم الظهر وكده

هذه اللحظة...... قدم لي الباشمهندس حماده كاسا......من عصير البرتقال..قدمت لي الدكتورة ايه كااسا من الشاي الاخضر الوحيد الفاهمني القبطان عابر.. قدم لي ما هو عارفني وكده...

بصراحه اجمل ايام عمرري...
خمسه احفاد ونص يا رشدي عقبال الجمل...
تم تحريره في انتويرب 11 مارس 2013

سلام كابيتانو - الرشيد - عاطف - خالد - عبد الرحمن وباقى الاخوة الاعزاء ....

سلام من بورتسودان الجميلة .... جو جميل و ناس جميلين و بلد جميلة و نظيفة ...

السياح بالكوم ...... و انا واقف فى الكورنيش الجميل حسبت حداشر يخت فاخر.....


رغما انو البلد فيها سودان لاين و الموانى و الباخرتين دارفور و النيل الابيض و الفاتح ماسورة و جنى و بقية الاخوة الاعزاء لكن شاعر انو فى حاجة ناقصة ....

تكون شنو ؟؟؟.. تكون شنو ؟؟؟.. فتشوا معاى بالله ...

مع اطيب التحايا ...

عبد الرحمن الزين2 كتب:
بصراحه اجمل ايام عمري ...
خمسه احفاد ونص يا رشدي عقبال الجمل...
تم تحريره في انتويرب 11 مارس 2013

كابتانو ربنا يجعل ايامكم كلها جمال وسعاده واللهم أدمها أفراح فى أفراح عليكم وعلى وكل الإخوان والأخوات أعضاء منتدانا العامر.
عاطف عكود

احمد محمد احمد كتب:
سلام كابيتانو - الرشيد - عاطف - خالد - عبد الرحمن وباقى الاخوة الاعزاء ....
سلام من بورتسودان الجميلة .... جو جميل و ناس جميلين و بلد جميلة و نظيفة ... لكن شاعر انو فى حاجة ناقصة ....تكون شنو ؟؟؟.. تكون شنو ؟؟؟.. فتشوا معاى بالله ...

قول أنتا بقاااااااااااااا. ( على قول عادل أمام )
عاطف عكود

طبعا ناقصاك المدام حبيبنا أحمد محمد أحمد لكن خلّى عمك مع عابر الوحيد البفهمو !!!

الرشيد

المجنني يا رشدي...المفعوصه..اخر ابتهاجات مع اية...باين الشغلانه ماشه كويس..بس انته خليها بيني بينك.. ما تقوم تدردق عبوري عارف ما بقدر يكضب عليك..
محبتي..
حماده ارجع سريع...
عاطف اطفي النور..

عبد الرحمن الزين2 كتب:
عاطف اطفي النور..

الرشيد شمس الدين عبدالله كتب:
أول حاجة ياعبدوس طفى النور لزومو شنو ؟ إذا كان النور مولّع نحن ماشايفين كويس
الرشيد شمس الدين

الاعتراف سيد الأدله
عاطف عكود