حكا يا ت من زمن سودانلاين الجميل

يا اخوانا عندي اقتراح.... واقتراحي اولا لازم يوافق عليهو سيد او اسياد الحوش وبعد كده لازم يتنيهو او يثنيهو اخونا الاعظم ...الاكبر وهلم جرا رشدي البرتكانة....
لاحظت ما يورد رشدي خبرا- وجزاه الله خيرا- الا ونحجم ونكنئب وننتظر اياما حتي نعود....اقترح واكرر اقترح ان نترك باب الوفيات لبوست اللهم ارحم
ونفتح بوست جديد اللهم اشف مرضانا وبوست تالت للاخبار السارة
احبابي ... اعرف ما يدور بخلدلكم ولكنها سنة الحياة...
اعتذر لو تطاولت
اللهم اشف مرضانا واغفر لموتانا وارحمنا جميعا يا كريم
معذرة
عمكم عبد الرحمن

الاحباب،، أثنى وشايف انو كلام عمكم عبد الرحمن سليم ،، انا قمت سويت البيان بالعمل ،وبدل بوست عملنا منتدى للاجتماعيات ،، إن شاء الله يكون عامر بتواصل الناس عامرا باخبار افراحهم وكذا هو محل للترحم على من رحل ونسمع فيهو اخبار اجتماعياتنا والحاصل فى الدنيا ،،،
فى زعمى وآمل انو تتزايد المشاركات ،، بيكون وجود منتدى للاجتماعيات منفصل متّصل ، انما هو تطور طبيعى
شكرا عبد الرحمن الزين على الفكرة ،، وأُأكّد انو هذا المنتدى هو حوش الجميع ولا صاحب له ،، هو مكان فى فضاء الله هذا وهو ملك عاااام ،،، كل من له فكرة ،،، رؤية ، اعتراض،، نظرية ،، نقد ،، اى شي فى سبيل جعل هذا المكان جاذبا،، ليرضى الجميع
فليكتب ،،،
فى انتظار اقتراحاتكم ،، عن اى بوستات عايزين تحريكها .... وإن شاء الله ننقل بوست اللهم ارحم وغيره قريبا
ودامت اللمة والمحبة وايامكم افراحا ،، ود بلا سواحل

الأحباب الأعزاء
أوافق وأبصم على إقتراح عبدوس وأوافق كذلك بشدة على مقترح خالد الذى هو مايحدث عادة فى المنتديات الأسفيرية الشبيهة والاحظ إنسجام مقترح خالد مع رؤية عبدوس , لذلك أرى أن يقوم خالد بعمل اللازم حسب إقتراحه ...
الرشيد شمس الدين

الاعزاء خالد... رشدي والاخوة المتداخلون....
شكرا لتكرمكم بالرد واتمني ان يكون الاقتراح في محلو عشان ننطلق بالمنتدي الي افاق ارحب...مرات الواحد تكون عندو فكرة وذكريات عاوز يحكيها لكن يلقاليهو خبر ما جميل فيحجم علي امل ان يعود لكن مع مستر زهايمر تطير الفكرة وحلك....
تحياتي ومعزتي لا تحدها حدود
عبدوس

العزيز خالد... في اخر اتصال مع العزيز قاشورة قال ما قادر يدخل المنتدي...
المهم انو بخير واصابعو شغالة تش لكن الكتف لسة متوعك... قلنا ليهو الجاتك في كتففك سامحتك المهم المهم المهم...
معزتي وناسف لي كترة الطلة...عبدوس

الاخوه الاعزاء...

لقد تم نقل بوست اللهم ارحم الى منتدى الاجتماعيات على حسب الاختراح المقدم من عمدة المنتدى عمنا عبدوس(اكيد فى نفسه حيقول عمى كباسه) والمثنى من الاحباب رشدى وخالد.

لكم الود

بحمد الله،،1 تم نقل كل البوستات الاجتماعية بـ تاءآتها التلاتة ( تعازى- تهانى -تواصل) الى منتدى الاجتماعيات بعد ما امجد شات ضربة البداية
وكل من ليهو اقتراح لترتيب وتنظيم هذه الدار يدّينا خبر
2 عذرا غياب كم يوم ،، المشاغيل
3

عبد الرحمن الزين كتب:.. في اخر اتصال مع العزيز قاشورة قال ما قادر يدخل المنتدي...
المهم انو بخير واصابعو شغالة تش عبدوس

سعدنا بسلامة الانامل ،، وجارى معالجة امر الدخول،،، افتقدناك يا فاتح

بحر محبة وود

حكايتى معاك
احبتى لكم التحايا واهناكم ونفسى بهذا الابداع وهذا الزمن الاجمل لانه ذكرنا الزمن الجميل.
قصتى بدات مع البحر العام 1977 عندما سافرت الى يوغسلافيا وفى معيتى احباء( فيصل فضل الله, محمد عباس الفحل,اسامه شحاته(وهو اخو شحاته نائب المدير وقتها),النعيم على, المرحوم الماحى محجوب). والتقينا فى ريكا باخوه يدرسون على نفقتهم(عبد الله يوسف, حسن بلغراد,محمد يوسف,سالم التبريزى,محمود سيد احمد حموده,حمدى الشوربجى,عاطف الجقور,والمرحوم الطيب نميرى)
وكان سفرنا على متن الباخره سنار واذكر من طاقمها (عمر داؤد,نادر عز الدين,يوسف عقباوى,اسامة المجمر)
ومن ديك وعيييييييييييييييييييييييييييييييييييييييييييك

ABD ELAZIM ELAMIN كتب:حكايتى معاك
احبتى لكم التحايا واهناكم ونفسى بهذا الابداع وهذا الزمن الاجمل لانه ذكرنا الزمن الجميل.
ومن ديك وعيييييييييييييييييييييييييييييييييييييييييييك

الحبيب عظمه نهنئنا و نفسك بالابداع والزمن الجميل والف مرحب بيك مشاركا .... مشاغبا ..... فعالا ... كما عهدناك دوما , والتحايا موصوله للاخوان سيف الصغير , محمد صديق , انور جرتلى , عبدالله دياب , النعيم .
دمت ودام التواصل
عاطف عكود

حكايتى معاك
الحبيب عاطف تحياتى .اخوك لسه فى المراحل السنيه (بكسر السين)
يا دوب جاى من شندى بى شنطه حديد.... وسروال..... ومركوب

عظمة العزيز , لك التحايا ومن الود اكثره ..... سعدت جدا بالمشاركة الفاعلة وبداية الحكاوى من الزمن الجميل ... ألف مرحب .... ماعارفين نسوى شنو ؟ يعنى نتقطع ؟ وكم بنبر بنحتاج ليهو ؟ واحد ليك وواحد لأسامة وواحد لجنى العجيب ؟ واخر لعلطف وخالد !!! يعنى المسألة ما حتكون ديسك وبس ! أخشى على عبدوس ونفسى من الزهايمر بسبب محاولة كثرة التركيز مع قلة القدرة على التركيز !!! ماتزعل يا عبدوس , هادا الله وهادى حكمتو!!! هل يصلح العطار ماأفسد الدهر ؟ لكم الود وليدم أبدا ما بيننا ...

الرشيد شمس الدين

حكايتى معاك
العزيز رشدى( اقتباس)....عارف باشمهندس بتسوى ليك حساسيه
لك الود أخى.. وخلى بنبرك جنب منبرك ,لانك وعبدوش(اقتباس) امهر صناع ذلك الزمن الجميل... وهاك تخريمه متقدمه كده لانعاش الذاكره....كان مسرحها الباخره دنقلا ..شقاوتها...شقاوه...وكان معنا ولدين وبتين فى رحله دائريه.. يعنى ما كبار شديد كدى. . وكان المقلب من اخراج رشدى وآخرين..حين سأل الولد الكبير فيهم مستفسرا ؟ الجماعه ديل بيسجلوا فى شنو؟ قاصد الCREWوقتها كان السيرد بيمضى الكرو..فى المنافست بتاع الجمارك ونحن داخلين احد الموانى الاروبيه.
اخوانا مساعدى المخرج قالوا ليه كيييييف يا ابو الشباب لازم تبلغ عن كل ممتلكاتك بمافيها الملابس..اما البنات ما تشتقل بيهم نحن عاملين حسابهم الكابتن بتصرف مع ناس الجمارك (منعا للحرج).... وكانت اللسته وتم عرضها بلوحة الاعلانات
- 2....صغير - 1 .... كبير!!!!
باقى اللستة اسالوا المخرج وآخريين
بلمناسبه الولد عريض المنكبين..... شلولخ

عظمة يا عظيم لك الود وانت تنثر درر الذكريات ، حبابك والبيت بيتك ويا نا خاتّين البنابر،،،
رشدى ما هذا التواضع يا حبيب ،، يا خى نحنا المتبنبرين فى ضل شجرة كتاباتك

أما وقد ساعد الأعزاء أسامة , جنى العجيب , عظمة , عاطف القوز , خالد وودكرار , مشكورين - فى إعادة بعض( المود الغائب ) , فهاأنذا أحاول العودة لبعض الحكاوى من زمن سودانلاين الجميل عل ذلك يغرى فى تواصل ما من الزملاء....
كنا فى الباخرة دنقلا فى تلك الأيام الجميلة البيضاء كما الثلج ... كان عبدوس العزيز هو القبطان مترقيا بعد سنوات الكد الطويلة التى قضاها فى وظيفة الضابط الأول والتى يزعم البعض انها إمتدت لما يقارب ( العشرين عاما حسوما ) ويقال كذلك أن المدير الأسبق المرحوم الخالد ( صلاح عمر ) , قد إستشار أحد دفعة عبدوس فى أمر ترقيتهم لقباطنة فأشار عليه ( لا فض فوه ) , أنهم يحتاجون لسنوات إضافية للتدريب ... فياللتواضع الجم والصدق فى العزم ... المهم كان من حسن حظ عبدوس أنه قد ترقى لقبطان قبل ان ينزل المعاش مع هذا التواضع الجميل من الدفعة ... ونعود لدنقلا فى تلك الرحلة ... كان الباشمهندس معه زوجته وكان مع عبدوس أيضا زوجته , طبعا , السؤال الواجب
( فى أى العهود ؟ ياماسورة شكيتك لله !!!) , والمعروف أن عبدوس لا يحب التكييف الزائد فى الغرفة ولذلك كان يقفل فوهة التكييف تماما .... ترى ماذا يفعل الان وهو يعيش فى بلاد تموت من البرد حيتانها .....
كان عبدوس يعمل حسابا شديدا للباشمهندس ويحافظ دوما على شعرة ( عبدوس - لا معاوية ) معه خصوصا والباشمهندس معروف وخبير ..... ذهبت زوجة الباشمهندس لغرفة القبطان لزيارة زوجته وحين وجدت فوهة التكييف مقفولة , عملت مشكلة كبيرة ... ( دا كدا ما كويس مع ناس هناى , أفتحى وخليهو فاتح طوالى ) ...... ومن يومها أصبح عبدوس يترك التكييف مفتوحا للأخر ولكنه بالمقابل يشغل السخان فى أعلى درجة فى الغرفة ...( ماقلتوا نوبة !!! ) وأحسب ان الغرفة - لو سئلت لما عرفت ماذا تفعل فى هذا الجو المتناقض ....
هذا يكفى اليوم كفاتحة ومقبلات مشهية للكثيرين , عل وعسى وليدم أبدا مابيننا ...

الرشيد شمس الدين

العزيز رشدى عودا حميدا ومازلنا فى انتظار عبدوس وماسوره وعقبال عوده الاخوان سيف مصطفى , اوى ,سعد كرار , ودالسيمت ,عوض الله وبقيه العقد الفريد والله الغيبه طالت جد.
ودام التواصل
عاطف عكود

Atif Siddig Akoud كتب:العزيز رشدى عودا حميدا ومازلنا فى انتظار عبدوس وماسوره وعقبال عوده الاخوان سيف مصطفى , اوى ,سعد كرار , ودالسيمت ,عوض الله وبقيه العقد الفريد والله الغيبه طالت جد.
ودام التواصل

نؤيد وبشدّة،، كلام مُركّز،،، صحى الحاصل شنو؟؟ الايام دى فى صيام ولا كيف ؟؟!! هل المنتدى فى حاجة لى لايف جاكت؟ ؟ نأمل انو القصة ما تحصل لايف رافت أو لايف بوت،،،
وقد نعود من بوست حوّل
ودام الود بحارا

شكرا على المرور الأنيق لعاطف القوز وخالد الرهيب وجنى العجيب , ونواصل ........
كنا فى بورتسودان , نستعد للذهاب للإسكندرية لكورس المهندس الثانى وفجأة أصدر نائب المدير ( سيد شحاتة ) , قرارا أن نوقع كونتراكت مع سودانلاين لمدة عشرة سنوات و كان المدير العام الخالد , صلاح عمر فى زيارة للصين حينها , رفضنا رفضا قاطعا لأن سودانلاين لم تقم بتحمل تكلفة دراستنا وأصر سيد شحاتة إما أن نوقع أو يلغى سفرنا للكورس .... فإخترنا ألا نسافر للكورس ... جاء الخالد إسماعيل بخيت فى نفس تلك الأيام لبورتسودان وحين علم المشكلة , طلب أن يقابل موفدين منا فذهبنا لمقابلته , توأم الروح الخالد عبد المتعال الجميعابى وشخصى ... لم يستغرق الإجتماع سوى دقائق , أقر بعدالة موقفنا وسأل سيد شحاتة :- ( هل يعلم المدير فى الصين بهذا الأمر ؟ ) , أجاب شحاتة بالنفى , فإستغرب للأمر وألغى قرار شحاتة وإعتذر لنا بلطف شديد .... فى المساء كان مسافرا للخرطوم بعد إنتهاء زيارته , طلب منى عبد المتعال أن نذهب له فى المطار لوداعه وشكره على موقفه فذهبنا , وهناك رأينا عجبا .... كان المطار يموج بالمودعين من الشركة وحين وصل عفش إسماعيل بخيـت للقيام بالإجراءات قامت القيامة ... تسابق كبار القوم لحمل العفش كل يريد أن يظفر به قبل الاخرين , فى تلك اللحظة لمحنا إسماعيل بخيت فترك القوم وأتى لنا ليشكرنا ويتحدث معنا بلطف زائد ...كانت المعركة محتدمة فى العفش وهو يرى الأمر ...
كان حبيبنا الخالد كابتن مبارك هناك وحاول مع المحاولين ولكن لضالة حجمة وقوته لم يجد شيئا وفاز الأقوياء بالغنيمة كلها ... عندها قال الخالد كابتن مبارك وهو يضحك :-( يا جماعة , مرة كدا أدونا فرصة معاكم !!! ) و ضحك إسماعيل بخيت وضحكنا كثيرا فقال له : ( يا مبارك إنت ما محتاج تشيل!!! ) ,,,
كان المرحوم الخالد كابتن قاسم واقفا مع إسماعيل بخيت متماسكى الأيدى وهو ينظر شذرا لذلك الزميل الذى يحمل الشنطة الضخمة وكأنه يعطى دروسا للعتالة فى كيفية حمل العفش ... كابتن قاسم كان دوما يعطى دروسا من نوع اخر ولذلك كان لا بد أن يكون من أول المغادرين للدنيا لأنه :- إذا كانت النفوس كبارا , تعبت من مرادها الأجسام ...
ونواصل ...
الرشيد شمس الدين

الاخ العزيز رشدى...

وين الحى بيك المنتدى من غيركم انت العم عبدوس خلا..بس الجماعه ميقوموا يزعلوا منى...غيبتك ده اكيد فى اجازه فى البلد...تمشى وتجى بالسلامه.

لك الود

سؤال وجيه ،، يا ناس الامارات وين الرشيد ؟؟

اخى الرشيد
متعك الله بالصحه والعافيه كما متعتنا بذلك الارث البديع آدام الله الود بينك والجميع. وحباك والعزيز عبد الرحمن بذاكرة لا تصدأ, حتى ننهل من ذكرياتكم كما نهلنا من علمكم. ولكم الود حتى نلتقى.
احبتى أدعو معى بشفاء ام مصعب..آمييييييييييييييييييييييييييييين

الأحباب الأعزاء دون فرز .....
لكم والله وحشة لا توصف !!! وللحقيقة أفتقدكم جدا جدا ....ولقد أسعدتنى كلماتكم الطيبات الزاكيات وأنتم تتفقدون الغايبين ... لو لم يفعل هذا المنتدى الرائع سوى هذا لكفاه والله ...الشكر أطنان لخالد وحاتم وود كرار وزملائهم الذين جعلوا هذا الفرح ممكنا ....
والشكر مكرر لعاطف القوز وخالد (ثانية) وود كرار ( ثانية ) وجنى العجيب وعظمة ولكل من سأل عن غيابنا من االزملاء وأخص بالذكر المرهف أحمد محمد أحمد الذى لم يكتفى بالخوف من ( الصنة ) ولكنه هاتفنى للإطمئنان ولكم أسعدنى ذلك كثيرا والله ... أحس حقا بمسئولية شديدة حين الغياب ذلك أن لحمة إضافية ربطت بيننا فى هذا المنتدى ولكن كان الغياب والله إضطراريا فى الأيام السابقة لأن كل أشيائى :- FALLEN APART
أولا زحمة إستثنائية فى العمل وبحد لا يوصف , ثانيا يبدو أن موسى ( أخينا أسامة ) قد بدأ يفعل فى دواخلى مافعله داخل أسامة وربما أكثر ..بالمناسبة أين أنت يا أسامة هل ذهبت مع موساك ؟؟؟
ثالثا غياب عبدوس عمل حالةجدب حقيقية والله أعاده الله سالما وأعاد هطول أمطاره النافعة ....
حتى تتحسن الأمور ونعود للحكاوى أشكركم مثنى وثلاث ورباع ( حوقلية ) وليدم أبدا مابيننا ...

الرشيد شمس الدين
.....

واخيرا عاد

كبرت كراعي من الفرح شي من في الارض شي في النعال
والعود احمد يا رشدي
لا اكذبك القول كنت اتلصص.. ودكرار ما قا قصر.. عكود كان نعم العوووووووووووك القبطان احمد وخالد تلغرافات...اما جني عارف انو عامل تقيل
اسامة هذا انسان لا املك الا ان اقبل الرض تحت قدميه
اشتاق اليكم بلا فرز وان ذكرت بعضا منكم فمعني ذلك ان من لم اذكرهم هم احب الي من من لم اذكرهم....
لكم في القلب معزة واشتاقاكم
اسوا الاخبار ساعود من زفت افريقا في 11 يوليو ويا رشدي حرم ما عرستة هناك...ولن اعرس
وتبقي ام عابروحمادة و...مازن
وتحيا ام اية
عاوز شمارات اكتر من كده يا رشدي
دم لي ومرحب بيك يا اصيل

شكراعبدوس العزيز ولاحرمنا منك أبدا ...
بالمناسبة أسف جدا فقد فاتنى ياعظمة العظيم أن أدعو الله الشافى الكافى المعافى أن يسبغ نعمة الشفاء على
( أم مصعب ) شفاء لا يغادر سقما قط , إنه نعم المولى ونعم النصير , ولكن يا عظمة , مالها أم مصعب ؟
أرجو أن ندعو جميعا لها بالشفاء ... وليدم أبدا مابيننا .....

الرشيد شمس الدين

اللهم يا حنّان يا منّان أشفها وأعف عنها وعافها،، وكل مرضانا
اجر وعافية إن شاء الله
نعود بإذنه تعالى