فنجان قهوة

ود عكود كيف حالك ياخ انشاء الله تكون مبسوط
انا والله حقيقه غبته كثير لكن الله اعلم دائما على البال انشاء الله ربنا اريح بالنا وبالكم.
اقول امشي الاجازه بلاقي وقت احسن امشي اندوش اكثر من ايام الشغل ارجع الشغل القصه تندوش ودا الحال.
ود راشد والله الواحد بقي اجمع ملامحك تجميع عشان ما اتذكر شكلك ياخ تعال البلد شويه وارجع عشان نعمل ليه اب ديت قبل ما احصل ليه دليت زي ما بقولوا الخواجاتيه
تحياتي لكل الخوان
مهدي شلكاوي

فنجان جبنة بى شمالوو
مهدى منور البوست،،،بعد غيبة
والسنة الجاية حاجى إن شاء الله،،وقبل داك لما السودان ينفصل انت شلكاوى دى بتوديها وين؟؟؟
اما ملامح ود راشد فما تغير فيه الكتير الا الشيب؟؟ ما تعدّش الشعر الاسود الا طشاش

وبدر الدين ،،عيّد فى المستشفى والحمد لله البنية هبة فى خير حال وترجع المدرسة الاسبوع الجاى الف سلامة والله

البوست منور باهله يا ود الاستاذ يا ظريف يا وجيه
كيفك خالد وكيف اخبارك والاسره الكريمه.... شكلها حاتدور معاكم برد وثلج ثاني من جديد بالله شوف الايام دي بتجري كيف من شويه كدا كنت بتشكي من البرد والثلوج مرت ومر الصيف ورجعت تاني في يومين تلاته الله ادينا خيرها.... اما بخصوص شلكاوي دي جنسيه مزدوجه غصبا عن الحكومتين وبعدين انا سمعت ان الدوله الجديده ان قامت حا اكون اسمها كوش انا بفهم انو كوش دي من عنديكم يعني كلنا في الهوا سوا ..... ربنا اجيب العواقب سليمه وتمر الايام الجايه دي بسلام...... مع الاعتزار للاخ العميل رقم صفر دخلنا في السياسه شويه مع العلم باننا لست من اهلها.....اما بخصوص اشتعل شعر ود راشد شيبا دا بس الوجاهه والوقار الداخلي طفح للخارج ...
مع تحياتي لكل الاخوان
مهدي عثمان مصطفي

الاخوان الاعزاء ود راشد .. ود عكود .. ود شلكاوي ... ود الاستاذ .. ود عابدون .. بكوري ..محمد احمد .. جميعا وللاخوة الاعزاء بالمنتدي ولرواد القهوة خاصة التحايا والتبريكات والشكر اجزله علي كريم سؤالكم علي صحة ابنتنا وهي الان بحمد الله ولطفه قد بلغت الصحة والعافية وناسف اشد الاسف في التاخير في عدم التواصل بكم ومعكم .. علي امل ان نلتقي..

الاخوان الغالين ودالجاك..ود راشد .. ود شلكاوي ... ود الاستاذ .. ود عابدون .. جنيدابى .. كركرب .. عبدوس كل رواد القهوه السلام جاكم وناسف للانقطاع بس ما باليد حيله وتسلموا.
ودام التواصل
عاطف عكود

الاخوان ود راشد وود كرار خبركم شنو مع امطار السعوديه امس واليوم . اللهم اجعلها سقيا خير وبركه.
والاخوان ود الاستاذ وود السيمت برد وجليد شديد . اللهم اجعله بردا وسلاما عليكم.
اللهم احفظ الجميع برا وبحرا.
ودام التواصل
عاطف عكود

سلامات ودعكود...

شكراً على السؤال والله جده دى لو كشحت ليك جردل الناس تتجهجه, صدق المثل القائل الضاق عضة الدابى بخاف من جرة الحبل.
المشكله المطره مدتها ساعه واحده ,بس لمن تشوف الطرق تقول المطره دى ليها يومين بتصب, والزايد الطين بله فى اكتر من عشره انفاق وكبارى جارى تنفيذها فى مدينة جده.

ولكن الحمده لله المرة دى جات سليمه, اللهم احفظنا واحفظ جميع اخواننا المسلمين فى جميع اصقاع الارض.

جانا تلج ،،،بلا عيون هذه المرّة مجرد جبال من البياض
والله غالب
صاحب هذه القهوة والله حيّرنا !!! ولا ما كده
المهم انو استلمت من راشد العزيز ايميل عن مدى الشوق والوحشة للمنتدى وللاحباب
الملاحظات على الايميل
* بالانجليزى يامرسى؟؟ يعنو الارسال تم من كمبيوتر ما بتاعو؟؟؟
* الايميل قصير جدا ! ودى ما من عادات ود راشد ،،استاذ التفاصيل
* لايوجد موعد محدد لرجوعه( وجه مستغرب!) انت وين بالضبط ياخونا؟؟؟
* إن كنا فى الزمن الزمان كنا بقليل جهد عرفناك فى ايتها حى من احياءك يا اسكندرية،،،،لكن الحـيـن غـــير !
وكل عام وانتم بخير

والله صاحب القهوة....حيرنا معاه.

والله انا فى جده بتصل بيه مابيجاوب...بس من شوقنا بنرجع نتصل بيه مره تانيه.

اما بردكم ده ماعنده حل, الا توقت اجازتك السنويه معاه وتهرب لحر السودان.

وكل برد وانت طيب.

الحبيب ابو منتهى...

لايسعنا الا انتقوقع امام افضالك وسؤالك وتفقدك لك افراد عائلة المنتدى,بسؤالك عن اخونا راشد لقد تم بحمد الله تسجيل اتصالى صوتى معه اليوم, لقد تعافى من وعكه صحيه المت به مواخراً وشوية دبرسه وحاجات تانيه لايمكن الافصاح عنها, ولقد وعد فى تقديم قهوه مجانيه لمدة شهر نظيرا لتغيبه الاسابيع الفائته.

اجمل التحايا والود لكل الخوان الكرام....
والله حقا انا متلوم شديد ارجو المعزره والمسامحه ....مسالة مشاكل الدنيا والجري واكل العيش والكلام من دا افتكر بقت اعزار مستهلكه ما عايز اقول ما مقبوله .........عموما تحياتي لكل اهل المنتدى المواظبين والمنقطعين الحرس القديم والجديد...مع تمنياتي ليهم بدوام الصحه والعافيه...
ود عكود ياخ كيفك اخبارك سامع عوووووووكك تدوي بقوه وصداها واصل بورسودان والاستجابات قليله انشاء الله ياخ ربنا اديك الصحه والعافيه انت من المرابطين حقيقه والله (بلغة ساحات الفداء) الله لا عاد تلك الايام ونسال الله ان يتقبل كل الشهداء....
الاخ صاحب البوست ود راشد والله ليك وحشه شديده...ما تشوفشي وحش زي ما بقولوا اهلك المصريين....
امجد عابدون كيفك والله انت صحيح ما مقصر بترن كل فتره وفتره وبتطمئن على الاحوال ونحن ما برن الا اكون كايسين خدمه ما بتقصر لكن تلفون صلاح الزيداب ما رسلتو لي....
ود الاستاذ والله عووووك والف عوووك كمان وينك يا راجل عودتنا تسكنا لحدي ما تجيبنا سك لينا ود راشد دا......انا قبل ما اكتب وقفت شويه كده احترته اكتب وين بعد المده دي كلها من غير ما ود الاستاذ انط لينا في حلقنا واقول لينا دي شنو الخرمجه دي......هسع ما تقوم تقول لي الوداك تبحت وتطلع القهوه شنو لاني مشتاق لصاحبها وايام كانت ما بتفضى من الزوار.......
لكم مني كل الود والاحترام...
مهدي شلكاوي

بعد التحايه و ما الي ذلك،
سلام الي صاحب الدبنه(القهوه) و الله واحشين و سلامه راشد واذيكم يا ناس امريكا وناس جده .
سامعين العّوَه و الديّه ولكن في البال الف مشغوليه، نطّلع لنطمن علي الحال و في باطن العقل راحه انكم متواجدين. لو لم نكتب حتي ، ما زلتم الاصحاب و الاحباب.
هذا ليس عذرا لعدم التواصل لكن زفرات مشاعر مع اخلاّء اخذونا كما نحن رفاق ونحن لهم نود

امتّع نفسى بالدهشة
ياخى كيفتونا،،كيف انكم
انا ذاتى اخش من ديار ود راشد لعل ،،،اذا عملنا هجمة جماعية نجيبوا جاى،،، والله انا غلبنى عديـــــــــــــــــــــــــــــــــــــــــــــل لانو تلفون ما يرفع -ايميل ما يرد لكن الدنيا ظروف لعل امجد وناس السعودية اقرب وقربئذ النبأ اليقين
انا حاشخبط
* اخونا محمد فراج والله كنت عايز اجيك ولى القرمزى ومفارقة انو الاحداث كانت فى بوسطن- عجبى كيف كانت بوسطن ترفض الطفل مجهول النسب وصارت فى اقل من 100 سنه من اكتر مدن الدنيا تحررا لدرجة ان الزواج العديل اصبح فى امرا ضيق
تخريمة ،،عزيزنا عمر موسى يقيم حسع فى هذه البوسطن
* اما الباشريس، فلى مع المرحوم ود الصول حكوة قد ذكّرنيها بوست البشريسين

* عمر يا خلف الله ياخبير الوطّايات ليك الف وحشة وبعض زفرات ، الحاصل شنو

*جنى -عفوا عمو جنى- لانك ماممكن تكون جداّ لينا لكن بعد ان طار غرابكم وبلغتم من الكبر عتيا،،،كدى طمّنا لعلك اخدت خروج نهائى وبتبقى قاعد معانا شوى

* الكابتن صلاح شرقاوى ياخى الف مرحب لك التحية وابقى داخل وحقيقى نؤمل عليك وعلى مخزون الذكريات من زمن العشرة العظام

* ياكرار ما رسلت لى تلفون الزيداب، برضو،،، ده الرقم السرى ولا كيف ،لك وله السلام

* عبدوس الاكبر بحضورك تٌشرق صفحات المنتدى ، أضف لذلك الالق اطلالة الرشيد الراقية،،،وكذا علمنا انو اسامة معاوية بيسخن

* كابتن احمد محمد احمد ، تشكر يا عظيم على طيب الكلام

* كبيرنا كابتن حمدالنيل، متشكرين يا قبطان يا حبّوب على حروفك الجميلات، وإن الله هون برجع ليك، اتى وقت المعايش( فداّ للمشروع الحضارى كما قلت انت) ويا لها من كلمة عبقرية، لك الود بحارا

* ووالله لولا المشاغيل والجرى لاطلنا( قول لى اكتر من كده) ولكنا حكينا عن عشمنا فى جيّة الباقين ولكنا كتبنا كل الاسماء ،،،،، لكن ان شاء الله نعود
ان للخبز رهقا

* قريبا اخر عمل ادبى لاديبنا عارف المصرى يأتينا على صفحات المنتدى

* اما المفاجأة الكبرى ،،،،،،،

هلا والله ود الاستاذ....
لا والله انا فعلا كايس بكل قوه تلفون ود الزيداب
بعدين وطايات دي جمع كوارع.....
سنعود
شلكاوي

خالد العزيز...دايما وكعهدنا منذ ان ولجنا هذه الديار نتطلع ونستمتع بطلاتك فلا تحرمنا من شخبطاتك...
العزيز ود راشد..وعلي قول ابننا عمر خلف الله اشتقنا كثيرا للدبنه وصاحب الدبنه..
الا تجد صرخاتنا وخرمتنا الكاربه من يلبيها...
نتمني ان ان نراك قريبا في دارك ودبنتك..كفايه بخل باه....ده ما من طباعك يا كريم
محبتي
عبدوس

وصّلنا خرمة الدبنة لصاحب القهوة محمد بن راشد ويصير خير إن شاء الله
ونواصل من شخابيط عبدوس الاكبر

احبابنا اهل المنتدي............اهنئكم جميعا بمناسبة الشهر الكريم واسأل الله ان يتقبل صيامنا وقيامنا وكل عام وانتم بخير ..
طبعا جبنة راشد في رمضان وفي سابق الازمان كانت ترويحة ومتعة ...وين انت يا راجل ؟ خير ان شاء الله
جني ظهر واختفي ..وود عكود (قرب) والمنتدي بقي (علمي) فهل غياب جني له ارتباط بالقصة دي ؟؟ ارجو الافادة مع تحياتي وامنياتي للجميع.

راشد كتب:
...والله السهر يبدو لي ياود الاستاذ صار جزء من شكل الحياة في الخليج عموما بالرغم من اني حاسس اني اقل الناس سهرا بس برضو مساهر.. بالرغم من اننا قد تخطينا مرحلة السهر من اجل السهاد والعتب علي عناد المحبوب:
انا وسهادك وسط عنادك قلال وما لاقين طريقة
نسهر الليل والنجوم والغيمة والقمرة الصديقة
نرسم امال من خيال للغمدة والنومة العميقة
.............
........
وكل سنة وانتوا طيبين انشاء الله نتلمي سالمين غانمين

طالت الغيبة حوالى تسعة شهور من اخر مداخلة وغياب من القهوة فلك التحية اخونا ود راشد ولكل من تبنبر فى القهوة وكل عام والجميع بالف خير ......وتانى جلسة بن (والبن مر وجنزبيل النشوة المفقود) مع قصيدة من المبدعة نضال حسن فلكم ولها اجل التهانى بمناسبة عيد الفطر المبارك (منقولة من اليو تيوب )
https://www.youtube.com/watch?v=FjSsZkJ6TdI&feature=related
وفى انتظارك اخونا ود راشد!!!!!! ودام التواصل
عاطف عكود

يا ود الاستاذ ويا ايها الناس اين ذهب صاحب المقهي الشهير ..؟نرجو الافادة وطمئنونا عليه.

الأخوة الأفاضل.....
يقريكم صاحب القهوة السلام فرداً فردا والله اسه أنا قاعد جنبه فى المكتب، مشغول ليه شوشتو.
بس نقول لسه عندنا امل يرجع للبنبر بتاعه تحت الشجرة ويعبق المكان بريحة الجبانا والجنزبيل ويلم الحبايب تانى.

الاخ ودكرار لك مني السلام والاحترام ...زمان كان في مقولة الواحد يقول ليك (علاقة بحر ساكت) لكن ما افتكر كانت بتشملنا واهو الدليل هذا المنتدي الرائع ..لكن لمن تلاقي ليك واحد في سفينة ركاب جايه من جده مثلا وهاك يا ونسة وصحبة واكل وادفع لي وادفع ليك وتلفونك كم وتلفوني اهو سجلو والسفينة وصلت والكراع هبشت الارض و(الخوفة)طارت ..هنا يكون طار اي شي وتبقي القصة علاقة بحر .ولانو الناس علاقتها مازالت رغم صعوبة التواصل التي وصلت درجة الاستحالة في هذا الزمن الاغبر تمسكنا بادني درجات التواصل الا وهو (التواصل الاسفيري)
لذا يا حبيب كان لابد من السؤال عن الحبيب الرائع ود راشد ولك الشكر (للتطمينة) يا امدرماني يا راقي.وما زلنا في انتظارك يا ود راشد ولا القصة علاقة بحر ساااااكت .

الاعزاء الغالين الجمل وودكرار الله يديكم العافيه والتحيه لودراشد . وكدى عليكم الله شوفوا لينا جنى وكركب ديل وين ؟وبقية العقد الفريد , وبالمناسبة خوة البحر طلعت نعم الخوة واللهم ادمها خوة .
ودام التواصل
عاطف عكود

صراحة....اخواني ..احبابي.. الوفي الجمل..ود كرار العزيز..والمخلص الابن عاطف..غياب راشد
يحيرني...
رجعت اقرا واعيد كل بوستات فنجان القهوة... قلته يا ربي امكن انا اكون عكيت
في موضوع ما..لكن ما لقيت..كلو تمام التمام..
يا ربي امكن قلته ليهو حاجه في التلفون..امكن.. امكن..لكن انا اساسا ما عندي تلفونو..
غايتو سرو بكون عن خالد...
المهم ليك وحشه ولا زلنا خرمانين للدبنه...
عبدوس

ألاخ كابتن عبد الرحمن .. الجمل... ود كرار ..عاطف ... خالد وكل الاخوة الاحباب:

اجمل التحايا و عام سعيد علي الجميع انشاء الله.
و شكرا ود كرار لطمانتنا علي ود راشد.

عبد الرحمن الزين2 كتب:
صراحة....اخواني ..احبابي.. الوفي الجمل..ود كرار العزيز..والمخلص الابن عاطف..غياب راشد
يحيرني...
عبدوس

تسلم عزيزنا الغالى عبدوس والله الابن عاطف دى ريحتنى شديد , لانو الواحد طول ما سمعها حتى الوالد الله يديه العافية بقول لى ياحاج , واحكى ليك قصة واحد اخونا وعزيز علينا بدون ذكر اسماء لانوا اكيد لما يقراها سوف يذكر تفاصيلها شخصيا , على العموم هو كان راكب البص وقعدت فى الكرسى الجنبو سيدة شايلة طفل وببكى شديد قام شالو منها وبداء يسكت فيه , المهم لما وصلت وعايزة تنزل شكرتوا وقالت للطفل يلا قول لى جدو مع السلامة ,فى الوقت وحسب قولو انها ما اكبر منو كتير وبالمناسبة الكلام دا قبل اكتر من عشرة سنوات.
على العموم ياسيدى ربنا يرفع معنوياتك بس انا خايف رشدى ياخدها عليك خصوصا انا وهو نزلنا المعاش فى كشف واحد وهو ما عرف باسم كشف الخوارج.
ودام التواصل
عاطف عكود