شخبط شخابيط لخبط لخابيط..غايتو جنس غايتو

حبيبنا وكبيرنا عبدوس، ورشيدنا العزيز.
كانت لكم وحشة شديدة فى زوايا المنبر فقد كان مقفرآ فى ألأونة الماضية، حتى ألقى حبيبنا كابيتان أحمد حجرآ حرك البركة الساكنة، فطل علينا أخونا ودفراج بحماس الشباب بمداخلاته الثرة وجرت الدماء فى المنبر فظهر أخونا ود الجمل وتوالت الأقلام فدبت الحياة فى المنبر من جديد، عليه، علينا أن نتعاهد جميعآ أن نطرق الحديد ساخنآ بقدر المستطاع حتى لا يبرد مرة أخرى.
حبيبنا رشدى يعانى لوعة الفراق من الوطن ويرجو أن يتمهل حبيبنا عبدوس عن الترحال ويستقر نهائيآ فى وطن حبيب علينا!
رشدى العزيز إن الأوطان ليست بحدودها الجغرافية المعروفة، ولا بتضاريسها الأرضية المرسومة ولكن هى التى تعيش فى وجداننا مهما نأت بنا المنافى والمهاجر، هى تعيش فينا نشتم عبيرها كل يوم وفى كل لحظة فى ألأنفاس التى نستنشقها، ألأغانى التى نطرب لها الغذاء الذى نتقوت به، الأزياء التى نرتديها، العادات التى نسير بها حياتنا. أنت تحن الى جبا الأولياء بكل دروبها وسككها وأحن الى أمدرمان الى كل حواريها وأزقتها.
لكننى عندما أبحرت أول مرة صارت الدنيا العريضة هى لو وطن لا تحدها حدود. تلك هى روح البحار المثالى ، لا يمل الترحال طالما كان هنالك نفس يدخل ويخرج ودم يجرى، وأرجل تقوى على الحمل.
ودامت ألود عأمرآ.
إبراهيم

انك خير من يقرأ افكاري حبيبي ابو خليل..دخلت صباحا..وجدت الصمت حتي من اصحاب الالوان الحمراء..قلت..جمعه وسبت ..اصبر عليهم...
دخلت لاقول..عوووووووووووووووووووووووووووووووووووووك وجدت رسالتك..ولكن حاسس في شوية متداخلين..قلت اديهم الفرصه حتي ارتب افكاري واكتب ما وددت ان اقول...
في نفس الوقت ما هان علي ما ارد عليك واشكرك..
دائما اخي ابو خليل نعتز بمساهماتك..
احترامي ومودتي للجميع

العزيز حماده..ابو خليل..
العزيز الجمل...مودتي التي تعرف..تذكرتك بالامس..استعرضت شريط
ذكرياتنا..قبرص..القبطان احمد مختار-مشكلتي معه واختياري لك لتحل محله ضابطا اولا.. احمد صار صديقا لي بعد ذلك ولم يحقد علي.. واعتز بصداقته..
اتاني في انتويرب ليعزيني في وفاة والدتي ..الح واصر ان يقابلني رغم انهم كانوا يصنفون من يتحدث الى انه من اعداء الخطوط البحرية...
طوال حياتي العملية
كنت ابدا احاول قدر استطاعتي ان ان انصح وارشد ولم اجامل...صحيح قد اكون لطيفااحياتا- ولكن الشغل شغل..هذا ما تعلمته من اليوغسلاف ماركو ديلتش ودراقو بالتش وطيب الذكر المرحوم قاسم...والذي اشهد اني قد تعلمت منه الكثير..لا انكر اني تعلمت من البحاره اكثر مما تعلمته في الكلية...وهذه نقطة هامه لا بد ان اتوقف عندها..

اخواني جميعا...اتمني ان لا ننسي فضل من علمونا خاصة من البحارة..كلكم لا شك استفدتم منهم..يوما..لحظة ما..هل تتذكروا هذه اللحظات..هل تتذكروهم...
انا سافتح نفاجا اتمني الا تغلقوه...ابدا واقول...
هل تتذكرون عبد الله علي عبد الله الشهير بي علوب...دونكي مان...لا زال حيا ولله الحمد...اظرف بحار عمل في الخطوط البحرية...كنت اصر دائما ان يصعد علي المركب الذي اعمل به رغم انه لا صلة لي بالماكنه...يسالني دايما العزيز حسن محمد صالح -مدير شئون الموظفين- ليه بس علوب وانت مالك يا قبطان وناس المكنه..اقول له ..وجود علوب في الباخرة والميز يعطي الباخرة نكهة..لا تعرفونها انتم...
علوب يا ناس الخرطوم..في محطة الغالي. شارع الصحافة .لديه كشك صغير.. تلفونه
00249122820825
لا شك انه سيسعد حقا لو فقط اتصلتو به..لا شك ان بعض العجائز منكم لهم ذكريات معه..
اسفي للاطالة..لكني ساواصل
عبدوس

عندما انتقلت من الباخرة سنار الي الباخرة الجزيرة في ميناء بورتسودان..عام...... كنت اود ان اقول
خلوها مستورة لكن للتاريخ نقول فبرائر 1972 –ما تطرحوا ولا تجمعوا منها شئ..
فارقت سنار والتي كان عليها قبطان قاسم ضابطا اول وجيد ضابطا ثانيا والنميري مهندسا ثالثا . والباقين يوغوسلاف حتي الطباخ والميكانيكي والكهربائي... انتقلت الي الباخرة الجزيرة لاجدهم كلهم يوغوسلاف.. الا البحارة...
قالو لي اليلة عاميلن ليك حفل استقبال في البوت دك....كنت اسكن في غرفة مشتركة مع السفرجي التاني ذلك الوقت عمنا عثمان بدوي.. حذرني ان اساهر الا وسيشكوني الي الضابط الاول...
ذهبت الي الحفل..كانو حوالي عشرة ..لا زلت اذكر منهم..حسبو مساعد الميكانيكي عازف الجيتار..عرمان..حسن التني الميكانيكي..محمد صديق النجار..المراحيم فضل الاله وفضل محجوب وبري صبي المطبخ..الطيب الشبارقة والطيب محمد حسن – الجاهل- كما كنا نطلق عليه والاخيران كانوا انصاص بحرية وليس عليهم ورديات..ثم المرحوم عبد الحميد ود الصول.و علوب..المساح في ذلك الوقت....
كانت ليلة تعلمت منها الكثير المثير....
لم يك لي سابق معرفة بالغناء..لا شكلا ولا موضوعا..كنت مثلي مثل اي مراهق –في ذلك الوقت- اردد يا نور العين..وصدفه..وبيني وبينك والايام.. بل لم اشا ان اردد بعض الاغاني لان بعضا من زملائي كان يحرف كلماتها...
توسطت القعده زجاجتان من الويسكي..لا مويه..لا صوده ولا تلج....ولا حتي مزه...فقط كباية صغيرة...
اذا قلت هذا الذي اكتب الان لبعض معارفي واصدقائي اولا لن يصدقوا وتاني حيقولو الجابرك شنو ؟؟
ما علينا...
ترنم حسبو.....وطرقع احدهم علي جردل...
تواصلت الاغنيات..غني حسبو ..كم بقت جافية....
واغنيات اخري ..
وفجآة..ترنم احدهم..
انا الحامل البلاء ما اشتكا..
انا الكاتم السر ما بكا......
انا العقده بحل مشبكا.......
وانا المساح دمع البكا...
وتعالت الهتافات...عقب يا علوب... الله يا علوب..ينصر دينك يا علوب..
هذه اول ليلة تعرفت فيها علي علوب ولم ادر حتي تلك اللحظه انه فنان لا يشق له غبار...
وودت ان اكتب عنه قبل ان يفارقنا بعد عمر طويل ومن يدري قد نفارق الدنيا قبله..
سازورك يا علوب باذن الله في الاسبوع الاول من يونيو هذا العام ان كتب لي ان اعيش ..كم كنت عظيما وانت تضحكنا وتبكي في دواخلك..
ابنك عبد الرحمن الزين

سلام يا كابيتان و يا سلام على علوب الرجل المرِح البشوش و الذى ينشر الفرح و التفائل اينما حل.

العزيز القبطان احمد...
لا ادري لماذا تذكرت علوب هذه الليلة بالذات رغم انه لم يفارق مخيلتي ابدا منذ ان افترقنا..كان درة اي باخرة يصعد علي ظهرها..لا زلت اذكر مداعبتي له عندما تمت ترقيته الي دونكي مان..قلت له يا علوب -عيني في عينك كده- الترقية نلتها بي كفاءة...قال لي يا قبطان ما تخلوها مستورة شوية كفاءة والباقي ظرفنه..والاخيرة هي التي جعلت من علوب درة اي باخرة يصعد عليها...عمركم سمعتو باخرة غرقت عشان الدونكي مان ما بنجض شغلو ماية الماية .. رغم انو علوب كان ادها وادود...
التحيه..لهم جميعا..

الاخ عبدوس كلام ذو شجون وذكريات معطرة بسيرة الرعيل الاول ....ربنا يديم الصحة والعافية لعلوب الرجل المرح البشوش سجلت رقمه عندي وان مد الله في الاجال سازوره في كشكه ....

سلام يا كابيتان

لقد ذهبت سودان لاين حين ذهب علوب و كثيرين من امثاله.

بالله دق لى تلفون عشان امشى معاك لعلوب لو صادف و كنت فى الخرطوم فالرجل يستاهل كل الخير.

علي العين والراس يا قبطان...جدا بس ربنا يسهل واسافر لكن للان 90 في المائه وربك يهون..سيسعد جدا اذا ذهبنا اليه...وسيفرح كثيرا....
محبتي وتقديري...
عبد الرحمن

اخر شخبطاطي قبل ان اغادر غدا وحتي الاسبوع قبل الاخير من يونيو..لا زالت تمطر هنا..ساشتاقكم...يشرفنا هذه الايام الصديق الصدوق العفيف الطاهر النبيل ..ابراهيم الكوباني...تعرفنا عليه او تعرف علينا علي ظهر الميمونة دنقلا..كم كان طاقمها عظيما...ابراهيم لا زال يذكرهم جميعا...كم اسعدني ذلك...لهذا استاذنكم ان افرد هذه السانحة كي احييه...وساحاول ان اكرمه اصالة عنكم كما اكرمنا في بورتسودان..
اردد مع ود فراج هلي تري يعود ذا الزمن...
محبتي والي لقاء قريب ان امد الله في الاجال..
عبدوس الشهير ب عبد الرحمن الزين..

بالسلامة ان شاء الله دوما عبدوس العزيز وأرجو ان تبلغ خالص تحياتي وأشواقي للحبيب ابن خالتى العزيز إبراهيم كوبانى وقطعا اغبطكم على الصحبة الماجدة والأيام الجميلة التى ستمضونها معا فلتستمتعوا بالأيام الجميلة وقطعا ياعبدوس اكرامك لابراهيم جزء اصيل من شيم الكرم الاصيل فيك ، كما هو اصيل فى ابراهيم كوبانى لكم مودتي .

الرشيد شمس الدين

كبيرنا وحبيبنا وتاج رأسنا عبدوس العزيز.
أتمنى لك رحلة سالمة وسعيدة، وإقامة طيبة بين ألأهل وألأصدقاء.
وأخر قولنا: غيب وتعال تلقانا نحنا يانا نحنا.
فى رعاية ألله الكريم وحفظه.

محمد الجمل كتب:الاخ عبدوس كلام ذو شجون وذكريات معطرة بسيرة الرعيل الاول ....ربنا يديم الصحة والعافية  لعلوب الرجل المرح البشوش سجلت رقمه عندي وان مد الله في الاجال سازوره في كشكه ....

الاخ ود كرار ..تصدق كنت قد كتبت هذا سابقا في المنتدي ورغم اني قد عدت لتوي من الخرطوم في اجازة قصيرة لم اتمكن من زيارة الاخ علوب في كشكه وماف الا المشاغيل الما بكفيها الزمن ...لكن لو كان واحد ذكرني كان امكن يعني الزهايمر برضو داخلة مع الزمن وحاجات تانية
من الاشياء الظهرت جديدة في الخرطوم (حوش السمك) في امدرمان يوجد له فرع في حديقة امدرمان الكبري ....جلسات بلدية انيقة وشربوت بارد ظريف وسمك علي ككيفك .تاني ما شايف جديد غير شارع النيل وكورنيش ابوروف وما غاب عن ناظري
سؤالي هذه المره عن الاخ ود فراج ..اين انت يا رجل ؟

طبعا مثل هذه الوعود التى يقطعها المغترب على نفسه فى ليالى الغربة البارده الموحشه وجميل الذكريات المتدفقه من جنبات الذاكرة المهتريه تحدث مع اى شخص ضاق طعم الغربه المرير , وكلنا نمنى انفسنا بزيارات ولقاءات حميميه لاحد اصدقائنا الاعزاء وندير فى رؤسنا كيف تكون الزيارة وبصحبة من وكمية الاسئلة المختذله فى الذاكرة التى سوف نطرحها والذكريات التى سوف نجترها......
ولكن حينما تطأ ارجلنا مطار الخرطوم تتبخر كل المواعيد والوعود كانما سخانة الاجواء تغلى الدماغ الى حد تبخر الاشياء الجميلة وتجبرك على مسايرة الحياة فى السودان ومجارات الواقع والسباحة مع التيار...
والغريب فى الامر بمجرد ان تدخل الى صالة المغادره وترمى بجسدك المرهق من الاجازة (التى تحتاج الى اجازه), تتدافع الى راسك المتصدع جميع الزيارات التى لم تنجز والاقارب الذين لم تسنح لك الظروف لملاقاتهم وتتمنى فى نفسك ان لا يعلموا بحضورك الى ارض الوطن, ولو كنت محظوظ يكون فى باقى رصيد فى الشريحة السودانيه وارقام بعض من تتذكرهم وتدير الارقام علك تحظى باخر فرصة للتواصل فى أرض التواصل .

وانت الصادق عزيزي ود كرار....
كلما كتبت كانك تقرأ ما بذهني....
تمنيت ان ازور علوب كما وعدت...وانا في الطريق اليه تذكرت انني وعدت كابتن احمد ان اهاتفه ونذهب معا لعلوب.... وبما انني فقدت كل تلفوناتي...شعرت انها خيانه.. ان ازور علوب من غير كابتن احمد...جاتني في جرح......واصلت رحلتي لكن لعنة عدم زيارة علوب حلت بي..صدم احدهم مؤخرة سيارتي.....واتلم الخلق والجاتك في ماللك سامحتك...
يا اخوانا انا عندي تامين شامل كامل.. لازم افتح بلاغ... اه...بس المسكين ده ذنبو ايه ما عندو رخصه...باركها يا عم.... باركها يا حاج..
بيني وبينكم ما عنديش مانع اسامح بس يا عم ويا حاج..

دي الحاجه الوحيده الزعلتني..عمي كباسه.... وتحجوا بلا قرعه...
نواصل زكريات الخرا توم..

حمدا لله على السلامة  يا كابيتانو

العزيز  قبطان احمد..اتلومت لكن صدقني ان تكون في السودان وما عندك  تلفوفات اقرب الناس اليك..خليها علي الله..
اسعدني ان اخذني العزيز ميدا- صديقي اللدود- لازور العزيز العزيز محمد صالح عبد الله عكود..في مشفاه في ابن مش عارف ايه..يخيل الي ابن سينا او خلدون..لكن بما ان  ابن خلدون ما عندو علاقة بالطب ارجح ان يكون ابن سينا..
حاولت ان اهاتف العزيز رشدي لاعزيه في عمه..ولكن يبدو ان التلفونات اللي زودني بها عابر قديمة...
انتهز هذه السانحه  لاعزي كل من فقد عزيزا لديه من اعضاء هذا  المنتدي الكريم..
شخصيا  وخلال اسبوع واحد  فقدت عمي بانقا الزين وعمتي فاطمة الزين وبنت عمتي زينب حسن الزين..تغمدهما الله جميعا برحمته والهمنا واياكم الصبر وحسن العزاء ولا حول ولا قوة الا بالله..انا لله وانا اليه راجعون...
نواصل..

العزيز الجمل ساحكي لك عن السمك...واحواش السمك..
تخريمه... راشد /خلدي...صحو ود عكود رشدي....الا...
عبدوس

سلام يا كابيتان
 
ربنا يتقبل الذين اختارهم الله الى جواره من الاسرة و يتغمدهم برحمته و يرحم موتى المسلمين جميعا و جعل الله المرض كفارة لمحمد صالح وبلغه الصحة.

كبيرنا ابوعابر....
البركه فيكم واحسن الله عزائكم....

الاعزاء ود كرار وحمادة والاخوة المتداخلون جميعا...كفانا احزانا..اللهم اجعلها اخر احزاننا.. نعود للشخبطه واللخبطة الي ان يرث الله الارض ومن عليها...في الطائرة خطرت لي خاطرة..سانزلها هنا..ولكن اخر نكته سمعتها وانا في السودان...قد تكون قديمه للبعض منكم..لكنها جد ضحكتني..لا ادري اين سمعتها او قراتها..امكن في هذا المنتدي..مين يعرف..موش رشدي قال صاحب الزهايمر ما بتذكر امبارح اكل شنو لكن ممكن يتذكر اكل شنو قبل ستين سنه او كما قال....رشدي...
قالو الوليه نوت الحج قالو ليها السنه دي الحج بي عشرين مليون...قالت ماني ماشه...انا زاتي ما عندي ذنوب قدر ده...
الي..الخاطرة في الرسالة القادمه باذن الله..
عبدوس

حبيبنا وكبيرنا عبدوس.
أولآ التهنئة بسلامة العودة، ,التعازى الحارة فى من رحلوا عن دنيانا من عم،عمة وبنت عم جعلهم الله جميعآ  فى ظلال جنانه، وجعل بركته فى أسرهم وجعلها الله آخر ألأحزان.
لقد شاءت إرادة المولى الا يمر علينا زمن حتى نًنًعى أو يُنعَى لنا فقد عزيز والحقيقة نحن جميعآ مسافرين فى قطار واحد يقوده عزرائيل وفى كل محطة ينزل منا أحد وعند نهاية الخط سيصل القطار خاليآ الا من سائقه، أحسن الله خاتمة من غادر ومن ينتظر.
ياعمنا ما بيقع الا حريف الجاتك فى مالك سامحتك فى موبايلك الجديد الذى تم نشله منك فى المطار، فهناك نشالين تخصصات من نشل جزالين نشل موبيلات نشل دول بحالها كما حدث قبل أربعة وعشرين عامآ مضت بالتمام والكمال.
حكى لى أحد ألأصدقاء بان له قريب فى السودان شاهد جنازة فى الطريق فتملكته الهاشمية وقال أقدمها خطوتين وآجر وصلى على النبى مسك رجل العنقريب وبعد مسافه قصيرة أصطدم به شخص آخر آجر وصلى على الحبيب و تحمل عنه المسؤلية رجع صاحبنا وعندما تحسس جيوبه وجد أنه قد تم تجريده من الناصب والجازم فلقد ذهب الموبايل والجزلان مع جنازة المرحوم. (جعلها الله له فى ميزان حسناته).
سعادتك المرة الجاية عند زيارتك للسودان خلى موبايلك فى مكانه، سجل كل أرقام تلفوناتك فى أجندة لوق بوك وانت سيد العارفين وزى مابيقول أخواتنا أولاد بمبة يموت الزمار وصوابعه تلعب (يعنى نسيت كتابة الوق بوك، لا أظن.)، لن تعدم الحصول على موبايل فى السودان والخطة البديلة سجل كل أرقام التفونات ورقم جواز سفرك صورة منه وضعها فى صفحة ألأيميل الخاص بك ويمكنك الرجوع لها من أى مكان فى العالم، كذلك لتفادى لصوص الأحذية عليك بهذه النصيحة إذا كنت ذاهب الى جامع عليك بحذاء الطنبورى وهو أقدم وأقبح حذاء فى التاريخ أو كما رأيت أخى يفعل يترك حذائه فى السيارة ويسير حافيآ وهذا لا أحبذه لأنك ممكن تركب فى مسمار أو أى كُبة فى هذه الحالة أعمل زى تور الجر ولكن بطريقة متحضرة خلى معاك كيس فارغ ضع فيه الحذاء ولا تغفل عنه حتى تنتهى من الموقف.
بينى وبينك سرقة الحذاء بيعوق (تعويقة ود طهور.) شفت جدو أخر تفتيحه لو جابو ليهو حرامى من اسطنبول ما بلقى فيهو فرطة.
لنا عودة ودام الود عامرآ.        

التحايا لكم والود أيها ألأحباب والبركة فيكم عبدوس العزيز وحمدا لله علي السلامة ... كثير أسفي علي الإنقطاع الكبير وذلك بسبب حالة من القرف والسأم الشديدأعترتني  في الفترة الأخيرة لم أستطع منها فكاكا .... كنت قد إتصلت قبلها تليفونيا بالحبيب عاطف القوز أسأله عن أسباب غيابه الطويل عن المنتدي  وليتني ما سألته فقد فجعني إذ  نقل لي حالة الإحباط التي يعيشها بحذافيرها من كل شيء حتي من المنتدي الذي هو من مالكي شهادة بحثه ... كانت وجهة نظره أننا قد فشلنا في إستكتاب المجموعة وصار أمر المشاركات  يشبه المنولوج إذ أن المشاركين قلة يحسبون علي أصابع اليد أو اليدين ويعتبر ذلك فشلا كبيرا للمنتدي ... إتفقت معه ولكنني طالبته بعدم الإنقطاع لأن ذلك يقلل حتي العدد القليل المشارك .. لم يقتنع ولم أقتنع ولكني دون أن أشعر وجدتني أسيرا لفكرته تلك وزاد ذلك من معدّل القرف العام أعواما ضوئية ... ماالسبيل أيها ألأحباب في أن نعيد للمنتدي ألقه القديم حتي يعود الجمع الكريم للحوش الكبير ؟؟؟؟
أمس ساهرت ليلة لاتنسي وأنا أتنقّل بين ميدان التحرير وقصر الإتحادية مع محطات التلفزة وقد هبت مصر أم الدنيا هبّة رجل واحد بل وأمرأة واحدة ضد الظلم وحكم المرشد وقد بهرني أبناء وبنات بمبة وهم يعيدون مجدنا القديم وأغنياتنا المجيدة في أكتوبر المجيد وأبريل الخالد .. لقد خرج المارد المصري البطل من قمقمه وكنا لانظنه يخرج  بينما شعبنا البطل المقدام معّلم الشعوب يغط في سباته العميق ... فياخيبتنا وياحسرتنا في أمجادنا التالدة وأجدادنا البواسل إذ نخرج نحن من أصلابهم بلارجولة ولامجد ...
مالي أزيدكم بؤسا بعد غياب , فى محاولة للإعتذارمنكم ,  إليكم آخر ماخطّه بابكر سلك في شماراته الموجعة لوالي الخرطوم :-

_________________________________________________________________

اها نجي لي شمارات والي الخرتوم كان شفت يا والينا زماااان ناس عمك ابراهيم عندهم زرائب للاسبير المستعمل لما يفرتقوا العربيه بقولوا جزرناها الداير باب نفس الموديل والداير مقعد والداير جربوكسي الداير رفرف الداير صدام كلهم بمشوا يشتروا من ناس عمك ابراهيم وكان شفت يا والينا قابلت لي بتاع بحر قال لي قررت اتجزر قلت ليهو كيف يعني ؟؟؟ قال لي ابيع نفسي كاسبيرات مستعمله يعني اقطع ليك كليتي في سعودي بي خمسين الف ريال ام فتفتي دي لو جابت ليها خمسه ريال بفكها اصلها قاعده ساي لا لاقيه امباز ولا اتملت اب سبعين كوارعي ديل ما بتباعن الا تشاد مستعملات شديد كركر شروني ساي انبرطن لكن لو لقيت امارتي اقطع ليك فيهو قلبي ده بخمسه وستين الف درهم بكون ارتحت قلت ليهو قلب بي خمسه وستين الف درهم ؟؟؟ قال لي ايوه قلب لاحبه ولا حدثني كالجديد ما مستعمل حاجه قلت ليهو والخمسه وستين الف درهم بتساوي كم ؟؟؟ قال لي ميه وتلين مليون بلعت ريقي وقلت ليهو ماعارف ليك عماني داير ليهو صلعه ؟؟؟؟؟ سلك كهربا ننساك كيف ياوالينا ونحن عارضين كلاوينا والي لقاء سلك -