شخبط شخابيط لخبط لخابيط..غايتو جنس غايتو

هذا البوست لارحب بي ود راشد وكلارا اماالباقين راجع ليكم ولتعليقاتكم نفر نفر..وانت ..انت انت انا جاييك راجع وانتي ديك العامله بتتطعن باللفة..قالت ايه خط هيثرو

.

يا كابيتانو بركة بالطلة .. خط هيثرو وأم الحسين دايرين تفسير الأول من النائب العام و التانى من المنتدى ، كويس انها شوية حطب يعنى ما شعللة انتا ما وصوك علينا تخف
بت عبد العزيز مرحب بيها كتير واتمنى ظهور الباقيات ، وماشين فى السكة نمد ولا ايه رأيكم .

[quote]

الرشيد شمس الدين عبدالله كتب:
لا دى مابنقدر نعدّيها ليك ساكت , لازم تورّينا وبالتفاصيل المملّة وين كنت طيلة شهر وماقادر حتى تدخل المنتدى ؟؟؟؟

ايوااا اقبض فى دى ..

وتانى قال إيه ؟؟
اماالباقين راجع ليكم ولتعليقاتكم نفر نفر..وانت ..انت انت انا جاييك راجع وانتي ديك العامله بتتطعن باللفة..قالت ايه خط هيثرو .
إنت , إنت , إنت أوكى مافى مشكلة , بس إنتى ديك ... أرجوك خف عليها ....
تسلم عبدوس الحبيب سعدنا بعودتك وأتمنى تكون قدرت تلم فى عبورى !

تسلم شانتير

العزيزة الاء..يا مراحب...بس حبيت اقول ليك سيبك من رشدي ده خوته خوة بحر.....ناس البحر خوتهم خوة بحر.......خوة مراكبية...



ما تسرحي بعيد.... عمري لم اجد ولن اجد اخوة مثل اخوة ناس البحر...كم تمنيت ان يعود بي الزمان ..اكون قبطانا لدارفور..... تلك باخرة لن انساها..ختمت بها سبعة عشر سنة من الابحار... دارفور...كان كبير ضباطها..عبد الحفيظ محي الدين. الشهير ب النتو ..والضابط التاني فيصل عبد الرحيم الشهير بالجزار و الضابط الثالث كان الخالد ابدا اسامه محمد مكي ...الباشمهندس سيف كمير والذي كان يعاني من اللوزات طوال الرحلة وتولي ادرة الماكينة المهندس الاول المدعو الرشيد شمس الدين .......ضابظ الاسكلي كان الخال الجد علي الحاج.. كان هناك طارق عبد الرحمن وعصام يحي..كان مهندس الليكترونات اسحاق عطا المنان..السحوق اللحوق..كما كان يناديه طيب الذكر اصيل..الميكانيكي كان جمال التمتام...وقصته الشهيره مع الباشمهندس الطاهر..مامون نصر ومحمد عباس...وعبد السلام سعد....اعتقد ان كبير الطباخين كان محمد محمود... وغيرهمو كثرو..في تلك الرحلة تشرفنا ب العزيز الغالي صديق المرحوم اسامة.. بيتر اورات ادور.. مدير الجمارك..وكانت رحلة اترك المايكرفون للعزيز رشدي لو ما الزهايمر عمل عمايلو.. اتحدي رشدي يقول منو الكان رئيس السفرجية..؟؟؟؟
عبدوس

انت يا عبدوس عليك الله الحكاية دي متذكرة ولا مسجلها فى مذكراتك ، ان كانت من الذاكرة فهذه شهادة براءة من ألزهايمر . وعشان أوريك انه انا برضو براءة من ألزهايمر كبير السفرجية كان المرحوم عم بكرى . طبعا يا عبدوس انا ما متذكر لكن معقول يكون معاك غير عم بكرى ؟

الرشيد شمس الدين

ما تسرحي بعيد

لم اسرح وربى ولم يخرج الموضوع عن قفشة فى لحظة .. ما شاء الله تبارك الله حقيقى زكريات جميلة شهادة برءاة فعلاً من اللى مايسماش .
حقيقى عهدتكم اخوة وآباء بالمنتدى منذ قدومى لم ار غير كل جميل وروح طيبة ادام الله هذه الروح والمنتدى للجميع .. ما عرفت خوة البحر
لك الود

العزيزة الاء...تعيشي وتسلمي..انت صرت.. شئت ام ابيت بعضا منا..نشكر لك كلماتك الصادقة وليدم ما بيننا كما يقول عدوي الحبيب.....
وي وي يا رشدي ..سقطت في الامتحان..الله يرحم العزيز الخالدابدا في قلبي وعقلي رئيس السفرجية ابو بكر ادم الشهير بعم بكري......رئيس السفرجية في دارفور تلك الرحلة كان عمنا حسن احمد الحاج..
دعني احكي لك عن اخلاص بكري وحبه لعمله ومن يعمل معه..
عندما كنت في البحر لم يك لدي مواعيد معينه اصحو فيها ولكن دايما ما بين السادسه والثامنه صباحا...في اي لحظه افتح باب مكتبي اجد قهوتي ساخنة في نفس اللحظه التي ادخل فها المكتب..تعجبت..وحاولت ان اغير مواعيدي..ولكن دايما القهوة ساخنه وفي وقتها..سالته كيف يعرف..لم يرد ان يجاوبني..قال لمن ينزل في اجازة سيخبرني...
علمت منه مؤخرا انه ياتي في السادسه ويقف في الممر قرب غرفتي وعندما يسمع ال flushing يعرف انني صحيت فينزل ويعد القهوة.....
رحمك الله عم بكري فقد كنت امينا عظيما طيبا مخلصا وبارك الله في ذريتك....
معزتي وتحياتي..

عبدوس ماتبالغ ياخى ... مصر تجيب لى زهايمر يعنى !!! أنا متأكد إنو مادام عم بكرى كان حى فهو كان كبير السفرجية وللأمارة كمان أنا الكلمتك بوفاة عم بكرى فى مكتب الخرطوم لو تذكر ... رحم الله عمّنا بكرى فمازالت ترن فى أذنى ( يا صباح الله ورضاهو !!! ) .
قال عم حسن أحمد الحاج قال !!! بالجد كدا هو فى كبير سفرجية كان بالإسم دا ؟؟؟ إن كان ذلك كذلك فالرماد كال حماد !!!!

الرشيد شمس الدين

سلااااااااااام الغالي ود الزين..
الف حمدا على السلامة وحزين لاني تغيبت ليومين ففوت على نفسي زفة وزحمة الفرح بحضورك الآخاذ ...اينما حللت فأنت ابدا مكانك القلب لك مساحة من الود بمدي مشاويرك...
ومعك دوما اجوب البحر وانا على شط اليابسة اتلمس ترابها ...اعشق المطارات وارهب البحر (لا احب الاماكن التي لا اري ملامحها امامي (يعني بقت فوبيا+زهايمر) خلطة تمسح ذاكرة جمل (سمعنا انو حاقد ومابينسى) ...
عفوا للخروج عن أطر شوق قدومكم
.....................
...............
سمعت حلاوة المولد ..
كسرة:
ياود الزين ...!! هي حلاوة المولد بقت قوية ولا اسنان الواحد خفت ..؟؟؟؟!!!!؟؟؟

ولك ولهم وحشة بحجم جبل أحد ( دايما مقياسي جبل أحد لأنه جبل يحبنا ونحبه ...وبينى وبينه مسافة 700 متر واراه يوميا امامي )
...................
...............
...
ود راشد

راشد كتب:
ولك ولهم وحشة بحجم جبل أحد ( دايما مقياسي جبل أحد لأنه جبل يحبنا ونحبه ...وبينى وبينه مسافة 700 متر واراه يوميا امامي )
ود راشد

سلااااااام ودراشد يصلك و انت بتلك البقعه الطاهره ، نسألك الدعاء لكل أعضاء المنتدى بدون فرز ولى بالاسم ( ممكن ارسل ليك رقمى الوطني ) . يأخى تسلم والله الشوق بحر ومتقريفين للبنبره فى رحاب قهوتك.

يا ادمن حصلنا صورة رشدي البرتكانة مافيشا
تكون مسحتها خلطة ود راشد ولا شنو

عبد الرحمن الزين2 كتب:
وبمناسبة الاعصار ساندي..قطعا ان اكثر الاشياء ازعاجا ومسببة لقلق اي قبطان مهما كانت مقدرته وخبرته هي الضباب و الاعاصير..بفضل التقنية الحديثة وسرعة البواخر بالامكان تفادي الاعاصير الا من رحم ربي...
في السابق كما تعلمون كان يطلق علي الاعاصير اسماء النساء..ولما احتجت جمعيات المراة صار يطلق عليها اسماء رجال ونساء بالتناوب....

وتانى عاصفه ثلجية تجتاح شمال شرق الولايات المتحده وصفها حاكم نيويورك بانها تاريخيه ، الإخوان خالد ، ود السيمت ، عمر موسى ، حاتم ، ابراهيم خير ، أخباركم عساكم واسركم بألف خير وفى دفو وصحه وعافيه ، حفظكم الله وكل الإخوان براً وبحراً.
عاطف عكود

شكرا عاطف العظيم، جات بسيطة الدور ده، قدّر ولطف
نيوجيرسى، السيمت ونحن فى خير حال، قليل من التلج الابيض المزعج
حاجة كده عشان العيال ينبسطو،،، اخونا عمر موسى، ولاول مرة طول قعادنا هنا، ما قدر يرجع البيت بعد الشغل، من كترة الجليد واغلاق الشوارع والهوا فى منطقة بوسطن ونواحيها
اقول امضوا ليلتهم فى محل الشغل،،، لكن عادت الحياة او بدأت تعود
اخونا ابراهيم، نتمنى نسمع من قريب
خارج النص
----
بعض من عذابات المنافى، كل هذا

كان لنا وطن

كما قال محمد المكى ابراهيم

تحايا ساخنات، من باب حلم الجعان عيش

كان لنا وطن ...يا خلدي العزيز...

كلما اسافر اعود وانا اشد قناعة الا اعود من تاني...ولكن...واه واه من لاكن هذه...به اناس لا تملك الا ان تشتاقهم وانت معهم..فما بالك عندما تبتعد عنهم...وكلما ابتعد عنهم اظل اعد الثواني حتي اعود اليهم.....

اهلنا .. احبابنا ..اولادنا..احفادنا..امهاتنا..زملاء دراستنا.. ذلك السوداني البسيط الذي يعيش في الريف ..عما تنا .. خالاتنا ..جميع هولاء وطننا يا خالد ..

حقا من اين اتي هولاء الذين احالوا وطننا الغالي من اناس طيبين الي اصحاب صفات لا تشبهنا...احالوا بلادنا من ارض خضراء الي غابات اسمنت يصل سعر المتر المربع فيها احيانا الي ثلاثه الف دولار ....يموت الخفير الذي يحرسها من البرد و يموت افراد عائلته من الجوع في اكواخ اعدت من الصفيح والخيش..
لك الله يا بلدا كنت لي وطنا...
عبد الرحمن

أولا اعذروني فقد انقطعت عن المنتدى لفترة بسبب ظروف عمل ضاغطة جداً وقد جاءت على كبر ، الله يلعن الكبر وسنينو .. كالعادة اتصل الحبيب عاطف ( حمد خوجلى) للاطمئنان بسبب الانقطاع غير المعهود .. لله درك حبيبنا عاطف فبمثلك تزدان المنتديات ونفخر ، لو لم يفعل المنتدى سوى هذا لكفاه والله ، ان نتفقد بعضنا خصوصا وقد بدأنا بكل أسف نتسرب عن بعضنا . حين سمعت بالجليد والظروف الجوية السيئة فى سواحل أمريكا وكندا خفت والله عليكم يا أحبتنا خالد وأسامة وعمر موسى وإبراهيم خير ، دعوت لكم فى صلاتى ان يخفف الله عليكم آثار الكوارث هذه والتى أصبحت تتساقط عليكم كثيرا ولكنى ابتهلت لله العزيز داعيا ان يحسن خلاصكم ويرد غربتكم وغربتنا جميعا إلى وطن بألفيهو نتساوى ، نحلم نقرا نتداوى ، سعدت بعودتك عبدوس العزيز ولكن ارانى أراك قد تدهورت كثيرا يعنى معقولة من الكاريبي لتشاد ، هذه نقلة كبيرة للخلف. المهم انك عدت سالما ولكن الى متى ؟ ومتى تلقى عصا الترحال ؟؟
لكم جميعا مودتي التى تعلمون وليدم أبدا مابيننا ...

الرشيد شمس الدين

حبيبي رشدي البرتكانه...لاحظت غيابك يا صديقي.فانت شمس هذا المنتدي وايقونته وفخر كل من عبر صالة المغادرة او المراسي في طريقه الي خارج الوطن ايا كانت الوجهة والغرض.....اشتقناك ولكن قلنا حتما يعود كما كان يردد الراحل سيد خليفه رحمه الله..حتما يعود...
يا حليل الكاريبي يا رشدي..بقينا نعيش علي الذكريات ولولا خوفي منك والعزبزة الدكتورة وحماده- علي فكره اين هو- لسردت لك بعضا منها...
انا مشغول حبتين لكن شايف في ركود قلنا نرمي بحصاة..عسي بل لعل..
العزيزه كلارا مالك انقطعت...جعل الله المانع خيرا...
المقطع الاخير مكرر CC لكل الاعزاء...نفر نفر
معزتي ومحبتي واحترامي
عبدوس

الرشيد شمس الدين عبدالله كتب:
لو لم يفعل المنتدى سوى هذا لكفاه والله ، ان نتفقد بعضنا خصوصا وقد بدأنا بكل أسف نتسرب عن بعضنا

لكم جميعا مودتي التى تعلمون وليدم أبدا مابيننا ...

الرشيد شمس الدين

عندما تغرب الشمس فى مكان فإنها تشرق فى مكان آخر

وليدم منتدانا وليدم أبداً ما بيننا

عاطف عكود

الرشيد شمس الدين عبدالله كتب:
. حين سمعت بالجليد والظروف الجوية السيئة فى سواحل أمريكا وكندا خفت والله عليكم يا أحبتنا خالد وأسامة وعمر موسى وإبراهيم خير ، دعوت لكم فى صلاتى ان يخفف الله عليكم آثار الكوارث هذه والتى أصبحت تتساقط عليكم كثيرا ولكنى ابتهلت لله العزيز داعيا ان يحسن خلاصكم ويرد غربتكم وغربتنا جميعا إلى وطن بألفيهو نتساوى ، نحلم نقرا نتداوى ،
لكم جميعا مودتي التى تعلمون وليدم أبدا مابيننا ...

الرشيد شمس الدين

آمـــــــــــــــــــــــــــــــــــــــــــــــــــــــين، رشيدنا وأثمن جواهر تاجنا، ياخى الله يسلمك ، الدعوات بظهر الغيب مستجابات، فزدنا منها
كتر خيرك حبيبنا،، الله غالب والقدم ليهو رافع، ليت العودة بسهولة التمنى، والله يجازى الكان السبب
والحمد لله من قبل ومن بعد
---
وطن حدّادى مدّادى ما بنبنيهو فرّادى
ولا بالضجّه فى الرادى ولا الخطب الحماسيّه
وطن بالفيهو نتساوى نحلم .. نقرا .. نتداوى
مساكن .. كهربا .. ومويه تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
---
يا سلام عليك يا محجوب

سلام يا الاحباب الكابيتانو - الرشيد - عاطف - خالد و كل الاخوان

دخول للسلام لحين ناخد نفسنا من الجرى و العودة برواقة.

تتشرف الخرطوم الايام دى بحضور اخونا ابراهيم خير فى اجازة قصيرة و كان لنا شرف مقابلته شخصيا امس و هو كما قال لا يحمل موبايل و لا لابتوب اثناء الاجازة لذا حملَنا الوصية بتبليغكم سلامه و تحاياه لكم جميعا.

مع التحايا للجميع لحين العودة برواقة.

تسلم اخونا احمد والله يكون فى عونكم مع الجرى جرى الوحوش ، والسلام أمانه لأخوانا ابراهيم خير . ونحن فى انتظار عودتك برواقه حسب وعدك.
عاطف عكود

سلامات واشواق وتحيا

اسفة للغياب الطويل عنكم .. لكن ظروف ومشاغل الحياة ..

أتمناكم جميعا بخير وأفضل حال

الأخوة الاعزاء الرشيد ,خالد,احمدوود عكود.....
سعداء بوجودكم بين اهليكم واهلينا ...والمنى للعزيز خالد بالعودة سالما غانما ولنا جميعا ... قلت ياخالد : الله يجازي الكان السبب ......من هو؟ الذي احال بقاع الارض بؤرة من وحل ومستنقع يصعب الورود اليه ...ام الذي زين لنا جمال الغربة ماديا لا نفسيا ام الاثنين معا ....!!!!

إذا ماضاق صدرك من بلاد .. ترحل طالبا بلدا سواه
عجبت لمن يقيم بأرض ذل .. وأرض الله واسعة فضاها
فذاك من الرجال قليل عقل .. بليد ليس يدري ماطحاها
فنفسك فز بها إن خفت ضيما .. وخللي الدار ينعي من بناها
فإنك واجد أرضا بأرض .. ونفسك لاتجد نفسا سواها
مشيناها خطى كتبت علينا .. ومن كتبت عليه خطى مشاها
ومن كانت منيته بأرض .. فليس يموت في أرض سواها .
......................
...........
بالله بلغوا تحايانا لمدىَ تبصره عيناكم
ولكم محبتى لمن بالداخل والخارج

راشد

بالله ياود الاستاذ طمنا عليكم ...أسال الله لكم الحفظ من كل كارثة وشر...
معذرة إن جئت متاخرا فوالله لا علم لي إلا اليوم وهذه اللحظة ....
فأعذروا جهلنا بما يجرى ولكم حبنا لما يأتي
خليتكم عافية

سلام للجميع

يغادرنا اليوم الاخ ابراهيم خير عائدا الى كندا فى رحلة طويلة - تبلغ حوالى الستة عشر ساعة - بعد الاجازة القصيرة التى قضاها بالسودان ..... نتمنى له سلامة الوصول .

العزيز احمد...
انت باين عليك حتبقي ركازتنا..وانه لواجب لو تعلمون ليس باليسير....ولكنك ادها كما نعلم عنك...علمت انك فارقت سودان لاين...هل يا تري هذا اخر مسمار..انا كنت اقول لخاصتي ما دام احمد هناك فهناك امل...
بالتوفيق اينما حللت..فلقد ساني فعلا ما سمعت مؤخرا انهم بصدد صيانة الباخرتين ولن يبيعوهما...ان كان ذلك حقيقة فاليحفظ الله البحرية السودانية..
تحياتنا للاخ ابراهيم وفي انتظار مداخالاته الثرة وذكرياته عن الخرا..توم..
كابتانو