شخبط شخابيط لخبط لخابيط..غايتو جنس غايتو

حلوه جد وطريفه لابعد الحدود يا خلدي- من دون كثير تلج- او جيم دال زي ما بقول العزيز ابو النيل-حمد النيل حماد- ود اخت طيب الذكر المرحوم الفريق ابراهيم عبد الكريم- والولد خال- الا في حالات نادره والا مش ...
ما علينا نعاود ذكريات الخرتوم...
اول مقلب شربته...
قبل اربع سنوات نصحني بعض الاخوه ان اشتري شهادات او صكوك شهامه قالو بتربح اكتر من 15 في المائه.. حلالا بلالا رزقا طيبا من عند الله مباركا
..ونحن طبعا - كلنا- بنلجا للدين عند المغنم... والا موش... الحرامي -في مصر- يتسلق المواسير ليسرق الشقه ويقول بسم الله استعنا علي الشقاء بالله...
ما علينا..قلت في سري معقول زول يديك اكتر من 15 الميه ده يا ربي ببيع بنقو والا سلاح..ما علينا اقنعت نفسي- وما منكم الا واردها...
في اوروبا لو ادوك نص في الميه تبوس يدك ضهر وبطن وبعد داك ناس الضرايب راجينك في اللفه عاوزين خمشه من الارباح الدفعها ليك البنك
..ما علينا
اتوكت واشتريت ...عدت بعد سنه وادوني شيك مندكل مع الاعتذار انو الارباح السنه دي 13 في المائة فقط... وانا لاقي..
انتو اكيد بتهظرو ده انا لازم اعتذرلوكو ..لا الشغلانه جد حلوه عاوز اشتري تاني.. قالو لا لازم تجي بعد شهر لكن كدي بالاول امسك شهاداتك دي كمستند ووقع هنا...

اتيح لي ان اعود - يا سادتي- عدة مرات ولكن لم اجد الفرصه او الزمن لاراجع.. قلته خليها.. تتربي ..وكما يقول العزيز الباشمهندس نميري..عكاشه في منزله والفلوس تشتغل...وتلك قصة اخري...مجالها بوست رشدي ...
ما علينا
عندما وصلت الحرتوم اكرر الحر توم -ما غلطان-
اول شئ كنت افكر فيه واضرب -علي قول عادل امام - عشرة وعشرين في تلاتين..وسبعه معانا الواحد..ايه ده..ايه ده .. ده اناكده بقيت مليونير...
ابقو معنا
ونواصل..محبتي..
عبدوس

اواصل....حدي هنا بكتب بي فلوس..
ما علينا
حملت شهاداتي -يا سادتي-الما خمج وصعدت الي الطابق -اعتقد انه الحادي عشر- من عماره مشهوره ومعروفه لي كل ناس الخرا توم الا ناس زييييييينا
المهم من باب لي باب ومن اموره لي اموره واخوكم او عمكم زي الاهبل...
اخيرا قابلتني الاموره المسعوله...

ايه ده.. انته شايل شهاداتك.... اي ده
ده المستند الوحيد......اللي عندي حتي اتمكن ان اصرف الارباح...وارجوكم شيكات لانو شايف الجو تحت لا يبشر بالخير...لو اديتونو كاش ..
كاش ايه وشيكات ايه يا عمنا ....
..يا بت عمي كباسه.. ده انا امكن اكون دفعتك...
يا عمو..بصراحه... منذ.. اكرر.. منذ.. اللحظه التي انت اخدت فيها اصل الشهادات دي .. توقفت الارباح لانهم اعتقدو انك ماشي تبيعها...
تقصدي ربح بح... اي ربح بح
لكن.. ولا ما لكن ولا لكن...
ياجدو
حقك محفوظ نحن ما حراميه امش شارع الجامعه قرب المتحف القومي تاخد اصل فلوسك علي داير المليم...
وفي طريقي الي هناك التقيت شرطي المرور خالد وتلك روايه اخري
تقول لي كمل علويه..
عمكم عبدوس

الغالي ود الزين ...نارت ارجاء المنتدي بمقدمك الميمون وصراحة شفقتنا عليك ..بس الحمد لله جات ع الفلوس ..وكما يقولون : الجات في مالك سامحتك ..
..............
..
عليه لن نعلق حتي تصل لنهاية الحلقة من السرد ..بس قولنا نقول صباح الخير ونشوفك كيفن اصبحت...
...................
..........

عبد الرحمن الزين2 كتب:
ياجدو
حقك محفوظ نحن ما حراميه امش شارع الجامعه قرب المتحف القومي تاخد اصل فلوسك علي داير المليم...
وفي طريقي الي هناك التقيت شرطي المرور خالد وتلك روايه اخري
تقول لي كمل علويه..
عمكم عبدوس

العزيز اخونا عم عبدوس بعد مرور اول 24 ساعه و نحن مشرورين فى شارع الجامعه بين متحف حساس محمد حساس وخالد بتاع المرور وفى انتظار علويه الاخرى .
ودام التواصل
عاطف عكود

الاعزاء ود عكود..راشد والمتداخلون جميعا...
يسعدني مروركم وتفرحني كلماتكم..دمتم ذخرا..
نواصل..صحيح استلمت اصل المبلغ وان في انتظار الشيك يجيني ليك واحد ويسلم علي بي حراره شديده..كيف احوالك ياابو الكباتن... ..لسه في المانيا..والا قالو انتويرب وكيف عابر وكيف محمد وكيف...وكيف وكيف..الله ده بعرفني شديد...
الله ينعل ابو الزهايمر ياربي ده شفتو وين ياربي كان معاي كديت في ياتو باخره .. يا اخي ما معقول عمرو يا دوبك تلاتين سنه وانا سبت البحر لي 23 سنه يا ربي ولد واحد من زملائنا...يا ربي..وقدر ما شلته وختيت غلب حماري..وكلو مره يقول لي انته باين عليك ما عرفتني...
صراحه ياابني ما قادر اتذكر اشتغلنا في ياتو باخره...
باخرة شنو يا كابتن انا .... ود عمتك.........
قال زهايمر قال..
ونعود لي خالد....
تخريمه .... العزيز خالد شكرا علي رسالتك ولكن جتي اشعار اخر سيبقي الحال كما هو عليه..
معزتي واحتراماتي لا تحدها حدود
عبدوس

ما قلته ليكم ساهريكم عشان تحرمو تقولو عووووووووووووووووووووووووووك
مريت علي قهوه الحبيب ود راشد واستمتعت بالمداخلات لكن صحي غياب ود الاستاذ يخوف...
حدي جاب سيرة رشدي والا عصملي والا التايواني ......
في خرا توم سيدي كنت اتمني لقاء العزيز الباشمهندس السحوق اللحوق وصديقي اللدود قاشوره..لكن لم تسمح الظروف وغدوة كابتن عابدون الفاخرة هرت مصاريني الما متعوده علي اللحوم لكن يا رشدي اللوز طلعت سليمه..اخوك برضو حريف ما دني...

والله يااولاد امدرمان ... استمتعه بليله من الف ليله وليله كنا سته اكرر سته فقط فقط...قعده انما ايه...
محمد ابراهيم زيدان ..الشهير بي زيدان ابراهيم..عمر الشاعر....
وفي الليله ديك
واواصل....لمن احكي ليكم قصتي مع خالد برجع لي زيدان..
محبتي ومعزتي
عبدوس

عبد الرحمن الزين2 كتب:ما قلته ليكم ساهريكم عشان تحرمو تقولو عووووووووووووووووووووووووووك
استمتعه بليله من الف ليله وليله كنا سته اكرر سته فقط فقط...قعده انما ايه...
محمد ابراهيم زيدان ..الشهير بي زيدان ابراهيم..عمر الشاعر....
وفي الليله ديك
واواصل....لمن احكي ليكم قصتي مع خالد برجع لي زيدان..
محبتي ومعزتي
عبدوس

العزيز عبدوس اه من السته باقين تلاته فقط و خالد
وفى انتظار الرجوع وباقى القصه و عووووووووووووووووووك اخرى
ودام التواصل
عاطف عكود

العزيز عاطف عكود والحنين محمد احمد طه والرقيق الوديع ود راشد..والله ياناس امدرمان صحي ليكم حق تشكروها...اكرمني صديقي الوفي علي المصري وقال لي يوم الخميس حاقعدك قعده تحكي بيها عمرك كلو.. اقفل تلفونك وما ترتبط وما تكلم زول بس تجي عندي الساعه تمانيه ونص...بعد صلاة العشاء..
وقد كان وعلي ضفاف النيل الخالد كانت اروع امسيه..6 اشخاص وانا جالس بين عمر الشاعر وزيزي...
والعود..والنغم والطرب..والحكاوي والشعر والروائع ولم نفق الا علي صوت مؤذن الصبح.. وعندما وصلت المنزل وجدت اهل المنزل واقفين في الشارع ... مالكم ..خير.....ما من عوايدك مالك... مالي ..ولد تائه يا ناس خلوني في حالي انا منتشي لابعد الحدود...الغريبه في بلاد السجم دي اطش شهرين والجن الاحمر ما يعرف انا وين..اغيب ساعات في الحر توم القي الشارع بفتش علي..
ما علينا سرحت تاني.. المهم غني زيدان وابدع عمر الشاعر وحكوا لنا ذكرياتهم واكثر ما يضحكني انو كلو واحد- تقريبا -من المستمعين طلب من زيدان يغني ليهو -في الليله ديك -وهات يا بكا ومخاخيت وكلو واحد يفتح الموبايل ويضرب نمره ويسمعها LIVE
اتاري العالم دي كلها مشوكشه ومكتوله كمد .. ما انا براي..
نسينا موضوع خالد ساعود باذن الله
محبتي
عبدوس

حبايبي الحلوين..
نعود بعد انقطاع قسري لا يد لنا فيه جميعا .. للشخبطه واللخبطه ...وتلك سنة الحياه راجيا ان يمن المولي عز وجل علي حبيبنا اسامه بالعافيه ويعيده الي اهله سليما معافي حامدا لله وشاكرا لكم علي دعواتكم الصادقه ووقوفكم معه والسؤال عنه..امين انه سميع مجيب..
لن اطيل اكثر عليكم ولكن احب انتهز هذه السانحه لارحب باخر من شرف هذا المنتدي-عزه محمد كمال علي- وعلي ما يبدو انها احدي كريمات الاخ الفاضل العزيز القبطان محمد كمال علي خليل- البوسانتس-وارجو الا اكون مخطئا... وعلي كل ياالف مراحب بالعزيزه عزه وعشان نرحب بيك اكتر وتتعودي علي شخبطاتنا ولخبطتاتنا ونعمل البساط احمدي نقول ليك اخر ما قراته عن علاقة المراة والرياضه....ساعوووود
الي لقاء ابقو معنا..
بعدين تطلع ما بنت البوسانتس واشرب ما اروي..
عبدوس

بمناسبة العودة ،،هاك الشخبطه الرفيعه دى


بعض الرحيق أنا والبرتقالة أنت

محمد المكى إبراهيم

الله يا خلاسية

يا حانةً مفروشة بالرمل

يا مكحولة العينين

با مجدولة من شعر أغنيَّة

يا وردة باللون مسقيَّة

بعض الرحيق أنا

والبرتقالة أنت

يا مملوءة الساقين أطفالا خلاسيين

يا بعض زنجيَّة

وبعض عربيَّة

وبعض أقوالى أمام الله



عشت زمن وانا اعتقد انو الشاعر مصطفى سند،،واستبان اليوم الغلط واظن حتى كتبنا مره فى المنتدى ده مداخلة عن بعض الرحيق منسوبة لسند،،وكذا نعلن اعتذارنا
لكنو اى سند كتب البيت الشهير

لو أن زندها احتمل الندى
لكسوت زندك ما يشاء
ابرتين من العبير وخيط مــــــــاء

ده كمان لو ما طلع هو ،،اظنى محصل عبدالرحمن الزين،،،،نشرب وما نروى يا قبطان
ويا عزّة مرحب
وهذا البوست شخبط لخابيط وتمنع فيهو ال u turn
عليه تحيات

صباح الخير ايها الرائعون ....كيفك ود الزين صاحب الدار وودالاستاذ بانئها ...لا ياود الاستاذ يبدو لي موقفك احسن كتير من ود الزين لانو فعلا ماورد هو لمصطفي سند الرائع المقيم وهاك دي لمصطفي سند (لن):

لَــــــــنْ



-1-

لمحتُ فى نافذِة البصيرهْ....

مدينةً من مرمرٍ

وقُبَّةً صغيرهْ..

وشاهدينِ فوق خُضرةِ الأشياءْ..

يُغنّيانِ للنجوم ِ والسماءْ..

-2-

عرفتُ أنّنى مطارد’’

فقلتُ : لنْ..

أ[يعَ سوسنَ الحروفِ للجرادِ

أو أتوهَ عن مداخلي ..لدارِ مَنْ..؟

أساىَ أنتِ

يا شهيدةَ العينينِ

عبر شفرةِ الجحيمْ..

سألتُ عنكِ

أنت لا سواكِ

قيلَ سافرتْ مع السّديمْ..

وضيَّعت مفتاحها .. وبابَهَا .. وعطرَها القديْم..

فهلْ تبيعُ..؟

قلتُ: لنْ..

الموتُ فى خُطاىَ والربيعُ والزَّمنْ..

ومن تشرُّدي سأدفعُ الثّمنْ..

-3-

براءة’’...

وهبّ حارسُ الجحيمِ

يُعلنُ النهايةً السوداء: مَحْكمَهْ..

يا رحمةَ السماءْ..

تنزَّلى

فهذه التي تنامُ فى بريدِ الخوف ِ والدماءْ

ستجعلْ النضالَ ملحَمهْ..
..............
............
والقصيدة طويلة اخاف ان ينام الملل علي رموش اعينكم فتغمض في حضرة الحرف
لنا ولكم وللبقية عودة

ود راشد العزيز...كم تخجلني ..خلدي الله يخليك.. بكلماتكم..تمنيت..لو..لو..لو.. هيهات .. اقدر اجاريكم..
وبمناسبة هيهات .. قديما قال شوقي..كما درسونا في الكتاب-الاساس- في ذلك الزمن الجميل-يصف القطار
هيهات هيهات لا جن ولا سحره .................. بقادرين علي ان يلحقوا اثره
طبعا ده كان قطار الانجليز وتدهورت سرعة القطار عندنافصرنا نتمشي وننام قليلا ويلحق هو بنا -ان استطاع- اما قطارات اليابان والصين والمانيا فقد تعدت 320 كلم في الساعه ودخلت الجن والسحره في امرا ضيق...ما احلي ايام الكيلتون والمحلي واخيرا قطار الوحده..
برضو مرقته بره الموضوع...
ساعود ابقو معنا..معزتي
رشدي مشتاقووووووووووووووون
شروحات
الكليتون كان قاطرة ركاب تغادر الخرطوم في السادسه صباحا يوميا وتمر علي كل المحطات والسندات في الطريق حتي سنار والسوكي في ايام الاحد والاربعاء ويصل مدني في الحادية عشر صباحا ..ويطلق صافرة معروفه لكل اهل مدني ويعود في الثالثه بعد الظهر تماما الي مدني راجعا من سنار ويتزود في مدني بالوقود*الفحم* والماء وينطلق الي الخرطوم في الثالثة والنصف ويسمي -المحلي- مارا بكل المحطات والسندات ليصل الحرطوم في التاسعه والنصف مساءا دون اي تاخير...الا ما ندر
اما قطار الوحدة فكان في زمن ناس عبود
انا شخصيا ما حضرته الزمن ده لكن قالو كان بقطع المسافه بين مدني والخرطوم في تلات ساعات ولا يتوقف الا في الحصاحيصا
قالو كده والعهده علي الراوي
تحياتي واسفي لو اطلت
عبدوس

عزيزنا الشاب الأنيق المعطر دوما عبدوس ...لك والله وحشة لا توصف وأنت تعلم أن القلوب عند بعضها حبيبنا .... ولكنى فقط كنت فى الصين ليس طلبا للعلم كما فى الأثر ولكنه جرى وحوش وراء دوامة العمل الذى لا ينتهى .... قابلت هناك فى الباخرة الباشمهندس نادر عزالدين وكابتن عبد الجواد ..كنت أظنهما قد سمعا بأمر حبيبنا أسامة مكى وعندما أخبرتهما نطّ عبد الجواد كالملدوغ ...وبدأ فى النحيب كما طفل حين تداهمة الحياة بغتة ... ندمت على تعجلى ثم أتصلنا سويا باسامة والذى طمأنهم على صحتة ولكن من يقنع عبدالجواد بالكف عن النحيب ؟؟؟؟؟؟ أعطيتهم نافذة المنتدى وأعتقد أن نادر قد بادر بالتسجيل .... أحكى لكم أحبتى عن حالنا فى هذا الزمن الأهتم ... لقد أصبحنا فى قدر من الهشاشة لا تحتمل هذه الأخبار المفجعة بعد أن توالت علينا الضربات من كل حدب وصوب...حتى أنه والله لقد اصبح أهون للواحد منا أن يكون هو المصاب من أن يسمع إصابة أخيه ...هل هذا شعور صحى أم انه الكبر ؟؟؟ لعن الله الكبر وسنينه .. ماعلينا ....
ضحكت يا عبدوس وأنا أقرأ لك :-
صراحه ياابني ما قادر اتذكر اشتغلنا في ياتو باخره...
باخرة شنو يا كابتن انا .... ود عمتك ...
الحمدلله أنه طلع إبن عمتك فقد كنت أخشى أن يقول لك أنه أخوك ...
ثم وأقول لك الجاتك فى مالك سامحتك فى امر صكوك شهامة وقد كنت أحسب أنك (فتك ) وأن مثل هذه
الأشياء لا تخيل عليك !!!!! أنت لم تكن فى حاجة ابدا لصكوك شهامة سيئة السمعة هذه فعندك من الشهامة الحقة مايكفيك ويزيد ...عفوا الإطالة وحتى لقيا قريبة - إن مد الله فى الاجال ..سلام ...

الرشيد شمس الدين

رشدي البرتكانة....حته واحدة...لكن ما بالغته..والله ليك وحشه وعندما اري طلعتلك في هذا المنتدي اسرح وامرح واتذكر و.. و..كم انت عظيما يا ابن شمس الدين...كنت اقول لتؤام الروح وصديق العمر عليوة- الباشمهندس علي النور خلف الله-
ياخي رشدي ده ود حرام وابن كلب...وقطعا لم نكن نعنيها..كان قصدي انه ابن ستين الف فتله..
برضو ما قادر افسر... رشدي البرتكانه
لم اعاشر من اعظم منه لا زلت اذكر عندما كانوا معنا في شندي....حيدر ..عبد الحليم ..لكن رشدي كان وسيظل نسيج وحده...لله درك ابن امي وابي...
اخاف ان يضيع البوست لان دموعي تحجب عني روؤية الكي بورد....
لا ادري لم اذرف الدموع..هل كما قال رشدي نبكي اعزءا لنا ام ننعي انفسنا..
والله كم اتمني كما قال رشدي ان ياخذني الله الي جواره قبل ان افجع بموت عزيز حبيب لدي..
السادة المتادخلون
اكاد اقراها في عيونكم...ما لنا وذكرياتكم..
لكم العذر
معذره
الم اقل لكم اعلاه شخبط لخابيط
عمكم عبدوس

اللهم احفظها حب ومودة واخاء ومتع الجميع بالصحه والعافيه وعمر مديد وسعيد ولمه فى ساعه خير
عاطف عكود

العزيز ود عكود..اشكر لك دعاؤك النابع من قلب ناصع البياض...
لم اتمكن من الدخول خلال الايام القليلة الماضية ولكني متابع وساكن الممبر وقاعد في البنبر يا ود راشد...صحيح اين انت يا رجل ليك وحشه..اين عصملي..اين الجمل.ود كرار يطل علينا وجني اختفي وبارك الله في اية الله بوسانتس..مش قالوا يا رشدي البرتكانه.. خياركم في الجاهليه خياركم في الاسلام...وتيب
خالد العزيز...شكري ومعزتي .. الله لا جاب يوم شكرك
ساعود لاهريكم..
تحياتي للزملاء الجدد وامنياتي للشيخ اسامه بعاجل الشفاء والعوده لديار اهله.. احر التعازي لكل من فقد عزيزا..وكل عام هجري وانتم جميعا بالف خير
عمكم عبدوس

غايتو يا شيخ خالد لازم تلقا لي حلل..
مره عبد الرحمن الزين 2 مره حافي حالق..مره بي صوره..اما عدد مساهامتي فعلمها عند الله..
شوفو لي حلل وكلو بثوابه..
عبدوس

عبد الرحمن الزين كتب:
العزيز ود عكود..اشكر لك دعاؤك النابع من قلب ناصع البياض...
امنياتي للشيخ اسامه بعاجل الشفاء والعوده لديار اهله..
..وكل عام هجري وانتم جميعا بالف خير
عمكم عبدوس

العزيز عبدوس تشكر يا غالى وسنه هجريه مباركه ومبروكه وكل عام والجميع كل على مايتمناه
واهديك وكل الاخوان ساعه صفا وسط الشخابيط بمناسبه العام الهجرى
https://www.youtube.com/watch?v=Zgh0PaQmvLI
ودام التواصل
عاطف عكود

كان ابي- يرحمه الله رحمة واسعة ويحسن اليه- كريما .. عطوفا.. طيبا ولكنه كان قاسيا شديدا في تربيتنا .. كنا نخافه ونتجنب غضبه ....كان لا يسامح اذا اخطانا خاصة اذا كان الامر يتعلق بفرض من فروض الدين كنسيان الصلاة في ميقاتها..الكذ ب.. السرقة.. حتي ولو سفة سكر - بضم السين-... عدم اسباغ الوضؤ وكلفتة الصلاة والغياب عن صلاة الجمعه وتلك عنده من الكبائرلا يسامح ولا يهادن فيها
.. كنت اصغر ابنائه.. الثلاثه الكبار..
كان يضربنا بالسوط او سير ماكينة الخياطة...
اكثر ما كان يزعجني ويؤلمني ان اخواني الكبار لا يصرخون عندما ينهال السوط علي ظهورهم ...
اما انا والحق اقول كنت جرسه..
واكثر ما يقلقني هو الدبوس السلكي الذي يوصل سير ماكينة الخياطه.. كنت اطالبه بدموع باكيه ان ينزع الدبوس قبل ان يضربني... كان رحمه الله يستجيب.. ولكن ما ان ينهال علي اول سوط حتي يعلو صراخي باكيا مناشدا امي...
امي .. امي الحقيني..امي عليك الله..
وتدخل امي -كعهدها -ولم تخذلني بدا- وتقف حايلا بيني وبين سوطه..
يقول لها وهو يزار .. غاضبا..
ابعدي با حرمة ابعدي يا ولية.. ابعدي.. والله اكان ما زحيتي قسما عظما ... انزل السوط في راسك..
تقول له وهي تحضني بيديها من خلفها... كفي كفي خلاس... دقني بداله
..هنا...
يسطر الزمان مقولة خالدة..
لن انساها ما حييت..
يرد ابي وهو يمور غاضبا
انتي عارفاني.. انا ما ممكن امد ايدي علي حرمه
يلا غوري من وشي انتي وولد ك......
رحمك الله ابي

الاعزاء رشدي..خالد الاخوه الذين عبروا صمتا وكلاما عن المجلوده..
لم اشا ان اعلق علي ما حدث حفاظا غلي خصوصية المنتدي..
وكتبت ما كتبت فقط لاقول ان ابي يرحمه الله وهو العارف لدين الله تعفف ان تمتد يده لضرب حرمه حتي ولو كانت زوجة له احل الله له ضربها
لا تعليق
تحياتي من غرب افريقيا ويا عصملي اهو المره دي اللاب توب معاي
معزتي
عبدوس

جان والكريسماس

كان كريسماس
في عوالم يمه لعيونك جديده
النبيذ في عيوني بق
ولهلبت روحي الموسيقى والبنات يايمه عينيهن تودر
كل لوناً
كل رمشاً بي قصيده
وجان بترقص
ولما ترقص جان بتفرق
مره زي لهباً مجنح
ومره زي أهل الطريقة
الطبول جواي دقت
*
*
**

والريزم لامن يهوم بالبنية
الغايبه زي أهل الطريقة
ببقى زولاً شكلو تاني
وحرفو تاني
ورسمو تاني
روحو ريشتو
والجمال في الدنيا عيشتو

من ابداعات هاشم صديق منقول من الموقع الرسمى للشاعر
شخبطات /25/12/2010

عليك الله يا خلدي البنسوي فيه نحنا نسميه شخابيط والدرر التي يسكبها يراع هاشم صديق يسميها شخبطات....عشان كدي قلنا غايتو جنس غايتو...
خارج النص
لا زلت حبيسا في افريقيا التي.... المره دي بسبب التلوج التي لم تكتفي بالمدرج ولا اجنحة الطائرات بل هددت سقف مطار شارل دي جول بالانهيار...
كنت اؤمل ان اقضي عطلة الميلاد وباين لي راس السنة بقي فيهو قولان...
كل عزائي انني اكاوي كل من يتصل من اوروبا يشكو من البرد...اقول لهم ياخي الحر زهجنا...واعرف طوالي يقفلو الخط في وشي.. لكن بيني وبينك حاسدهم علي البرد...
الانترنت هنا يعمل لكن لازم يكون عندك صبر اكتر شويه من حق ايوب..
معزتي
عبد الرحمن

يا عبـــــــــــــــــــــــــدوس
يا كبيــــــــــــــــــــــــــــــــــــــــــــــــــر
يا افريقيا،،، فكّى لينا الزول ده

والعود احمد..اشتاقكم...
غصبا عني والحديث في هذا المجال يطول..
متابع ولم اتمكن من الدخول ورغم مساعدات خلدي البرتكانه -علي وعد ان ينافس الحبيب رشدي البرتكانه-سيد الاسم- لم اتمكن من الدخول ..واخيرا تمكنت ولله الحمد..
في القلب حسره ومن العين تنزل دمعه علي وطن انشطر
وثور يذبحه الخال ابتهاجاووعد ووعيد..والولد خال.. وشعب لم يعد هو الشعب الذي نعرف...لا ادري ماذا اقول وماذا اكتب..لا اطيل ..دعوة لكم جميعا لتخرجوا مافي صدوركم..هذا المنتدي نريد له ان يعبر مافي دواخلنا
..لا نمانع في تقبل التعازي والتهاني فهذه سنة الحياة..ولكن الحياه دايما تسير...
ساواصل
محبتي
عبدوس

حمد الله على السلامه
ونواصل
عاطف عكود