فنجان قهوة

عبد الرحمن الزين كتب:غايتو يا ود كرار انا ما بكضب من ما قريت بوست اخر الليل بتاع الفيران كبيت الزوغه عديل خاصه اني نوهته انو الحاج خالد سالي سكينو..وقلنا ننتظر ونستفيد من فرق التوقيت..لكن شايف الحاج مسجل غياب وود عكود ممشي الامور..

العزيز عبدوس
ود عكود حدود مسؤلياتو الفارية تنحصر لما دون العشرين وما فوق الخامسة والخمسين ومابين ذلك هو مسؤلية اخونا خالد رغم التلج والجليد ,
على العموم واخيرا فقد عادت الامور لطبيعتها والامن مستتب وعلى قول الشاعر يا فار ما دخلك شر.
ودام التواصل
عاطف عكود

والله ياودعكود دبلوماسي من الدرجة الاولي ...بس يبدو لي انو اليومين ديل الناس اعصابه بايظة شوية لانو جات موية النار وشوية فار ود عابدون قبل مايجر واطي..المهم الحكاية دايرة ليها قعدة برواقة كده

راشد كتب:وقبل الدنيا ماتولع هاكم النكتة دي.....قالوا في جيران حلفاويين كل يوم بيقعدوا مع بعض ..................لتهدية الاعصاب ...

العزيز راشد
ما عارف السبب الخلانى اربط بين مداخلتك السابقة بتاعة (قعود)الجيران الحلفاويين وتهدية الاعصاب مع مداخلتك الاخيرة والناس الاعصابة بايظة والحكاية الدايرة ليها (قعود) برواقة كدة .
هل هى احد فروع الدبلوماسية ؟.
بمناسبة القعود دى مسؤلين من الخير دحين القعود دى مش مرحلة من المراحل السنية للجمال ؟
ودام التواصل
عاطف عكود

والله ياود عكود حيرتنا عديل ...قلت لي بتاع السجارة منو؟
والله انت متخصص دبلوماسية لكن نحن شغالين (كيري) وطبعا كيري دي مفردة بستخدموها الجماعة البضبحوا برة السلخانة (الفتيحاب)....
بالمناسبة هي ثلاث مراحل للجمل :حاشي وقعود وجمل (ناقة)...والله اعلم
................
.............
والله القعدات دي جات بحسن نية ......

راشد كتب:
لكن نحن شغالين (كيري) وطبعا كيري دي مفردة بستخدموها الجماعة البضبحوا برة السلخانة (الفتيحاب)....
والله القعدات دي جات بحسن نية ......

يا اخوى الحكاية جابت ليها ضبح وتقول لى حسن نية !!!!
عاطف عكود

غايتو يا درة المنتدي انا من زمان شامي ريحة قهوتك دي بتشبه قات اليمن..اللي عمرو ما كان سعيد...-.لكن شايف ما عندي طريقه غير ان ادخل واخد لي تخزينه... الفاتح ماسورة فاتح لي ...النتو سمعته تحت تحت من ود عكود انو سافر لي الغاليه- نحبو حنان- ام سماح- وعسي امكن الدخان يكون حرق شمبات مين يعرف..جني طفش مين يعرف متي يعود..رشدي بقي تقيل خالص... الحاج جالد - ما غلطه مطبعيه يا ود عكود - بتعلل بالتلج والبرد..رغم انو هنا - ونحن ما متعودين ناقص عشره درجات وما عندنا غطاء لا افقي ولا جوي
ود كرار من عمل عملتو زاغ..عصملي وعدنا بالدرر ومن ديك وعيك..قبطان احمد متحيل قال في سرو ديل حيجبو رجلي.. اسامه العزيز من زمان عارفو كتير علينا لكن عشمنا انو يطل علينا..غايتو جني ولعها وطفش.. يا خوي بقينا انا وانته وامكن ود عكود ..كدي خلينا في نص العرقي ..القهوه دي مره وما بتندار...ساعود لك بس خليني اخت التنكه في النار
عبدوس

الرائع ود الزين ...والله جايك بالبرواقة ,عندي اجتماع اخلصو وافضى ليك ...عشان ماتقول راشد كمان زاغ ....

الحبيب ودالاستاذ....
والله كلما نشوف النشرة , ندعوا ليكم ربنا يدفيكم, ياخالد اخوى ماقلنا كفايه غربة فى البلاد التى يتجمد فيها شعر الجلد,
وتعال لينا فى بلاد الشعر جلدك يقوم فيها من ماتدخلها مايرقد الى لمن يختموا ليك فى الجواز الخروج النهائى
ودام الود دفئاً,

راشد كتب:بالمناسبة هي ثلاث مراحل للجمل :حاشي وقعود وجمل (ناقة)...والله اعلم ......

ااستنوق الجمل ياود راشد ولاليه الناقه بين قوسيين كانها تعريف للجمل.

ولكم الشكر

ود عكود والحبايب الحلوين ..اقترح (ولكي يسهل تصفح المنتدي) ان يكون الترحاب في بوست والعزاء في بوست و...........الخ وياريت العناوين تكون جزابة كما في المنتديات الاخري وبرضو ممكن ابواب اخري نتشكل فيها كما نريد قلتو ايه ياكنترول؟

الاعزاءود الزين ود عكود ود كرار والجمل...
طبعا ياود الزين شايف الناس جات علي حس حضورك الحلو ..طبعا قهوتنا مازي قات الجماعة لان القات يحتاج للسكوت (ترخيمة) ام قهوتنا فمحتاجة للفرفشة والشمارات ولكن يظل وجه الشبه الادمان في الاثنين...
ياود كرار شايف اليومين ديل بقيت زي مصححين الشهادة السودانية تكتب ليك سطرين وتزوغ يا تجيب ليك كبة واتورطنا فيها زي فيران المعامل بتاعتك...والله المسالة لا انقنة الجمل ولا اجملت الناقة بس حبيت اقول انو ده ممكن يحل محل ده كطور نهائي ...
سمعت دي بمناسبة الابل بشكل عام :
داك براقا قبلي فوق اهلي وفوق ابلي
قوم يابخيت احلبي لبن امزور طابيلي
.......
............
لحدي ماتقول:
يما هييي يايابا ماتقولوا لي كضابة
ود ام زور هبابة
سبق البيدولابه
(طبعا القراية بالتشكيل مهمة)
شوف ياود عابدون ده غنا بنات ومافيه اي غزل مبتذل ..طبعا البيدولابه هو السيارة..ود ام زور اسم جمل
....................
...........
والله الجمل انت دايما في حالة تجديد وتطوير مستمر للمنتدي حينا بالافكار واحايين كثيرة بحضورك الفاعل...
والكلام اكيد لودعكود وودكرار وود الاستاذ..ونحن معاك معاك

ود كرار كتب:الحبيب ودالاستاذ....
والله كلما نشوف النشرة , ندعوا ليكم ربنا يدفيكم, ياخالد اخوى ماقلنا كفايه غربة فى البلاد التى يتجمد فيها شعر الجلد,
وتعال لينا فى بلاد الشعر جلدك يقوم فيها من ماتدخلها مايرقد الى لمن يختموا ليك فى الجواز الخروج النهائى
ودام الود دفئاً,

شكرا يا فردة على الكلام الدافئ،،، امانة لله برد وتلج ،،عشان تمرق العربية تفحط ساعة،، والمشوار البياخد عشرة دقايق ياخد ساعتين
والله المستعان،،،،الله يجازى السبب ما كنا كويسين على الوطنية السعودية ،،نركب وننزل فى امان الله،،،،
وتحويدة على كبير المنتدى عزيزنا عبدوس/ لاينبغى لنا رغم الجليد الجالد ان نغيب لكن الله غالب ،،،السنة دى انت شايف وانت الرجل الرحّال العارف،،،وبى كده تلقانا نجد جمرات الحنين ودفء الاخوة على صفحات هذا المنتدى
اجعله الله عامــــــــــــــــــــــــــــــراً
تخريمه
شكرا امجد على العرض المتكرر ،،،وفى ذات يوم حتما إن شاء الله نعود،،ادعو لنا الله ان يكون قريبا( انا واخوى الكاشف)
توضيح
الكاشف بالانقليزى هو اسامة السيمت
حب الف

mhmdaljamal كتب:ود عكود والحبايب الحلوين ..اقترح (ولكي يسهل تصفح المنتدي) ان يكون الترحاب في بوست والعزاء في بوست و...........الخ وياريت العناوين تكون جزابة كما في المنتديات الاخري وبرضو ممكن ابواب اخري نتشكل فيها كما نريد قلتو ايه ياكنترول؟

الجمل ،القومة ليك ياحبيب وتحية خاصة وانت تتشايل معانا هم ان يتطور هذا الامر
سريعا
التطور هو حاجة تفرح فهو دليل حياة،،ومن ميلاد المنتدى حصلت شوية تطورات ،،اهمها كان ميلاد منتدى الاجتماعيات..مع نقل مستمر لبعض المواضيع
فى تقديرى،،لابد ان نسعى دوما للامام.. لانو لو حسينا اننا وصلنا للكمال فهى حتما النهاية
تشكيل الصفحات يقبل التغيير فى اى لحظة،،وانا وعاطف فى تشاور مستمر ،،،لكن الوقت واحيانا قلة المشاركات تحتم ان يظل الوضع كما هو ،،لكن وبحمد الله ان شعر واحد بس انو المنتدى مليان واصبح التصفح مشكلة ،، فده معناتو اننا جاهزين للنقلة التانية
عمليا،،،اقترح انو انتو يا ناس قطر،،،تقعدوا مع عكود وتغيروا ما ترونه مناسبا ،،،لانو حقيقة المسألة بتكون احسن ان تشاور الناس لانها رؤية
اذا فى اى تصور مقترح تجدونا حاضرين
هذا ملك عام وللجميع الحق فى اقتراح اضافة او حذف كى نعمل سويا للوصول بهذه الدار لى قدام دايما
ممكن يكون فى عنوان جانبى من داخل اى منتدى
ويستمر التشاور

العزيز ود شلكاوي ...وينك ..؟ شايفك بتظهر في بوست الاجتماعيات وبعد كده تبقي متخارج ...وين حكاويك عن سفريتك الاخيرة ...؟
....
............
ماعايز اكتر عشان اديك فرصة تكتب .. بس زالله ليك وحشة...؟
...

ود راشد
متشوفش وحش يا ود راشد يا حبيبنا
والله انا بس كنت مترقب ود الاستاذ شايفو عندو فكرة تحويل فنجانك ,احلك منو الحله بله زمان حلاني منو ود عبدون . لكن ود عابدون هسع ما ظنتو افضى ليك من كارين ارمسترونغ ومايكل وولف غايتو جيتو الجايه بودي الشيخ الياقوت اعزم ليه.
مع تحياتي للكل
مهدي شلكاوي

هاهاها ...والله الحلا بلة زاتو كب الزوغة...طبعا انت من سمعت ودالاستاذ ظهر بيجاي ,مشيت جري علي بوست الاجتماعيات وهاك يافاتحة...ود الاستاذ زاتو الايام دي عندهم جليد وبرد شديد يعني الحلا بلة ما اظنو يتورط هناك....وود الاستاذ ماقال داير يحول البوست ياو شلكاوي داير يحول بس النكات بس ...المهم منتظرنك تجينا بالجديد..
تخريمة:
والله ود كرار اليومين شغال بامسيسي وكارين ارمسترونغ ..وحيرنا عديل كدة؟ الزول داير ليه زيارة عشان نشوف الحاصل شنو ...؟

الحلوين الظريفين ود عكود وراشد والجار ود كرار والله لم اتبين مداخلاتكم بتاعت الحيوانات والمراحل السنيه يعني بقت علي قصة الكلب ينبح والجمل ماشى وللعلم يا راشد التقول علي المراحل السنيه تشتمل علي مرحلة فرخ ..والله اعلم لكن عاطف بما انو ضليع في (اللغة العربية) علي وزن قعد يقعد فهو قعود وشيشك يا جمل لا تكسر الضانقيل ....مودتي

الغالي الجمل...
والله الحمد لله انو سيرة الحيوانات عدت علي خير ..ده حتي اللحظة الواحد عايشو علي اعصابو ...عليه البركة في جاركم انتم واخي انا ....
......
....
اهو ياسيدي ماحدش حوش ..شايف صفحة الاجتماعيات بقت باب مباشر...
والله انا شخصيا يا الجمل ماسمعت فرخ جمل ...!!! وانتم اهل العلم وما نحن إلا اخذيه من افواههكم ...
لك الشكر ياغالي 

اخوتي الاعزاء ....
عدنا للهدوء الذي يدب كالخدر في اطراف المنتدي ...ودوما افكر بعد ان تعدينا مرحلة البيات الشتوي في الخليج هل المسالة مسألة شتاء ام تقوقع حول الذات نتيجة الرتابة وعدم طرح مواضيع جديدة ولكن سنكون اكثر سعادة لو كانت المسألة موضوع مشغوليات فهي اسهل هضما واسرع استعابا واجمل عذرا واحلي مبرر....
تخريمة:
يبدو لي جني عمل الموضوع جد ....وبالله لو مافي ليه جوال الحقونا انشاء الله بتلفون علب صلصة .....
....
..
ود عابدون واهل الزمن الجميل وود الاستاذ وود شلكاوي واقلام المنتدي ( وكل من لم يذكر اسمه فهو من الزمرتين الزمن الجميل واقلام المنتدي)
........
.....
عاشق الصخب الجميل ..والله ماعشان بيع القهوة الحكاية شوق وبس

العزيز ود راشد................
من الاسكلا وحلا ...ولجبل اوليا غشى ....واظنو صلى العشاء فى القطينه .....انا ما عارف دا كان راكب شنو غايتو سرعته ما اظنها تتعدى الخمسه عقد.
امبارح كانت حقيقه لمه جميله بلرغم من التنسيق لها كان في وقت ضيق و لم يتمكن الكثيرين من الحضور ولكن اسماءهم وذكرى ايامهم التي مضت كانت تصم اذان كل الحضور في الاسكلا ......حكاوي حاتم طوني وشكري عثمان وكمال زمراوي وبدر الدين الجاك وعلي محجوب يتداخل هنا وهناك مع حسن كمال ومره مع عاصم القدال ومره اقطع خلوة عمرخلف الله واحمد بحيري وكلعاده بتختم القعده بتلفون طلب حضور بدر الدين الجاك ونحن بلطبع بنخاف عليه من المبيت في الجامع..........
ود راشد كيف حالك بخصوص انشغال الناس او تقوقعم .....المشاغل فعلا كثرت وتنوعت هناك من ينشغل بظروف العمل وهناك من ينشغل بظروف ومشاغل البيت وهناك من ينشغل بصلة الرحم والواجبات......وهناك من ينشغل انشغال عقلي او زهني بلتفكير الكثير لساعات طوال دون اي حركه ....عندك انا مثلا الايام الفاتت كان هناك اكثر من سبع فواتح غرب الجبل وشرق الجبل (انشاءالله ربنا احسن خاتمتنا)....
عرفنا ود الاستاذ عندو مشكله في (الدي....فروست)انشاءالله ربنا اسيح تلجم ......ود كرار مالو .
الاخ علي وعد بلظهور والمشاركه.
تحياتي لكل الاخوان
مهدي شلكاوي

راشد كتب:اخوتي الاعزاء ....
سنكون اكثر سعادة لو كانت المسألة موضوع مشغوليات فهي اسهل هضما واسرع استعابا واجمل عذرا واحلي مبرر....
عاشق الصخب الجميل ..والله ماعشان بيع القهوة الحكاية شوق وبس

العزيز صاخب العشق الجميل ودراشد
حتى يطمئن قلبك المسألة موضوع مشغوليات وكمان قليلة الدسم حتى يسهل هضمها .
وانقل لكم تحيات جنى فردا فردا وقد افتقدكم كثيرا
وفاصل ونواصل
عاطف عكود

الاخوان ود راشد.... ود عكود
من الجميل فعلا الواحد اصادف حضوركم حتى ولو على الشاشه الصغيره هذه ....فعلا هناك احساس بقربكم وان كان جغرافيا غير ذلك...الله اديكم الصحه والعافيه........
- ود عكود بالله تحياتي للاخ جني اينما كان مع تمنياتي ليه بالتوفيق .....
- ود راشد احمد الله ياخ اهو قهوتك راشه رش تمام حتى انت ما ملاحق على الناس!!!!!! هناك رساله مني تزامنت وتداخلت مع رسالت ود عكود وتغلبت عليها رسالت ود عكود بالرغم من قلت حروفها ولكن بدسامتها وظهرت رسالت ودعكود في الشريط واختفت رسالتنا ولكنها موجده اعلى رسالت ود عكود .......ود الاستاذ فعلا بردان دا عطل فني نرجو تدخل العميل رقم صفر حاتم الكدندلي الرسالتين بينهم دقيقتان
بعدين انا ساعتي في المنتدي ماعرفت اظبطها منوين فشلت كل محاولاتي ......
انا مضطر انسحب حتى افسح المجال .....
سنعود
مهدي شلكاوي

الاعزاء الاحباب ودعكود وودشلكاوي...
والله سعدت حد الاندهاش وانا اتفاجاء بحضورك الحلو الذي حرك سكينة المنتدي ...والله ايام ياودشلكاوي عمرها مماتتنسي ده الواحد ختي اللحظة يعيش بتلكم الذكريات الرائعة والله هي مش ذكريات وبس بل عمر حلو من الزمان اقتطعناه في غفلة منه ...بالله كيف الشباب ؟...والله الواحد محتاج لقعدة معاهم وانشاء الله الاجازة الجاية سنكتب من قلب الاسكلا ونعيش الفرح واقعا لا شوقا ولهفة محمولا بين الضلوع...
تخريمة:
بالله قول لود الجاك عشان ماتتجهجه في الجوامع صلح علاقاتك مع بتوع الفنادق للطواريء لانو امكن قعدات الاسكلا تطول شوية وللموضوع بقية...
والله ود الاستاذ موضوعو تلج اقصد طويل بس دفيء حضوركم يكفي ...
والله ياود عكود الواحد لما يطمن انو الناس بخير تسكننا والمنتدي انشراحة ...ومادام الحكاية معايش ومشغوليات مافي مشكلة...
............
.........
هاهاهاها والله كلامك صاح انا ماقدرت اسجل المداخلة بالرغم من اني قبلكم في الكتابة واكيد بعدكم في الترتيب...
الكدندلي ؟؟؟ هو وين هسه ..؟ مع االبرد ولا الحر ...؟ واخبار الجضوم شنو..؟ اكيد جبت خبرم...
...............
....
لكم كل الود

تعظيـــــــــــــــــــــــم سلام ويا سلام ،،
طلعنا شوية فوق الصفر،، والحركة اتسهلت شويتين ،،بالمناسبة التلجية دى العيال ادّوهم اجازة يومين من المدارس،،ولا اذكر انو ده جصل قبل كده ،،، يوم واحد،،،،عادى
مهما تلّجت تظلون فى القلب ،،، مهدى ابداع يا جناح ياشمال ،،كدى اشتغل لينا شوية فى ناس الخرطوم
حقيقة نحن يبهجنا ويذوب تلج قلوبنا ويسيح أميال الجغرافيا شوفة اسماء الشباب العجزوا ولمّات الاسكلا دى والله تخلى الزول يحسدكم عديل
جرى الحياة والمشاغيل،،، تفرض انو الزول يلقى شوية وكت لابتسامة وحكوة من زمن اجمل ،،فمجهودكم معانا بالله ،،،ثم انو احنا فترنا ،،،لينا سنتين بنكتب هنا فادونا متعة الفرجة حبّة يا أحبّة
وكدى ناس الاسكلا ادونا جديد اللّمة وسلم لينا على كل الحاضرين والغايبن
تخريمة:
يا بورسودان حووووول

والله ياودالاستاذ كلامك كلام زول حقيقي مشتاق ولا زلت مندهش لجليد او ثلج ان يقرب دفيء دواخلك التي احالت جلاميد صخور دواخلنا لينابيع فرح ...لا عليك بردة وتروح ودوما احلي الذكريات من اقسي الظروف...والله صدقت لمت الاسكلا ثقبت جراب اشواقنا اليابس فلن يُخاط له جلد إلا إذا ابتل بنبع حضوركم لن نحسدكم علي اللمة ولكنا نحبس علي المآقي دموعا وعلي قلبي حسرة.....