يا ناس البحر . جنيدابي وصل

سلامات للجميع خاصة المتاوقين

يا جماعة الصنة الطويلة دي شنو ....... ؟؟؟؟؟؟؟؟

ريحة الملوحة و التركين دي طيرتكم ولا شنو ...... ؟؟؟؟؟؟

مع التحيات للجميع و الرحمة لاخونا اسامة و كل موتانا و موتي المسلمين

مع بشريات العام الجديد وتصديق الرجل الهمام بزيادة الحد الادنى للاجور الى 425 لحلوح سوداني اي ما يعادل 6،07 دولار امريكي في الشهر مع الامنيات بعام سعيد

اخوكم جني ابو ستة

حبيبنا الأغلى جنى أبو ستة ... كل عام وانت والأسرة الكريمة بألف خير وصحة وعافية ولكم جميع الأحبة فى المنتدى العامر ... يا جنى يا عجيب كمان دائر تخمنا فى الحساب وانت اتاريك مأكل الجدادة وخامى بيضها بالكامل ... الصحيح انو الحد الأدنى للمرتب فى الشهر بعد الزيادة اصبح 60.7 دولار وليس 6,07 دولار كما حاولت أن تخدعنا ... والصحيح أن اسمك مفروض يكون جنى أبو الخم وليس أبو ستة . تسلم حبيبو والأسرة الكريمة وكل عام وانتم كلكم فى صحة وعافية وسعادة كافية ...

الرشيد شمس الدين

سلامات جني و الرشيد و عام مبارك علي الجميع.

جنِي دة الظاهر عليه معارضة لانو قاعد يحوِر في الكلام ....

يقولوا ليك يا جنِي المرتب حيبقي 60 دولار في الشهر تقول 6 دولار ؟؟؟ ..... دة بدل ما تحمد ربنا .... وبعدين ال 60 دولار دي قلعوها ليك قلع من وزير المالية و كمان بقرار رئاسي.... تقدير ساي مافي؟

عالم ناكرة للجميل و ما بتحمد ربنا.

و الخبر دة من العربية لعناية جنِي:


العربية.نت
دفع رجل أعمال لبناني 20 ألف دولار أمريكي مقابل استئجار شقة سكنية لليلة واحدة لمشاهدة احتفالات رأس السنة، التي تقام في منطقة برج خليفة.

وتبلغ مساحة الوحدة السكنية 7 آلاف قدم مربعة -700 متر- موزعة على طابقين، وتضم ست غرف، وسبعة حمامات، وصالة طعام، وصالة بلياردو وغيرها من الخدمات التي تضع البنتهاوس في مصاف أكثر الشقق السكنية شهرة في العالم.

مع تمنياتنا للجميع بسهرة رأس سنة سعيدة.

ابسط ياعم جنيدابى العزيز اهو كسبت ليك من مافيش 54 دولار (الفرق بين 60.7 و 6.07) , اهى دى نعمة جاتك من حيث لاتحتسب وهى تساوى بالجنيه القديم حوالى 380 الف جنيه ... طبعا تكون ضحكت حتى بانت نواجزك , يلا ياعم والله تستاهل ... ذكرتنى نكتة الزول الطالب ليهو واحد قروش وعجز ان يستردها رغم كل المحاولات فذهب اليه ووجده ياكل فى بلح فقال ليهو الليلة ما حاخليك الا تقول لى متين حترجع لى قروشى دى ؟؟ واصل الرجل اكل البلح ووضع النواة فى صحن وقال ليهو :- شفت نواة البلح دى , حاأزرعها ولمن تقوم بلح حاأحصدوا وابيعو وادفع ليك قروشك ... ضحك الرجل من الهم فقال له صاحب البلح : ايوه اضحك كويس ما ضمنت حقك خلاص ...

الرشيد شمس الدين

بسم الله الرحمن الرحيم

التحية للزملاء

ونجدني أسف أخي الرشيد علي الخطأ في فرق العملة وسوف احسبها لك بالسنت وهي 425 لحلوح لمدة ثلاثون يوما والمنصرف اربعة الف لحلوح
وجبات _ مدارس _ علاج_ ترفيه_ ( طيور الجنة ) ومهرجان سياحة وتسوق يعني الواحد يا يكون حرامي يا حاوي ,,,,,,,,,,,,,,,

ولكم الود

أخوكم جني الحــــــــــــــــــــــــــــاوي

اعزائي التعازي الحارة في وفاة القامة الفنان محمود عبد العزيز الغرض الصيني للشعب السوداني بمبلغ 1.5 مليار دولار اي مايعادل 10000مليار جنيه سوداني اي مايعادل ثلث الميزانية وهي منصرفات الشعب السوداني لمدة اربعة اشهر وماحنرجعها لهم وهي خطة ابوجهل لتوزيع الدم على القبائل
ودمتم اخوكم جني الجاهلي

عبدالمنعم جنيدابي كتب:
بسم الله الرحمن الرحيم
التحية للزملاء
اربعة الف لحلوح
ولكم الود
أخوكم جني الحــــــــــــــــــــــــــــاوي

ولك الود حبيبنا جنى لحاليح الحاوى

نتيجة للاوضاع الاقتصادية اعتمدتا سياسة صرف تقشفية واضعنا كل الوعود من دراسة الابناء بالخارج الي المصاريف المدرسية ونتيجة لذلك عندما امر في المنزل اسمع همهمات واصوات تاتيني من الغرف ..... يا ماسورة ؟؟؟؟

ليك وحشة والله حبيبنا جنى الماسورة .

الرشيد

عبدالمنعم جنيدابي كتب:
عندما امر في المنزل اسمع همهمات واصوات تاتيني من الغرف ..... يا ماسورة ؟؟؟؟

جنى الحبيب ، وشهد شاهد او اكثر من الاهل ، وصدق المثل الصيني البقول لو اتنين قالوا عنك ماسورة فانت كذلك أو كما قالووووو . ونى هاو ياتايقر بور والشوق مطر.
عاطف عكود

السلام عليكم فشلت كل محاولاتي في الاتصال بالاخ بابكر عشان اقول له كفارة واخيرا اتصلت بالاخ جمال المصري وطمنني على بكوري وعياه السمح واقول له برجاك ياعلي تكبر تشيل حملي(يادخري السمح)بالعديل والزين .
امسية الخميس التقيت بالاخ الحبيب كركب واسرته الكريمة بحدائق حبيبي مفلس وتبادلنا الزكريات الجميلة وسألته عن ابنه البكر في اي المراحل الدراسية فأجابني بأنه في زيرو كبيرو وهي مرحلة بين الحضانة والاساس فقلت له انشاء الله تضوق مرتبه
ودمتم

العزيز جني يا الف ديشلون مراحب بعدد كل مواسير النفط الفارغة...
يا اخي انت من زمن الوالد بنتظر مرتب الابناء..ده انت راجل طيب بشكل..ليهم حق يقولو عليك ماسورة..
معزتي واحتراماتي
عبد الرحمن

الحبيب جدا جني ضواقة تحياتي لك ولصديقك كركب ...ليكم وحشة وان شاء الله يا جني تضوق مرتب اولاد اولادك ....

امي الله يسلمك تحتفل بورسودان اليوم بعيد الام (2013)يتم الاحتفال بفندق سمارماز وتحي الحفل المطربة ندى القلعة وسوف يتم في الاحتفال تكريم بعض الامهات المثاليات (محافظة علي الوزن ، اناقة ، كريمات ، وحنن) والرقص سيكون دقني شديد.
سوف انقل لكم كيف كان يتم التكريم سابقا تصطف الامهات في صفين ويتجردن من العراريق مع لبس السربادوق ابوتكة ووضع حقة الصعوط بعيدا حتى لا يتطاير الرزاز عندما تقوم الحبوبات بجلدهم بسوط العنج ويلحقهم جدودنا بالصفقة والهتاف ويتم تكريم الام المثالية التي قامت بقطع النهر من القيف الى الجزيرة سداري
تخريمة ستردد ندى ،،،،،،،،،،،،،،،،،،، لوكي القرضة وامسكي في راجل السترة ماتخلي.
يصعب تفسير معني لوكي القرضة ضع الكلمة المناسبة محل لوكي والبهار المناسب محل القرضة .
وكل عام وانتم بخير.

السلام عليكم كبارا وكبارا جدا .........................
لقد كنت اشاهد قناة التسوق للعالم العربي ومعي ابنتي الصغيرة ولاحظت بعد انتهاء الدعاية ان اسماء الدول العربية تأتي بالترتيب واخرها دولتي الســـــــــــــودان وفلسطين فسألتني لما الدولتين في الاخر فقلت لها:لأنهما محتلتان فلسطين يحتلاها يهود بني اسرائيل والسودان ابناء عمومتهم
ودمـــــــــــــــــــــــــتم ........................
اخوكم جني المســـــتقل.........................

سلام جنى

اظهر و بان و ليك الامان ....

حبيبنا جنى العجيب ، توحشنا كالعادة وانت تغيب وتجى على كيفك وواضح انو الحكومة ماشايفة شغلها كويس ، كيف أخبارك تكون ؟؟ وهل ماتزال ماسورة كبيرة أم صغيرة ولكن فى الحالتين انت ماسورة بامتياز ، سلمت حبيبنا من كل شر .

بعد اليوم نرفع راية استقلالنا، ودى الشمس لو طال غيابها لابد.. وكده
جه كلام الكبار مقاما ده

احمد محمد احمد كتب:

اظهر و بان و ليك الامان ....

الرشيد شمس الدين عبدالله كتب:حبيبنا جنى العجيب ، توحشنا كالعادة وانت تغيب وتجى على كيفك ....

والسؤال انت فعلا بتطش وين؟؟ غيب وتعال وتدينا تلغرافات، ماركونى اصيل والله ، شغال معانا بالمورس
الشعب يريد جنى المستقل فى تجليات كتلك بتاعت الفسيخ وصدى الذكريات الحاكى
كسرة
كركب وينو؟؟
كسرة2
---
-...._ .. _ _ _ _ ..... ،

بالمناسبة راشد ده كان شاطر جدا فى النقطة شرطة دى
ياخى خش واتوهط

جيناكم يا حبايبنا وكلنا شوق وذلك بعد ان فكينا النمله عكس الهوا . تحايا خالصه للمحاربين القدماء والذين لا زالوا قابضين
علي جمر هذا المنتدي عبدوووووس ’ رشدي ’ ود الاستاذ ’ ود عكود , احمد محمد احمد , الجمل , ود كرار , راشد النابغه وعظموتي
ود الامين وكرك زهايمر مع الاعتذار لكل من سقط اسمه سهوا مع هذه الذاكره الهلاميه كما نحيي الصاعدين الجدد علي ظهر هذا المنتدي والذين شكلوا
اضافه حقيقيه له ونبارك لكل من كانت له مناسبه سعيده في نطاق الاسره البحريه ونشاطر كل من فقد فقدا .
نعتذر اخوتي للغياب الطويل حيث انني قمت بانزال صوره لي وانا صغير ( شرك ) في الفيس بوك والواتساب وال اي ميل وعملت نفسي من
مواليد التمانينات ومن لحظتها وانا غارق في رسائل الاعجاب الي شوشتي واخر هيصه ولوصه لكنني اوعدكم بالمواصله والكثير المثير
الخطر وكشف اخبار البلد ودمتم ,

اخوكم جني خوجلي

يا الف مراحب جني العزيز..وياريت كل المجانين زيك...كنا نكون اسعد امه علي وجه البسيطه..
مرحب بيك يا الرحته طولته الغياب...هناك من سقط اسمهم سهوا يا صديقي اذكر منهم ود فراج العزيز وجدنا الكبير ابراهيم وبقية العقد الفريد. ديل بقوا اسياد بيت يا جني واقدم من رشدي وخلدي.......
تخريمه...جني خوجلي..يا ربي تكون خال بتي ايه وانا ما عارف!!!