يا ناس البحر . جنيدابي وصل

مع بداية العودة الطوعية للاخوة الجنوبيين كنت اقيم في منطقة حدودية تدعي نجاما وهي تبعد بضع كيلومترات من منطقة ابيي المتنازع عليها.واري نظرات الاخوة العائدين فيها الخوف من المجهول والحسرة علي وداع الام .
لاحظت الحافلات المتجهة جنوبا وهي محملة بالبيرسونال افيكتس وهي كالتالي .براميل وجركانات وكريستالات فارغة وبلح من انتاج مناطق (الشايقية،التناقسة،والبديرية الدهمشية )خميرة ناشفة .سفنجات،شباطة،احزية رياضية(مستعملة)
بوتقة ماصة قطع شاش.
وهم يلوحون ايديهم بالوداع وانا الوح لهم مع امنياتي بتكوين دولتهم الجديدة ولسان حالي يقول حليلكم......وحليل
سديد انساء الله نموت

معاشي240 جنيه في الشهر .اسرة تتكون من اربعة افراد نشتري عيش بي120 جنيه في الشهر يعني عيشة لكل فرد مع كل وجبة وزيط تعام 60 جنيه يعني نقطة لكل فرد في كل وجبة وموية 60جنيه في الشهر يعني كباية للفرد في كل وجبة
لدي حوض برسيم وتلاتة نيمات..................................وحياتي حلوة ما الزمان اداني ريد وعمر جديد
.............................................................................اخوكم
.................................................................................جني الحاوي

جنى ياروعة اها العيد دا مابيجيبك ..كلما اسمع اغانى زيدان القديمة اتذكرك..قبل يومين اتذكرتك عندما تغنى عمر الشاعر فى اغانى واغانى اغنية فى الليلة ديك وسرحت بعيد ايام زمان وجلسات رمضان 83 تحت العامود وفى حيطة الاهلية .. وعميرة والتقر والضيف...والله زكريات لاتنسى
بالله عليك لو جيت العيد ادينا خبر عشان نعيد الزكريات العود موجود ....نقوم نعمل لينك تسجيل ونفكو فى المنتدى عشان يعرفو انو جنى فنان الظاهر الجماعة ماسمعوك تغنى..الى اللقاءانشاء الله

اهداء الي كركب (الدهباية)له الحق في ان يرويها الي اعضاء المنتدي متي اراد؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شخصيتنا الاولي حسن الشهير بحسن عقدة وهو شخصية نرجسية يحب الاناقة ويخاف من شكة الدبوس محبوب تم تعيينه في منتصف السبعينات وصعد علي الباخرة مريدي وبعد مرور اربعة اسابيع والباخرة لا تزال في ميناء بورسودان طلب النزول ساله مدير شئون الافراد بعد مرور اسبوع طلبت تحوليك من قسم الدك فاجاب بان العمل شاق من غسيل العنابر وما شابه والاسبوع 2 طلبت التحويل من قسم الماكينة فرد بان لديه حساسية من الزيوت والاسبوع3 طلبت التحويل من قسم الخدمات فرد بانه لن يقوم بنظافة الغرف وتقديم الشاي والقهوة والاكل والاسبوع4 طلبت التحويل من قسم الجلي (المطبخ) فرد انا اقشر بطاطس ؟؟؟؟؟؟؟؟؟؟؟؟؟؟؟؟؟؟؟
الشخصية 2 ياسين لاعب كرة في المريخ دخل معاينات في اواخر السبعينات فسالته اللجنة عنى موهلاتة فرد بانه لاعب كرة في فريق المريخ بورسودان في خانة الجناح الايمن احتارت اللجنة في توجية الاسئلة واستقر رايهم اخيرا في توجيه سوال واحد من صميم عمل البحري علي ان يتم استيعابه في حالة الاجابة الصحيحة فكان السؤال
قوو ا هد؟؟؟؟؟
قام صاحبنا نط فوووووووووووووووووووق ...............ضرب هد
اخوكم .................جني الجزلي

عبدالمنعم جنيدابي كتب:اهداء الي كركب (الدهباية) ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اخوكم .................جني الجزلي

جنى يا عجيب
والله عليك جنس حاجات الله يديك العافيه والتحيه لاخونا مبارك كركب وربنا يصبروا عليك .... هو يقول ليك فى الليله ديك تقوم تقول ليه الدهابايه وشنو ما عارف !
ودام التواصل
عاطف عكود

يا جنجون مالك بقيت تفط سطرين نحنا سطر واحد ما قدرنا بعدين في حاجات بينك وبين كرك شمار ما واضح حصلنا بالشرح والايضاح ....الليلة ديك ظاهرة من عنوانها لكن الدهباية دي غلبتني.....تحياتي لك ولكركب الرهيب وكل الاخوة وفي الانتظار

سبحان الله .....المشكلة ليست في الارتفاع الجنوني للاسعار مع حلول شهر رمضان المبارك ولكن في النوعية الرديئة المهم نفسي كان في فاصوليا و اخدت نص كيلو وبليتو اليل كلو ولم يستوي حتي فرغت انبوبة الغاز ..............السلطة عجور اصفر ’جرجير احمر وطماطم اسود وهنالك الوان اخري :..............كنت في السوق وحضر اربعة مواطنين ودفعوا 16 جنيه قيمة كيلو عجالي مقسم الي اربعة ارباع رد الجزار بان السعر 20 جنيه فهاج وماج احدهم وارغي وازبد رافضا ان يدفع 5 جنيه قيمة الربع اخزه زملانه جانبا محاولين اقناعه بكل السبل واثناء توسلاتهم نظرو الي الجزار فصاح فيهم اقنعوهو سريع قبل ما ارفع سكيني دي لانو لمن انزلا السعر حيكون جديد.....زهبت الي المنزل للحاق بالافطار وتركت الحال كما هو في صبيحة اليوم التالي وانا متوجه الي العمل سمعت اصوات الجزارين علينا جاي ابو الرخاء كيلو العجالي بي 24 جنيه.
تخريمة :بعد الانفصال قامت حكومة الشمال بتقطيع فاتورة السلس....يون ......ولنا عودة

الحبيب جنى .....
حمدالله على السلامه، والله الفاصوليا اتلومت معاك، بس المرة الجايه اشتري ليك شوال فحم لونفسك هفتك لفاصوليه.

العزيز جني.. الف حمدا لله علي سلامتك ومتابعين اشراقاتك التي نحتاجها دائما..فما تحرمنا من طلتك وقفشاتك...بس انا شايف بدل الفاصوليا اليابسة دي مش احسن تشتري خروف والا عجل لانو شايف اجرة الضباحين نزلت شوية وبقت يجي كدة اربعين الف اهو برضك توفر بدل ما كنت بتدفع خمسين الف للضباح...

احسن اقوم جاري قبال ما تحصل تعضيني.....
محبتي وتحياتي...عمك عبدوس

الليلة كيلو العجالي بي28 جنيه وتصومو وتفطرو علي خير

عبدالمنعم جنيدابي كتب:
الليلة كيلو العجالي بي28 جنيه وتصومو وتفطرو علي خير

معنى كدى انو الربع بى سبعة عاقلة وتصوم وتفطر على خير حبيبنا جنى العجيب
عاطف عكود

عيد سعيد وعمر مديد تتحقق الامنيات (كل عام وانتم بخير)..........................................................
اليلة كيلو العجالي خام امبرنبيطة ب30جنيه..........................................................................
لا يفوتكم الحفل المقام في الجمعة الاولي بعد العيد وزلك بميدان الستين بصنعاء مع الفنان علي جاكسون ورائعته الجديدة (فاتكم القطار).
من انتم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شاركونا في افتتاح معرض لو ما فاطر ما تخاطر..........ودمتم.........................................اخوكم
....................................................................جني اندكس.

التحايا من بورسودان .اصبحت البلد جميلة وكلها انترلوك والموية بالسقا الصباااح بدري السقا يكب ليك جركانتين في البرميل والحمار يكب قطعتين في الانترلوك...................................................................................................
واحدة بايركس قالت لي ود عمها نلعب دس دس وازا لقيتني تعرسني وازا ما لقيتني انا ورا الباب...................................
اتنين اخوات بايركس ابوهم كتب يافطة قدام البيت ....................تزوج واحدة وخد التانية هدية معها.......................
بعد حرق الكتاب الاخضر اصبحت الوحيد الزي يملك نسخة منه وكانت بسبب المقلب من بعض الاخوة بالباخرة امدرمان ورب ضارة نافعة فانا اعرض النسخة بي مليون دولار وتحصلت عليه وانا البس اللبسة اعلاه يا حبيبنا رشدي............. ودمتم

عبدالمنعم جنيدابي كتب:
بعد حرق الكتاب الاخضر اصبحت الوحيد الزي يملك نسخة منه وكانت بسبب المقلب من بعض الاخوة بالباخرة امدرمان ورب ضارة نافعة فانا اعرض النسخة بي مليون دولار وتحصلت عليه وانا البس اللبسة اعلاه يا حبيبنا رشدي............. ودمتم

الغالى جنى حمدالله على السلامه , مليون دولار يا مفترى؟ والله بجد الهامك عجيب .
ودام التواصل
عاطف عكود

عبدالمنعم جنيدابي كتب:
التحايا من بورسودان .اصبحت البلد جميلة وكلها انترلوك

جنى سلام وحمدالله على السلامة، اها إن شاء الله قاعد شوية؟؟ غايتو نحن طالبنك عشرين صفحة كده

لاحظت انو الصورة ولا الفيديو ما نزل
وسؤال برئ
انترلوك يعنى شنو،، بالقديم// بالجديد

الاعزاء لكم التحايا و التعازي لمن فقد عزيز والتهنئة لمن رزق بمولود مع ان السواد الاعظم منكم اسمر اللونا وفاتر الماء.........
......................( كل عام وانتم بخير ).......................
اعاده الله علينا وعليكم باليمن والبركات مع الامنياتالقلبية لكم جميعاً.............
زيادة في اسعار الخراف وارتفاع في حالات الطلاق وانا الان عائد الي المنزل لمقابلة ابني اسماعيل ...
ولكم الود ........... اخوكم جني الضابح
بمناسبة العيد والاضحية والسكاكين ............... رجل اعمال من هواء جمع السكاكين تدخل مكتبه فتجد جميع انواع السكاكين كبيرة وصغيرة ومددبة ومشرشفة حادة النصل وغليظة النصل دخلو يوم الصباح الي مكتبه فوجدو كل السكاكين مركبة فيهو

يا جنى سلامات وحمدلله على السلامة.....

ومبروك الخروف... كان ترسل لينا صورة بالألوان مع السيد الخروف.

وربنا يحفظوا من السكاكين والخناجر.

وعيد سعيد

واخيرا .....جنى يا عجييييب ...... الف حمدالله على السلامة والبركه فيكم فى ابن عمك ... وياخى بلاش تطول.
ودام التواصل
عاطف عكود

اعزائي لكم التحايا و نأسف وزلك نسبة للمشغوليات الكثيرة طبعاً الايام دي السودان كلو ساكي التمويل الاصغر..... .... يعني الدين الاكبر.......وتقول لي الربيع العربي ............ووييين الكلام دا ............في زول مدين من زول بقدر يعاين ليهو ساكت ..........ودمتم سالمين .......
اخوكم: جني السالف

والله يا جني كلامك صاح مافي زول مدين ليهو زول بقدر اعاين ليهو خلي انو ..... ( يقلبو ) بعدين انت وييين مختفي كده والناس تهاتي بيك ؟؟( انت عذاب الف ) ....
ياخي البركة فيكم وربنا يرحمه ويغفر له ... وحمدا لله علي السلامة ..وعل حسك وين اخونا كركب ؟ تحياتي وفي انتظارك يا جميل .

mhmdaljamal كتب: .....) بعدين انت وييين مختفي كده والناس تهاتي بيك ؟؟( انت عذاب الف ) ....
ياخي البركة فيكم وربنا يرحمه ويغفر له ... وحمدا لله علي السلامة ..وعل حسك وين اخونا كركب ؟ تحياتي وفي انتظارك يا جميل .

الف واحد بس؟؟؟؟؟؟
كركب فى الشريط ياخى مرحب،،،ايميك يا مبارك بتاع ياهوو ما شغال!!!افتنا
ابقوا داخلين

اعزائي لكم الود اجزله والشكر علي هزه الاحاسيس الجميلة
وازف لكم التهنئة ولقيت ليكم حل للمشكلة الاقتصادية في بلدنا الحبيب وهي (زيادة صادر الحلومر الي الصين )واستقلال الخط الناقل وميناء بشائر يعني بنية تحتية جاهزة
اخوكم :جني ني هاو امبا نا هلو مر يا حبوبة

سلامات يا جنى
الفكرة جميله جدا وخاصة لو إتنفذت عن طريق القطاع الخاص ( الرأس مالية الوطنية ) - لكن السؤال المهم من هو المستفيد - هل هم المصنعيين(ناس العواسة)؟ ولا السماسرة والناس الما يتسموا دييييك؟؟
ملحوظة: للراغبين فى الإستثمار والدخول فى المنافسة أنا بوصيهم بالمصانع التركية لزوم التسويق (إنتاجها جمييييل وحلو). للإستشارة وعمل دراسات الجدوى يمكن الأتصال بمؤسسة عاطف عكود للإستشارات التركية.

سلامات جنى....
شايفك شغال مع الصين بس النيو لوك مكسيكى وله عيونى خانتنى، والله الصينيين ديل مامحتاجيين حد يصدر ليهم وهم زمان ليكونوا سرقوا الحاجات البستفيدوا منها، يأخذ ديل زرعوا الكركديه بعد اول شحنه اترسلت ليهم من السودان تقول ليه نرسل ليهم حيلو مر.
إيه رايك ياجنى نعمل ليهم زيارة فى الصين، واهو معرضهم الدولى البيقام سنوياً فى كوانزوا قرب، ونشوف الجماعه محتاجين لشنو عشان نرسلو ليهم.
وكده فكر ليه فى (التنباك) بالمرة.

تحية وشوق للجميع
طبعا .. لىً مدة مابنتا .. لا يوجد سبب سوا الركود العام الذى اصاب الجميع ولا نعرف له سببا .. لانها بضع دقائق تكفى للدخول والاطلاع فقط .. مجرد مرور لمعرفة الاخبار الاجتماعية على وجه الخصوص .. وتاسفت لما علمت مؤخرا باصابة الاخ عوض الكريم (نسال الله له عاجل الشفا) بعد اتصالى به اول امس للتعذية ...
بمناسبة جنى المجننى.. هل تصدقوا لم اقابله فيس تو فيس حتى اللحظة وهوو ببورتسودان منذ اكثر من شهر..وما علمت الا عندما اتصلت به بالتلفون معزيا فى وفاة ابن عمه (عبد المنعم جنيدابى) طبعا احد الاخوة ببورتسودان اتصل بى منزعجا لسماعه فى الاخبار بوفاة المواطن عبد المنعم جنيدابى بامريكا ... وعلى الفور اتصلت بيهو وتفاجئت بوجوده ببورتسودان .. قال لى اسكت ساكت بيتنا اتقلب فراش الناس كلها جايا تعزى فوقى.........

ونواصل......