حكا يا ت من زمن سودانلاين الجميل

بالمناسبة حبيبنا ماسورة ذكر الاتى عن عبدوس :-

(لانه بالمناسبه انحنا مشتركين فى أشياء معينه وبنعالج بعض الامور بنفس الطريقه وقلته ربما عامل السن اثر عليه ونسى بعض الاشياء لكن لقيت أنا الكبرته وذولى يا هو ذاته ) .

ماهى هذه الأشياء المشتركة والأمور التى تعالجونها بنفس الطريقة يا ماسورة ؟ والله لم نكن نعرف ذلك ؟ والحقيقة لقد بدأنا نشك كثيرا !!! هل لهذه الأمور المشتركة والتى تعالجانها بنفس الطريقة أى علاقة بالأصابع الذهبية ؟ غايتو إذا لم تخبرنا بالتفاصيل عن المكالمة العجيبة فلنا الحق أن نشك ماشاء لنا .....

الرشيد شمس الدين

حبايبي الحلوين
بادئ ذي بدئ لا املك الا ان اترحم علي العزيز جدو شريف الشهير باوزو يرحمه الله
عملنا معا في النيل الازرق وكان نعم الاخ والصديق
ابنائي بوكو وبوري وحمادة تعلقوا
به كثيرا
طالما سمعتهم يقولون
جدو شريف
جدو شريف راجل ظريف
الخ
نزل من النيل الازرق في اجازة وتم تصعيده علي القضارف وتقابلنا في بورسودان وكنت اتمشي علي الرصيف
وسمعت من يناديني .... نظرت الي اعلي.. كان هناك علي السطح ضابط ورديه يشرف علي التفريغ... صعدت السلم لاسلم عليه ونزل هو مهرولا ليسلم علي
واخذني- يرحمه الله في حضنه- وبكي وبكي ولم املك الا ان انزل ... لم اقل له اي كلمة ولم يقل لي هو اي كلمة.... في ذلك النهار حبست دمعات كم كنت اتمني لو تركت لها العنان

اللهم ارحم جدو شريف وسائر من فقدنا
العزيز الراجل السكرة ود كرار
يا اخي القشوريه دي نحنا كرهانها من زمن البحر والله اكان ما فيها .... الكعبة... كان يكون عندنا كلام
غايتو ما بكضب عليك ولا علي روحي يا محل ما انا يا ................
خلدي السكرة
ما عارف اقول ليك شنو دايما تخجلنا وزي ما قال رشدي الله لا جاب يوم شكرك رغم اني اكره هذا التعبير ولكن يكفيك فخرا انت وزملاءك انكم استطعتم ان تجمعونا
رشدي السكرة والله باين حقك راح صاحبك باعك بي رخيص
حبيبي توحة ليك وحشه يا اعز الناس
التفاصيل في البوست القادم بس عاوز اقول كانت ليكم وحشة
رشدي
كلاكيت مره تانية
حارجع ليك بالتفصيل في رسالة قادمة بس اخد نفسي

عبدوس

واللة كانت ليكم وحشة ... انا عارفكم متونسين لكن انا المسكين لي الله..
طبعا رشدي عاوز يعرف توحه الحبيب قال لي شنو... بعدك...
واحد من اسباب الغياب اني سافرت لندن لاحضر ميلاد حفيدي الثالث ... اي حفيدي الثالث ولسه حالتو عبوري ما انتج .. انا قلتة ليهو يا ابني خلي قدوتك ماجداب وعمك جمال وعبد الرحمن الزين و فضل السيد و واعك تكون زي اعمامك النتو وتوحه وعليوه وناس كتار ما بقدر اجيب سيرتهم لكنهم بس بحبو حنان..مين يعرف يمكن الود يطلع لابو ما يكون زي عمو توحه والا الرماد كال حماد
الي لقاء
ابدوس

بوكو وبورى وعبورى وحماده أقل واحد طوله مترين غايتو جنس غايتو يا الرشيد .
الحكايه وراثه ما قدوه والضحك شرطكم يا ناس بورى وعبورى و عبودى.
مشيت بعيد يا الرشيد الاصابع الذهبيه سيده واحد الله لاجاب يومه. مشتركين فى تحليل وحل بعض الامور بنفس الطريقه.

الفاتح

الفاتح ... قال.... الله يفتح راسك
والله صحي انته ود حرام ... مانفع معاك كسير تلج
ولا توحه .. اه لو ما سمعته انو حاجه امنة مرة طيبة... الغريبه انو سمعته انو الدكتوره حلفت تغير اسم الدكتورة لمن عرفت انو اسم امنة دة انجب واحد تافه زيك
لكن اهو ناس الجبل وكوستي ديل ناس علي نياتهم
معزتي
عبودي ابو بوكو وبوري وحماد ة و ايوية و وموزو وتوتي وبوسي ونوسي و لوسي و جد جنان وياسو ويوسي وموسي و روسي و امكن توحي
المهم انتاج يا..........

عارف والكلام ليك عندي رسالة من العزيز عاطف عكود وانتة عارف الولد عم مش خال... وحلفني ما ارسلها ليك الا لمن انزنق... وباين محتاج بريدك الخاص جدا عشان ارسلها ليك...........
معزتي للنقابي الضليع ناصر المستضعفين عاطف
فغي نفس الوقت نناشد خلدي ان يحاول مرة اخري مع عليوة ابو النيل الريس عبد العظيم وطبعا ود كرار ما بقصر ودردقوا لي مختار وين قريب المرحوم قاسم من ديك وعيك والراجل الراقي الما بجيب اسمو لانو الهوا بقسمو
معزتي ومودتي

* والله يا بو الكباتن انا ذاتى اناشد،،، دايرين نغير الكورس ... ادّونا أفكار//لعلهم يأتون
** تحيات لى عابر الذى ظهر... عياناً... وللحبيب عاطف صديق الذى ظهر من وراء الكواليس

*** ونجد نفسنا فى خندق واحد مع الرشيد دفاعاً عن حقه المشروع فى (الشك)
والشك الديكارتى كمان
دام الحب بحـــــارا

الشىُ المحيرنى زعلك هل عشان المحادثه ام بسبب الاصابع الذهبيه ام الوراثه والله بينى وبينك كلهم بزعلو لكن دى قسمتك وياريت لو ورثتهم اى حاجه تانيه غير الاصابع الذهبيه لأنه بعدين حيقولو الله يرحمه أنحنا قلنا ليه عايذين قروش ولا عقارات انحنا عايذين الجترى. أنا ما عندى بريد خاص ولا عندى حاجه داسيها اسمح ليك أنشره هنا وممكن عاطف انشر العايذه.
ذى ما قلته ليك يا الرشيد عندنا حاجات مشتركه والحاجات دى حتمشى معانا المقابر لانه عايها قسم ولاء وقسم المهنه .

الفاتح

الرسالة وصلت ياتوحه... يعني عاوز تقنعني انو ماعندك بريد خاص ولا تلفون بعرفوهو ناس معينين و لا طريقة معينة للاتصال من نوع اضرب رنه واقفل واضرب رنتين واقفل والتالته ارفع...قصدي السماعة... خلاص الود عبد المخلص وياحليل الجتري...انا ممكن اقتنع لكن.... يا ربي.... في ناس تانية حتقتنع.. غايتو جنس غايتات يا رشدي
اطنان من المودة
عبودي

عارف داير يشتت افكاري ويكرهني في رشدي البرتكانة وده بعدو
بعدك يا توحة والعب غيرها
قال ايه بابكر النميري جاهو بي بي بدلة
اولا سلام لي للنمر
وتاني قوليهو ما قال ود كرار لا....................لا
....
لكن جد مشتاق اشوفكم وبلغ تحياتي لي عم حمدان.. لمن اتذكر قصة البنطلون الملبوس بالقلبة اموت من الضحك
قصدي خلي سعدون يتونس مع دفعتته... وبي عضمة لسانو قال رشدي برتكانة دفعتنا... هل لديك اقوال اخري
بودي

همدانه ده شنو..................
والله انحنا ما عارفين الرشيد دفعة منه.
والله مشتاقين كتير لكن انته عملنه ليك ناسات جداد وبقيت من ناس الخرطوم ونسيت القدام
وحاتجينا راجع لانه ناس الخرطوم بياخدو البوش من الجيب.

سلام

الفاتح

والله انت الصادق يا توحة...زيكم اكيد ما بلقي لكن قلنا اهو نفتح شوية ونشوف البلد ماشه كيف.. يعني ناخد لينا بوشين تلاتة لمستقبل الايام.. لكن يظهر كشفوني وقالو لي خوتك خوة ناس بحر... بس همه ما عارفين خوة ناس البحر كيف...واللة مشتاق بجد لكن مافي طريقة جية قريب... امكن نتلاقي في الخليج لو بتجي قريب لكن ما في الصيف... بري
مودتي

كل عام وأنتم بخير , وتتواصل حكاوى زمن سودانلاين الجميل وقد سعدت بما أثاره ماسورة وعبدوس عن العزيز حمدان ( ودالشيخ ) ....تذكرت تلك الأيام البيضاء بلون الثلج وكذلك تلك الأيام الحارقة بطعم الملح حينما يغوص فى فؤاد جرح ... ضحكت حينما تذكرت حبيبنا حمدى الشوربجى وهو يحكى لنا القصة وخوفه أن نحكى الأمر , إذن فالمسافة بينه وبين الترقية أبعد من السماء للأرض وتطميننا له أننا لا يمكن أن نحكى لأننا فى الهم شرق فالترقية أيضا كانت تنتظرنا ولا يمكن أن نضيعها بسبب قصصه العجيبة ...... ذهبنا للشركة ودخلنا للمكتب الفنى , كنت ثالث ثلاثة ,
( سوحى ) ( إسحق , اللحاق فى بحر المالح ) كما كان يقول حبيبنا الراحل خليل سورج , وتوأم الروح الخالد على سورج وشخصى ....دخلنا وكان فى المكتب حمدان الشيخ وحده , وطبعا لم يكن فى البال أننا يمكن أن نفتح الموضوع , ولكن من غير على سورج لا تحده الحدود ولا السواحل ولا يمكن له أن يحسب حساباتنا الدنيوية ( لكأنه كان يعلم أنه مغادر سريعا ولذلك لماذا يحسب حساب الدنيا أم بنايا قش , وهى كما هى دار الغش) .... صاح على سورج بأعلى صوته وبطريقته الحبيبة :- ( أى..أى..أى ... ياحمدانا تقول لى ماشى الشغل ياحمدانا ؟ تكضب على ياحمدانا؟) ... ذهلنا مصعوقين ولم نصدق .... دهش ود الشيخ أكثر ...( أى أمان فى هذه الدنيا إذا كانت أسراره كلها جهرا ..هكذا ....ولكن الموضوع مر بخير )
بالمناسبة تعلمون أن ود الشيخ إضافة لكل مزاياه التى لا تحصى , يملك صوتا جميلا نادرا ويحفظ الحقيبة كما لو كان من روادهاالأوائل ...
ومن معاناة العاملين فى البحر تتولد أشياء عجيبة ....أذكر حينما يردد أحدهم أغنية أمامك , فإنك تستمر كل اليوم تردد تلك الأغنية وتنتقل العدوى بالتالى لكل الطاقم فما ينفك الجميع يردد الأغنية حتى تغطى عليها أغنية أخرى وهكذا , وقد كان ود الشيخ أكبر شهيد لذلك الأمر فكنا ( نشرك له للإستمتاع بجمال الصوت ) , وفى مرة فى الباخرة النيل ألأبيض قصدت سماع الصوت الجميل , جلسنا فى الصالون نلعب الكوتشينة , حينها حبك المقلب , ورغم قبح الصوت , بدأت أردد :- ( أذكرى أيام صفانا وأذكرى عهد اللقاء والليالى الفى حبور ...) ... قبض الشرك ..بدأ ود الشيخ فى إكمال الغناء بذاك الصوت الشجى ,,, وأستمر فى غناء الأغنية دون توقف حتى ذهبنا للنوم ....
فى اليوم التالى جاء ود الشيخ للماكينة والعيون حمراء , قلت له : يبدو أنك لم تنم جيدا .... قال لى : كلو والله منك ...( شبكتنى فى المسينيحة دى للصباح ما قادر إتفك منها ...أذكرى أيام صفانا ....) ....لك الإعزاز الكبير حبيبنا حمدان وعفوا للإطالة وليدم أبدا ما بيننا ..

الرشيد شمس الدين

دائما كعهدنا بك يا رشدي البرتكانة يا دفعه تعيدنا لاجمل الايام والذكريات... فلله درك... حمدان لنا معه ذكريات لا تحصي بدات في رييكا..علي فكرة دفعة حمدان علي ما اذكر النحاس...لا ادري اين هو.. قسم الله.. الهمزاني المشهور بصلاح.. المهم كانت لنا ذكريات عطرة ابطالها عليوة وابو النيل وعلي حسن البطل وشخصي و ابو العروس -رندة- عم حسن صديق اللة يطراهو بالخير..وتلك روايات وذكريات.. حمدان كان اكثر الناس كرما...ما عليك الا ان تدردقو وتفتتش حق البدروم... والبدروم لمن لا يعرفون مكان فيه تشربون شاي رخيص بي اقل مما فيش.. وما ان نتجرع الكوب التاني... حتي يقول حمدان كما نتوقع... واللة الليلة ماريتسا باين عاملا ليها جدادة كدي ا رحكم نشوف... هنا تكون الخطة نجحت ونحاول ان نعتذر لكن بي دبلوماسية شديدة... حتي لا يغير رايو... ولحظات وتكون الجدادة راحت في حق اللة رغم انو تقديرات ماريتسا انها تقعدهم اسبوع...لكن وين مع البعاعيت.... اما قصة حسن صديق وعلي حسن دي ما بقدر اقولها علي قول نميري
معزتي وحبي
عبدوس

قبل يومين وصل بورتسودان شخصيه من شخصيات سودان لاين الفريده ومعه الزوجه رقم 9 عمنا حسن بنيش وياهو ذاته بسلم عليكم شديد ولازال بدون سنون وضاحك.
وتقول لى أوزون و جترى.
أعنقد يا عبودى انه حسن صديق هو اول من وراك الدريبات والله ما كسب فيك خير.
اليوم زارنى تبه الفيل وبسلم عليكم شديد.

سلام

الفاتح

جد جد حاسدك يا قاشورة شايفك متونس بالله السلام تحياتي لهم جميعا.. زرت اليوم الاخ علي ابرهيم الشهير بعلي جربان او علي جزيرة احيانا وفي الجبل علي ود الشايقي.. وبقينا نقول ليهو علي فان دين بيرج - اي علي ود الجبل باللغة الهولندية- سبب الزيارة انو وصل من السودان امس وقالو راقد بي ملاريا.. طوالي يا توحة اتزكرتة حبيبب روحي عليوة السكرة.. طبعا زمان النيلات ما بقيف في بورسودان اكتر من اربعه وعشرين ساعة تصل الجنوبية ليلا وتشفتن في الصباح الي الميناء الشمالي ومنها الي اوروبا... وغالبا بناخد البنكر في الجنوبية وطبعا كبير المنهندسين لازم يكون موجود... وطبعا ما في عذر احسن من كدة انك ما تمشيش البيت... الشاهد زي ما بقولو في احد المرات ما كان في بنكر في بورتسودان وجاتنا تعليمات انو ناخد البنكر من جدة.... غايتو صاحبي هرج جنس هرجي... وانا المسكين افتكرتو زعلان لانو بنكر جدة ما تمام مقارنة بي حق بورسودان لكن اتاريهو عرف انو ما عندو اي عذر... المهم قبل دخولنا بورتسودان يجيني الضابط التاني ويقول لي يا كابتن الباشمهندس عندو ملاريا
ومبلغ عيان....
تذكرت تلك القصة وانا اعاود علي جربان وضحكنا كتيرا .. لكن شفتة خاتين قدامو المبخر قلتة ليك ياخوي اتوكل ما بتحلك الملاريا كان غيرك اشطر....
تقولي حسن بنيش معرس تسعه...
ولنا عودة مع الذكريات بس ساعدونا بالباصات
عبودي

ده سبب من الاسباب الشجعتنى.
أخر تقليعات رستم 2 كبايه لبن أبل على الريق وبالمساء 2 كبايه مكسوره ب7UP وبالمناسبه اخر مره كان فى الخرطوم فى يناير ومفكر امشى فى يوليو عشان الخريف يعنى بعد ما ابلع ليه 5 جمال.
تحياتى لعلى جربان.

سلام
الفاتح

ابو الكباتن لو وصلتك الرساله من الرشيد صدقنى دى كانت خطه خبيثه من الرشيد ارجو انك ما تتغشى ذى ونهدم علاقة السنين والمحبه..
ارجو ان تحكم عقلك وتذكر الايام الحلوه وايام سوار الدهب وكتيل العيون وماسوره حبيبك
اما التافه الرشيد انا لابد ليه وحقك حأخده منه.

ولو كمان عايذ تولعه والله انحنا جاهزين والفايلات مليانه
سلام

الفاتح

لأترك عبدوس وماسورة جانبا إلى حين , ذلك أن شيئا كارثيا قد حدث صباح أمس الباكر وبينما كانت باخرة البضائع
( إبن بطوطة ) فى طريقها من مصر إلى الأمارات تحت قيادة الأخ القبطان ( عبده محمد عبده ) إذ تعرضت لعطل ميكانيكى بسيط وتوقفت الباخرة لإصلاحه وبينما كان الطاقم منهمكا فى الإصلاح والباخرة
( NOT UNDER COMMAND) قامت باخرة ألمانية ضخمة بالإرتطام بها و بقوة شديدة مما أدى لأصابات بليغة بجسم الباخرة وبالأخص منطقة سكن الطاقم وتسربت المياه للماكينة والمؤسف أن الباخرة الألمانية هربت بعد الحادث مباشرة بدلا عن المشاركة فى عمليات الإنقاذ , حتى تم القبض عليها فى السويس لاحقا ..... ولأن الباخرة قد غرقت سريعا من الجزء الخلفى منها لذلك لم يتمكن الطاقم من إستعمال قوارب النجاة ولضيق الوقت إكتفوا بلبس
( بدل الإنقاذ ) والنزول للماء مباشرة وقد قامت الطائرات المصرية بمحاولات للإنقاذ كان من نتيجته إنقاذ تسعة أفراد من الطاقم وإنتشال جثة واحدة ومايزال (16) من الطاقم فى مقدمتهم الكابتن ( عبده محمد عبده ) فى عداد المفقودين وما تزال الطائرات المصرية تزرع المياه بحثا عن الناجين ...... أرفعوا معى أكف الضراعة صادقة لله أن يلطف ويحفظ حبيبنا عبده محمد عبده وزملاءه , إنه نعم المولى ونعم النصير .....
الغريب أن كابتن (عبده محمد عبده ) قد إلتحق بالباخرة مؤخرا ( يوم3 مارس الحالى ) فى ميناء الأدبية مباشرة قبل رحلتها الكارثية هذه بديلا للأخ كابتن ( محمد على الرخا ) .........
بالمناسبة الشركة المالكة للباخرة فى الأمارات يعمل فى إدارتها أخونا العزيز كابتن الصادق محمد أحمد وللمزيد من المعلومات يمكن الإتصال به على النقال :-00971507684588

نكرر الدعوات أن يحفظ الله ويلطف أخونا كابتن عبده ورفاقه ..اللهم إنا لا نسألك رد القضاء ولكن نسألك اللطف فيه يارب ......

الرشيد شمس الدين

للإطلاع على أحدث صورة للكابتن عبده محمد عبده يرجى الضغط على الرابط السابق

http://photos1234.page.tl/Capt-.-Abdou.htm

عفوا كان هناك خطأ فى الرابط ولكن هذا هو الرابط الصحيح لأخر صورة للعزيز كابتن عبده ...حفظه الله ...

الرشيد شمس الدين

لاحول ولاقوة الا بالله للفقيد الرحمه ولأهله الصبر والسلوان ولكم حسن العزاء

الفاتح

عذرا....احبابي...وشكرا رشدي لنقل الخبر المحزن ولم اطلع علية الا قبل لحظة فقد كنت خارج البلد... اسفت وحزنت وحز في نفسي كثيرا.... اولا الرحمة لمن تولاهم الله برحمته ولكن كيف لم نسمع بمثل هذا المصاب الجلل من دواير اعلامية تتباكي لو فقد اوروبيا او امريكياولا نقول اسرائبليا او يابنيا اوحتي من كافة دول جنوب غرب اسيا اصبعا من احدي قدميه... الي متي يظل بحارة وركاب البحر الحمر لا بواكي لهم....ما يولمني في الخبر باخرة المانية ضخمة تدهس باخرة ماكيناتها معطلة وتغرقها وتفر هاربة...واللة في المانيا ذاتها لو صدمت حجرا في الطريق ولم تبلغ عن نفسك فمصيرك السجن حتي ينجلي الامر ويحاموك فورا بقانونhit and run وهوقانون لا يتيح لك حتي ان تسمع اقوالك..فما بالك بباخرة تصدم باخرة وتقتل سبعة عشر انسانا من بينهم القبطان.... الي متي تهون علينا انفسنا..الي متي نموت قبل اجلنا..الي متي نعلق ضياع ارواح ابنائنا علي شماعة القضاء والقدر...
الي متي..الي متي...السلطات المصرية عليها ان تحمي كل من يعبر موانيها..مصلحتنا البحرية والتي يدفع هولاء الشهداء رسوم الجوازات البحرية التي يحملوها عليها ان ترد لهم اعتبارهم وتطارد من تسبب في استشهادهم وكل قوانين الدنيا معهم..لا عفا الله عما سلف ولا العوض عند اللة فكل من يخطئ يجب ان يحاكم وينال الجزاء..اللهم ارحم شهداء البحر ولكن اما ان لنا ان نجعلها اخر ماساة لنا...صدقوني لو شك القبطان الالماني لحظة واحدة ان يد العدالة ستطاله لما هرب ولكنه يعلم وهو الجاني ان دولته ستحميه..الي متي نعلم نحن المجني علينا ان هناك من سيدافع عنا...رحمتك اللهم واغفر لنا هوان انفسنا علينا...معذرة اراني اطلت

يبدو أن أخينا ماسورة كعادته دائما لا يستطيع التريث فى الأمور فبينما نقلنا الخبر وطلبنا أن يدعو الزملاء الله ضارعين أن يحفظ الله أخينا كابتن عبده محمد عبده وأن الطائرات المصرية تقوم بمجهودات مقدرة للإنقاذ , يرجو ماسورة الله أن يرحم ويغفر للمرحوم المفترض والأن أنقل لكم هذا الخبر المدهش من ( قوقل ) , إذ يبدو أن الله قد إستجاب لدعواتنا وهاكم الخبر المفرح والذى نتمنى أن يصبح حقيقة :-
Cairo - A Sudanese man was rescued on Tuesday as Egyptian authorities continue to search for survivors a day after a Cypriot-registered cargo ship capsized in the Red Sea, police have told Deutsche Presse-Agentur dpa. The Sudanese survivor raises the number of people rescued to 10 of the 26 men on board the Ibn Battuta. On Monday, the bodies of two crew members were pulled from the water.
Police say those rescued from the vessel include four Somalis, two Iraqis, a Bangladeshi, a Yemeni and an Ethiopian.
Preliminary reports indicate that adverse weather conditions were behind the accident. Authorities are looking for the ship's black box recorder to ascertain the exact cause of the accident.
The Ibn Battuta was carrying a cargo of 6,500 tons of sand used for manufacturing glass, according to Egypt's official Middle East News Agency.
The ship had passed the Suez Canal and was bound for the United Arab Emirates when it capsized near Egypt's Red Sea port of

علما بأن كابتن عبده هو السودانى الوحيد فى الباخرة , نحن فى الإنتظاروالمتابعة مع الدعوات الصادقة ونتمنى أن نؤكد لكم الخبر المفرح ويالفاتح ماسورة حتودى روحك وين مع لسان عبده الإنت بتعرفوا براك ...الدعوات متصلة وليحفظه الله .....
الرشيد شمس الدين

وهذا خبر اخر ندعو الله أن يثبت للناس حقيقته ....

CAIRO (AFP) — Three sailors perished and 10 are still missing after a cargo ship sank off the Red Sea coast of Egypt on Monday shortly after leaving port, a maritime official said.

Thirteen people were rescued when the 5,600-tonne Ibn al-Battuta went down in the sea about 35 nautical miles off the port of Safaga, a port official told AFP.

Among those rescued were the ship's Sudanese captain and Somali, Iraqi and Bangladeshi crewmen, the official added.

He said two vessels and helicopters were involved in the search for the missing members of the crew, which include Sudanese, Indians and Pakistanis.

The ship was carrying a shipment of silicon and had set sail from the port of Abu Dhunaima, near Safaga, on its way to the United Arab Emirates, the official said, without giving details about the vessel's ownership.

In February 2006, a ferry sank as it was travelling to Safaga from Saudi Arabia, drowning 1,000 passengers in one of the deadliest disasters in modern maritime history.

In 1991, another Egyptian ferry sank in the Red Sea en route between Jeddah and Safaga, leading to the loss of nearly 500 lives


الرشيد شمس الدين