شندى...الجمال...وانا مالى

يا حليل ربوع شندى
بلد الجمال عندى
فى شندى العظيمه تلقى بنات جعل
شندى الوديعة الهاديه....؟ شندى التاريخ...ود ضحويه ..المك....شنان....ملين...الخواجه
وانت دخل ليها من الجنوب تستقبلك مويس..القليعه..قريش...المعهد وزكريات الاوليه و .عم الباز بتاع الدكان.KG2
استاذ قسم البارى وانور والناظر محى الدين راسخ (وملين)الذى زامل كل سكان شندى.على يمينك مربع 17 وشمالك شندى فوق و8 و9 و7 والحجازه(عمر الخير ,ضرار,عبد المتعال,محمد عمر) وعم الصادق بتاع النبق
ست كلتوم التى كنا نزورها والواحد ماسك توب امو!!وكان الجميع يتبرك من قبرها.وفى ذلك اليوم تنشط تجارة البالوظه والدوم والحنبك .الست كلتوم بت بحر العلوم والله ماعارف ليها اى نسب (افتينا يا كابتن احمد).ثم التنميه ونادى الاهلى. الحجياب .حجو على حسين اللاعب الفلته. والحجياب ديل ملوك اللحمه فى شندى.سينما شندى العتيقه وبدوى ملك الاعلانات(عنيف..مثير...مغامرات) رنقو ذوالمسدس الذهبى..ديجانقو ابو تابوت...
استاد شندى ...سارديه ..النسر..ابو السعود اشهر المشجعين..بابو اظرفهم..عوض شربش الباك الخطير بلعب ماتش وبقيف ثلاثه!!!دحيش 80 التاج ,ابوشريعه..الكذى(الكذى كان يلعب فى النيل قام انتقل للمجد .3و4ومباريات قاعد احتياطى..بق ما بجى التمرين سالو واحد من الاداره مالك ما بتجى التمرين؟ الكذى قال ليهو قعاد الكنبه داير ليهو تمارين)
خلف دار الرياضه ديم عباس(هو يا ليلى)واكلنا فيه جنس علقات...يوم يرسلوك تجيب القش بتاع الغنم علقتك % .وفيه ملك الجان ..عبد الشكور..ده قالو عربيتو بتمشى باى حاجة..مويه فول ..عرقى..صفار بيض.......... نجى حلة البوليس والاهليه .استاذ النمسا..ومنزل خالد حسن حسين ................ انا فطيت اهم حاجه ثانوية البنات وبرج الحمام... دى الباص بتاع الترحيل .كان يعرف ببرج الحمام عشان الفرصة الوحيدة للحمام لكى يطل على شندى كانت عبر شبابيك ذلك البص .فكن كما الحمام فى برجه!!!!
ولنا عوده ان الله سهل

ياعظمه
لولا الملامه والله تشهى الواحد يبقى جعلى عديل كدى .
واصل وبنواصل
عاطف عكود

العزيز كابتن عبد العظيم تحياتي
امتعني ما كتبت ,وزي ما قال عاطف........!
ذكريات الصبا الاول والمنشأ من امتع لحظات الحياة حين اجترارها.
من روائع ما تغني به اللحو عن المك نمر ( ذو عفه وبشاشه.......تشهد دار جعل يوم حريق الباشا)(تشهد شندي فوق تشهد مويس)
سئل د. عبد الله الطيب رحمه الله عن المك نمر فقال (رجل وزعيم للجعليين ,كثر عنه الكلام بين بطولات وفروسيه,إن صح فيه ربع ما قيل لكفانا فخرا".)
في انتظار مزيدا من الذكريات وما تنسي محطه القطر!

الاخ عبد الرحمن الشوق مطر...ويظهر عليك كاتلاك طعميه المحطه...
الحبيب اير.....عكود ليك وحشه ما انت ياهو ذاتو جعلى....(يحكى ان ابو داؤد ساعد ليهو مره.قالت ليهو متعجبه!!!!! بارك الله فيك العملتو ود عرب ما بسويه)..
ونعود لشندى..ونحن داخلين بمحازاة شريط السكه حديد. بعد السينما.(السينما دى جنبها حوش كبير لمن يكون الفلم هندى طويل المويه بتاعت التبريد ما تديك الدرب!!)
نادى النيل..ابو القوانين محمد الشيخ مدنى...عصام الحاج..عامر جمال الدين ورمبيك اعرق المشجعين ويمثل التعايش الجنوبى الشمالى..سجن شندى ومبانى المحكمه وتمساح الشاويش همام لا يزال صامدا ومعلق على باب المحكمه. ابو الزيق بتاع الطعميه وده من الجاليه القبطيه(النقاده) وديل بشيلو الفاتحه عديل لكن بيقروا شنو الله العليم!
نخش ساحه المولد القديم وكانت مرتع الصبا وعم محمود البشير..الحصان بى شلنوالسمسميه..الفوليه..الهريسه..ايام المولد دى كانت متنفس لى ناس فيصل فضل الله وكانو ظاهرين الواحد تلقاهو متطهم ويعاين للانوار ..امك ولع ...امك طفأ....والجلابيه غالبا ماتكون خدره وبى لياقه!!!
ود مرحوم والنوبه والحوليه..وصحن الفته..حسين الكرستانى احسن من يقلد عثمان حسين...ابو دومه ملك الكيف ودى مره ساق ناس البوليس بكامل عتادم عشان يوريهم مكان البنقو.وبعد طلعو من شندى قالو ليهو وين البنقو يا ابو دومه؟ قال ليهم فى ..واو.
ولنا عوده ان الله سهل

ندخل السوق..
سلوى بوتيك عز يا شندى بوتيك الكلام دة قبل السبعينات يا براتك. نخش على ادورد سمعان سجارتو قصبه حتى النوم وشوف عينى باكو الروثمان فى التربيزه ولعتو واحدة بس الصباح. قهوة بابو وهبار وقهوة الكاظم(لازم..لازم..شاى الكاظم)دكان احمد حكيم(تحياتى لهاشم الطويل) دكان النحاس وده معاهو جارنا عثمان غايتو لمن طلعنا مساعد ياى!!مكتبة العدسى وقهوة التيمان والجامع الكبير وعم الحارث المؤذن ذو الصوت البديع. سيد الخياط وابو جوخ محمد عبده واول شبط جلد بعد اعتزال الشده(شبط بلاستيك بى سير).الاطرش العجلاتى العجله بى قرشين والمبيت بى شلن فى الليالى المقمره.الملجه وسوق الخضار والتواجد الكثيف لاخونا الفليل!!!!!!!!!!!!(الزحمه فيها الرحمه). الاسبتاليه والاسعاف (كومر)وعم ابوالقاسم ابشنب والاسعاف ده لما تشوفو لازم تقطع صوفة من راسك..ليه ما عارف(افتينا يا سمسمون)
ولنا عوده ان ربنا سهل

غرب الإسبتاليه المجلس البلدى...
لازلت وساظل اذكر وادعو لذلك النحيل الاسمر الضاحك ابداوالمترنم دائما بمدائح المصطفى . ذو القلب المرهف ,الحنون كم علمنا الصبر فى الشده والايمان بالقضاء وحب المعرفه.كان (عامل ناموس) بالنهار وقهوجى باليل فى نادى شندى الاجتماعى, حتى يوفر لنا العيشة الكريمه ما اعظمك ابى لقد كان فخرنا وعزنا وهو يرتدى الرداء الكاكى والقميص الكاكى ذو الجيوب الواسعه وساعة باله ويحمل طرمبه الجمكسين على اكتافه وقزازة المبيد بيمناه طائفا بحوارى شندى وازقتها قاتلا لحشراتها......عم اللمين جنبنا مويه مطر فيها ناموس كتير ...جايكم ياولد بعد مانرش الجمكسين لى ناس ابشوك.... كنا ننتظره بشوق مواعيد الفطور حين يعود بقفة الخضار وتمتلى جيوبه بما لذ وطاب وكنا نتحلق حوله فيداعب هذا ويمازح تلك.لقد كان مرحا...بديعا فى تعامله وديعا..
لقد جاب معظم قرى الشماليه هو وزمرته وكان زادهم الكسرة الناشفه والبصلوالمويه الحاره. يدرؤون الخطر عن الغبش فى ماموريات تمتد الى شهور(وقتها كان العبد لله رب الاسره بالانابه)كنا ننتظر عودته بفارق الصبر ......ويومنا داك يوم عيد حين يعود محملا بالنبق والدوم واللالوب
كان دمقراطيا بالفطره ويساعد من اراد التعليم وينصح من رفض...درس العلم فى خلوة جده الابوابى بمنطقة المحميه.ونزح الى مدينه شندى لكسب العيش.سكن مؤاجرا فى مربع واحد ثم مربع 11 الى ان امتلك منزل بالثوره مربع 14 كنت اساعدة فى بنائه لقد كان عصاميا..كان هو البنا والزبال والمبيض ونحن مساعدوه. لقد تعلمنا منه الكثير ولا زلنا الا رحم الله الامين الطاهر وادخله فسيح جناته.
سالته يوما وانا اتاهب للسفر عائدا للبحر. داير حاجه يا ابوى؟ ايوة داير كفن..يا ابوى جيب كفنك براك واشمعن كفن يعنى؟ فأجاب انا ماشى بى كرعى ديل ما بتجينى عوجه..العوجه وانا ميت الوقت داك داير لى كفن بس!!!!
الم اقل لازلت انهل من حكمته
لن ولم افيك حقك ابى...ولازلت بين ضلوعى.....
ولنا عوده ان الله سهل

ABD ELAZIM ELAMIN كتب: لقد تعلمنا منه الكثير ولا زلنا الا رحم الله الامين الطاهر وادخله فسيح جناته.
سالته يوما وانا اتاهب للسفر عائدا للبحر. داير حاجه يا ابوى؟ ايوة داير كفن..يا ابوى جيب كفنك براك واشمعن كفن يعنى؟ فأجاب انا ماشى بى كرعى ديل ما بتجينى عوجه..العوجه وانا ميت الوقت داك داير لى كفن بس!!!!
الم اقل لازلت انهل من حكمته
لن ولم افيك حقك ابى...ولازلت بين ضلوعى.....
ولنا عوده ان الله سهل

مااعظمك العزيز عظمه وما احكمك عمى اللمين(الامين)
فالله درك عبدالعظيم...... ولك الرحمه والمغفره عمى اللمين .
والله يسهل وتواصل
عاطف عكود

اللهم ارحم عمنا الامين و كل ابائنا و كل موتى المسلمين يا رب يا كريم.


و نقول يا حليل شندي وناس شندي و هواء و (هوي) شندي.


و عن ستي كلتوم ( تلحقنا و تنجدنا) فيقال انها ابنة سيدي الشيخ جعفر ولد (او حفيد) سيدي الحسن - البحلفوا بيه الشايقيات و الجعليات - و يقال انها توفيت بشندي و هي ابنة عشر و اقيم لها هذا المزار و الذي اصبح حاليا داخل المسجد الذي قام ببنائه رجل البر ( نصر) من قرية مويس/الحوش. و الله اعلم.

ظلت زيارة قبر ستي كلتوم طقس اساسى اثناء المناسبات الاجتماعية ( زواج/ طهور/نجاح ) ولا ادري ان كانت هذه العادة مستمرة بنفس القوة ام بدأت فى الاندثار مثلها مثل غيرها التى بدأت فى التلاشى فى عصر الفضائيات.

اذكر انه كان هناك ايضا (بيان) لشيخ غير معلوم مكانه قبالة دكان عريبى فى اتجاه الغرب فى الفسحة بين مربع حداشر و الثورة - لا ادري ان كنت تذكره او عندك معلومات عنه - و كان ايضا مزارا للنسوة فى العصريات.

شندى دا موضوع/ السوق الكبير \دكان محمد عبدو\ حسين عبد الماجد\ ناس ابجوخ وقهوة بابو \واجزخانة الشفيع\ ومطاعم السمك كان عمك يقول يااولدي انتوا مستعجلين! السمك دا بايت لكين اعصروا علي الليمون!!. وفي قهوة بابو الجماعه يتناقشوا انا شايقى انت جعلي انت حساني ابعد كدي اها يازول وقف الجعلي وقالهم ; اسمعوا ياناس نحنا جدنا العباس علي بالطلاق يوم القيامه البصات تقوم من هنا- شندي الجنة،، شندي الجنه، وما تنسى يا عظمة سوق شندي مليان بالنكات خاصه منطقة الجزارة (الحجياب) المربعات والاحياء حلة البحر وحي الزهور ومربع واحد . ناس شندي بقولوا للقطر ابسديري دخل المحطه ... وطبعا اللاعب عبد المحمود ابوشريعه والله زمان ياخي الحكاوي كتيره وشندي اكبر من كبيره سلام ياناس ... وين البنطون بعد كبري البشير؟؟
وهذا بعض ما كان من امر شندى العظيمة يا عظمة،، ريسان مواضيع لفتح شهية اولاد شندى
الف رحمة عليك عمّنا اللمين،،،،، وقد نعود !! مع شندى او اى مدينة \ قرية \ حلّة
ودام الود بحارااااا

احبتي الشنداويه لكم من القلب اصدق تحيه,والحمد لله كثر المتداخلون وفي انتظار المزيــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــد.
اللهم ارحم عم المين وجميم موتي المسلمين.آمين

الاخ عظمه .لك اجمل التحايا وانت تخترق ذكريات الماضي الجميل ...وابنك .,.والرحمه من الله لذاك الخالد الامين.
ارجو ان تواصل .... وياريت تعرج علي الدويمات و الفجيجة وكثبان الرمال وشجر المسكيت و......شندي فوق

mhmdaljamal كتب:الاخ عظمه .لك اجمل التحايا وانت تخترق ذكريات الماضي الجميل ...وابنك .,.والرحمه من الله لذاك الخالد الامين.
ارجو ان تواصل .... وياريت تعرج علي الدويمات و الفجيجة وكثبان الرمال وشجر المسكيت و......شندي فوق

العزيز ابو احمد لك الود وياريت انت كمان تخترق ذكريات الماضى الجميل .... و تعرج (ولو بى الجوكر)....... تعرج على امدر .... وروائع امدر اماااان.
ودام التواصل
عاطف عكود

احبتى لكم الود وانتم تشاركون بلمساتكم الرائعة والبديعه التى تلهمنا الروائع.
كل سنه وانتم تامين ولامين
الغيبه كانت مسببه وذلك للسفر الى رييكا لتجديد الرخصه والحمد لله جددنا الرخصه وكلو!!
نخش على الثانويه الحكوميه شندى...والاجيال المتعاقبه من ناس البحر ...احمد محمد احمد, ابن عمر مختار,العمرى,محى الدين عبد الرسول,ديجانقو,ابو جزمه,ابو الديب,عبد المتعال الكابو,فيصل,عمر الخير,عادل عثمان,شافت,محمد عمر والقائمه تطول(ذكرنى ىا كبتن احمد).....
استاذ الكرنكى....فى الصفره ايام الداخليه ناس الاقاليم(ولا اعنى فيصل)..إدافرو على الفول الما خمج..ولس عمك محمد على ما جهز الصفره ..قام استنجد بى الكرنكى استاذ الانقليزى ..دخل الصفره all of you out ..محمد على كب الزيت!!!!!
وكان استاذ البقره كما يحلو لنا..البدوى حافظ كتاب الرياضيات ونص الحصة تمثيل وغنى والنص التانى علم..محمد اسماعيل..محمد عثمان جتا..عباس ..ختم..
ومن افذاذ الطلبه ..الشهيد عوض عمر السمانى كان شاذا فى كل شى المدرسين احتارو يودوه علمى ولا ادبى وكان الاول حتى فى مماته.
اذكر فى ايام نميرى اعتصمنا فى المدرسه واعتلينا الاسوار...شرقنا البطرى وعربنا مدرسه كامل بتاعت البنات....ناس البوليس هاجمونا من الشرق وكانت الحلقه الاضعف لانو كثفنا الحراسه غربا!!!!!!والسبب معلوم ..يا جكس!!!
ولنا عوده ان الله سهل

حمدا لله على السلامة يا عبد العظيم و رمضان كريم.

سلمك الله من كل شر عزيزى احمد
ونواصل.....خلف المدارس الجناين وقلعه شنان ...اى ياهو ذاتو شنان بتاع الإنقلابات. والجناين دى اى زول فى شندى عندو معاها فلم ...مره مشيت ان وابنى عمى(له الرحمه) من الدوغش لى جنينه ود جبور..ومع كثافه الاشجار وكثره الجوافه وميه الزير البآآآآآآآآآآآآآآآآآآآآآآآآرده ومنقه شندى (المستكاوى) ..ما شعرنا بالزمن ولمان طلعنا بره كانت الواطه مغيرب...والدنيا قايمه وناس حارسين البحر....وكاد ان يكون عزاء عديل كده..اليوم داك اكلنا علقه اخوها الكلب!!!!!استعملت فيها على ما اذكر فروع الخروع!!!ده معروف لديكم؟
وانت نازل من الجناين بين السبتاليه وشندى فوق توجد منطقه لازالت تحتفظ بآثار حريق سمعه باشا...تتوسطها قبة ابو فراج(يلحقنا وينجدنا)...ثم الدونكى حيث تعلمنا ركوب العجله فى منحدره...نادى شندى العريق وكان اول عهدى بالعمل كm.boy..والتقيت بكبارات شندى..كان اجملهم عمك سنجر.
ثم نادى الامل وحديقة شندى...والشارع ماشى طوالى مرورا بالسوق الى حلة البحر ومدرسه المك نمر المتوسطة واصلا كانت معهد شندى وحولت الى متوسطه ..درسنا فيها اجمل خمسه سنوات(ما اعاده سلم تعليمى ساكت)..وكان الاول عبد الجليل محمد حسن التهامى طيلة الخمس سنوات ..وكان استاذ علام,بابكر الذين,قرشى,الإحيمر,الحاج, والناظر محمد عثمان ..لهم التجلى والاحترام.
ولنا عوده ان ربنا سهل

عظمه علي عظمه. الف حمدله علي السلامه ومنتظرين اخبار شندي والنقاده.......

العزيز عظمه الف سمدالله على الحلامه ....وتكملها بى بحر العافيه .... وعقبال تجديد 2014 والتحيه عبر البوست بتاعك لكل الاخوان الاعزاء فردا فردا , لانو عندى مشكله سرعه فى النت وماقادر اتواصل وحتى دى بعد طلوع الروح و محاولات من بعد التراويح وربنا يسهل
دمتم ودام التواصل
عاطف عكود

عظمة العزيز , الف حمدالله على السلامة وشهاداتك مباركة , أطال الله أعمارنا حتى 2014 ياعاطف القوز الحبيب , ( الحبيب هنا لعاطف ما للقوز ) .... يعنى كيف إنت لمن كنت فى الخرطوم قدرت تتواصل بالنت وتشرك أسامة مكى من شارع الظلط وتقول النت فى الدوحة بطىء ؟ ... أها ياعاطف بقت ناقصاك بطاقة المؤتمر الوطنى بس لأنه دا أكبر دليل على قدرة الإنقاذ الفائقة ...مش ؟؟؟
عظمة العزيز , نتابع بلهفة التوصيف الجميل لشندى العظيمة التى أنجبت العظماء والأصدقاء الأعزاء ولكنها كذلك أنجبت الكوارث ( ماتزعلوا إنتوا حتودونا فى ستين داهية ولا شنو ؟؟؟ ) ...حقيقة من الوصف شعرت كأننى أعرف شندى بكل شوارعها وأحيائها وشخوصها .... واصل و رعاك الله فلك ( كى بورد ) ساحر والله ...
على ذكر الشهادات التى تنتهى فى 2014 , أحد الزملاء الذين يعملون فى البحر فى شركتنا و جدد شهاداته وقتها حتى 2013 وبعد حوالى سنه من تاريخ ركوبه الباخرة إتصلت به أسأله عن الوقت المناسب لنزوله للإجازة فأدهشنى بالرد الجاد :- ( شفت أنا لو ما تاريخ شهاداتى إنتهى ماداير أنزل ) .... حكيت الأمر لأصيل الحبيب قبل أيام من وفاته فرد على بطريقته المحببة :- ( باااااالغت ...باااالغت ) ....

الرشيد شمس الدين

الحبيب رشدى مرحبا بك فى ربوع شندى..
خفالا يا القوز..القاسم المشترك الاعظم للمنتدى.... وباقى ليك فيها 14...
عريزى (الشبل)عبرحمان الظاهر( السيره) بالبص لشندى..او كانت...اوستكون...ولا كائنه بالدس...لك الود.
بعدين ىا رشدى مالك على..انا المحوقلين الصغار بتاعين سودانلاين ما قدرت عليهم!!اقوم ادافر ..ووين كمان...برى يا يمه......وعاطف بينى بينك البطاقه (إندو) بس ما سيوبر.
ولنا عوده ان الله سهل

عظمة العزيز ألف مرحب , إنت أظنك رحت بعيد وحتودينا فى داهية ....أنا ما قاصد القاصده إنت دا !!! أفو !!! أنا كمان بقول كلام ذى دا ؟. أنا قاصد بالكوارث أحبابنا أبو الجزم وديجانقو الله يطراهم بالخير ...إنت ياأخوى وديتا لمنو؟ هاللا هاللا على الجد ! مالك ؟ تكونش قاصد صلاح إدريس ؟؟؟ ريّحتك مش ؟ سلمت ودامت شندى رغم الكوارث كلها ...

الرشيد شمس الدين

العزيز رشدى
والله مافى (اكرث) من ديجانقو وابو جزمه ...وما فى احلى من الزوقه بالدو!!! لكن الدآمه ماكلها ..ماكلها!!!!!مادام دونا الارباب!!! لك الود حتى نلتقى
ان الله سهل.

خلف المدرسه منطقه السقاله ...و البنطون ... والجميزات الكبار حيث يستظل اهالينا من غرب شندى..الجوير و المتمه , الصفر(المرحوم البدرى) و الصلوعاب , قوز بدر ,النوراب(مصنع الكمالى للنسيج) الحليله(فيصل)الجبلاب(الصادق الحسن)وهلم جرا...
البنطون وما ادراك..ورى....ورى.....قدام....قدام...... التلغراف الناطق بين الريس والمهندس...آل ريكا آل ....الجماعه ظابتنها ليك آخر حلاوه....الشجره يمينك والغنمايه شمالك ولم تقرب السرعه قدم حمام..اللورى فى النص وتقل ورى عشان الدفهوالنسوان فى اللوكرات والرجال فى الدك.والحيوانات أزربيهن عشان ما يلوجن يقلبن الشى ده.
سؤل اخونا الماحى (له الرحمه) فى جلسه استجواب..آجنا هه انت دحين بتقرأ شنو؟والله يا حاج بنقرأ بحريه.. يعنى بنسوق السفن..شن نفرن السفن ديل؟ يعنى يا حاج مراكب بس كبار شويه....متل البنطون الليلنا ده؟ تقريبا يا حاج...لا خلاص(بنضوره وعرفنا دوره) نواتى يعنى!!!!!( النواتى هو قبطان الفلوكه)
عائدين ان الله سهل

نتجه شمالا بمحازاة النيل العظيم وسر الحياة من تانا وفكتوريا حتى الدلتا....على اليمين مبانى عتيقه اظنها كانت للحاكم ايام اولاد جون(لماذا وجون وليس بوش وغردون) عايتو جون ده ماشفن منو حاجه كعبه الا لم كان خائن فى (حفنة دولارات)...نخش على رصيف الجيش الذى يمتد بمحازاه القياده الشماليه الى الشقالوه(قريه شمال شندى وبها جزيرة سارديه التى انجبت عبد المحمود(الخواجه) وعثمان الجلال....)الرصيف ده ما عالى لكن حدث انو جماعه اخوانا ضربو سجاره green و اقنعوا نفسهم لايمكن الصعود فى هذا الارتفاع وناموا للصباح بين النيل والرصيف وهو كلو متر ونص!!!
نمشى شويه يمين ورش السكه حديد(جيتك يا عبد الرحمن) ودى كان اول فطره (انليقل) فى عصريه رمضان..... وقتها لسه ما كت مكلف ....كت عائد من البحر والجملون كبير وفيه جنس همبريب وزيرا بارد قت اديها مضمضه على خفيف لكن اظهر المويه درجة لزوجتها ماعاديه ..زاقت منى !!!!
كده دخلنا المحطه من الخلف ..جهة الصهريج وقطاطى العاملين والعطشقيه والبرادين والناظر ..محطه شندى كانت عامره بعمار السكه حديد حيث كان يمر بها اكثر من عشره قطاره..اكسبرس حلفا دى كان ما فيه بيع كتير لانو ما بقيف ..جرى... وبينى بينكم الحلفاوين بركبو جاهزين بى مناديلم.المنديل كان بنشيلو من النسوان ب 4 قروش وانت وشطارتك ولو ما بعت ما مشكله ...ذى الجرايد ممكن ترجع لكن ..الجنى ما بياع ..ما بدوك الانواع السمحه(قلوب العزارى)..قطر كريمه المتعه قطر ماهل(بس ضرار)تبيع وتغير وتجرى معاهو مسافه وتتعكلت..وتخليك حريف المسطح اكان ما اداك ما تسلمو المنديل.
المطر صبت ممكن يقطعوا الكهربه فى اى لحظهز ولنا عوده ان الله سهل..

زملاء واصدقاء ورفقاء الزمن الجميل ........ما احلاكم وما اروعكم وما اجمل كتاباتكم ............وانتم توثقون لروائعكم(الاخ اسامه) ولمدنكم (الاخ عظمة) ولنا ولكم (بقية العقد الفريد)
الاخ عبدالعظيم الطاهر كنت قد طلبت منك ان تعرج بنا بذكرياتك الي مناطق الدويمات والفجيجة ورمالها ومسكيتها .فقد كانت لنا اجمل الايام في تلكم القري الجميلة وطبعا يا عبد العظيم ارجو ان لا تنسي تدلف علي امدرمان فقد شهدت الجزء الاكبر من سنينك وذكرياتك (بالتأكيد) واكيد في جعبتك النضاحة الكثير الرائع الذي سيطربنا ويشجينا وفي انتظارك يا رائع وانت تبهجنا بشندي وبالمناسبة من اين اتت تسمية شندي وماذا تعني
ارجو ان لا اكون قد اطلت فهذه عادتي عندما الاقي حبايبي لكم التحيه ولك عظمة الاشواق ورمضان كريم ...............سلام

متابع ... سرد يحشد الحياة كلها في جمل قصيرة رشيقة وجميلة
قلمك جاب شندي كلها ... حتى أن رائحة طعمية المحطة هيجت علي رمضاني
يا سلام عليك يا سلام