بختنا ..... مبروك ليكم كلكم

منقول ...

الدكتـور ياسر المنصــورى لـ(تقاسيم ):
الدكتور ياسر جاد المولى أحمد جابر (المنصوري) إختصاصي وإستشاري جراحة المخ والأعصاب ..قام بإختراع جهاز لكشف المعادن النفيسة كالذهب وايضا للكشف عن المياة الجوفية والعملات المزيفة واطلق عليه أسم (الكاشف الثلاثي) (تي دي سي) عُرض هذا الجهاز على لجان إستشارية وهندسية لينال بعدها براءة الأختراع بالرقم 1894 ..فدعونا نترك دفة الحديث للدكتور ياسر ليحدثنا عن هذا الاختراع..

كتبت: سحر
يقول الدكتور ياسر: بدأت الفكرة منذ خمس سنوات حين بدأت في تجميع المعلومات على خلفيات إهتمامات في مجال التكنلوجيا الحديثة وبالفعل إجتزت مرحلة التكوين والتركيب والأختبارات وقد أشرف عليه نخبة من الخبراء من داخل وخارج السودان وعرض على لجان إستشارية وبناء على ذلك تمّ منحي براءة الأختراع وهو الآن جاهز للعمل ولكنه في مرحلة التصنيع والأستثمار والسيد وزير الطاقة والتعدين فتح ابواب وزارته لتطوير الاختراعات والأستفادة منها كثروة قومية بالرغم من أن إختراعي هذا بدأته في الأردن وكانت هنالك الكثير من المغريات من بعض الدول الأوربية الأ انني آثرت العودة به السودان ..
وبسؤالنا له عن طريقة عمل الجهاز أجاب قائلا:
يوجه الجهاز نحو المنطقة المراد التنقيب بها (الذهب) فيصدر كهرومغنطيسية من خلال حساسات أو (انتينات) موجودة به ?كما هو مبين في صورة الجهاز-ويقوم بعملية توجية ذاتي للمنطقة ثم يقوم بالتحرك صوبها حالة وجود المعدن ويقرأ على مؤشر فهو مزود بجهاز كمبيوتر في مرحلته الأخيرة ليقرأ عليه المكان والعمق وكمية المعدن، فقاطعتة بقولي ان هنالك الكثير من الأجهزة للكشف والتنقيب عن الذهب فما الفرق بين هذا الجهاز والأجهزة الأخرى
ردّ الدكتور بقوله: يختلف عن الأجهزة السابقة بأحرازة دقة وكفاءة عالية في النوعية مثلا اذا وُجه للكشف عن الذهب فانه ينقب عن الذهب فقط في حين أن الأجهزة الأخرى تنقب عن كل المعادن مما يؤدي للخلط واللبس في النوعية بالأضافة الى انه قليل التكلفة . هذابالنسبة للمعادن أما فيما يتعلّق بتزييف العملة نضع العملة مباشرة تحت الجهاز بعد تزويدة بشفرة العملة الأصلية فيقرأ على الكمبيوتر مباشرة أو بعمل الأحداثيات والمياه الجوفية يحددها بدقة عالية حتى 300متر تحت سطح الأرض .
نعود للجهاز ودقة تحديده للذهب فقد أكتشفنا بواسطته كنز من الذهب يقبع في المكان الذي توجد به مشرحة الخرطوم وبتحديد كميته وجدناها تكفى ميزانية السودان لعشر سنوات قادمة وبالرجوع للتاريخ ثبت ان هذا المكان أثري وبه مملكة قديمة ..واحب ان أضيف أن اهتماماتي بالأختراعات في مجال التكنلوجيا كانت منذ الصغر والآن اعمل على إختراع جهاز يعمل على( تحديد فصيلة الدم هن بُعد) ويعد طفرة في تاريخ الطب وهو في طور اللمسات الأخيرة وسيرى النور قريبا وقد سبق وسجلت براءت في (تقنية الحجامة الطبية الحديثة) و(برتكول معالجة مرض الشقيقة).....نقلا عن صحيفة الانتباهة اليوم ..حقيقة ابناء السودان فى الطب مفخرة للسودان ليت بعضهم يعير الرياضة بعض الاهتمام ...فيكتشف جهاز للكشف عن المواسير المنتشرة فيه

ميزانية السودان لعشر سنوات قادمة


شفيق يا راجل...هو ابريل جاء..وينك عم احمد ..غايتو لو جد جاكو بلا
عبدوس

حمدا لله علي السلامة يا كابيتانو.

شفت الواقعين فيه؟

و الله ما ليك حق تتضايق من رجب ......

تحياتي للجميع.

فى الأول قربت أصدق إنو حبيبنا أحمد محمد أحمد يعيش فى حلم النائمين ولكن طالما إنو الدهب مدفون تحت مشرحة الخرطوم فليس للأموات من أحلام .... هذه - إن صحّت الرواية - حقوق مكتسبة لهؤلاء الموتى وورثتهم ... باكر ناس عم رجب وزوجاتو بنطّوا فيها ويقولوا هم أصحاب الحق .... بعدين يا أحمد الحمد لله الموضوع دا ظهر , على الأقل تواصل المرابطة حتى يقضى الله أمرا كان مفعولا ... أخشى ماأخشاه أن هذه آخر حيل الحماعة لإلهاء الشعب مع بداية المظاهرات وربيع الشعوب العربية حتى يبدو للشعب أن هناك أمل وذلك فى إنتظار غودو الذى يأتى ولايأتى ... غايتو جنس غايتو ...

الرشيد شمس الدين

سلامات يا رشدي

خلينا نحلم انو يكون الموضوع حقيقي .... نحن ورانا حاجة.

الموضوع منقول من موقع كورة سودانية واعجبني ايضا التعليق الفي اخر المقال عن المواسير.



تحياتي للجميع..

دخول ودابرق، لكن لقيت الدهب مدفّق والتباريك حايمة فما ينبغى ووو
خاطر لعين جه فى راسى
يكون ده دهب الاسنان الصناعية المركّبة فى اسنان المراحيم،،، اال مشرحة اال

قال ايه

لعشر سنوات قادمة وبالرجوع للتاريخ ثبت ان هذا المكان أثري وبه مملكة قديمة

مملكة؟؟؟؟؟؟؟؟؟؟؟؟؟؟

اما المواسير بالجمع والمفرد فحكاية تانية خالص

سلامات يا خالد

والله نتمني انو كلام الكنز دة يكون صحيح ..... انشاء الله نطلع منو باللقاه سواق التاكسي ....


قال ليك مرة عجوز راكبه تاكسي كل شويه تدي السواق فول.. لما وصلت قال ليها: يا سلاااام ياحاجه الفول السمح دا من وين؟؟ قالت ليهو: والله دي سنيكرز يا ولدي بس عدم السنون بمص الشوكولاته واديك الفول .

تحياتي للجميع...

اخونا احمد كل سنه وإنت طيب
تعرف الجماعة ديل يكونوا ناوين يكسروا الإسبتاليه لكن كايسين ليهم لسبب وجيه.. خليهم يكسروها اصلها ما منها اي فايده قصصها طويله، كدي خلك منها هسع بس قول، إنشاء الله ربنا يكضب الشّينة والموضوع دا اضلع حقيقي ....والله ما عشان الذهب في حد ذاته كمعدن نفيس غالي سعره ما عِندك ارياب الفرنسية تغرف فيه بالأطنان ليها كم سنه منو الكان سامع بيها ولا حصل واحد جاب سيرته في ميزانية دوله. الموضوع انا بنظر ليه من زاويه تانيه خالص ...جريدة الانتباهه دي والاستاذ الطيب مصطفى كان ليهم دور رائد و كبير في قضية انفصال الجنوب من خلال مقالاتها وحكاويها وقصصها ووووو في ما يخص موضوع الجنوب.....الجنوب إنفصل والكان كان ...لكن كان الموضوع دا طلع كذب في كذب الراى ببقى شنو في مثل هذه الصحيفة... وين المصداقية والمهنية والمعلومة الصحيحة وتحري الدقة والموضوعية والكلام الكبير كبير داك والبرجع الجنوب شنو.... عشان كده انشاء الله ربنا اكضب الشينة...والميه بتكضب الغطاس...
كل التحايا والود

سلامات يا المهدي

غايتو نحن من كترة الكبيع في الراس بيقينا نصدق اي شئ وزي ما قالوا اهلنا: المودر بيفتش خشم البقرة.

تحياتي للجميع....

العزيز مهدى...
لو بقت على الأخطاء الإملائية هينة بس الواحد يسأل المولى يجنبنا الخطأ فى حقوا وحق عبادو.

والله اول حاجة خطرة ببالى لمن قرية الموضوع ده، قلت فى نفسى الدكتور ده لو ركز لينا فى المخ والأعصاب بتاعته دى ماكان داوه لينا مجانيين البلد النص هم جنا من الغلاء وشح الرواتب والجبايات.

والله ياأبن عمّى مهدى عثمان , تستحق التهنئة على إلتفاتتك الرائعة إنو الجماعة نووا يكسروا المستشفى وكعادتهم دايرين مخارجة للموضوع ... إتذكرت قبل سنوات لما المتعافى كان والى الخرطوم أخبرنا دكتور سليمان فضيل إنه إستثمر كل أمواله فى مستشفى فضيل بعد أن رأى بعينه مخططات الشوارع الواسعة حول المستوصف بعد تكسير المستشفى وكل ماحوله وبناء عمارات ضخمة بشوارع واسعة حول المكان وفضيل كان وقتها فى إنتظار التنفيذ .... بعنى الجماعة ديل لما ينووا يعملوا حاجة مابيغلبهم يلقوا أفكار تحيّر إبليس .. وبرضو مافى مشكلة طالما كلّو بإسم الدين وهى لله , هى لله لا للسلطة ولا للجاه ....

الرشيد شمس الدين

لك التحية يا قبطان احمد و يا حليل ايام زمان كلها كانت دهب
بخصوص موضة الدهب الايام دى انا كنت قبل ايام فى المديرية الشمالية و كل من سالت
عنه يكون الرد انوا اشترى جهاز كشف الدهب و سافر يجرب حظوا - خلوا الزراعة
ايه رايك تجى نمشى يمكن الحظ يضرب معانا و منها نعيد الايام الخوالى
اخوك عثمان بخلن

سلامات و مراحب يا عثمان

غايتو من السمعتوا من اتنين حاولوا قبل كدة - و رجعوا بحالة يرثي لها - انو موضوع الذهب دة حظ اولا واخيرا لكن من ناحية موجود فدي حقيقة.

صراحة انا ما معاك لكن اتمني ليك التوفيق واسال لك الله انك تكون محظوظ زي بلدياتنا دة:

https://www.youtube.com/watch?v=sHR6q-OSTyU&feature=related


تحياتي للجميع.....

الاخ العزيز باشمهندس الرشيد شمس الدين
كلام دكتور فضيل بوضح تكدس وحرص كل الاطباء على وجودهم في نفس الشارع او على الاقل في نفس المنطقه ....بالرغم من إنها أصبحت فعلا لا تُطاق ..إنت عشان ما تمشي تقابل طبيب في الشارع دا ( إعتادت الناس على اسم شارع العيادات) و اذا كان معاك شخص كبير في السن ضعيف النظر، والسمع، حركته صعبه.... سابع المستحيلات تلاقي موقف امام او حتى على بعد مائة متر من عيادة الطبيب المقصود ...الناس كانت تهرب وتبركن في شارع (السيد عبدالرحمن) حاليا دا ذاتو ما تلاقي فيه طريقة إلا تدور على مكان تاني (المك نمر) ولا اي شارع فرعي في اي مكان أخر. تخيل انك مفروض تقود الشخص المُسن دا المسافة دي كلها وبعد دا ممكن ونص ترجع تلاقي العربيه مكسوره، اقلاها إنت بتكون مقلق إنت محتاج.. شخصين على الأقل عشان تقدر تقيف تنزل المريض مع واحد (اللحظة دي إنت بتكون قافل الشارع تماما) بعدين تمشي تدور ليك على مكان تقيف فيه وتخلي التاني مع العربيه حارس ...لما تصل العياده كداري تلاقي الجماعة ديك خلصوا تبدا تعيد الموال دا من جديد.....
ولا الاطباء عايزين يرحلوا ولا في اي جهة عايزه ترتب المسالة دي، كان سألت ناس الحركة يقولوا ليك: دا موضوع ناس الطرق والكباري كان سالت ناس الطرق والكباري اقولوا ليك: دا موضوع ناس تخطيط المدن كان سالت ديل ذاتهم بقولوا ليك: لا لا لا الموضوع دا مفروض تعالجوا المستشفى مع المجلس الطبي... الحكاية جايطه والله يا باشمهندس ما تعرف تلاقيها من وين ولا وين ...الموال دا والله ما خيال انا كل فترة وفتره بدخل الدوامه دي....الحكومه ما عايزه تخسر مليم في تنظيم حاجة يعني تكسر وتدفع تعويض للمتضررين او تكسر وتوسع الشارع وترجع تبني تاني الجزء الذي تم إزالته..الاخوان رِفاق الاكاديمية بعرفوا دكتور جمال مختار (مدير الاكاديمية) ازال صف عمارات بحالها وقام بتعويض أصحابها فقط عشان مدخل الكلية يكون مواجه للشارع الرئيسي.....دا مدير مؤسسة تعليمية ليس إلا. قصص طويله معليش دوشنا مخكم انشاء الله ربنا يديكم ويدينا الصحه والعافيه ويطول لينا في عمر كبارنا نحن عايشين ببركاتهم....
تحياتي للكل.
مهدي شلكاوي

الاخ القبطان .. شكراً ليك على الترحيب معليش جات متأخرة
الاخوة الافاضل المتداخلون
لكم التحية
الاختراع رائع واكثر من رائع .. لأن الدهب تسبب فى موت شباب وفقدان آخرين وكنت ناوية انزل بوست عن الدهب ورحلة الموت .. وهى مواضيع معايشة بل هنالك الذى عاد وهو غائب العقل والرصيد الجابو ما بكفى علاجو .. يبقى لو وجد جهاز بتكلفة أقل افضل ويحدد مكان المعدن نفسو خاصة وان الجهاز السابق فوق ال25 الفاً على ما سمعت واصبح للتنقيب سوق وايجار أجهزة ووسائل حركة خاصة البكاسي التى تقل الاشخاص وبالتالى اماكن للرزق شاى واكل لفئات بسيطة..
زاوية : قريبك دا قولوا مبروك عليك .. والباكل براه بتخنق .
زواية تانية : ناس رجب يكتروا ، دهب وقروش وبالتالى عرسات اضافية .. و يا شماتة ابلة ظاظا فينا .

الاخ مهدى سلام ( فيل الروضة ما كبر شوية ؟ )
المحل بقى شهره ( شارع العيادات ) .. وخاصة للاختصاصيين الجدد .. المسألة عايزة اعادة نظر من الدولة طرق وكبارى ، تخطيط عمرانى ، مالية ودى الاهم .. والطب ذاتو بقى تجارة .. يعنى تمشى للدكتور يحدد ليك المعمل الفلانى ولما ترجع يدلك على صيدلية معينة .. (معليش بره النص )
بمناسبة البركنة دى مرة لى قريبة حديثة عهد بالسواقة وقفت عربيتها ونزلنا لما رجعنا العربية ما عرفنا محلها من الزحمة ، استعنا بى عسكرى الحركة عشان يطلع العربية .. يعنى تكون سواق ومحترف .

الاخت العزيزة ....
والله أنا ضد الفكرة جملة وتفصيلا ، يااخوانا إحنا دولة زراعيه كيلوا الطماطم والبصل والتوم وجميع الخضروات وصل الشئ الفلانى وبجرى فى بلدنا نهر من انهار الجنة برضو تقولوا ليه دهب وبترول ، بالله تعالوا نقعد فى الواطه ونحسب من اول برميل اتصدر شنو الاتغير فى البلد، ماهو شارع الاسبيتاليه كما هو من زمن الانجليز بس كما وصف الاخ مهدى ذاد قرف وزحمة.
(ياجماعة ارضنا من شدة ما فيها خير قالوا البنقو لمن زرعوا فى انجلترا لقوا المادة الفعالة المخدرة نسبتها 0% اما البنقو المزروع فى تربتنا فلقوا نسبة المادة المخدرة فيه 100%.
برضو برجع وأقول لو كل واحد قعد وأفكر واخترع لينا حاجه فى تخصصوا يكون احسن ، مش بتاع المخ يخترع لينا جهاز للدهر نبتاع البطيخ يخترع فى الهندسه والمسكين القاعد فى ضل الشجرة يتكلم فى سياسة البيت الابيض والسمسار يفتى. فى الدين.
الله المستعان 

اهلين اختنا الاء....
الفيل كبر وبقى بتكلم ...بسلم عليك وبقول ليك بشويش بشويش علينا انت تغيبي تغيبي
وترجعي تدينا من كامل الدسم بالجمله .... عشان الكولسترول بس ..
بعدين الطريقه الرجبانيه بالفلس ما بلدهب والقروش...الف مرحب بك
مهدي شلكاوي

سلامات و مراحب اختنا الاء

هناك تاكيدات من مصادر مختلفة بوجود الذهب السطحي بكميات كبيرة علي امتداد مساحة السودان والذي يمكن ان يساهم في حل مشكلة الفقر للافراد والدولة لو وسعت الاخيرة مستوي تفكيرها و دعمت الافراد بالمعدات والخدمات بدلا عن سياسة (المكاوشة) علي كل شئ.

سلام يا قبطان احمد- لك التحية و لكل رواد هذا المنتدى الانيق
استمعت انا و عائلتى جدا جدا باليو تويوب و الف مبروك لبلدياتك- كلامى معاك كان مجرد ونسة لكن بعد شوفتنا لى الثمانية كيلو دهب الظاهر الموضوع
حيبقى جد.
اخوك عثمان بخلن

ود كرار كتب:الاخت العزيزة ....
والله أنا ضد الفكرة جملة وتفصيلا ، يااخوانا إحنا دولة زراعيه كيلوا الطماطم والبصل والتوم وجميع الخضروات وصل الشئ الفلانى وبجرى فى بلدنا نهر من انهار الجنة برضو تقولوا ليه دهب وبترول ، بالله تعالوا نقعد فى الواطه ونحسب من اول برميل اتصدر شنو الاتغير فى البلد، ماهو شارع الاسبيتاليه كما هو من زمن الانجليز بس كما وصف الاخ مهدى ذاد قرف وزحمة.
(ياجماعة ارضنا من شدة ما فيها خير قالوا البنقو لمن زرعوا فى انجلترا لقوا المادة الفعالة المخدرة نسبتها 0% اما البنقو المزروع فى تربتنا فلقوا نسبة المادة المخدرة فيه 100%.
برضو برجع وأقول لو كل واحد قعد وأفكر واخترع لينا حاجه فى تخصصوا يكون احسن ، مش بتاع المخ يخترع لينا جهاز للدهر نبتاع البطيخ يخترع فى الهندسه والمسكين القاعد فى ضل الشجرة يتكلم فى سياسة البيت الابيض والسمسار يفتى. فى الدين.
الله المستعان 

ود كرار .. كيفنك
البلد دى الحكومة قعدت على كل المشاريع الكبيرة والمؤسسات وهدمتها
الزراعة فى البلدان المتطورة الناس ما انصرفت عنها لا للتجارة ولا الطاقة ..
يبقى فى البلدان النامية ومن بينها السودان أهم .. فيكفى انو استاذنا البونى يدو وجعتو مما كتبه من مواضيع مشروع الجزيرة فى عموده حاطب ليل . ودا مثال بسيط ..
اتمنى ان نرجع للزراعة .. ونترك الدروب الوعرة وعدم الامكانيات .
وعلى قولك الواحد يبدع فى مجالو
لك التحية

احمد محمد احمد كتب:سلامات و مراحب اختنا الاء

هناك تاكيدات من مصادر مختلفة بوجود الذهب السطحي بكميات كبيرة علي امتداد مساحة السودان والذي يمكن ان يساهم في حل مشكلة الفقر للافراد والدولة لو وسعت الاخيرة مستوي تفكيرها و دعمت الافراد بالمعدات والخدمات بدلا عن سياسة (المكاوشة) علي كل شئ.

قبطان سلام ..الدولة فعلاً حسب مصدر sudan net (( وزارة المعادن تحول التعدين الأهلى الى تعدين صغير لتشغيل 4000 خريج ))
يعنى ال 4000 خريج ديل قاعدين بلا وظائف .. فالحمدلله البقى دهب ولا خلافو .. خريجين ولا مخرج .