أديب جديد بيننا،،،عارف المصرى كما لم تعرفه اسكندرية

المهدى عثمان مصطفى كتب:


عارف يا مصري والله ناس كبروس ومحمد خالد واسامه اللوا كانوا مخبئين مننا اديب ....بتجي وبتسافر ابقى اسال


مهدي شلكاوي

واقف براك أغنية الاسطورة مصطفى وكلمات مدنى النخلى الرائع
فيها بعض حديث عن عذابات الأرصفة

واقف براك والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك

مطر الحزن عاود هطل
جدد عذاب الأرصفـة
ضى المصابيح البعيد

كل المبدعين يبدو انو بيعانو للارصفة بنظرة مختلفة ، تسلم يا ابو حسام

في اتصال هاتفي بيني وبين بن عمي الغالي اشرف المصري دار بيننا الأتي :
بعد حق الله بق الله والسلام والتحايا والتعازي باغتني فجأه انت ياعارف ماتتحرك علينا دقه سريعه لعبري ورائد اخوك عربتو شديييييده ولو معاكم بكري لينا (بكري ترمك سابقا بكري المصري حاليا كما يطلق عليه والدي مد الله في عمره) تكون كملت واحلوت ..
بس يا اشرف انا جيت دقه سريييييعه عشره يوم لانجاز مهام عائليه اجتماعيه ومواصله اشتات اشياء قمت بجعلها كموباكت باكيت وبعدين انا عندي رغبه اجي بي مهله وارخم وهانت اخوك جلكيم سنه *بكسر السين .. وأتقاعد وكمان اخوك بقا فته و. . و. .
رد بن عمي بصخب : عشره يوم ؟!!! لييييييييييه !؟ انت وفد صيني .. هو الوفد الصيني بقعد اسبوعين اقل حاجه ايه الحركات بتاعتك دي ؟!
وهكذا وبأسمه تعالى ننفض الغبار عن البوست وخربشات من قاع القاع
صخب المساءات والق الدعوات والتمنيات جداريات متنوعه عن زياره الوفد الصيني ... اخوكم لست الإسم نوارة المداين وحلة الزهو والجساره عنوان التغيير القادم وفجر البشاره ووعد مواسم الهجره ... .. للوطن
ليكم ولي ناس هنا الشاغلين فؤادي وللأمل الباهي تحياتي ومن ... وللخرطوم سلام ،
http://www.abritabag.net/vb/showthread.php?t=6027&page=20

هل لم اجد ذاتي مرة اخرى ضمن مرات اخريات تلاحقن في زيارات سابقات ام ذاتي هي التي حرقت مراحل التلاحق والتلاقح والإنتباذ القصي لكينونه الصيروره الثقافيه والتكوينيه ذات الجذر التأريخي فصفعني مدرج المطار وهو يلامس طلاسم الأحجيه المستعصاة في ملهاة مسرح عبثي يخوض في اللاجدوي وفوضوية السادرين في غيهب جرف الحرف فيلطمني صهد برودة اقبض عليها فاغرا فاهي كطفل اسعده وطن فتثائب وتسائل اين من اعرف وهل انا بعض ذاك
ام كل هؤلاء هم .. وانا لست وحدي ؟
. . . .
ماذا تراني اتيت افعل ؟. .
لفظت سبابا . . وكلاما. . وهمهمه . . . .قرأت المعوذتين ورددت في سري . . فأغشيناهم فهم ... صدق الحق
ومددت جواز سفري القميء ذاك سقطت ورقه توت الجساره حين اقفز للوطن من .... مداخل الاجانب
سحقا لكل التماثيل على أحصنه الزمن هنا سدرتي المشتهاة وعبق صندل الصباحات المضاءه هنا جسر البداءه وخيمة التكوين طبل الطوطم الابنوسي وانظر . . انتظر علني ارى غابه تشتل في قلبي وسافانا او انهر الزراف واناشيد الرعاة السود اهزوجه المساءات خمر الاغنيات الطروبه تتشرب في نسغ الامكنه .
اسيل في الاحداق لوطن لا يعرفني ازمجر في دواخل ارصفتي البعيدات . . هسي الجابني شنو ؟!! التقط الحقائب واحتضن الطريق اسف غبار الشوق المترب والمتعب وال . . المتعب (إحداها بفتح الميم والاخرى بكسرها او كماترون فسيان) .
كثر في تلك المسافه التي سبقت الطريق في صالة الجمرك تم اختيار عشوائي لعله لحقائب عليها رسم صليب طباشيري فاتيكاني حظيت بها وتم تفتيش خصاصتي وسط تجار شنطه ولحظه نظر لجوازي وحدجني بنظره جهلت معناها الا انني انتبهت لها عن طريق وعقب المداخلة الاخيره النافذه الى خلايا دماغي الناشف داك لحظة دغدغته الاستاذه الاثيره منار قال وقد ابان مني زماني الفلتكاني من امستردام ...... يا اي كلام !!! ؟ دي طبعا من اطار مسقطي قرمي امريكي بربري تبجي عبري احفادي وبري ناصري اسدي ختيييييييير جدا .
خارجوا اشيائي وكتبي وزماني . . يابلومي الليل ليل يابلومي . . يابلومي الحايم بفوقي لكم اكره المطارات والبحث عن غرف تدخينها والطائرات المفزعه وكلامها المبهم المدغم ومخارج البطيخ وعدم التدخين والجالس جوارك اصلوا ما بيصادف يقعد جنبي جكس شدييييد جدا اصبو ليك وابريهو حنك دايما جنبي ناس جلاكيم او شفع مزعجيييين او حجات تعبق في حواشيهم البركات وتزغرد من افواههن الدعوات
لاكين ورغما عن اني عامل بختار الكرسي واللهط بي الانترنت تب ما تفتيحه فانا عامل فيها ما باكل جداد ولا جناهو الا مجبورا من يد جحفل المغول والخان الاعظم ست البيت (اخوكم واعي هسي ام حسام تلقاها بتكشف وحاجات زي دي الا اكتبها بالحبر السري) ودايما بتحجج بانو الجداد ماعندو مخ وبيلهط اي حاجه وعوير وكده الإ بتاع كنتاكي المقرمش الإسبايسي الفظييييييييع والجردل الكرتوني الفاميلي المدفوس داك فبعمل فيها مجاااااامل وبتجاوز وبتنازل وظريف على الاخر حسام لاحظ وحاول التعليق فاسكته بي كلام عن بتاع ايس كريم في ناصيه ما ساعزمو عندو لو هو حشا خشمو بالجداد وسكت عموما من الحته ديك وعييييييييك خرجت بافكااااااريييي تااااااايهه من اميستل وبلاد هينيكن والفريس بالردميه عد السنافر وفي الطريق لم تعمل الشريحه الهاتفيه سوداني خاصتي اكتشفت ان ما كان معي من عمله سودانيه هي منتهية الصلاحيه وهذا سبب رفض حمال حمل امتعتي عنوه واقتدارا رغم انني عافرته معافرة الفارس في ساحة الوغى إلا ان المدفع المكسيم اقصد عربه تتأرجح بأيقاع وصرير جنائزي كعربات الفراعنه حسمت الموقعه فرددت بصوت اجش على ايقاع صريرها وعامل اب خفه ...بيتعرجن في البيشان زي القايد حامل النيشاااا....
إلا انه افاقني بصوت هادر متسائلا بس ديييييل ؟!!!!
ولكنه ونسبه لترانزيتاتي المتتاليه المنيله انهكتني المقالعه وبقيت نابليون متخارج من روسيا مجقلب سحقا لخطط السير المدرب فيرجسون بطيخه ايفر ريدي ونادي ليسوتو الملكي ريالتو ليسوتو يا توتو والتي وضعت لها خطه ماثلت لعبنا مع تنزانيا وفوزنا لاحقا بالمركز التاااالت ولكني.... هللت لها مع المهللين رغم تفاهه المنافسه والمركز التاااالت وضعف المشاركين و...اي اقلو اشيل حاجه معاهو برضو وماعارف انحنا لييييه مابنجيب معانا مرووووحه ؟!!! لييييه ؟!كان شلت المروحه شكلي بقا عجب وابهه ...ما علينا .... فاقتلع امتعتي اللعينه وكتاب حول الاشتراكيه وصحيفه الاخبار وباكوين سجاير فأرتعبت من فكرة عودتي للتمباك الساعموطي وهل اجازتي تكفي لاستخدام علبه نيفيا وجعلها حقه كاربه وهل اسف سفا بالكلينكس ام رجوعا ؟!!!! وها سانجح في التكوير والتدوير في اخر الكف حتى تستصطبغ يدي اليسرى وثلاث اصابع من اليمنى ببقعه عطرون تلتمع كحنه عذراء في كف صديقة العروس
ام اكورها داخل العلبه واجدعها في الفضاء والتقطها بالشلوفه السفلى في سلوك يجعل البعض يلحس كوعو. . ويحجل بي قيدوا . . ومحبشاتو وبابا كوستا. . .ولم اكن للساعه قد صرت صينيا وطلس ولا عامود ازبتاليه حتى . . .
فأطرقت انا ...
هماااام من البتنجان ........
طوالي سلاماااااااات للاخوان واولاد الاخوات .......
ولعت سيجاره تانيه وجذبت نفسا بطول المسافة المتاهة و.....
ولي الرياض شارع المشتل تحرك الوفد الصيني و . .
نرجع انشاء الله ......
وليكم وللخرطوم سلاااااام ،
http://www.abritabag.net/vb/showthread.php?t=6027&page=20

المدخل الرئيسي كان منفذي لذاك العالم المزدحم المتناقض المتداخل كأنه جلوبليزم انساني يجمع الناس وجنسيات ...نحل والوان ...والمحلات والطبالي والاكشاك والمباني الزجاجيه وتهدر في اجواءه لاندينج جسور لطائره مع ازيز تكتك ختري يرسل انغاما لا هي مناحه او ياليلى ليلك جنه.... ...
باصات دفارات ومشاة وزولا راكب عجله مع ملاحظة اختفاء ملحوظ لتلك الاغنام التي كانت ترتع كالغزلان بشارع المشتل زمااااااان .
نظرت لوالدي مد الله في عمره وهو منشغل مع عمال يشتلون حديقه تلاصق جدار منزلنا وتحف بالحديقه اشجار استطالت بشكل ملحوظ فترة غيابي الاخير فسألت والدي عنها فالفايكس كان احتاج سنوات وسنوات ليتسنى تشكيله وتهذيبه رد والدي بدعابه هي نبته سعوديه .... لقت عندنا المويه كتيييييره في بلدنا دي فرحت... وطاااالت .
اعرف والدي كم هو حذر من هكذا اشياء... فناكفته تعرف يابوي النجيله الخدره دي والشجر الظليل سيغري ست شاي كاااااربه بأن تجلس وتستدعي بزينتها وابتسامتها زبائن من المشاة وبجوار الزير السبيل العملتوا الحاجه ده ممكن تتكون جنب حيطتنا مرحله تجريبيه داديه بوهيميه يمكن تسميتها من إلاسكلا لو حلا الرياض بيت الدكتور.... او حبيبي مفلس شارع المشتل !!!!
رد والدي حبيبي مفلس زاتها عملوها بقروش !!!!! .... استغربت وصول هكذا اخبار اليه وخمنت وابتسمت لخاطره ان من ابلغه ربما احد اثنين بكري ترمك او ميمي المصري مع ترجيح التاني .
عبر ..... ووسط الطريق وبمحازاة منزلنا عمال يحفرون بهمه ... ربما خنادق فسألت ابي وانا اتناول كيس بلح كارب اعطتنيه والدتي عبر الباب المشرع مع طلب اعطاءه لعمال الحفر .
هم بيحفروا في شنو !!!؟؟؟ مره اخري انا متسائلا بلهفه و....هبل !!!
ابي رد وهو وسط نقاش حاد مع العمال هم زاتم ماعارفين اسألهم وانت بتديهم البلح حتسمع اكتر من موضوع واكتر من خطه لحفريات اخرى ولا يوجد بنيه تحتيه ولا مجاري ولا .... جيب شوال نجيله تاني واشتلو حاول تملأ الفراغات هو بي كم تسعين ليييييه !!!؟؟؟ وواصل النقاش مع العمال .
عبرت خطوات نحو ارض العمليات كأنها انفاق يهود يعبثون تحت الاقصى حفر طوليه عميقه كأنها خطوط زمن تجتاح المدى ..... والجو مترب وتتصاعد الاغبره تخالط اشعه شتائنا الدفيء وتعلن عن نهارات البحث عن لقمة خبز وجموع كالنمل تملأ المواصلات... المحلات... والامكنه الناس والوقت الكل في هلع حقا هكذا نحن وصدق الباريء .....
والسلااااااام ياجماعه يعطيكم العافيه والله يخليكم شويه بلح نظام اينرجي وطاقات وكده .......
شكروني بحميميه والفه فلم ارى داعيا لازعاجهم باستفسار يبدوا بايخا فهم يحفرون ... ويحفرون وسط مخاطر الطريق وبين السيارات وامام المنازل والمحلات في صمت ودأب وعنفوان فمؤكد انهم يعرفون جيدا ماذا يفعلون فلا يعقل ان يكون هذا عمل فوضوي عبثي .... تجريدي ,
ودار في خاطري الفسااااااد وعطاءات وشيلني واشيلك وغطيني وصوتييييييي .
عدت لداخل المنزل هاربا ومرتعبا من مواسم الفوضى لويلي سوينكا .......وطفقت اغني...... ياتمر المحوس المابنقرو السوس......
دخلت غرفتي ابدلت ملابسي بلاجينز بلا كلام فارغ لبست جلابيه وسروال ومركوب وعمه مطرزه اخذت مفاتيح السياره خرجت الى الشارع تفاديت العمال بالسياره واطلقت زمورا عربيدا اخترق الضجيج نظر والدي المنشغل بالحديقه الخارجيه نظره عجلى إلي فيها لمحة عتاب واستغراب لوحت له بمرح فحطت تفحيطه تَتْفُـلِ على الجانب الترابي للشارع ...كور سايق ركشه بيده لي مهددا .....وصاح ونصفه قد تدلى وخرج من النافذة سايق اخر لسياره نقل أأأشر ... ياحمااااا ..
رددت بنزق ما بأشر يابليييييييي ....وطوالي ...
اخترقت الاسفلت وبدأت زياراتي العائليه
وليكم وللجميع تحياتي و..... للخرطوم سلام .
http://www.abritabag.net/vb/showthread.php?t=6027&page=20

ما اروعك ايها العارف العباس المصرى ..... وغيب وتعال تلقانا نحنا يانا نحنا ... وليك وحشة.
ودام التواصل
عاطف عكود

الله يخليك لينا ياعاطف عكود دايما رافع معنوياتنا لك وللجميع مودتي واحترامي .

شن جونق ين،،، سفير الصين العليا
بعد الصفقة معاليك،،،
انت بتقدر تسوق فى شوارع الخرطوم دى كيف من اول يوم،،
اهل الخرتوم ادرى بشعابها،،فهم المرابطون والقابضون على جمر الشوارع ضمن جمر كتير ما ليه حد؟؟؟
كنت اظن القصة دايرة ليها كم يوم !!!!!!! غايتو انتو يا الصينيين ، ما بغلبك شئ

تخريمة شريرة:
ناس الجمارك وصلبانهم الفاتيكانية دى!
تفتكر منو البيورد ليهم الطباشير؟؟؟؟؟ وبالكميات دى

قريبي خالد عبدالحميد في التناول التالي ستكتشف احدي مهارات اخوك الانفراديه انا زولا بطاااااااال في السواقه تجذبني المناظر واششششششطح بعييييييد لذا احتفظت بعلاقات قديييييمه باماكن الخرد والمناطق الصناعيه ميكانيكيه وسمكرجيه ولحامين عوادم وادلف للمنطقه الصناعيه منذ ايام مجدها التليد ذاك ناقشا كل جخانينها كنت احفظ اسماء ستات شاي ايام لم يكن لهكذا حرفه ومهنه انتشار ملحوظ كالأن اقل مايمكن ان نطلق عليه تعبير الظاهره والصرعه التي تبين انتقالنا من ازمنه الاندايه لارصفه كورنيش النيل البهي وماتراه ياخالد هناك جعلني اتسائل لما نتكدس بنفس المنتج وفي نفس المكان هل هناك شعور برغبه للتجمع والتلاق بعد الفتق وثقوب نسيجنا الاجتماعي ..... ام انعدام للابتكار وروح الخلق اقصد لوطلعت ياخالد حله عرديب قدام الباب وسلكت جارك الصباح ما بعرض كركدي او قضيم او سوبيا لأ إلا عرديب والبعدو واللي بعدو و يبقا اسمو شارع العرديب وفلان عرديبه وعييييك وفي المنطقه ايامها حاجات (الغريبه دوما صغيرات السن) يتقافزن برشاقه الظباء بين اكوام الحديد وجلبات طرقعات الشواكيش ونافخي الكير من لاحمي العوادم وتراهن ياخالد وبطريقه يحسدهم عليها بارعي السيرك الروسي ومحترفي الاكروبات يحملن صواني فضيه على رؤوسهن مليئه بقراصة النبق واكياس تعج بالفول المسلوق ولفات ورقيه مليئه بمفضلتي للأن حلاوة الشعيريه
بقت الشغلانه مناطق صناعيه بأي زقاق وملف ضيق كل شيء واي شيء ولكن ربنا ما يقطع ليكم وليك ولي عاده زرت الفروسيه واشتريت تصادم لعلاج اثار حادث ارتكبته مع دفار في حلة حرمنا المصون .
الطباشير كان جايبو في ظني وزير جنوبي قومي صار حاليا من رعايا دوله اجنبيه !!!!!!!
سعدت بمرورك وشي شي (شكرا بالصيني)
ليك كل موده وللجميع سلامي وتقديري .

الحكايه احيانا في تناول دقايق تفاصيلها وكيفيه محاولة تجميع شتات الذات كانت في جلسة حوار بيني وبين احد رفاق النضال القومي ايامها كم كنا صغارا شغوفين بتلك الرؤى البطوله ... العنفوان ... التمرد كل هذا انتشلتني من الغوص والتفكير فيه احتضاني لصديقي ع . ص واستغرابي من الزياره الليليه تلك وفي مواعييييييد عجييييبه بلهجة الوالد مد الله في عمره ايام زمان ... الربط الخيطي والاعتقال والمنشور وكتابات الحائط والتطوع لحماية البوابه الشرقيه للوطن العربي .... كنا كما قالت الشاعره الاميره في واحده من قصائدها
إن في قلبي جواداً عربياً
عاش طول العمر في الحب أبياً
فأذا عاندته, ألفيته..
ثار كالمارد جباراً عتياً
و إذا لاينته, ألفيته
بات كالطفل رقيقاً.. و حيياً..
لمسةٌ تجرح من عزته
يستحيل الطفل وحشاً بربرياً
وزاد تعجي من الزياره وكنهها اللطيف الاليف والودود ان صاحبي عاد قبل فتره قصيره من الشتات من تلك القاره العجوز البارده ذات الايقاع الروبوتي الجاف والمنظم والدقيق والمبرمج ببساطه كان شد الو ... عندوا الرقم المنيل بي ستين نيله الرقم الذي خدعني احد باعة السوق العربي وقد كنت في اول ايام عودتي قبل سنوات من المنفى الاختياري وقد اصريت برفقة صديق عزيز ان ادلف بالسياره رغما عن تحذيره المتكرر لي وانا خاشي شمال واكشف بشغف من خلف النضاره الشمسيه لشيء يتجول محاذيا ابوجنزير الذي كان عصيا حتى إقتلعه نظام اقتلع شمس النهار وتمايلات السنابل زمره هدمت جروف المحبه وقلعت شتايل الفرح اغرقت البستان الزاهي الملون بجداول الدم كسرت المزامير وادمنت تأوهات الانين اواه عليك ياوطني ما اجمل انحنائك البطولي امام عواصف الغبار ستنجلي وسنجلوك اشراقي من رهق السنين العجاف ماعلينا وانا مررررررركز شديددد فيما لو إستدعيت تفاصيله قد يتطلب لاحقا صراخي على الشبكه العنكبوتيه مناديا ومستنجدا ... وا داباه .... على وزن وا معتصماه ...فوتوها وماتحكوها قاصد المعلم بتاع البرمجيه بالمصري الاورديحي او الكشيفين بالسوداني الرندوق او المراقبين العرب بلغه الجامعه الفته من ام حسام وتغولات حرمنا المصون في بلد قانونها بس كاتباهو ومفصلاهو الحاجه مشاطه لفايده خالتها الحاجه وصاااافه وربنا يجعل كلامنا خفيف عليهن .
نعود للتليفون صاحبي اثناء اول قدوم لي بعد سنوات عديدات افقت على صراخه وانا في حلم سرمدي وكأني على قمة الاولب جالس وحوالي العرائس .......
اوعك ماااااااااتلف بي جاااااي ... بالغت لكييين ياعارف لفيت ليييييييه بس الله يسامحك هسي يمرقنا الله ...
يا اخي لفيت اعمل شنو ؟؟؟ كدي نرجع ورا ولا نعمل اي حاجه ....وهو ده شنو ؟ الناس ديل منو ؟ ماشين وين ؟ هو نحنا وين ؟!!!!
ده ياحبه شارع المليووون بتاع في البتاع كدي ترجع وين شوف ليك حته اقيف اشتري تمباك ...
هو انت بتسف ؟ من متين ؟
وكمان .. عندك اعتراض بالله ده حر يشربو فيهو سجاير عالم طرور صحيح السعوط تمااااام معاي اسبيشالي في الصباح تخش بي سفه في .....
انا مقاطعا وصفه الذي لو واصله فمؤكد غدا صباحا حاعود لايام الثانوي وادنكل واحده ... وبس... لقينا باركينج خرافي ودكان بتاع اتصالات صاحبي مشى يجيب كيس ليهو وواحد زغيرررروني لي وركزت ان يكون ازغر حاجه ممكنه لزوم استخدام وقتي مزاجي قد يزول في لحظه !!!
بجيب ليك واحد مقاس منقارك يافرده و اوعك تتشوبر وتنزل دقايق يامان ... اقوم ارجع ما الم فيك وانت يا وهم ماعندك موبايل ..
منقارك ؟ فرده ؟ وماعندك ....
وهم ...
ماعندك ...!!!!
وقربت اخش دور نفسيات لولا فجأه لمحت سبب انحرافي المروري والعمري وهي كالمهر الوحيل تدلف(سنوات ابحث عن استخدام لتدلف وكينونه وتنداح فشكرا لاداره المنتدى لاتاحتها فرصه طق الحنك كما نرغب فقد قرأت هنا وهناك حاجات اثارت حسدي وحفيظتي كيف جهلت تعبيرات زي دي يعني الوقت اللي كدينا فيهو الدوم داك ولعبنا الدافوري كنا اتعلمنا حاجاااااات وبغرت لاستخدام عضو لكلمه تنداح ...واخرى عبرت في اتكاءه ) محل الاتصالات قدام العربيه طوالي ....
فدشيت في نهارات الشمس وسديم البطيخ الشليان ... وتلقفني البائع وخرج الشادن ودخلت في صفقه اقنعني فيها صاحب المحل بان الرقم الذي ابتعته بمبلغ مقدروالتليفون الاركسون ده فضي ماشي مع دبله العرس وتعمل بي كمره شنو وماكان الربيع العربي ايامها مزهزها يحتاج تليفون بكاميرا ولايحزنون فوافقته .
وانا خارج ارجع قبل عوده صاحبي بالاكياس المشتهاة والزول بيعد القروش سألتو بس مميز كيف ؟ الرقم ماصعب وغريب(لم استطع حفظ الرقم لليوم) ...
رد علي بنفاذ صبر : ماشايفو بينتهي بي 101 اصلو مميز اكتر من كده كيف يعني ....؟!!!
اي وبعدين دي مامشكلتي الناس الدايره الرقم تدبر روحها !!!!عندك حق ...
صاحبي علق غايتو انت عوييييير عواااااره !!! استنكحك يافته يافرنانه ...
.... يا اخي لونو ماشي مع الدبله وبينتهي بي 101
وبعدين الناس بتجيب معاها تليفونات اخر صيحه بتشتري شريحه !!!!
اي النااااس انا اصلا ماتعدني معاهم ... انت قايلني باتفسح بره وبعمل شوبنج انا لاجيء يا صاحبي زي تيسافاي قرماي عشان اقرب ليك الصوره ....لاحول ولا قوه الا بالله هسي الباركنج نمرق منو خلف كيف ؟
اصلك انت الدخلك هنا شنو ....
كدي انزل ثبت الناس دي !!!
لأ فضل تقول لي امشي ليك قدام العربيه افضي ليك الشارع ... كدي زح انا بسوق العربيه يا ... يا حبه
ومرقنا ...
الشريحه قمت قبل يومين من زياره صديقي ع . ص في الصباح واظن يوم وصولي بمعيه الانيق بكري ترمك لمول عفرا تم تغيير شريحتي وهويتي و....وانتسابي.
احتفظت بالرقم القديم فقدت كل الارقام في الشريحه القديمه لاني لم اسجلها على الاريكسون اللعين فاحتفظت برقمي واضعت ارقام اصدقاء جمعتها بعناء وجهد في زياراتي السابقات صحيح انا هنا وبنفس الرقم المميز واريكسون التميز البدائي ذاك رغما عن انه لا زال ملائما للدبله الفضيه ولكن من يدري ... او يهتم بوجودي بالوطن اصلا !!!!!؟
كل هذا دار بخاطري وانا ارقب اثار الزمن وهي تجتاح معالم وتقاطيع وقسمات ضيفي وصديقي ورفيقي ع.ص .
لو املك عين الاخر لانظر لنفسي واقرأ كيف كان تحولي الفينيقي البطريقي الابريقي لهذا الكائن الساكن ببرود على حد نصل الانتماء سألته مرددا ايقاعه الهامس :تشرب جبنه ؟
في الليل ده ؟! انت مالك عياااان ؟
حلبه حصا ...حاجه بارده
نظر لي مندهشا ينسون عندكم ؟
طبعا لأولا الحلبه حصا حتى ....
اشعل سيجاره ونظر في عيني وقال ...
الجماعه ..... ؟؟؟!!!!
خليتهم في هولندا انا جيت دقه سريعه واشرف سماني الوفد الصيني .... حسام في المدرسه و...
قاطعني كأنه ينظر للجنرال في متاهته ....
الحزب يا عارف الرفاق دايرين يلاقوك و...
اشرت له باصبعي بان يصمت واختلست النظر خارج باب الغرفه واقفلت الباب ورددت وانا اعود لاجلس : انت بتتكلم بالجد ؟ ولابتهزر ؟!!!!
لأ ... بالجد ياعارف حتى رفيقنا مج..
اسمع يا صاحبي كلامي ده تماااااااام وبلغه للرفاق واذا اعادوا رغبتهم في لقائي انا حاضر ....
ولم يتصل ع .ص ولا غيرو بالوفد الصيني حتى مغادرته ارض الوطن عائدا لمنفاه الذي تحول من اختياري لاجباري .......إقتصاديا على الاقل مرحليا ....
للرفاق وليكم تحياتي وتقديري وللخرطوم سلام .
http://www.abritabag.net/vb/showthread.php?t=6027&page=20