مصطفى سيدأحمد، اسطورة من جيلنا

شكرا حبيبنا ابو صبا على القصيدة الجميلة عن فنان الشعب الخالد مصطفى سد أحمد ... ولقد إحترت فى هذه العلاقة الجدلية بينك يا خالد العزيز وبين المبدعين من بلادنا ... مرة كتبت مطولا عن الفنان المبدع أبو عركى أبان زيارته لأمريكا وثانية تكتب عن المبدع مصطفى سيدأحمد وهاأنتذا تنقل القصيدة الجميلة عن مصطفى وهى كلمات المبدعة عفاف الصادق ... وعفاف لمن لا يعلم هى زوجة وحبيبة عركى وهى تعمل بالسعودية بينما يقبض عركى على جمر السودان .....
جمعتنا إبن عمى الفاتح وأنا قبل عامين فى إجازتى فى السودان مناسبة مع الموسيقار المبدع محمدية ... قال لنا بالله كلموا صاحبكم عركى دا ..مافى فنان فى السودان يمكن أن ينافسه وهو محجوز للحفلات لمدة أكثر من شهرين ولكنه دائما يعتذر لأسباب مختلفة ... تصوروا قبل أيام ألغى كل حفلاته لمدة أسبوع لأنه كان فى المستشفى مرافقا وملازما للشغالة الجنوبية التى تعمل معهم ... وبعدين ياجماعة فى زول بيكتب شعر فى مرتو ؟؟؟ تصوروا عركى كاتب قصيدة فى مرتو إسمها ( حبيبتى بطانيتى ) ....
فى إجازتى الأخيرة للسودان دعانا عركى لوجبة سمك فى منزله العامر تحت الإنشاء ... وبينما نتناول السمك الماخمج سألته ل عن هذه القصيدة فقال لى بطريقته المحببة تلك :- كنت نائما فى منزل الحتانة وكنت فى حالة من البرد الشديد ورأيت فى الغرفة بطانية عفاف فأخذتها وتغطيت بها وكنت مشتاقا حينها لعفاف فشعرت بالدفء الشديد يسرى فى جسدى ولذلك كتبت القصيدة وقرأها عركى لى فكانت يشهد الله من أجمل وأعذب ماسمعت من الشعر ...
قبل أيام نجح التلفزيون السودانى فى إقناع عركى بفك مقاطعته التى إستمرت منذ مجىء الإنقاذ وقد كان المسرح ممتلئا حتى لقد فاض بالحضور البهى وكانت ليلة مامنظور مثيلها غنى وتحدث فيها عركى كما لم يفعل من قبل وشهدت تجاوبا منقطع النظير ....
إتصلت بعركى بعدها بيوم أهنئه بالعودة الظافرة والنجاح الباهر ولكنه كان حزينا إذ أنهم وعدوه أن ينقلوا كل الحفل ولكنهم قطعوا أهم أغنيه غناها ولذلك فسيعيد المقاطعة ثانية ...طلبت منه أن يقرألى كلمات الأغنية التى لم تتم إذاعتها قإذا هى تتحدث عن فساد السلطة .... ضحكت وقلت له باااااالغت ...إنت كنت دايرهم يذيعوا دى والله إنت بتحلم .... ثم والمهم أننى ذكرت له : إن ما فعلته حفلتك هذه أكبر أثرا من ألف مظاهرة وألف ليلة سياسية وهذه الأجهزة ملك للشعب السودانى فلا تحرمنا من طلتك البهية هذه.. رجاء ... سعد بكلامى وذكر لى أنه ظل يتلقى مئات المحادثات فى نفس الإطار ....
هذه ياخالد عائلة فنية مبدعة لا مثيل لها والله فبالإضافة لأبنائه ذى يزن وسيبويه ففى ذلك الحفل قدمت إبنته الرائعة سماهر فاصلا إيقاعيا على ( الدرامز) أتحدى أن يستطيع فعلة عباقرة الدرامز العالميين ....
أعلم أن هناك المشترك الكثير بينك ياخالد وبين عركى لذلك فهاتفه هو :-xxxxxxxxxxxxxxx
لكم العتبى على الإطالة وحتى لقاء دمتم ...

الرشيد شمس الدين

خالد عبدالحميد كتب:عاد عبد الله،، رشيد هذا المنتدى شمساً أشعل الصفحات بالضياء
وعدنا بملك ارادتنا وحباً وكرامة لى قعاد البنابر لا نخشى رهقا
وهم ايضا يعودون
لك الف ود ولهم

لزمن مضى كتبت الاقتباس اعلاه وما اشبه الليلة بالبارحة
لك الود ولعركى العظيم القومة ،،،والزلزال الذى احدثه فى الشارع السودانى فى حفلة العيد لا زال القوم تحسبهم سكارى وما هم بسكارى لكن النشوة التى سرت فى العروق ايقظت خلايا الابداع التى كادت تموت،،،ودونك اليو تيوب والمنتديات التى تملأ الاسفير
لكن والله لا تلمهم على الاهتمام الكثيف فهذه النخلة المزروعة فى قلب بلادى المدعوة أبوعركى البخيت لهى من مفاخر ابداع الشعب السودانى
تخاريم عركية
* ارسل لى صديق عزيز القصيده الممنوعة فى تلفزيون السودان
* كنت محظوظا اذ صادفتنى سماهر على الدرامز،،، ماشاء الله
* كان محمد ابوعركى هو العازف على الاورج لما اتونا هنا
*السيدة د عفاف الصادق حمد النيل ( تقول العرب) صادف شنً طبقة
هكذا قالت الاقدار والتقى الاثنان على على ابداع قد ندر
* ما صدفة ان اولاده لهم الاسماء اللافتة الانيقة المعنى
* ولازال حوار عركى مع صغيرتى صبا يشرفنى وحاضرا فى ذهنى
( صورة صبا مع عركى لازالت فى مكان ما فى سودانيز اون لاين تحت ابوعركى فى نيوجيرسى)
* يوجد الكثير الذى يوجب الاحترام لعركى غير الفن والصوت والموسيقى
فخلف الفنان يوجد انسان من طراز رفيع ولا تحتاج اكتر من دقايق معاهو لتصل للمعلومة
* اما الذين منعوا حتى اغنية،،،،،،،،،،،،،،،،،،،،،،،،،،،
غلبنى حتى الكلام
*انا شلت الرقم يا الرشيد وإن شاء الله لما تتيسر اتصل عليه خصوصا الايام دى هو مشغول بما بعد حفلة العيد
* وعطفا على الرقم،،،اذا رغبت ممكن تحذفو ،،حفاظا على عركى العظيم انو رقمو ما يقع فى يد من يمنعون حتى اغنية ويرغبون حتى فى منع العصافير من التحليق
وخواجة قوووووقل سخى فى اعطاء المعلومة
* وطلب ،،،سمعت ابوعركى يلقى قصيدة وسألتو عن الكاتب فقال انو -هو وعفاف- يعنى حاجة مشتركة وقدر ما فتشت قووووقل ما لقيتها فاذا ممكن تجيبها لينا هنا ،،هى عن الوطن ذاك العشق الازلى
* والله انا الطولت وخالص خالص فمعذرة

شكرا حبيبنا خالد على إتاحتك هذه الفرصة لى للمداخلة وإقتراحك بسحب التليفون قد قمت بعمله .... ومازلت أعيش فى دهش ذلك الحفل الحافل الذى تغنى فيه عركى بفرح طفل هدندوى تذوّق السلات بالعجوة لأول مرة ثم أعطوه نقودا ليشترى مزيدا من السلات بالعجوة ....
تغنى عركى برائعته :-
من معزتك إنتى ليّا ...ختيتى قلبك فى إيديّا ...وقلتى ليهو عزيز عليّا ... عليك الله أحرسوا ليّا ...
فى صباحو وفى العشية ... وقلت ليهو معاك سلامة......
ثم وشنّف اذان الحضور وهو يغنى رائعة المرحوم محمود محمد مدنى ..ياقلب جاى تسألنى الدبارة !! وتفاعل الحضور البهى معه وهو يردد كما لو أنه يغنى لنا فى المنتدى ياعبدوس:-
ياقلب أنا كنت قايلك تبت من تعب السفر .. من مخاواة القمارى ومن شراب موية المطر ..
ياقليب ياما سرحنا ...مرة جينا وألف رحنا..ومرة شاى عصرية فى طرف الغمامة .. ومرة منديل مسقى حنة ..
ومرة دوبيت للمحنّة وانحناءات للحمامة ...
مازمان أنا وإنت لفّينا الموانىء ... بالقطارات والمطارات والسفن ... دقّينا أجراس الجديد وأعدنا ترتيب المعانى ........ جاى تسألنى الدبارة؟ ..لا المراكب قادرة تكسح فى النزيف ولا نحنا شايفين الفنارة ...
يالجمالها تلك الأمسية البيضاء بلون الثلج ..... بالمناسبة يوحشنى جدا والله حبيبنا أسامة معاوية !! أين أنت عزيزنا الرائع ؟...

الرشيد شمس الدين

الغالين الرشيد وخالد الله يديكم الصحه والعافيه والله تشهو فى (الادب) اقصد الشعر والفن
د.عفاف , مصطفى سيداحمد , ابوعركى , المرحوم م م م (محمود محمد مدنى ) والله حاجه تفرح وتشرح الصدر شى شعر وشى غنا وشى ما شى والله يفرحكم
والشوق بحر ليكم وللاخ الغالى اسامه معاويه ونقول الغيبه طالت.
ودام التواصل
عاطف عكود

من وين نبدأ
اسامة معاوية أبا صبا،،، فى السودان لعله لازال،، لانو سافر العيد
ورغم انو طعم العيد روّح لكننا ما عنه ببعيد
اضاف حبيبنا الرشيد لنا عيدا آخر فى سيرة ابوعركى واهله
ولها نعود إن شاء الله

خالد عبدالحميد كتب:
من وين نبدأ
اضاف حبيبنا الرشيد لنا عيدا آخر فى سيرة ابوعركى واهله
ولها نعود إن شاء الله

الاخوان خالد والرشيد عمد قبيله العركيين قلت افتح نفاج بين صالون العركيين وبين قهوة الحبيب ودراشد , وهاكم باب السنط.

باب السنط ........... محجوب شريف

دق باب السنط والدبكة والنفاج
والحوش الوسيع الساكنين افواج
واللمة التي ربت جنا المحتاج
والنار الدقش والريكة جنب الصاج
الفينا مشهودة عرفانا المكارم انحنا بنقودة
والحرة بنخوضة
الشاي باللبن برادة لابس تاج
صينيتة الدهب ترقش كبابي زجاج
والسكسك المنضوم حول الجبينة نجوم
والفنجرية تقوم تقهوج الحجاج
طق طرق
يابن القهوة كيف ومزاج
طق طرق
يابن خلي نعدل الراس

ودام التواصل ..... وكلو كيف
عاطف عكود

صباحتك خير ود عكود ... وكل عام وانتم بخير .. وجميع رواد المنتدي بصحة وعافية .. زي ما قلت نحن والله محتاجين نفتح نفاجات بين الصوالين الكتيرة دي عشان الفايدة تعم والكيف يتسلطن .. وزي ما قلت ... كلوكيف
بدرالدين الجاك

ود عكود...ياعجيب

مشتاقين والله, الفينا مشهودة عرفانا المكارم انحنا بنقودة
والحرة بنخوضة,السنين دى كلها وانا بسمع فى الاغنيه دى, اول مرة اعرف بان كلمات الاغنيه للشاعر الخالد محجوب شريف.

احب كيفكم

شكرا أحبابنا ود عكود وود كرار ... للتصحيح فقط ...أعتقد أن الفينا مشهودة هى من كلمات محمد على ابو قطاطى ومحجوب شريف هنا يستعير بعض أبياتها الخالدة فى قصيدته الرائعة التى اوردها الحبيب عاطف القوز ..لذا لزم التنويه ...اما اذا كنت مخطئا فلكم العتبى والعتب على الزهايمر ...

الرشيد شمس الدين

الرشيد شمس الدين عبدالله كتب:
شكرا أحبابنا ود عكود وود كرار ... للتصحيح فقط ...أعتقد أن الفينا مشهودة هى من كلمات محمد على ابو قطاطى ومحجوب شريف هنا يستعير بعض أبياتها الخالدة فى قصيدته الرائعة التى اوردها الحبيب عاطف القوز ..لذا لزم التنويه ...اما اذا كنت مخطئا فلكم العتبى والعتب على الزهايمر ...
الرشيد شمس الدين

وانت الصادق عزيزنا رشدى فعلا الفينا مشهودة للشاعر ابوقطاطى وقد اقتبس محجوب شريف مطلعها ليتوسط باب السنط
وهاك حبيبنا الغالى ودكرار كلمات القصيده
الفينا مشهودة عارفانا المكارم انحنا بنقودا
والحارة بنخوضا
الزول بفتخر يباهي بالعندو
نحن اسياد شهامة والكرم جندو
ما في وسطنا واحداً ما انكرب زندو
البعجز يقع بيناتنا بنسندو
الحارة بنخوضا...
ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف ما حر منو نتبرا
الحارة بنخوضا..
الفينا مشهودة عارفانا المكارم انحنا بنقودا
والحارة بنخوضا
للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيرى الموت في الركاب سنة

وكمان رابط بصوت فهيمه عبدالله للاخوان من ودكرار ولى جاى
https://www.youtube.com/watch?v=YpWAN0nP0iI
ورابط بصوت ابو داوؤد لناس الرشيد ولى غادى
https://www.youtube.com/watch?v=4CxcvN7Gqo0

وكان الله من وراء القصد وكلو كيف
عاطف عكود

وطالما كان الحديث الطيب أحباءنا خالد وعاطف القوز عن المبدعين فى بلادنا ...مصطفى سيدأحمد وأبو عركى البخيت فلابد أن يمتد الحديث ليشمل إحدى مبدعات بلادنا الحبيبة والتى تعطّر سماء السودان بعبق الإبداع الحقيقى حتى أن الواحد فينا وبعد هذه السن يسعد ويفتخر أنه قد عاش زمان المبدعة الحقّة نانسى بدر الدين عجاج ....ونانسى حين تغنى تتحول الدنيا كلها لفرح خرافىّ لاينتهى ... بعض الفنانين حين يغنّون تحس بأن عروقهم تنتفخ حتى تكاد تخرج من أوداجها ولكن نانسى تغنى كأنها تستحم ..تماما كما تفعل فيروز العظيمة ... ولأن الشىء بالشىء يذكر فقد تغنت نانسى برائعة عركى
( من معزّتك إنتى ليّا ) كأبهى مايكون الشجن .... وللمشاركة هاكم هنا الرابط للأغنية الرائعة التى جمعت الرائعين عركى ونانسى ... هدية متواضعة منى لكم أحبتى ..:-
https://www.youtube.com/watch?v=2FOONHMwx8I&feature=related

الرشيد شمس الدين

تسلم الحبيب رشدى
اوداج وشنو كدى ما عارف ؟ وقالو على شقى ومجنون
ومن معزتك فلك الشكر ...ولها ..... وللرائع ابوعركى وكدى اخد لى خفسه بنفاج اخر للغالى ابوصبا و(أتانا أبوعركى البخيت ذات مرّة) وراجع ليكم تانى .
ودام الفرح الخرافى
عاطف عكود

17/ يناير 2011 الفات قبل يومين كان الذكرى ال 15 !!! اى والله خمستاشر
سنة منذ أن رحل الاسطورة مصطفى عليه رحمة الله ولان ما كتبه صاحبه الشاعر ازهرى محمد على يحتاج ان يكون هنا لاجل التوثيق
ويبقى مصطفى جزءا من تاريخ اُمّة

سلامــــات// أزهرى محمد على
الى مصطفى سيد أحمد



مدخل أول :
لمتين متيمم شطر النيل
متوقى اليابسة .. ووارد
متوكى الغنية .. عصا موسى
بتهش فى غيم الإلفة .. الشارد
مهدودة القُدرة وفترانة
حردان الضل البارد
بتوجل لى يوسف فى البير
يطلع من بطن البير المارد

مدخل ثاني :
فات الكان بدينا إحساس بالإلفة
وكان راوينا
فات الباكى جراحنا وناسى جروحو
ولا فى ورانا مدينة .. مدينة
فات الصاحى
ونحن نغط فى النومة السابعة
طالق حسو ولا حاسينا
حتحت فينا غناهو الطاعم
وفات قنعان من خيراً فينا
سلامات يازول يا رائع
سلامات .. عوافى
سلامات يا خلاصة الخير الفى الناس
وترياق الزمن المتعافى
سلامات يا زول يا رائع
سلامات عوافى
............ ............ ...........
محاصر فيك بسأل عن سكة تطلع منك
أو سكة تودي عليك
بسأل عن مخرج منك ... وليك
زى نهر بينبع ... وما لاقى مصب
بتمدد عشقك فى أقصى ضواحى الروح
لى أقصى نواحى القلب
يتكثف بسعة إطلاق الربّ
وانا كنت بفلى القلب بسيرتك
سميتك حلاب الغيم
من ضرع الجدب
وطنيتك مارست الفعل .. السرى
وحفظت فحولة النيل ... أيام الخصب
ولمحتك وانت بتمشى وترقص فى حمامك
على حُمة إيقاع الحرب
وتكلكل جلد الكلمة الحافة
لحبيبة بتفتح مجرى الغنا فى الدم
وتفلس باب القلب
فيا بنوت الشارع الطاعم قومن كب
قومن لى الما قصر فى غناكن .. ضمة
ولا إتلوم بى وراكن تب
ولو تبقى السكة الجاية ضهب
وسلامات يا زول يا رائع
.......... .......... .........
البارح عفورتك ركت فى البال
رقصت
وادت عصفور الريد شبال
وطارت من قولة كر
ما الزول النهر العصفورة
بحرض فى كلاب الحر
لا بسنى وداخل فى اللحم الحى
راصد كل البسأل عن حالى
حرش ضلى على
ونتف زغب الخاطرة ... التخطر على بالى
ومنع العصفورة تحوم
إستجوب كل الناس التجى فى النوم
ماتقول !!
يازول يارائع ... ومهموم
يا مضيع ضى عينيى .. وراك
واقف حاحاى لى النوم
يا مستف رئة الدنيا شهيق
ومشحتف روح الخرطوم
كيف حال يا ابوى
كي حال يا خال
..... وتعال !
إتفضل على باحة بيتنا .. الطيب
ما عون الأطفال
ضمد جراحاتك .. تعال
من ضلاماتك .. تعال
أدينا هينين من صبر
السكة أبعد من مشيك
والجرح أعمق من حدود الإحتمال
السابلة والأطفال هناك
قدامك المشوار .. طويل
والريح .. وراك
كل البيوت
إتشرفت .. لى طلعتك
والونسه ماكملت .. معاك
القرقراب .. والقهقهة
مين سمى ترحالك .. غياب !
والغيبة بتزيدك بها
لويرتق الحزن المصاب
كان بعدك الموت إنتهى
يا أقصى حالات الحضور المشتهى
يا منتهى
تعال فرحنا بى دهشت غناك الحى
وحى من جرحك الدامى
وفتر حيلك
وحى من ضلك الرامى
وحمل شيلك
تموت متل الشدر واقف
تموت واقف على حيلك
فيا حليلك
يا حليلك بنستناك
على صهوة جياد الريح
بنستناك
فى الزمن اللديح القيح
بنستناك
على باب الحلم فى غناك
بنستناك
رحيلك شلهت الدنيا
ورتب العالم البى هناك
بنستناك
وانا تانى وراك .. شن لاحق؟
دهستنى فى بعدك حدود الخوف
الداخلة على بالساحق
أدينى القدرة التمنحنى
بحجمك سعة الشوف
لو أقدر أطل من شاهق
لو أقدر ألوح لى عيونك
تلمحنى
وانا ضعفى أمامك فاضحنى
سامحنى
ما قدرتا أطولك سامحنى
........... ............ ...........
شفتك من وجع طالع
من برزخ ملتقى النيلين
كنت هناك ... وحيدك
وكل الناس ... اتنين ... اتنين
براك واقف حد السيف
براك الما وقف بين ... بين
تغازل حلمك الفارع
فتح بابين على الملكوت
تسلم على حضرة جلال الموت
وتفتح فى الارض نفاج
إذا امتلأ الفراغ ... بالصوت
فيا باطن الاديم أفتح
براحات الحنين ... مشرع
وأنده لى مدن شاخت
أنده لأطلال القري .. الراحت
بيوت فى بيوت
تمرق من شبر مسرح
مدن فاضلة
وعالم بى إتساع الحلم
بقامة يشتهى التابوت
فما لفظ البحر يونس
ولا إنسدت شهية الحوت
ويا زول يا رائع
تمشى بالحسرة .... وتموت ؟؟!!
سلامات
يا زول يا رائع

أبداك من وين
وفينى منك لسه حاجات
من مخاوف ومن شجن
أبداك من وين
وظنى إنك فكرة إعلان الحياه
وإنتهاءات العوارض والمحن
نفسى ألقاك
وأكون أنا كلى من بعضك
أو بعضى من كل بدن
وداير ابقاك وأوحد دورة الدم
المقسمة بينى بينك والسحن
أبداك من وين
أبداك منى ولاَ منك أبتديك محل محل
من ياتو منفذ ادخلك
وكل المنافذ فيك
سداها النحل
من ياتو شارع أوصلك
وكل الدروب معطونة لى آخر الوحل
أستبيح كل الحواجز وأدخلك
من بين مسامك .. أدخلك
من أىَ قاسم مشترك
وشبه التشابه .. أدخلك
ونتلاقى نهرين من تسامى وإشتها
وأبداك من حيث إنتهت عندك
خواتم الإنتهاء
أبداك .. واخلع خيام عمرى المضى
والقاك مبسوطة اليدين
مفتوحة أبواب الرّضا
أبداك من لحظة آنستك نار
وأخدت من قبسك هدى
وانا ضمه زاهد
فى الدروب الما بتجيك
ولا بترجع لىّ من تالاك صدى
أبداك من وين ؟؟؟
وازهري محمد على ومصطفى سيداحمد المقبول
يسلم جيلك ( ايها الاستاذ ) جيل العطاء المستجيش ضراوة ومصادمة
لى عودات

الاء كتب:


أبداك من وين ؟؟؟
وازهري محمد على ومصطفى سيداحمد المقبول
يسلم جيلك ( ايها الاستاذ ) جيل العطاء المستجيش ضراوة ومصادمة
لى عودات

ألاء المدهشة
كان يقينى أنّك ذات يوم بهذا البوست تتوقفين
ابهجنى وعدك بالعودات

يا واقفة بين جرح السحاب وبين شهقة الارض البكر
ما كان ده ريد
كان احتمال تغير قوانين حركتك
ما بين حديثنا ولحظة الفعل الحقيقي
وإنتباهِك انتى للشارع البيرجع
تانى لى نقطة بدايتو
وانحيازك انتى للشارع البيرشح
فى مسام رمل التوقع،،،،،،وما اتعرف قانون نهايتو

شهيق/ مصطفى وكلمات عاطف خيرى
غنى مصطفى هذا الكلام الصعب

مصطفى سيداحمد :
مدرسة لنوعية من الغناء المتميز .. دخل قلوب الشيب والشباب حتى الاطفال يشدهم الصوت الممزوج بالحزن عالي التطريب ، خلد فينا احاسيس الشجن الذى يتدثر كل اغانيه .. تأخذك الكلمات وتحلق بك فى فضاءات مدهشة وريفة .
وليه .
غبتى يا قمرة
نركب جياد الليل
وإنشرّ بينّا صباح
سفر العتامير .. ليل
نرجاكَ فى المطرة

وسائلين عنك يوماتي رحيل...لمواني المدن النفطية ... وشقيش ماتقبل يا أبوالحيل في قلوبنا مواجعك متكية ..ابعتلك شال الحب مرسال تايهين في بحرو مراكبية... بكتب على صدر الموج آمال اطفال عمال ومزارعية ...كيف حال ياابوي كيف حال ياخال بتمسي بيوتنا الكاكية...حزنانا بتبكي دوام الحال والزمن الساقم إيدية ..
يا هدى الناس الحيارى ياندى الفجر الببلل نور عوينات الفقارى و كتين يضيع عرق الجباه الشُّم شمار فى مرقة .. آه .. يا نورة آه من دربك التّور نفس خيل الصبر .. ساعة الشموس الغر تهضلم تلحق الصح في المغارب يدفر الضو الكهارب يدفر خطاوى الشوق وراه .

هل كان يرثي نفسه يا ترى .. ام كان يحس مواجع وآهات الآخرين .. فليرحمنا الله ويرحمك .

يا ضلنا المرسوم على رمل المسافة
وشاكي من طول الطريق
قول للبنيه الخائفة من نار الحروف
تحرق بيوتات الفريق
قول ليها ما تتخوفى
دي النسمة بتجيب الامل
والامل بصبح رفيق
و الاصله فى الجوف اندفن
لا بتنسى لا بنمحي لا بنتهى منه الحريق
و الفينا من اهات اليمه فى حكاوينا القديمة
لا بيرحل عن عيونا ولا بتغشاه الهزيمة
و القبيل راجينو نحنا يوم تبشر بيه غيمة
لما تمطر يوم علينا
الفرح يملا المدينة
و البلودات الحزينة
يا ضلنا

؟... ابظلالها تتميز الاشجار ام بثمارها
؟... تري ماذا لو ان الكائنات فقدت ظلالها
؟.. وهل يستقيم الظل والعود اعوج

تذكرت هذه التساؤلات وانا احاول أن التقط حديثي مع البروفسر علي المك
ذات مساء حميم في دار اتحاد الكتاب السودانيين ـ امر غريب ان تنزع هذي الدار من الكتاب السودانيين وتمنح للاتحاد العام للطلاب السودانيين ـ الجملة السابقة اعتراضية جدا ـ كان الحديث مع علي المك دائما ممتعا وعميقا ، قال لي
ـ أمبارح كنت استمع الي اغنيتك يا ضلنا ، فكرت في كيف اهتديت يا يحيي الي هذا المطلع الشفاف ؟
هذا التساؤل له من العمق ما يكفي تماماً لبعثرة افكاري وان علي ان ابحث عن اجابة لها نفس العمق فقلت
ـ والله يا استاذ علي قد تبدو المسألة عفوية ولكنها ايضا لاتخلو من قصدية ، قد لا اعرف كيف خطرت ببالي هذه الفكرة ولكني احس بان فكرة مناجاة الضل فكرة موحية وعميقة وانا قد استسلمت تماما لهذه الفكرة وانت ايضا يااستاذ علي لك مع الظلال حكاية فانت منحاز الي فكرة الاشجار بظلالها وانها الاشجار تتميز بالظلال وليس بالثمار
ـ هو تعرف يا يحيي ، هي فكرة فلسفية ، فكرة الاصل و الظل ، فكرة النقائض ، لكن الانحياز هنا يبدو امر عاطفي جدا
ـ طيب انا اذكرك بي حاجة ، سمعت ـ بناديها ـ لعمر الطيب الدوش
ـ طبعا
ـ في مقطع بقول
بفتش ليها في التاريخ
واسال عنها الاجداد
وفي احزان عيون الناس
وفي الضل الوقف ما زاد
هنا تفتكر يا استاذ علي ، الضل الوقف مازاد ، ضل افقده عمر الدوش الحركة ، هل يكون ذلك هو تعبير عن معني الثبات ، عن جمود في الزمن
ـ ما هو شوف ، الاغنية الجميلة عندها القدرة العالية جدا في انهاتسرب للمتلقي مفاهيم فلسفية قد تبدو في غاية التعقيد ، يعني مثلا التساولات العميقة عند شعراء الحقيبة
يا طبيب انا سالك
قول لي بكل صراح
انحنا هل جنينا
ام عقولنا نحن نصاح ؟
أو
انت صاحي و لانايم
ولا طرفك من طبعو نعسان
زي ما بقول ليك ببساطة شديدة انو الاغنية ممكن تقودك ـ مش كمان اي اغنية ـ تقودك الي مفاهيم فلفسفية

ـ فكرة الظل برضو يا استاذ علي كانت قد دخلت ايضا علي السرديات مثلا ـ الرجل الذي فقد ظله ـ رواية فتحي غانم او رواية فرانسو ساجان ـ الذين هم بلا ظلال ـ تفتكر لانو الضل هو حالة انعكاس الاصل في حالة التعرض لضوء ولا هي مساحة فبها كثافة من لاستخدام للتعبيرية؟
ـ علي كل يا يحيي هي فكرة مغرية ، فكرة ممتدة ، ان تنتزع من الشئ ملامحه ، قادر تصور معاي لو كان في زول ما عندو ضل ؟ يعني عشان كده هي مش مساحة لتعبيرعالي وبس انما كمان مساحة واسعة للتخيل واللعب النقائض
كان حواري مع علي المك حول الظل طويلا وعميقا ، كنا نبحث عن مصادر في الشعر و القصة والرواية تدعم حوارنا ، تحدثنا عن الكاتب الالماني فردريش دورنمات في نصه الدرامي ـ قضية ظل الحمار ـ الذي اخرجه الصديق الفنان المسرحي المتميز ـ ديرك اويا الفرد ، في هذا النص صراع طريف حول ظل حمار ـ الحمار تم ايجاره لطبيب اسنان الذي كان يريد أن يصل الي مريض في قرية و حين اشتدت حرارة الطقس جلس الطبيب تحت ظل الحمار ، كان ذلك في صحراء قاحلة ، هنا احتج صاحب الحمار علي ذلك باعتبار انه اجر الحمار ، و ليس الظل الذي كان ، وتطور أمرالنزاع حول ظل الحمار حتي وصل القضاء وتداعت الاحداث حتي ان المدينة انقسمت الي حزبين ، حزب الظل وحزب الحمار
وادي ذلك الي حرب اهلية الي درجة ان التهمت النيران المدينة وفي النهاية تسأل الحمار الذي هرب من قاعة المحكمة تسآل الحمار وسط ذلك الخراب قائلا هل انا الحمار الوحيد في هذه الحكاية؟؟؟
اعرف ان الكتابة عن علي المك شاقة جدا و احس بان علي ان اصرخ ولكن ان الاشجار التي تتميز بظلالها عليها ايضا ان تدون تاريخ الثمار و لاسيما نحن في زمن تحدث عنه صديقي الشاعر قاسم ابو زيد قائلا ـ ضلك وراءك ما بشبهك

فى حديث البروفيسور على المك شجى ، طرب وعمق تفكير ... رحم الله ادباؤنا ..الماتوا ويجعل البركة فى الحيين .

الاء كتب:مصطفى سيداحمد :
مدرسة لنوعية من الغناء المتميز .. دخل قلوب الشيب والشباب حتى الاطفال يشدهم الصوت الممزوج بالحزن عالي التطريب ، خلد فينا احاسيس الشجن الذى يتدثر كل اغانيه .. تأخذك الكلمات وتحلق بك فى فضاءات مدهشة هل كان يرثي نفسه يا ترى .. ام كان يحس مواجع وآهات الآخرين .. فليرحمنا الله ويرحمك .

يا زول .... الشاعرأزهرى محمد على ورثاء لمصطفى سيداحمد (من اليو تيوب )
https://www.youtube.com/watch?v=Dw_b9mwpBz4&feature=related
عاطف عكود

جميل هذا الأزهري يا ود عكود
وين ما نسكتك .. نسمع
عصيفير الحكاوي رطن
متين ما نفقدك نلقاك
تحانِن بالغناوي وطن ..
مع إنو حباكَ ميتة الغربة
وإستكتر عليكَ كفن .
قدُر وطنك مع الأوطان
إذا ما كان سحايبو أبن
يمرقن قش من الوديان
عشان تدِّي السعية لبن
قدُر وطنك ..
إذا هلكان
قدِر ينقذ قرف دركان
قدِر يقسى ويخيِّب ظن
حِبَيْبُو .. الطيِّب .. الإنسان
يطفِّر ريحو .. روح الفن

دا حميد كمان

17 يناير/ اليوم الذكرى ال17
لرحيل مصطفى..........
له الرحمة سبعطاشر سنة!!
-----
من مقال لبكرى الصايغ اقتبس هذى الروابط بقصد التوثيق فى منتدانا وعسى الايام تسمح والوقت يسمح بالعودة لهذا البوست الذى يحوى الكتير عن الرجل الاسطورة مصطفى سيداحمد
مكتبة الفنان الراحل مصطفى سيد احمد بموقع (سودانيز اون لاين) الموقر:
http://www.sudaneseonline.com/cgi-bi...b.cgi?board=11

(ط)-
***- صور نادره للفنان مصطفى سيد أحمد,,,
http://seedalbalad.com/vb/showthread.php?t=1311

(ك)-
مصطفى سيد احمد .. روح في الجسد السوداني...
http://www.alnilin.com/news-action-show-id-40524.htm

(ل)-
الراحل محمد الحسن سالم حميد محمد الحسن سالم حميد يبكي مصطفى سيد أحمد...
https://www.youtube.com/watch?v=8KL76wX8XuA

(م)-
***-
***- واخيرآ:
مصطفي سيدأحمد حكاية فنان لن تنتهي...
http://alkafoga.yoo7.com/t1584-topic
شكرآ لموقع - ويكيبيديا، الموسوعة الحرة- الذي وثق للراحل مصطفي سيداحمد...

واخيرآ جدآ:
رابط اغنية "السمحة قالوا مرحلة"....
*********************
1-
https://www.youtube.com/watch?v=PFV5_HlR17Y
2-
https://www.youtube.com/watch?v=CGrXG7cV8JA
3-
أغاني وأغاني 2011- 21 -- السمحة قالوا مرحلة - صباح
https://www.youtube.com/watch?v=dwTMS7_D6oU

خالد عبدالحميد كتب: 17 يناير/ اليوم الذكرى ال17
لرحيل مصطفى..........
له الرحمة سبعطاشر سنة!!
-----

تسلم حبيبنا خالد ، وبمناسبة مرور 17 سنه اليوم عندنا فى الدوحه حفل تأبين للراحل مصطفى سيد احمد والتفاصيل لاحقا بعد الحفل إنشاء الله والدعوة لكل الدوحجيه من أعضاء المنتدى .

سلامات عاطف و خالد و انشاء الله طيبين.

ربنا يرحم مصطفي سيد احمد فاغانيه ستظل خالدة و لن تتكرر ابد الدهر بكلماتها العميقة و الحانها الفريدة مصحوبة بأداء مصطفي الذي يخرُج من الدواخل ويتميز بالاخلاص الشديد.

مع التحايا للجميع بالدوحة و امريكا.

اللهم ارحم الفنان محمود عبدالعزيز ووسع مدخله واغفر له وارحم مصطفى سيد احمد وكل أموات المسلمين
و تسلم حبيبنا أبو حميد

فى مثل هذا اليوم من عام 1996 أي قبل سبعة عشر عام من الأن غيّب الموت الفاجع حبيبنا الخالد الفنان الرائع الهرم مصطفى سيدأحمد , نصير المستضعفين وحادى ركب السودان الجديد المتجدد . سبعة عشر عام مرّت من المحل والجدب على ساحة الإبداع فى بلادنا , نحن هنا نستعيد هذه الذكرى الاليمة يامصطفى .. وجيتنى فى الوجع الأليم وفى الحزن النبيل وفى سواد الليل وفى يتم حبيبنا النيل ... وهذه كلمات معبّرة وجدتها فى النت لست أدرى من كتبها ولكنى وجدتها مناسبة للمقام فإليكموها .....




يا الفارشين الأرصفة
يا الحلمهن حلم الطيور.......
عيشةً شريفة وأرغفة
في بلد حِنيْنة ...
موالفة
يا المن أصابعين الوطن
حتى القيامة ...ولا الزمن ..
لا كُبَّة حامي بتنتفه
يا كلكن في العاصفة
دون عاطفة
مَن كان .... بيسمع ...
مصطفى .. صــــــــــنّه
ووهج صوتو انطفى
ومن كان بيسمع ..
ما اصطفى
حى
بى قضيتو
وبس كفى
_________________

17 عام علي رحيلك المر ياحبيبنا مصطفى ( وأنت باقي فينا الي اليوم وستظل ) (17/1/1996)
__________________

مطـــر الحـــزن عاود هطْـل ....
رحـل صوت المغنـي حزين ....
_____________

وفى نفس اليوم تماما ... وتماما أصبح الصبح على الشعب تماما ... ولأن ارواح المبدعين متقاربة فقد رحل اليوم وفى نفس هذا اليوم الفنان الشاب , فنان الشباب , الحوت :-
محمود عبد العزيز , بعد معاناة طويلة مع المرض , جعلها الله كفارة له من كل ذنب والتعازى الصادقة لمعجبيه الكثر ولمريديه ( الحوّاتة ) ...

الرشيد شمس الدين