حـــضــووور

المهدى عثمان مصطفى كتب:تمام يافندوم
انتوا فندوم يعني شنو......

ياحبيبنا والحالة درسة فى ام الدنيا .........
فندوم دى ما تصريف لكلمة الافندى اى الموظف الحكومى على ما أظن.

وحشتونى وحشتونى وحشتونى ...... أحبتى , والله لكم وحشة لاتوصف ... عدت لكم والعود أحمد ( محمد أحمد شخصيا كمان ) ... فضيت مايزيد عن الشهر فى رحاب الوطن العزيز ... هناك حيث الوطن الذى يسكننا قبل أن نسكنه وجدت ويالهول ماوجدت .... وجدت القيامة قامت والناس بدوا يعذّبوا فيهم كمان .... أعجب كيف بشعب أكتوبر وأبريل قد رضى هذه المهانة كلها وبهذا القدر من الإستكانة ... أقول لكم وبصدق أنهم يعيشون اليوم الذى يسبق مباشرة يوم القيامة رغم أن قيامتهم قد قامت فعلا .... إن لم تخنّى الذاكرة الخربة والزهايمر الذى لا فكاك منه فإنّ السودان يعيش أجواء العشرين من أكتوبر أو الخامس من أبريل ....والحسّانية مازالوا فى إنتظار سبق الحمير الشهير .. تصوروا أنهم ينتظرون أكثر من خمسة أشهر مشاركة الآخرين ثم وفى الآخر تمخّض الجبل فولد نفس الفأر ... كرتى , عبدالرحيم , نافع بتاع لحس الكوع , على محمود بتاع الكسرة والمتعافى بتاع كلّو ... لكأن حواء السودان الولود لم تعد تنجب بعدهم أحدا. والمدهش أن غندور يقول إذا خرج الشعب فسنخرج فى قيادته ... تصورواالمصيبة البقينا فيها ؟؟؟؟؟ ماعلينا وعفوا إذ أطلّ عليكم بعد الغيبة بهذا الوجع ولكنّى لا أريد أن أتوجع وحدى ونحن فى إنتظار غودو الذى يأتى ولا يأتى ... لكم الود وليدم أبدا مابيننا ..

الرشيد شمس الدين

ما تشوفش وحش يا باشمهندس...
الف حمد لله على سلا متك.....اقول ليك سلامت عودتك وانت راجع من عندنا....شايف كيف بالله انت متوفر وانت بعيد اكثر من وانت قريب, ما هي دي الدوامه نحن نصارع عشان ما تنزلنا القاع, ما هو هنا بقت يا الدوامه يا اجرفك التيار وما ادراك ما التيار الكزب والنفاق والدجل ووووووو...انت ما متوجع لوحدك انت يا دوبك شفت مناظر الوجع , مرحب بك راجع بين اهلك واحبابك. بس كثر من الدعاء لينا بالفرج....شوف بالله كيف ,انا متاكد انت راجع الشغل عشان ترتاح من تعب الاجازه كلها بقت مقلبنه الله اعدل الحال....
لك كل الود والتحايا.
مهدي شلكاوي

لك الشكر الكثير ياإبن العم العزيز مهدى شلكاوى ولقد صدقت فمنذ عودتى من السودان وأنا من سرير لسرير لكأن الإجازة إبتدأت الآن لتوها رغم تعب الشغل الكثير ... وكدليل على أن الشعب السودانى يعيش مخاض الثورة الحقيقى هاكم الرابط التالى وفيه تجدوا المرمطة التى تعرّض لها دكتور نافع ( بتاع لحس الكوع ) فى الجامعة والرابط هو:

https://www.youtube.com/watch?v=wsS1P95cDkw&feature=channel_video_title


لكم الود ودمتم ..

الرشييد شمس الدين

حمدا لله علي السلامة.

اكيد بعد الشهر القضيتوا في السودان اقتنعت بانوا القاعدين جوة البلد هم العايشين في الغربة ما انتوا.

تحياتي للجميع.

أنّه قد عاد عبدالله، رشيد هذا المنتدى وشمسه
الفين سلامات وحمدالله على السلامة

الأحباب أحمد محمد أحمد , ودكرار وخالد ... شكرا على أناقة المرور الذى يشرّف حقا .... كنت أظنكم قابضين على الجمر ياعزيزى أحمد ولكنى إكتشفت أنكم و بجسارتكم المعهودة تقبضون على ماهو أحرّ من الجمر بكثير وآمل ألا تكونوا فى النهاية فد ( قبضتوا الريح ).... قلبى معكم وبصدق ولكن ورغم المعاناة فإنّ الغربة حارّة و قاسى إحتمالها والوطن جميل بكم وبأهله الصابرين المحتسبين .... بالمناسبة أين المغتربين عن المنتدى ؟؟؟؟ أين كبيرنا عبدوس وأين رمانة المنتدى عاطف القوز وأين ريحانة المنتدى آلاء وأين وأين وأين ؟؟؟؟ لكم الود وليدم أبدا مابيننا ...

الرشيد شمس الدين

المنتدى فى حال بيات شتوى بامتياز
لولا اشراقات من احبابنا القلائل المجتهدين
لحق القول -الفريق اصبح خلا! ( وجه حزين، مستغرب)
كنت اقول فى بدايات المنتدى ولازال القول احق حسّه
انو هذه الصفحات انما تعمر بالتداخل والمشاركة والونسة العابرة لحدود المكان والزمان
وان كانت المشاركة مجرد سلام واعلان حضور ،،،،،،،،،
لابد من الخروج من مأزق مباريات الكورة!!
حيث 11 نفر بيلعبوا والاف يتفرجوا
وللحديث بقية........................

وكان الله فى عون السودان

سلامات يا رشدي و ودكرار وخالد

و ايضا نسال أين كابتن عبدوس وأين عاطف وأين وأين وأين ..........

من زاوية الحضور ابلغ الجميع كل الاشتياقات والامنيات الطيبات لكل فرح افرحهم وكل التعازي لكل من فقد عزيز لديه وكذلك الف سلامة لكل من اصابته نزلة وانت طالع
هنا في الدوحه تماثل الاخ الحبيب دكتور الفاتح مكي (اخو اسامه مكي) بعد عملية قسطرة للقلب وكان قد اتي مرافقا لفريقنا الوطني لكرة القدم (الرديف) ومن نتائجهم واداءهم تعللت كل القلوب

والحمد لله اجريت له ا لعمليه صباح اليوم وهو الان بصحة جيدة والحمد لله يغادر السرير اليوم مساء ..الف حمدا لله دكتور الفاتح وجعلها الله في ميزان حسناتك ..

سلامات قبطان الجمل و حمدا لله علي السلامة و حمدا لله علي سلامة دكتور الفاتح.

كان الله في عونكم يا ناس قطر من النتائج الفضيحة للفرق المشاركة التي تلاعبت باسم السودان.

تحياتي للجميع.

والله يا كابتن احمد كل الفرق المشاركة لم تقدم شييء يذكر حتي فريق كرة القدم كان مستواهو صفر خاصة في لقاءه مع الفريق الفلسطيني الواحد يمسك الكوره خطوة والتانيه ينزلق ...اكيد تابعت وشفت المستوي (جد فضحونا) كان احسن نشكل فريق محلي من هنا وعلي الاقل يوفروا كتير من المصاريف
تحياتي لك كابتن احمد ولكل الاخوة طرفكم ..بالمناسبة وين اخونا جنيدابي وعاطف وووووووووو

وأذّكر فى كتاب الحاضرين
أنّه قد عاد....
عودا حميدا ....مستطاب
سنة يا كابيتانو
والكسرة والتخريمة ليك
يا آلااااااااااااااااء

تسجيل حضور بالمرور السريع فى بوست الرائع عظمة ... التحايا للعزيز الجمل والترحاب بقدوم كبير القعدة كلها عبدوس العزيز ....والله منورين وفى إنتظار العزيزة آلاء ... دام التواصل العذب وليدم أبدا مابيننا ...

الرشيد شمس الدين

رشدي البرتكانة شخشيا..والله ليك وحشة يا رشدي..وعلمت انك قضيت شهر بحالو في السودان...شهر بحالو يا مفتري ده انته تستاهل حداشر شهر اجازة عشان ترتاح.....ورجييم...وحبوب قاوت..و.......اعانة عاجلة...ومدنكلة...
روح الله يكون في عونك يا شيخ...
ما تحرمنا من الطله.. صحي اين الاء....؟؟؟؟؟
ود الاستاذ كيفك..الجمل القومه ليك .. صحي النيو لوك رائع..
كابتن احمد كيفك شكرا علي السؤال يا قبطان..كيف الضهر؟؟؟؟
ونعود لنتفقد باقي العقد الفريد في رسالتنا القادمه باذن الله..
عبدوس

احمد محمد احمد كتب:
كان الله في عونكم يا ناس قطر من النتائج الفضيحة للفرق المشاركة التي تلاعبت باسم السودان.

رابط لما كتبه اخونا الهادى هبانى (ودالناظر) ودى ذى ماتقولوا قيدومة كدى وعربون لحدى ما يجيكم بالدرب عدييييييييل.
ودام التواصل
http://www.alrakoba.net/news-action-show-id-38810.htm
عاطف عكود

وبمناسبة هذا المقال الرائع - عزيزنا عاطف القوز - يسعدنى ويشرّفنى بإسمكم جميعا أن أكون فى طليعة المرحّبين بإنضمام حبيبنا الغالى الهادى إدريس هبّانى إلى المنتدى ... والهادى لكل عارفى فضله الكثر غنىّ عن التعريف وهو إضافة حقيقية للمنتدى إذ أنّه ممن يشار إليه بالبنان فى كل منتديات الدياسبورا ..... ثمّ وألا يكفى أن يكون الهادى هو أخ للأعزّاء عليش وبشارة هبّانى لتكتمل الصورة الزاهية ناصعة البياض ..
ألف مرحب حبابك عزيزنا الهادى فبمثلك تزدهى المنابر كلّها ... بيتك ومطرحك ونحن موعودون حقّا بالدرر..

الرشيد شمس الدين

سلام عليكم ايها الكرام
تسجيـــــل حضووووووووور.........واذهب الله احزانكم وابدل امواتكم دير خير من ديارنا....اللهم آمين

يا مراحب العزيز ودفراج , وليك وحشة, لك التحية ولكل من بطرفكم.
ودام التواصل
عاطف عكود

العزيز جدا جدا
كابتن عاطف
والله سعيدين بي شوفتك....الله يديك العافية ويديم الود والتواصل بيننا......اللهم آمين

في بوست حضور مطلوب حضور الحبوبه الاء والله اشتقنا لحكاويها وتعليقاتها على تعليقات الاخوان ...نتمني ليها كل الصحه والعافيه....
انت يا ود الاستاذ عناكب الفهرس في محركات البحث دي شنو...جبتوا التسميه دي من وين.

المهدى عثمان مصطفى كتب:
في بوست حضور مطلوب حضور الحبوبه الاء والله اشتقنا لحكاويها وتعليقاتها على تعليقات الاخوان ...نتمني ليها كل الصحه والعافيه....
انت يا ود الاستاذ عناكب الفهرس في محركات البحث دي شنو...جبتوا التسميه دي من وين.

العزيز مهدى ليك وحشة ,والتحية موصولة للاخت الاء حتى تظهر و ياسيدى عشان اقرأ الجملة بتاعة (وتعليقاتها على تعليقات )جانى ابو الشهييييييق.
ونيابة عن ودالاستاذ بقول ليك عناكب الفهرس فى محركات البحث دى حاجة كدة ممكن تقول عليها درجة بين زوار تحت البطانية ....وفيران ودكرار , والله اعلم.
ودام التواصل
عاطف عكود

المهدى عثمان مصطفى كتب:في بوست حضور مطلوب حضور الحبوبه الاء والله اشتقنا لحكاويها وتعليقاتها على تعليقات الاخوان ...نتمني ليها كل الصحه والعافيه....
انت يا ود الاستاذ عناكب الفهرس في محركات البحث دي شنو...جبتوا التسميه دي من وين.

خالد عبدالحميد الثلاثاء يناير 10, 2012 8:19 pm الثلاثاء يناير 10, 2012 8:20 pm المنتدي العام
bing الثلاثاء يناير 10, 2012 8:15 pm الثلاثاء يناير 10, 2012 8:15 pm في فهرس المنتدى 207
زائر الثلاثاء يناير 10, 2012 8:14 pm الثلاثاء يناير 10, 2012 8:14 pm في فهرس المنتدى
bing الثلاثاء يناير 10, 2012 8:02 pm الثلاثاء يناير 10, 2012 8:02 pm في فهرس المنتدى 207.46.20
زائر الثلاثاء يناير 10, 2012 8:01 pm الثلاثاء يناير 10, 2012 8:01 pm في فهرس المنتدى 141.0.8
bing الثلاثاء يناير 10, 2012 7:53 pm الثلاثاء يناير 10, 2012 7:53 pm في فهرس المنتدى 65.52.1
زائر الثلاثاء يناير 10, 2012 7:27 pm الثلاثاء يناير 10, 2012 7:27 pm في فهرس المنتدى 180.76.5
زائر الثلاثاء يناير 10, 2012 7:25 pm الثلاثاء يناير 10, 2012 7:25 pm في فهرس المنتدى


مهدي، سؤال زول مصحصح وبيدى الصفحة مسحة بوليس،،

ما اعلمه عن العناكب،،،شايف لما تلقى فى الحضور سبعة نفر،،واحد عضو وستة زوار،،،مثلا
حقيقة اتنين او اقل او اكتر بكونو عناكب!! والباقين ياهم ناسنا ومننا وفينا
طيب منو العناكب ؟؟؟؟؟؟؟؟
الاجابة فى الحلقة القادمة

بخرة//
الحتة الفوق دى مقطوعة من دهاليز صفحات ادارة المنتدى
وعينك لى تلاتة عناكب،،، حسة فى اللحظة دى!!!

تحياتى للكل،،،ومازال الليل طفلا؟؟؟؟ آل طفلا آآآل

والله يا ود عكود ضحكني كثير ابوشهيقك......
وينك يا راجل. المره دي ما حا تعرف تهرب انا راجيك بعصيدة الدخن ومفروك الباميه بالسمك وانا وراك والزمن طويل....تلاته اجازات وانت بتهرب المره دي انشاء الله ما عندك طريقه...لك كل التحايا وترجع بالسلامه انشاء الله....
والله يا ود الاستاذ تطصني جاموسه وتكون عميه كان اكون فهمت حاجه...انا حا اعتمد تفسير ود عكود حتى الحلقه الجايه....عموما طول ما هي عناكب غير سامه مافي مشكله...يعني ما مؤتمر وطني دي لدغتها وال....
لكم مني كل الود والتحايا....
مهدي شلكاوي