شخبط شخابيط لخبط لخابيط..غايتو جنس غايتو

القصيده الحلمنتشيه دى مالقيت ليها نفاج الا نفاجك ده ياعم عبدوس فاسمح لينا......

تغزل في السستر
المتجهجه الأممي

أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور

وخدكم وحده للمستعرب الخلوى


زى ما انتو يا الحلوين
خالين بال ومرتاحين
تاكلو رغيف ..وكلو خفيف .. وكلو ظريف
انحن كمان هناك عايشين!
...............
نضرب خدرة بكاتولة
نتمها موية بى دغلوبة ..ناكل لوبا
بليلة فريك.. تخلى الزول يقيف انبوبة
تستفو تب..تبرشمو تب..
توقعو رب
وتبقى انفاسو فيها صعوبة
برضو كمان عايشين
..............
وزى ما انتو يا الحلوين
فى الدور والقصور ساكنين
هناك الناس كمان ساكنين
مافى فيلا .. فى راكوبة
بى شوك الكتر مزروبة
وفى حر الهجير منصوبة
..............
وشوف السمحة ديك مخطوبة
قاعدة تفلى فى حبوبة
وتلقى الحاجة بقرقوبها
قاعدة هناك تهز فى روبها
...................
شافع لونو زى الطوبة
فى نص راسه قامت قوبة
شايفو هناك بيقلب هوبة
فى دكة بعر مكبوبة
برضو كمان عايشين

شافع لونو زى الطوبة
فى نص راسه قامت قوبة
شايفو هناك بيقلب هوبة
فى دكة بعر مكبوبة
برضو كمان عايشين
عارف يا ود كرار لمن مشيت السودان قالو لي
الاغنياء خمسة
او خشمه كما يقولون
اولهم الوالي والمتوالي والمتعافي والمتشافي وهلم جرا
ثانيهم
صلاح ادريس سيد الاسم
تالتهم ورابعهم مشترك ناس دال والنفيدي
اما الخامس قالو اكرر ...قالو ....اول اسمو الفا .... ووره وقيل انه قال لثانيهم انو الاسم او الكنيه التي تحملها انت لا تشرفها...
كم انا سعيد ان يكون من بيننا مليونير..اللهم زد وبارك
عارفو لمن يفضي حينط لي في حلقي وهذا هو المطلوب
عب...ودي

ليلة الكرسماس او عيد الميلاد احبتي...
في هذه اليلة تشعر وتعرف كم انت غريب ديار وغريب اهل
صدقوني لا ارثي لحالي فلي من الاحباب والصحاب هنا من يتمنو لو اكون بينهم ولكن برضو بشعر اني غريب ديار غريب اهل وبلادي في سود ال.....
المهم احببت ان اكون بينكم يا اهل المنتدي
لاتمني لكم جميعا عيد ميلاد سعيد وسنة اروع من سابقتها...
اصدق امنياتي لكم جميعا واستعير عبارة رشدي البرتكانة يا حاج خالد ومشرفنا ود عكود واقول فليدم ما بيننا
عمكم عبدرحمان

العزيز الغالى كابتن عبدالرحمن كل عام وانت ... وهم.... ونحن بالف خير وربنا يعفينا ويعافينا من الغربة والاغتراب وربنا يجمع الشمل , والبركة فى المنتدى وهو يقوم بذلك حتى وان كانت لمة شمل اثيرية ولكن هناك شعور بالتواصل ( وعلى قول الشاعر ) قحة الكى بورت ولا صمة الخشم .
ودام التواصل
عاطف عكود

تسلم تسلم يا طوفي يا امير شفته طوفي دي حلوة كيف ان شاء الله ما يحسدوك عليها عارفهم ما بقصرو المهم انا الليله قاعد ليهم والحشاش يملا شبكتو
قال ايه عمل ليهو غرة صلاة
تبارك الله
وينك يا رشدي
عبدوس

عبد الرحمن الزين كتب:ليلة الكرسماس او عيد الميلاد احبتي...
في هذه اليلة تشعر وتعرف كم انت غريب ديار وغريب اهل
المهم احببت ان اكون بينكم يا اهل المنتدي
لاتمني لكم جميعا عيد ميلاد سعيد وسنة اروع من سابقتها...
اصدق امنياتي لكم جميعا واستعير عبارة رشدي البرتكانة يا حاج خالد ومشرفنا ود عكود واقول فليدم ما بيننا
عمكم عبدرحمان

واقتبس ما كتبت يا كبيرنا كما هو
وقد لمسنى احساس غريب ديار كما سوط الجليد المٌكوّم قدّام البيت
وامنياتى ايضا كذلك وداااااااااااام الود بيننا
وكل عام والكل بخيــــــــــــــــــــــــــــــــــــــــــــــــــــــــــر

احمد محمد احمد،،، وينك انت يا كابيتانو؟؟؟؟؟


عاطف يا عكود بمناسبة اعياد الميلاد
من هو جـــان والكريسماس؟؟؟

خالد عبدالحميد كتب:
عاطف يا عكود بمناسبة اعياد الميلاد
من هو جـــان والكريسماس؟؟؟

سلامات يا حاج
جان والكريسماس دى اغنية كلمات هاشم صديق غناها ابو الامين في السبيعنات او بداية التمنينات فى جوبا احتفالات الكريسماس وراس السنة ....... (وعندى ليها تسجيل تعبان )
لكن قول لى من وين نكتها دى يا حاج اتخيل لى انو عندك ( سحارة ) ادبية من زمن الصبا يا ابو صبا
ودام التواصل
عاطف عكود

ياأخوانا مجرد سؤال ...وين الاخ العزيز احمد محمد احمد ؟؟؟؟؟؟ بالله ياابو حميد اظهر للاطمئنان ....
وجعل الله ايامك خضراء كما دواخلك ..
تخريمة:
الاخ العزيز ود الزين والله عارفو مامحل بلاغات بس اكون سعيدا بالشخبطة علي جدران بوستكم المزدانة باقلام الاحباب اعلاه...

راشد العزيز بيتك ومطرحك والبوست يفتخر بتواجدك...افتح بلاغ حتي في حاج خالد.. ظاطو..صحي وين كابتن احمد اكيد اخد الحاجة والوليدات ويا شندي جوك الحبايب..
معزتي

ما شاء الله يا كابيتان على النيولوك. حقو تحصل بيه موسم الانتخابات الجاى دة. اقله بيجيب وظيفة وزير.

الشكر الجزيل لود الاستاذ و راشد وكل الاخوان الذين افتقدونا.
الحمد لله بخير بس زنقة شغل ليس الا خلتنا نساسك فى البواخر و مشاكلها حتى انصاص الليالى و لكن بنمر مرور سريع على البورد كل فترة.

العزيز احمد
سعداء جدا بظهورك ولن نقف جسرا بينك والعمل بس شفقنا عليك وانت صاحب حضور لا يغيب...ويبدو لي كنت منتظر تظهر مع النيولوك بتاعت الاخ العزيز ود الزين ...والواحد لو همس بحرف فوق تعليقك يامحمد يكون افسد الوصف ....

الاعزاء احمد وراشد...لكما شكر العاجز... عسي يجي المابتسماش يقول دي صورتو لمن كان كديت... شفتو داخل الصباح لكن كنت علي موعد ولما عدت وجدته قد خرج دون ان يترك اثارا وده البخوف..لعله المزيف..
محبتي..
اين رشدي.......................

عبد الرحمن الزين كتب:...المهم قضيت وقتا جميلا وحتي اوزون ما شفتو...وحاتك...

جني00لكن شماراتك عينة...
عبدوس

العزيز عبدالرحمن ماشاء الله وعينى باردة برودة كوب ايسكريم اوزون البرتقالى الفى الصورة ( كنت عايز اعلق عليه ) لكن لقيتك حلفت بى حياة الرشيد انك ماشفت اوزون المرة دى .
على العموم ياسيدى فى النهاية طلعتا براءة وطلع مايك ما طلعش كوب ايسكريم اوزون على قول عادل امام .
وفى انتظار تعليق رشدى وشمارات جنى و...
ودام التواصل
عاطف عكود

ما شاء الله يا كابيتان ،،،صورة تخلينا نفكر نغير اللقب من كبير المنتدى الى
وجيه المنتدى ،،،
لكن شمارات المايك تحتاج بوست ولا كيف ؟؟؟
حقيقة ظهور المايك دليل انو الصورة فيما بعد زمن ال( ووكى توكى )

أولا ماشاء الله تبارك الله عينى باردة على النيولوك الماخمج ياعبدوس العزيز .....لم أدخل المنتدى أمس ولكنى تلقيت مكالمة عاجلة من السودان أمس من صديق عزيز ( مابجيب إسمو عشان الهواء مايقسم عنقرتو ) .. سألنى :-
دخلت المنتدى وشفت الحاصل ؟؟؟ أبدا والله مادخلت .... فى شنو ؟؟؟؟؟
شفت صورة صاحبك ؟؟؟ أولا دا خروج على قواعد اللعب النظيف !!! مامعقول يعنى الصورة بالعمة وتغطية كاملة لكل عوامل التعرية والتى عجزت أمامها كل عمليات الزراعة حتى فى أمريكا التى كان قد دنا عذابها ....
غايتو جنس غايتو......

الرشيد شمس الدين

علي النعمه ده ما انصاف...................
وحاتكم كتبته اكتر من خرتماية كلمه.. وفجاة وبلا مقدمات حرن الماوس وبعد محاولات عاد ولقيت ان كل ما كتبته راح...المهم عسي ان تكرهوا شئيا...لاني باين عكيت...
اختصر مكرها لاختصر ما وددت قوله...
الحاج خالد كعهدك تخجلني كلماتك الناصعة البياض
قلت لك كنت افكر في زيارتكم ولكن عمايل الفلاتي حالت وما سطرته قد يكون السبب في توهان البوست

لاني بي عباطه اوردت اسم بلدكم و الاسماء...الممنوعه
ود عكود العزيز...جزيل شكري يا امير..وجودك يعطي هذا المنبر القا وصفاءا ومحبة ..جعلها الله في ميزان حسناتك يا امير

رشدي البرتكانة صاحبك يستغل طيب معدنك ليس بيننا قواعد لعب نظيف ما نتحدث عنه المقدرة مثني وثلاث ورباع وامكانية الكلب وصديقي من زمان اكتفي بي واحدة وده الربنا قدرو عليهو والباقي كلام باللسان.. ابدا يا رشدي ما جبنا سيرة تلبس شنو وتغطي شنو وتكشف شنو
ولعلمك يا الما بتتسماش اثبت الطب
ان الصلع ظاهرة سببها حساسية تصيب جذور الشعر من افراط الجسم في افراز هرمون الذكورة...انتهي
اكان ما خايف البوست يطش ما كنته بسكت
حاشية
رشدي واسامة
تغيبان معا مدة طويلة وتعودان معا..هذا كثير علينا..
ليدم ما بيننا
احبكم كثيرا...
عبودي عبدالرحمن راخو ابدوس

متااااااابع
قت لي الصلعة شنو ؟ الله يطمنك يا سيدي ... طيب مادام كدا احاول انزل طرف الصورة المعلق فوق دا
واللا أحسن نلبس لينا عمة ندسها من أعين ( الحاسدين )

العزيز ابدا وقبل ما يظهر رشدي لانو لا زال...
اكرر
الصلع ظاهرة سببها حساسية تصيب جذور الشعر من افراط الجسم في افراط هرمونات الذكورة
المصدر........
مش كدة وبس يقال انها شعيرات غبية لم تجد لها مكانا في راس ذكي لهذا تساقطت وفي رواية اخري شعيرات ذكية اثرت ان تنزوي وتكشف راسا عبقريا للملا...خدها كيفما شئت حبيبي اسامه وانت الكسبان
مودتي

حبيبنا
أها مافي طريقة نرجع بها الشعرات ( الذكيات ) ديل لي بيتن ومطرحن ؟
عشان الواحد يبقن عليهو اتنين شعر مغتي الإضنين وكمان ذكي مش ساكت

والله يا اسامة اخوي دي صعبه شويه...اخونا القبطان العظيم كابتن حسين علي حمد تجمعنا انا وانت والباشمهندس الطاهر الحاج صفة مشتركه- انت ما تفسر وانا ما بقصر- المهم اخوه عثمان النقابي الضليع كان يعمل بحارا في الطقات قال له بعضا من زملائه في البحرية .. يا عثمان انت اخوك حسين دة قالو بسافر اوروبا ما تخليهو يجيب ليك دواء عشان شعرك يقوم...وضحك عثمان قائلا .. خليهو يشوف نفسو الاول ..ولا زال عثمان يضحك...
المهم صديقي بحسدوك....القبطان احمد قال الشعر بقي يقوم في الانف والاذنين بكثافة ويتساقط في مواقع اخري وعلي القول الماثور كثافة في الانتاج وسؤ في التوزيع غايتو الواحد يلحق نفسو عسي ان يجدو بعض الشعرات ليضعوا عليها الضريرة..
مودتي
حبيبي اسامة...نسيت اقول ليك...الشردن خلهن اقرع الواقفات...

الأحباب الأعزاء عبدوس وأسامة ..... ماتشكروا لى الراكوبة فى الخريف ... ضحكت من مقاربة عبدوس بين الصلعة والذكاء وأنا رغم إحترامى لذكاء كل المصلعين ولكن لاأعتقد أن ثمة ذكاء لهذه الشعرات المتساقطة ...لو كانت تملك القليل من الذكاء أو الحياء لما تركت موقعها الأصلى بهذا الغباء لتترك الحسرة عند أصحابها ... ذكرتنى ياعبدوس حين كنا فى الجامعة وبدأت بداية اثار الصلع عندى , قالت قريبة لنا لوالدتى :- الرشيد ولدك شكلو حتكون عنده صلعة مدنكلة ....ردت والدتى :- أريتا يايمة صلعة السرور ..دى صلعة كلها ذكاء ...
أخشى ياعبدوس أن تكون مصادر مقاربتك شبيهة بما قالته أمى ....

الرشيد شمس الدين

رشدي البرتكانة..نحنا ما قلنا الذكاء بس قلنا حاجات تانية.. ارجع البصر كرتين..وده المخلي سمسم مبسوط
محبتي

العزيز عبدوس....

والله ذى مقصت كتابتك الطشت حصلت ليه , وانا كنت من اول المعلقيين على الصورة البهيه دى و المكرفون المذدان اناقه بجوار اناقتك المشهود لها حتى من المايتسماش, المهم كما قال الاخوان عينى عليك بارده و حتى لو شلت العمه حتكون الصلعه لايقه عليك ذى صلعة اخونا واسامه.
طبعا موضوع الصلعه ده موضوع شايك وحساس جداً عند بعض الناس لدرجة الهوس مع العلم وذى ماذكرت فى بعض الناس الصلعه لايقه معاه لدرجة لواتخيلته بشعر مابكون بمثل الوسامه الحاليه.

كان معاى واحد فى البحر ومن غير ذكر الاسماء متعقد من قصة الصلعه دى لدرجة ,قام اشتره ليه ماكينة حلاقه بمبلغ معتبر ويومى على الله لازم احلق ماتبقى من شعر لكى تتعادل المنطقه المزروعه, وفى لحظات التجلى يطلق مابدخله من حسرات ويقول والله انا بحب ونسة الجكس بشده بس الشى الحارمنى منها صلعتى ده.

لكم الود