مرحبا بك فى منتداك

السادة اعضاء هذا المنتدى الجميل الرائع بكم - اسمحوا لى و نيابة عنكم جميعا ان ارحب بالعضو الجديد الشاب الخلوق المهندس محمد الفاضل التوم و هو بإذن اللة سوف يتحف المنتدى بكل ما هو مفيد و جديد- مرحبا بك يا فاضل فى منتداك
عثمان بخلن

لك الشكر و التقدير باشمهندس عثمان بخلن

مرحبتين حبابك
ابقى داخل، البيت بيتك
اشوفك فى ديار الحرمين الشريفين! !
؟؟وفى انتظار مساهماتك يا هندسة

جمعا ان شاءالله يا خالد وشكرا كتير

زمان اخونا خالد عنده مقوله اشتهر بها لمن تقول ليه حرماً ارد عليك قدساً. اخونا محمد الفاضل مرحبتيين وحتا......

اشعرتموني بحسن الضيافه في هذا البيت العامر,شكر من القلب اخونا ود كرار

ود كرار كتب:زمان اخونا خالد عنده مقوله اشتهر بها لمن تقول ليه حرماً ارد عليك قدساً ......

امجد، والله بالغت،، برئ من الزهمهم تماما، اول مرة اتذكر الكلام من ربع قرن
كانت تلك ايام -القدس عروس عروبتنا-
وفوران الشباب والقضايا الكبرى
وعودة للحرم وديار الحرمين
اخونا محمد الفاضل
تعرف لما كتبت

اشوفك فى ديار الحرمين الشريفين! !

كان قصدى انى شايفك فى السعودية، ما بعيد عن الرياض
ولا انا غلتان؟؟؟ تقول لى شفتنى كيف؟؟؟ العولمة يا سيدى
وتجدنى أٌؤمّن على دعائك أن نلتقى فى رحاب البيت العتيق إن شاء الله
وما أمجد كرار ده ببعيد

أولا الترحيب أكثره بعزيزنا الباشمهندس محمد الفاضل ومحمد لمن لا يعرفه من أرق وأنبل أوفياء هذا الزمن الأهتم ... أجدد بإسمكم الترحاب به وكلى ثقة أنّه سيكون إضافة حقيقية للمنتدى العامر باهله ...
ولكن ....... يبدو أنّ الأدمن من شدة حرصه علينا يعرف ماذا نفعل فى كل لحظة وأين نكون ...
يا أحبابنا خالد وعاطف خلّيتو شنو لصلاح قوش ؟؟؟؟ بالمناسبة هل يمكن بهذه الطريقة أن تعرفوا لنا بالضبط إن كان عبدوس فى يوم الناس ذاك قد ذهب فعلا إلى المغرب مع المفعوص...ة أم لا ؟؟؟؟
بعدين رجاء أدفع نصف عمرى لأعرف الطريقة التى تعرفون بها مكان كلّ منّا ... وأنا أريد معرفة الطريقة لمتابعة الرحلات المستمرة لمجاهل أفريقيا وهل هى كما يبدو أم أنّها للمغرب وخلافها ...... أمانة ماوقع راجل !!!!!! غايتو جنس غايتو !!!!!

الرشيد شمس الدين

مرحبتين حبابك باشمهندس محمد الفاضل..يسعدني حقا ان ارحب بمقدمك..قطعا نحن لا نملك ان نعلو صوت رشدي....وانتهز بوست الترحيب بك-ما انا انتهازي وكده- لارد عليه فاسمح لي ارجوك....

هي ..لا حولا... غايتو جنس غايتو....
وينك انت يا الاء... شفتي رشدي ..عاوز يستفيد من العولمة وخالد الادمن بس عشان يعرف انا وين..مع اني- تقريبا – الوحيد الذي يكشف ويقول ماشي وين...
علي فكره يا رشدي انا كنت في شرق افريقيا..كينيا اثوبيا..السودان....والمفعوصه متواجدة في غرب افريقيا. الكامرون ..الكونغو...يعني هي غربت وانا شرقت..بس ما تنسي انو للكنغو حدودا مع اغلب دول شرق ووسط افريقيا...
ما علينا..
اسعدني انك دايم التواصل مع حميد... اما انا فاستمتع بسماع صوته في العيد..بلغه حبي واحترامي له ولاسرته..
تخريمه او سمها كسرة..هذا المساء كنت في هيثرو تيرمنال فايف في طريقي الي بروكسل..كان عندي بعضا من الوقت-علي خلاف العاده.. ..قلته نخش راكوبة ومنتدي بعد قراءة البريد... وجدتك تكتب في الراكوبة باسمك كاملا.. قلت ارد علي تعليقك الذي اسعدني واعجبني....لكن قلته طبعا اكيد خلدي- الادمن- بكون عارفني وين..لهذا
ارجات تعليقي.. حتي وصلت مطرحي.. ها ها عالم جبنات.
علي الدوام يا رشدي تزداد معزتك عندي.. وازداد قناعة انك انبل الناس واطهر الناس واعطم الناس .. والان صرت ..اشجع الناس...
علي فكره ..
90 % ممن يعلقون في الراكوبة يكتبون باسماء مستعارة
اما العشرة الباقين فلديهم جنسيات من دول تحميهم او يحتموا بها - عند اللزوم..
اما انت فلك الله وقناعاتك...وايمانك..
تذكرت النكتة القديمة.... عندما صعد الحمار والغراب علي الطايرة.بدؤا في معاكسة المضيفة التي لم تجد حلا الا الاستعانة بالكابتن الذي وجه المضيفه .. اكان الاتنين ديل ما بطلوا......... افتحي الباب وارميهم..
المضيفة حذرتهم لكنهما واصلا................
اضطرت المضيفة لفتح الباب ورميهما خارج الطيارة..
فورا طار الغراب في الجو..وصاح الحمار انا اعمل شنو..رد عليه الغراب اكان ما بتعرف تطير طيب بتت.......... ليه
واصل يا صديقي لن يسترد السودان عافييته اذا جبنا و دفنا رؤؤسنا في الرمال...علي فكرة حتي النعامة تخلت عن دفن راسها..
محبتي..معزتي.احترامي..وليدم ما بيننا..
عبدوس

لكم الشكر الجزيل غدوتنا والمثل الاعلي لنا باشمهندس الرشيد وكابتن عبدالرحمن , والله نحن مامحظوظين لانو جينا في الزمن الضائع وماحضرنا الزمن الجميل.وهذه المنتدي العامرهوالباقي من الزمن الماضي,

نحن في السعوديه فعلا يا خالد,لكن نحن شكلو ماشيفين العولمه بالحيل وانت وين اراضيك

مرحبتين بالاخ محمد الفاضل في المنتدي ونتمني ليك اقامة طيبة .

و شنو يا كابيتانو مغسلنا كدة لما مريت بالسودان؟ علي كل حال حمدا لله علي السلامة و طمنا عليك.

محمد الفاضل كتب:نحن في السعوديه فعلا يا خالد,
وانت وين اراضيك

أراضيك؟! سؤال يثير اشجان والتفاتة تأمّل،، نحن يا هندسة فى ما لا يطلق عليه اراضى
ديار بعيدة،،بها كتير عمارات سوامق، حينما اتاها الزميل كرستوفر كولومبس كان انتصارا تحدثت به كتب التارخ ولا زالت
ولعلى من قلائل فى زمان الناس هذا ،،اتيت على باخرة،،،،واحيانا فى احاديث تقتضيها المناسبة، احكى عن كيف وصلت لهنا
ويتبع الاجابة،،حواجب مرفوعة دهشة،،،وابور... فى زول يجى لى هنا بى باخرة!!
لكن يا حميد الله غالب
امريكا كانت ارضا جديدة،، صارت غابات من اسمنت وناس تلهث، ونحن نمارس (انشطارنا الازلى ما بين رحابة الحلم وضراوة الواقع)
اراضينا، سهول خضرة ممتدة، او بياض ثلجى فاقع يسر الناظرين، اعتمادا على موقعك الجغرافى
فى اراضينا لا يجتمع الناس الا لماما، فما عاد الوقت هو الوقت،، لكن معظم من هنا ينتمون لزمن جميل ، يتشاركون ماضى،،لا افاعى فيه
زى كلام عثمان،، يحملون بستان زاهى وبقية من عشق لوطن كان
لعلى اجبت عن سؤالك
تحياتى