مرحبآ بالأب الروحي كابتن عبد الرحمن

العزيز جدا والحبيب الي قلبي دوما اوتش
والله ليك وحشه
افتح شنو واخلي شنو
لكن قطعا ساكون اسعد الناس
وانا معكم وبينكم
بيني وبينك وانا عارفك بتحب الشمارات عارف مفكر افتح بوست بس للناس البحبوا الغلاط وطبعا علي راسهم صديقي اللدود اول اسمو الرش.....
وبعدين اهم زول اول اسمو السحوق اللحوق تخيل ديللو اجتمعوا مع المرحوم علي سورج رحمه الله بس يكونوا ناقصين واحد اول اسمو محمد صالح وواحد تاني اول اسمو عليوه والله وهات يا غلاط للصباح

عارف يا اوي في ناس كده بتشتاق ليهم جد جد وبتحبهم جد جد ولو ليك مراد انك تبقي معاهم العمر كلو احسن شي انهم عارفين نفسهم وهذا ما يسعدني ولا اخال اني في حاجة لكثير ثلج بعد هذا العمر احبك للابد وساظل فقط اغفر لي انني بهدلته عربيتك السمحه
عبودي علي فكره ده اسمي الجديد بعد بن لادن عمل عمايلو وانا احسن من الن قال الن قال

اواصل معكم بعد معايانت عده وس وجيم ولجنه اخيره تراسها عمنا ادريس بخاري والد القبطان الاعظم ونسيب اعظم المهندسين الانسان الروعه بكل ما تحمل هذه الكلمه من معني اخونا عبد الحميد عيسي ومعه المرحوم خليل سورج تم اختيارنا شخصي واستاذ كمال حسن
وسافرنا

كانت كل العايلة في وداعي بمطار الخرطوم في ذلك الشتاء من عام خلوها مستوره
حطت بنا الطايره اولا بمطار بورتسودان كنا انا وكمال وعزالدين حمزه موسي اغبش ابو ادربس عبد الوهاب التوم
ليس هذا هو المهم ولكن كان هناك عمنا ادريس بخاري يستقبلنا واحدا واحدا وسالني يا عبد الرحمن في طريقه نتصل بابوك ونطمذنو انك علي الاقل وصلته بورتسودان بالسلامه لانو قالو كان ببكي بي حرقه شديده وقال ليهم خلاص دفنتو دفنتو
.... احكي لكم فقط لاقول هولاء العظماء من رجالات البحريه كيف كانت قلوبهم معنا وعلينا

من بورتسودان اقلعنا ومن المدرج الترابي الي القاهره برفقتنا معلمي الكليه ومندوبي الميناء الذين حضروا لامتحانت الضباط التواني للدفعه التي سبقتنا دفعة ناس الحاج عثمان وعابدون
وصلنا بلغراد عن طريق روما وفي مطار روما كان في استقبالنا الاخ فزع مدير مكتب
الخطوط السودانيه شوفتو العز ده كيف
ويوم في روما في فندق خمسه نجوم لغايه بكره ياحبان

نعود لنواصل وصلنا رييكا بعد ان مكثنا في زاغرب حوالي الاسبوع لاجراات التسجيل والكشف الطبي.... كان البرد قارسا ونحن نرتدي الملابس التي جينا بها من السودان وبعد ان صرفوا لنا بعض الاموال قررنا شراء ملابس تقينا البرد واطرف مافي الموضوع دخلنا المتجر ونحن ثمانيه وخرجنا وكل منا يلبس بالطو اسود نفس الماركه واشتري كل من مظله لزوم المطره كلها حمراء وخرجنا الي الشارع والناس ينظرون الينا في تعجب وقلنا ديل اكيد ما شافو عبيد ولكن اتضح وخلافا لقصة الزي الموحد زي فريق الكوره ان الذي لفت انظار الناس هو المظلات اذ ان المظلات الملونه خاصه بالنساء
نكتفي بهذا وعن حكايات رييكا نتابعها في بوست ود كرار عن رييكا

العم عبدالحمن الزين...

كل عام وانت بخير...

وين الغيبة...وماتحرمنا من الطلة ...

لك الود

العزيز الغالي ود كرار
بقدر ما اسفت اني لم التقيك بقدر ما سعدت اني تعرفت عليك من خلال هذا المنبر
زملاء واخوة كثيرين التقيت بهم سعدت بمعرفتهم خاصة اوليك النفر الذين قالبلتهم خلال اشرافي علي الدراسات العليا في رييكا
كم تمنيت لو يتاح لي الوقت لاعرفهم اكثر ولكن زملاذي في الدراسه مدير واساتذة الكليه لم يسمحوا لي ولهم العذر ولكن ويشهد الله انهم اعانوني وتخلوا عن اشياء كثيره ليساعدونا فلهم التحيه
العزيز ود كرار كعهدي سرحت في موضوع اخر ولم يكن هذا قصدي فمعذره
اردت ان اقول اني تغيبت غصبا عني فقد كنت في مجاهل افريقيا كما يقول رشدي العزيز وعدت قبل لحظات وهانذا معكم وساهريكم
ولي عودة مع ذكريات رييكا
تخريمه
مولانا رضي الله عنه اخونا كابتن حمد النيل حماد له اغنيه الفها ولحنها اسمها
يا بت رييكا
انا لن اكمل الكمات لكن اخوي الكاشف علي النور عارفها
اخوك
عبدوس او راخو كما يحلو للحبيب الن

ود كرار العزيز
جافاني النوم وهانذا اعود لاهريكم
المهم الف مرحب بكل من ينضم الينا- شوف الينا دي كيف- خلاس بقينا اصحاب الحوش
من احلي ذكرات رييكا الي قلبي خليك من ناس هباني وعليوه وحد النيل والمرحوم خليليل سورج
وقسم الله والنحاس وعلي البطل الهمزاني وعمنا حمدان الشيخ وزوجته العزيزه مارتساام ناصر وفريده وخالد حمدان وتلك ذكرات ساعود اليها بلا شكلو سمححتم
تحياتي
راخو ابدوس

شفته يا ود كرار عمك خلاس خرف
مره اخري يا ودكرار طلعت من الموضوع
دفعة ناس عابدون واالحاج عثمان اول دفعه تصل رييكا لامتحان قباطنه ومهندسي اعالي البحار
المهندسين دخلوا امتحان الكهرباء وفيما يبدوا ان الاستاذ كان شديدا معهم فرسبوا جميعا اي سقطوا في امتحان الكهرباء فكان الذ تعليق قاله الاخ كابتن امام الحاج لعبدون
والله يا عابدون لو رجعنا البحر الا اكان نشيل معانا رتاين
لمن لا يعرفون رتاين اسالوا اوي

رييكا شانها شان كل مدن الادرياتك انت دايما في حالة صعود ونفسك قايم ما عدا طريق الميناء فهو في مستوي سطح البحر.....
اول شكله لنا مع اليوغسلاف كانت في عام 68 علي ما اذكر وسبب الشكله
ان قام اخونا الباشمهندس عبد القادر بصفع احد اليوغسلاف كفا معتبرا لانه اساء اليه وهنا تجمع اليوغسلاف دفاعا عن زميلهم وقاموا بضرب اي اسود وجدوه امامهم ومن ضمن الذين تلقوا علقه اخونا واستاذنا كابتن كمال حسن وعندما بدا الناس يسالونه يا استذ الناس ديل مالم معاك وانت زول طيب ومسالم فما كان منه الا ان قال ما ده كلو من ابو الشبك ده وهنا التقط القفاز اخونا حمد النيل واطلق الاسم علي عبد القادر .... الطريف في الامر انه لما اشتد الضرب قررنا الذهاب واللجوء الي البوليس ولكن اليوغسلاف عادة لا يحبون التجمعات في ذلك الوقت وعندما وصلنا مكتب البوليس كنا حوالي خمسة عشر سودانيا او اكثر قليلا ولم يسمحوا لنا بدخول المكتب وانتظرنا خارجا واطل علينا مدير البوليس من النافذة وبدا يسال بصوت عالي العبيد ديل عاوزين شنو؟؟؟؟؟
ثم قال جملة لن انساها ما حييت تتصورا زي ديل انا ممكن اشتري مائه زيهم في امريكا بدولار واحد واغلق النافذه امرا جنوده بتفريقنا فورا
تحياتي

عمنا عبدالحمن....

الظاهر عليك جاى متعطش للكتابه من غياهب افريقيا واختلط عليك البوستات...لانو المداخلتيين اعلاه ,الظاهر كان مفروض تدرجهم فى بوست رييكا, ولا انا غلطان...

اما عمنا شبك عاوز ليه بوست خاص لانى زاملته فى البحريين ومن قبلها فى الوطنيه...

كابتن عبد الرحمن حمد الله على السلامه وكل عام وانت ( الخير والبركه) وفى انتظار متابعة رييكا بوست والتحيه موصوله للاخ النشيط ود كرار والاخوان عادل انور (اسكندريه بوست ) والعزيز الباشمهندس الرشيد والحبيب ال .Admin خالد

اعود لاواصل ذكريات رييكا
بعد الشكله اياها قررنا ان نجتمع صباحا في الحادية عشرة بمقهي الكونتنتال وهو مقهي شهير يقع في وسط البلد
راينا ان نصعد الموقف علي اعلي نطاق
كتبنا مذكره لمدير البوليس وادارة الكليه والسفارة السودانيه
ولكن وحاتكم زول عبرنا مافي


اهم ما تمخض من هذا الاجتماع انه كان النواة الاولي لاول اتحاد للطلبه السودانين برييكا
والذي كان النواة الاولي لاول تجمع لناس البحرية والذي تمخض عبر مراحل شاقة ساسردها تباعا ادت تكوين اول نقابة لناس البحر تشرفت بريئاستها حينا من الدهر
والي لقاء

قمنا ايها الحباب بتكوين اول تجمع للطلاب السودانين برييكا وانضمننا للاتحاد العام للطلبه السودانين بيغوسلافيا وكنا اكثر الاعضاء فعالية لاننا كنا ندفع اشتراكاتنا اول باول لاننا كنا الوحدين الذين لديهم اعانه من مجلس المساعدات الفنية وكانو يطلقون علينا ناس الكويت واطلق علينا هذه الصفه المرحوم
عوض دكام وكان ريئس اتحاد ناس زغرب

ساهمنا كثير ا في نهضة الاتحاد العام
ولكن عندما حاول البعض تسيسه انسحبنا في هدؤ وبعد انسحابنا لم تقم للاتحاد العام قائمه
اتحادنا كان مصدر فخر لنا رغم اننا اتخذنا فيه قرارات كنا ننظر الها في ذلك الوقت انها قرارات صائبة ولا بد من اتخاذها حماية لسمعة السودان وقمنا باعادة اثنين من السودانين الي السودان لانهم تعدوا الاصول السودانيه ولكن ما اراه يحدث اليوم يجعلني اندم علي قراراتنا رغما عن انهو اتخذناها بالاجماع وعن قناعه ولكن جل من لا يخطئ
اتحادنا هذا كان النواة الاولي والشرعية لنقابة ضباط ومهنسي الخطوط البحريه
واخوكم كان له الفخر ان يكون السكرتير الدايم - قبال ما يظهروا فيها ناس الريس الجد الجد اخونا محجوب حسن وياكلوا مننا الجو!
الرئيس طبعا كان عمنا وابونا واخونا واستاذنا كمال حسن وبحسب الدستور الرئيس مفروض هو الحائز علي اعلي الاصوات لكن اخونا القطر عمر داود رفض ان يعطي صوته لاستاذ كمال وبالتالي كان مفروض اكون انا الرئيس ولكننا في نفس اجتماع الجمعيه العموميه قمنا بتعديل الدستور حتي يكون الاستاذ هو الرئيس وقد تم ذلك في هدوء وضحكنا كثيرا لانو ابو داود دخلنا في مطب
وساوصل ان شاء الكريم لاعدد لكم انجازات الاتحاد

تسلم ياوي يا حبيب
ولكن اظنك تعرفني تماما انا لا احب ان ادلو بدلوي الا اكون متاكد تماما
قرات كل المشروعات ولكن لا بد ان نكون واقعيين
فكرت في المضوع كثيرا يا باشمهندس ولكن سؤالي الازلي سيظل
اي مشروع وحتي يكون ناجحا لا بد ان نجد من يتفرغ له
السؤال هل اي منا علي استعداد
عندما تجدوا الاجابه تجدوني جاهزا لاقدم لكم مش المشروع كمان التمويل
اتمني ان اسمع منك ومن الزملاء
محبتي ومعزتي وامنياتي
عبدوس

كابتن عبد الرحمن مرحب بيك ونورت المنتدى ، يمكن تكون ما متذكرني ولكن لو رجعت بالذاكرة لورا شوية أول مرة قابلتك فيها كان في رييكا - كرواتيا حيث أنني كنت هناك للحصول على شهادة ضابط بحري وكانت مجموعتنا مكونة من الأخوان أسامة شروم ومحمد علي عبد الرحيم وحسن جريتلي وطارق عبد القادر وأذكر أنك وقفت معاي أنا والأخ حسن جريتلي وقفة شهامة حيث أنك أقنعت إدارة الكلية بتخفيض تكلفة الدورة على أساس أننا لسه خريجيين جدد ويادوب لينا سنة ترينينغ وجايين للدورة على حسابنا الخاص ، ولا أنسى أبدا أنك عزمتنا أنا والإخوة على أكلة بتاعت سمك في مطعم راقي للمأكولات البحرية وخلال تلك العزومة عندما أتى على لسان أسامة شروم ومحمد علي سيرة سودان لاين و بعض المواقف الطريفة لبعض الأخوان الشغالين في الشركة إمتلأت عيناك بالدموع حتى فاضت وحينها كنت قد أدركت كم أنت مرتبط بسودان لاين وبكل العاملين فيها ، طبعا الكلام ده ما حيكون غريب على الإخوة في المنتدي لأنهم بيعرفوك أكتر مني ، ومرحب بيك تاني يا كابتن ونورتنا .

العزيز خالد
لله درك
اكثر ما يسعدني يا صديقي ان اكون قد قدمت شيئا ما لانسان ما
في عملنا هذا ووظيفتنا للاسف لا نملك ان نقدم الكثير خاصة لاهلنا وذوي القربي ممن كانوا يتابعوننا ويبتهلوا الي الله في صمت ان يوفقنا حتي ننجح ونرد لهم اجر دعواتهم ولكن للاسف عجزنا وهذا العجز يا خالد يصيبني انا شخصيا باحباط ما بعده احباط
لهذا تجدني- مثلا- اسعد من كل قلبي عندما اسمع بان فلان عينه الرشيد وعلان ساعده سيف وفرتكان امد له يد العون عثمان وخليل ساعده جمعه اما انا ماذا قدمت
ولا شي واخجل من ذلك
حبي للخطوط يا خالد نابع من حبي لابنائه فنحن لا نحب الكهف الا من كان يسكن الكف جديرا بالحب
مرحبا بك في المنتدي حبيبي خالد
عبد الرحمن