إبْـتسامةُ السودانيين

نصف إبتسامة...! [ علي سلطان ]
لماذا يبتسم كثير من السودانيين نصف ابتسامة، ولماذا لا تكتمل إبتسامتنا دائماً رغم أننا شعب جُبل على الإبتسام، ولم يفلح الحر ولا الصيف الحار في محو هذه الإبتسامة التي قُدر لها أن لا تكتمل، ثمة منغصات تجعل الإبتسامة باهتة شاحبة، وتأمل حالنا كلما بدأنا نبتسم ونتهيأ للفرح تأتينا مشكلة.. قضية عويصة .. إخفاقات.. إحباطات تمنع الإبتسامة من أن تكتمل.. متى يبتسم السودانيون إبتسامة كاملة مدورة صافية تنبع من القلب رغم الحرارة الشديدة والسخونة والشمس الحارقة التي تتوسط كبد السماء، والبعوض في الليل.. والذبا...

العزيز ياسر...
والله عندك حق وطرحك جميل...
سنبتسم يا ياسر بل سنضحك اذا..
قدر لنا يوما ما ان نكون احرارا في بلادنا
اذا قدر لنا ان نختار من يحكمنا
..اذا قدر لنا ان نعبر عن ارائنا دون خوف او وجل..
اذا سمحوا لنا ان نضحك-كما كنا نفعل- اذا سمحوا لنا .........................................
لا اود ان ادخلك ونفسي في متاهات... شفته كيف
حتي في هذا المنتدي الحر لا استطيع لان هناك شخص ما قد يحيل ضحكتي الي شبه ابتسامه ..تتقلص رويدا رويدا حتي تتحول لقدرة قادر الي تكشيرة...
ارجوك لا تلوم الحر ولا الذباب-- اخي او ابني ياسر-- فقد عايشناهم وعشنا معهم ورغم ذلك كنا نبتسم..ونضحك ونسعد
..في بورتسودان العزيزه الجميلة ودرجة الحرارة تفوق الاربعبن والرطوبة 100 في الماية ولعمري تلك درجة من الصعب ان يتحملها جسد انسان..رغم ذلك كنا نخرج نمرح نذهب الي كيلو تمانية نضحك ..نعوم في انصاف الليالي المقمره... نباري الحفلات ونستمتع ونعود الي بواخرنا الراسيه
ونسيققظ قبل ان يطرق الوردية باب غرفتك لانك لو نمت ستجد انو الجماعة ضربوا ام فت فت
وملحقاتها وهم يضحكون...
معزتي
عمك عبد الرحمن
اعجبني طرحك وساعود اليك عندما اعود من رحلتي
القصيرة باذن الله

العزيز ياسر
كلام كتير دار بذهني حتي اجيب علي سؤالك
ولكن اعدك ان اعود...
عندما اعود باذن الله
فكر معي....
ماذا يخبئ لنا غدا وماذا اعددنا له
هل المنزل الذي اسكنه ملكي
ماذا سيحدث لي اذا فقدت عملي

ماذا بشان معاشي-ان قدر ان يكون لي معاش- هل سيكفيني
ماذا سيحدث لو حدث لي حادث
اذا اصبت لا قدر الله بالسرطان او اي مرض اخر من سيسفرني..من..من
من سيراعي اسرتي
خالي المريض..عمي التعيس..حبوبتي..عمتي فاطنة...

اخواني..اخواتي.... الخ الخ الخ
وهذه الخ تذكرني لخة البحر...فعندما يلخك تقول دي اخر رحلة ولكن ما ان تلتصق الباخرة بالرصيف ننسي كل شئ...
نحن يا ياسر نحمل هموما اكبر مننا ..نحمل هموم غيرنا وهذا هو سر نصف الابتسامة
اما النص الاخر اتركه لك وللاخوة المتاخلووووووون ومن هنا نبدا
عبد الرحمن

لا ادري لماذا اصر ان واصل رغم انو سيد البوست والسؤال تخلي عنه.. لكن جد جد اعجبني السؤال...لماذا لم نعد نبتسم...
الاجابة بكل بساطه لان همومننا اكبر من طاقتنا...
في اغلب دول العالم انت لا تفكر في الغد..علاجك مضمون..معاشك مضمون..بيتك ملكك..حتي قبرك مضمون..
كل شي تملكه او حتي لا تملكه مؤمن... اذن ما الذي يمنعك ان تبتسم او حتي تضحك...
انظر الي حالنا....... نتحدث عن الرياضه والكرة 24 ساعه ونحن 113 في العالم.. ماذا سنفعل لو كنا بس رقم 50 ..نتحدث عن السياسه وريئسنا- للاسف- الرئيس الوحيد المطلو ب علي مر التاريخ ان يقف امام محكمة..وهو لا زال في السلطه...........صدقنا او قالوا لنا اننا سلة غذاء العالم واذا السيد وزير الزراعه الدكتور المتعافي يصرح في الصحف ويبشر اهل السودان..ستكون هناك فجوة غذائيه العام المقبل.. لكن لا تقلقوا اعددنا العدة لاستيراد ما يكفي هذا الشعب من الحبوب...المصدر كل الصحف السودانبيه...
هل تريدني ان ابتسم يا ياسر العزيز
كم باخرة كانت لدينا...كم كنا ووووووووووووووووووووووووووو
قلت لك لا اود الخوض في السياسه ولكن الا تعتقد ان ابتسامتنا مربوطه بالحكي في الممنوع
سنبتسم يوما ما... ومن ضحك اخيرا ضحك كثيرا


وعندما يطل الصباح
وتشرق الازهار والورود
فاسرع الخطا واقفز الجبال
الشيخ قد اضحي فتي
وقل وداعا للمواخر والسجون
واتركها وحيدة
وحيدة تبحث عن سجين
كلماتي........
معزتي

yasir Mohamed Elfadil كتب:نصف إبتسامة...! [ علي سلطان ]
لماذا يبتسم كثير من السودانيين نصف ابتسامة، ولماذا لا تكتمل إبتسامتنا دائماً رغم أننا شعب جُبل على الإبتسام،...

الاعزاء الغالين
يا لها من صدفة وما اروعها صدفة العزيز كابتن عبدالرحمن يبحر فى سؤال العزيز ياسر ونجد اجابه السؤال فى اسئلة كثر فى (الباي باص ) بتاع الباشمهندس الحبيب الرشيد ومانقلة لنا من ابداع الرائع اسامة الطيب فعندما تكون اجاباتنا على اسئلتة ايجابية اى بنعم فاكيد سنعرف سر سلبية ابتسامتنا

اسئله من ما خطة يراع المبدع اسامه الطيب فى رائعته سرير الروح

(هل تحسستم الذاكرة هذه حين أومأت لنا السنين بغربةٍ مفرحة؟ حين تخذل الصبية أحلامهم فيبيتون على الطوى يأكلون الأماني ؟ هل تحسستم صوت أمهاتنا يطالعننا بعيون قلوبهن ونحن فقط نجهّز للداخلية والآن ينزفن أمومتهن كلها ويودعننا لحضن شقروات العالم الأول؟ هل تحسستم إدعاء تماسك الآباء حين نخذلهم برغبةٍ في السفر ويخذلهم الواقع في إقناعنا بجميل الانتظار؟ هل تحسستم ثقل هذه الأسئلة ؟ تتحسسنا هي ولكنا نغالط الروح بمكابدة الرهق ونحن ندعي الانتباه ونبرر ( امشوا في مناكبها ) وتمشي في مناكبنا نكبة العالم وقهر الآمال.)

ولله دركم ياسر عبدالرحمن الرشيد اسامه

ولكم العتبى مع الاحتفاظ لكم بحق الابداع الادبى وحقوق الملكيه الفكريه

دمتم ودام ابداعكم وتواصلكم
عاطف عكود

وصلتني ارسلها بدون تعليق
(وصف البيوت في السودان (الكاتب مجهول



تخش بشارع المخبز التركي تلقى ليك محل بتاع حلويات شامية..... تمشي طوالي بلاقيك حلاق فلسطيني.... جنبو بتاع سباكة بنغالي....... و في الركن بتاع سراميك باكستاني... أول شارع تدخل بيه تلقى بيت ساكنين فيه عمال هنود تخليه..... بعديه بتلقى عمارة ساكنين فيها لعيبة كورة نيجيريين..... جنبها في مكتب ديكور¬ كوري وعلي يمينك في كوافير بتاع ارترية شويه منو كدة في نادي مساج بتاع تايلنديين تلف على يدك الشمال تلاقى محل شيشة مصريين قاعدين جنب دكان اليماني اللي في الناصية
قدامو في عمال صينيين بيحفرو مجاري الخريف... و بعدين بتلاقيك عمارة فيها مكتب بحرية فيهو خبراء ماليزيين تحتهم في الطابق الارضي في مدرسين انجليز بتاعين مدرسة دال هناك في شجرة تحتها ست شاى(حبشية)
وقدامها في عمود قاعدين تحتو خريجين واحدين شايلين اعلام زرقة وواحدين حمرة وبتناقشوا...البيت اهو قدامك ..فيهو
عواطليه سودانييين

أها دا البيت زاتو

عزيزى عبدالرحمن الزين
كم انا سعيد بمداخلتك الرائعه فى موضوع ابتسامة السودانيين وفى نفس الوقت حزين لأننى أشعر بأننى عكرت دمك بتذكيرى لك للوضع السياسى الردئ المتسبب فى مسح الابتسامه من شفاهنا..
حقيقة أكثر ما يعجبني في الإنسان طلاقة وجهه ، وأجمل ما في المرأة بنظري ابتسامتها ، وأفضل لغة يتداولها البشر فيما بينهم هي لغة الابتسام.
ما أصدق من قال : ( ابتسامة المرء شعاع من أشعّة الشمس) ، إنّها عنوان التفاؤل ، والأمل في الحياة ، بل هي علامة الرّضى ، والاطمئنان والفرح ، كما هي علامة من علامات الصداقة والمحبة ، وهي هناك أروع من قول الرسول صلى الله عليه وسلم : تبسمك في وجه أخيك صدقة ، أو قوله : ( لا تحقِرَنَّ من المعروفِ شيئاً ولو أن تلقى أخاكَ بوجه طَلق ).
أمّا ابتسامة المرأة ، فعنوان من عناوين جمالها ، وسبب من أسباب جاذبَّيتها ، وسر من أسرار جمالها ، فيها تجذب المحِّبين ، وتغري العاشقين ، فإذا أردنا أن نصف وجهاً بالجمال ، نقول : الضحّاك .
وقد شبَّه العرب ابتسامة الفتاة بالبرق والنور ، وجعلوها شَرَكاً قادراً على القنص .

اعجبني موضوع الابتسامه المنقوصه وتناول اتبرا بالتفصيل الجميل وبما انك كاتب متميز ولك اسهاماتك في الجرايد السودانيه فسامتثل مقولة الباشمهندس عوض الكريم مصطفي ما حا ادخل في (الزحاليق)ولكن ساشارك ببعض الابيات وليدة اللحظه
قمت لقيت في بيت حبوبتي سبحة عاج وتقروقه
وابريقا من الفخار ديمه رقبتو مترومه
وفي آخر البلد اندايه معلومه
اسرح بي خيالك وزيد وحاول كمل الصوره
كان جارتنا قبطيه تحاكي النخله في طوله
وكان كل الفريق اغبش الا حويلتو مستوره
اتبرا كان زمانك زين وفي الساعه بيقوم قطرين
لاهما يهد لا دين ولا يوم انقطع نوره
في يوم العديل والزين وفي ساعه الشديد الشين
ما بتحتاج تكلم زول عشان كل البلد اهلك
وصلاتنا الطيبه موصوله
قولت لا لا بي مهله وصوت عمالك المهره
صرير ورشك شرار احمر
غضب زمجر ملا السهله
وياما اتحدوا ديل اهله
شوف حال البلد بقي كيف
مدبج بالخداع والزيف
اسرح في الخيال والطيف
اوع تخاف وحاول كمل الصوره
ابو عابر ياسر سال البسمه نص ماله؟
وفي وادي الودار والتيه
وغضبة ريح عتي وهوجه
بقت احلامنا مدفونه وباقي الامنيات عرجه
بقت احلامنا مدفونه وفضلت امنيات عرجه

اكيد راجع..كلام.. بس ..فوق حتي اعود

عبدالرحمن محجوب يوسف كتب:
وبما انك كاتب متميز ولك اسهاماتك في الجرايد السودانيه
_______________________________

ولكن ساشارك ببعض الابيات وليدة اللحظه

مــــا شاء الله ،،،، هلا بالفرسان ،،،،،،،،نحن بعد كده ناس بنابر ســـــــــــــــــــــــــــــــــاى
بحضرة جلالكم يطيب الجلوس
ياسر كدى ادّينا من ابداعاتك
عبدالرحمن ،،،،القومة ليك وبارك الله فى اللحظة التى ولّدت هذا الابداع
نعود إن شاء الله

أما وأنك حبيبنا خالد اخر المشاركين فى هذا البوست الرائع البديع لياسر فإننى أطلب منك أن تغير قليلا فى إسم البوست
ليصبح ( إبتسامة السودانيين ) , ( فالياء هى البديل الموضوعى للواو هنا ) , هذا طبعا بعد موافقة صاحب البوست وحتى لا يقال فينا ( ناس بحر ساكت ) , رغم أن ذلك شرف كبير بأى حال ... هذا رجاء لك ( أبو صبا ) وعبء يضاف للكثير من الأعباء الأخرى ... سلمتم ...

الرشيد شمس الدين

[quote="خالد عبدالحميد
مــــا شاء الله ،،،، هلا بالفرسان ،،،،،،،،نحن بعد كده ناس بنابر ســـــــــــــــــــــــــــــــــاى
بحضرة جلالكم يطيب الجلوس
ياسر كدى ادّينا من ابداعاتك
عبدالرحمن ،،،،القومة ليك وبارك الله فى اللحظة التى ولّدت هذا الابداع
نعود إن شاء الله[/quote]

خالد اخوى وانى كمان معاك
ويابنبر جاك زول
وادى قعدة
ودام الابداع
عاطف عكود

اخونا العزيز الباشمهدس عبد الحميد-الله يطراهو بالخير..دايما ابدا ..كان مثل رشدي مهندس ولكنه يعرف الملاحة اكثر مننا ..يكتب العربية ويترجم ويرسم و..
و...
ويعرف قواعد اللغة ومتبحر في الدين وحلاق .. والدنيا ..عندما اقول له يا حميد...ده شنو يقول لي وهو يضحك سبعه صنائع والبخت ضائع..

رشدي...لفته بارعة عربيك لا زال ولكن قطعا اسامه قاصد
والا انا غلطان....
ياخوانا مافي زول بقدر يدردق حميد..اضعف الايمان تلفونو
+447833724005
وانا برة..
محبتي
تعريجة
عارف يا رشدي المعلقة اياها....مكانها هذا البوست ارجوك للتاريخ اعدها... هنا لو شمحت اخي... ما تفتكرني غلطان في السين انا قاشد
محبتي رشدي..صاحب البوست.. عبد الرحمن العزيز ..الحاج. خالد .والعزيز ود عكوووووووووود وهات يا بنبر
علي فكرة عدت وساهريكم..

رُفعت الإبتسامة وتمدّدت قليلاً خصوصاً بعد الضم اللازم فى آخرها مما انتقص من بريق
البسمة،، فأضفنا سكوناً لزوم الطمأنينة وكى تروق البسمة ،،أمّا فى أمر السودانيين فقد ازدادوا كسرةً ( وهذا كيل يسير) على كسورهم التى منعتهم حتى تمام الإبتسام،،،، وما زالوا <يُضاف إليهم> بعض عبء
كان هذا شأن جملة المبتدأ
وفى انتظار مايرى صاحب البوست عن خبر ذاك المبتدأ
انقليـــــــــــــــزى ده يا مرسى
شكرا رشيدنا على الإنتباهه
عبدوس ؛؛؛ ياخى خلى لينا البنابر ...ما نحن جارين بنبرنا فى ضل بوستاتك برضو
بركة بالعودة
اتمنى من قلبى ان يلتقط المبادرة من هو كفيل باقناع الباشمهندس عبدالحميد عيسى بالحضور هاهنا ،،،ليته يأتى
وهذه هى العوووووووووووك الاولى

يا ريت نشوف اخونا عبد الحميد عيسى (الفنان الشامل متعدد المواهب) معانا هنا.

ظهر معاى لفترة قصيرة فى الفيس بوك ثم اختفى.
ساحاول من هناك وانتوا حاولوا من جانبكم.

ونزولا عند طلب العزيز عبدوس - وهو يعلم أن طلباته لا يمكن أن ترد - تتحول المعلقة السودانية موديل 2009 إلى بوست عزيزنا ياسر هذا - طبعا بعد إذنه - والحقيقة أعجبتنى إلتفاتة عبدوس الذكية هذه ففى المعلقة الإجابة الشافية لسؤال ياسر الموضوعى ( لماذا إختفت إبتسامة السودانيين ؟؟؟ ) ...أما عن طلب الأعزاء عبدوس وأبو صبا وحبيبنا أحمد محمد أحمد لرؤية حبيبنا عبد الحميد عيسى هنا فوالله هو يمثل إضافة حقيقية لهذا المنتدى وهو مكانه الطبيعى ولكنى أعلم أسبابا ومشاغل موضوعية كانت تمنعه فى السابق ولكنها وبحمدالله الواحد الأحد قد زالت كلها لذلك أتعهد بالمحاولة الصادقة معه منذ اللحظة وفى إنتظار محاولاتكم التعزيزية أيضا .....
والان إلى المعلقة مع ودى الصادق ....
الرشيد شمس الدين

___________________________________________________________
الـفار فرفر في الفـروة
شابكنا يومـاتي فـتاوي!
كم أرنـب جوه الطاقيـة
مستني منـديل الحـاوي!
الحاجـة اليـوم تتحـرم
وينكتلو علـشانا شـباب!
تتحلل في اليـوم التانـي
ويـقولو لي ناسا حـباب!
الجـن من جنـو اتجنـن
واتعـوذ مـن الـجايات!

@@@

والهـون رفـع التلفـون
في لحظة ضرب البليـون!
والهـم واقــف طابـور
من تصبح ما نلقى فـطور!
الفــات فات لف اللـفات
فـي جـيبو الكـنجالات!
من مافـي ركب العربات
جالوصو أصبح صرايات!
والفـلة وقعت في البـير
محروسة بي كم خـنزير!
لا محاسب لا كشف حساب
لا ذمــة لا إقــرارات!

@@@

الحالـة بس زي الطـين
في جيبـنا مافيش مليـن!
وأي سـعر أصبح سعران
ما بـنقدر ندخـل دكـان!
والسـوق أصبح مطلـوق
وأي قرش أصبح ممحوق!
يا حلـيلو زمن الضـيفان
ما بنقـدر نعـزم إنسـان
على فطـرة بمـوية فول
لا جبـنة فيـها لا زيـت
لا سلـطـة لا طعمـيات!

@@@

بترولنا بى نسمـع بيهو
بس منو ما ضقنا ثمـار!
العـائد أكـبر مجـهول
وتوزيعو ســر الأسرار!
أفتــونا يا مـدنيـيـن
ورونا يا نـاس الـجيش
لى جدادنا ما نلقى العيش!
لى غنمنا مافـيش برسيم
لو جعـنا بس ناكل نيـم!
كم ليلـة القـوى بتناهو
وأصبحـنا زي الحطبات!

@@@

ورسوم راجياك بيـجاي
وجباية حارساك بيهـناك!
على راسك تدفع دقنـية
النبقة مقسـومة مـعاك!
وضرائب حولك تتـحاوم
لو تجري تلـقـاها وراك!
التـور ذاتـو يحلبــوه
الأرحم عهــد الاتـراك!
باى باى سوولا رسـوم
تحصيلا بدون إيصـالات!

@@@

الكـان مستـور الحــال
الليلـة مقـطوع الـراس!
وابليـسنا سارح بي غنمو
وغـنمو سارحات بالناس!
الفاطـي سطـرين وتلاتة
الفاطـي كـل الكــراس!
لا يحلـو الشيخ الجعلـي
لا تحـلو سيطان كـدباس!

@@@

عمّي على ضاق بيهو الحال
ساب مرتـو خلالا البـيت!
عمّي على باظت أعصـابو
وأخلاقو قطعـت كم خيت!
عمّـي على أصبـح نقناق
ومين يسمع في بلاد الواق!
عمّي على ضاق خيرا زمان
والليلـة ما شايف حاجـة!
بتـمنـى الماضـي يعـود
ويحكمنا من تاني خواجـة!
لا وطنــي نافـع لا أمـة
لا حـركة لا مـؤتمـرات!

@@@

الشافـع بس الله معــاهو
الشافـع ما لاقـي اللـقمة
الشافـع ما لاقـي دواهـو!
الشافـع أصبـح بكــاي
الشافـع أصبح ضــبلان!
كرشوه من جوه الاوضـة
طـردوه مـن الديــوان!
حرمـوه مـن أي حـلاوة
حرموه من باقـي الشـاي!
في العيد ما يشوف عـيدية
بي عينو ما يشوف لعـبات!

@@@

الطالـب طالـب مـن الله
كيف يصـبح من الشطار؟!
كل همو بقى بس في بطنو
كيف يقطع كـمين مشوار!
الجامعة يا حليل الجامعـة
لا صـفرة لا داخلــيات!
الجـامعة يا حليل الجامعة
لا مـعامـل لا مختـبرات!

@@@

الكهـربا بتسـل الـروح
بتـقطـع من دون انـذار!
الموية تقطـع على كـيفا
وتنشـف حلـق الأزيـار!
الأزمـة من دون تفـسير
ما النـيل هو أبو الأنهـار!
لو أصلو معـدوم الفائـدة
لو مويتو صبحت سجمانة
بيعـوه لشعوب عطـشانة
عبـوه فـي جـركـانات!

@@@

تلـفازنا بـوظ أعـصابنا
النـشـرة زي حفلة ظار!
بيجاي واحـدين بيكوركو
بيـهناك بـيدقو الـطار!
النشـرة مجروس متحرك
والعـسكر يلعـب بالنـار!
وعكـليتة يقـدم برنامج
طـفشـنا من السـهرات!

@@@

فنـانا أصـبح هـنـاق
بيغنى غـنا ما مفهـوم!
بـيعكر جـو أمدرمـان
بيـفور دم الخـرطـوم!
النجم الأوحد في سـمانا
مـداح بيـغـني الـراب!
يتلولح زي شافع الروضة
يطوطح من دون أسـباب!
حنينا لي حقيـبة الجـن
حنينا لي الـحكـامـات!!

@@@

الكورة صبـحت دافوري
اللاعب أصـبح كحيـان!
يا دوب قـادر يتحــرك
كيف يعني حيجيب اقوان!
ومعلق يحـرق أعصـابو
ومشجع مـسكين غلبـان!
وبـلاد ما تسوى الحـبة
تغلبنا جـوه الـسـودان!
البلعــب دون ميزانيـة
أيه يجني غير الخيـبات!

@@@

القـومي في أمـم أفريقيا
لا ريحـة لا طـعم لا لون !
فـي تلاتة غلـبونا تـلاتة
ما طلعـنا ولا مـرة درون!
ما تزعـل أبـداً يا فـردة
لو تيـمنا واقف كـراكون!
ما عـزانا الأوحد يا سادة
في نفسـنا جبناهو القون!

@@@

للهجرة الـباب مفــتوح
الرايـح انـشالله يـروح!
الهاجر من ضـيق الحـال
الهاجر من ضيق الـروح!
الهاجر من فصل جماعـي
بالجملـة أو بالقطاعـي!
كم جـيل بـدل جــيناتو
كم جـيل اتناسى قديمـو!
لو طـرتا لي آخـر الدنيا
لو رحـتا بلاد الأسكيمـو
حـتقابل زول أو زولات!

@@@

في الغـربة بتلاقي مصايب
في الغــربة بتلاقي ماسي!
دكـتور شــغال جرسون
ومهــندس شـغال تكاسي!
واحـدين ساكنين مقطورة
كان أحـسن سكنة تنقاسي!
واحـدين ساكـين الميتـة
ما شبـعو من الـصدقات!

@@@

الغـربة صبـحت ملعـونة
الغــربة صبـحت بطـالة!
لا سـفارة تنصـر مظلـوم
بي هرشة أو حتى رسـالة!
كم زول مغلـوب على أمرو
معصـور بكفـيل وكفالـة!
قــلاع يقلــع مقــلوع
لا منطـق ينفـع لا رجـالة!
واحـدين فـي مـحلك سـر
واحـدين قايميـن دفـرات!
@@@

أطفـالنا في الغربة اتولـدو
وتراثـنا مدمـوس مدكوك!
لا اكـلو ولا مـرة كـجيك
لا ضـاقو وريـق مفـروك!
لا لعـبو شــدد لا شلـيل
لا طـارو زي الماكـــوك!
لا لعـبو فـد يـوم بالطيـن
لا ساقــو عربيـة سلوك!
لا شافـو فد مـرة حمــار
لا سكـو سخـلان وديـوك!
لا حامـو في وسط السيرة
لا نامـو في بيوت بكـيات!

@@@

وحكـومة شغالة رجـالة
بالعلنـي قالت لي ناسـا
الدايـر حقــو يحـاربنا
سيبـونا من أي سياسـة!
كل حتـة مرقـت بسلاحا
كل حتة جـمعت فـراسا!
خايفـين مـن الشايفـنو
خايفيـن مـن الزنـدية!
خايفـين سـودانا يضيع
يتقســم زي كمـونيـة!
كل حـتة تتـناول كـوما
وتتحـول لي جمهوريـة!
الحـال ممكـن يتلخـبت
والواقـع يصبـح كالآتي
كل حـلة ترفـع أعـلاما
تتمـتع بالحكـم الـذاتي!
الـشايقي ينازع الجعـلي
في حـدود ما مرسومات!

@@@

وحـكومة شابكنا حلـيفة
الـوزرا يحلفـو بالـدور!
قـوات دوليــة يمــين
ما تدخـل اقـليم دارفـور!
وكم قـوة دوليـة تحـوم
في جنوبنا وجـبال النوبة!
المنطـق راح في حق الله
والجوطة قلبـت كم هوبة!

@@@

وجنوبي وشمالي اتشبكو
كل واحد بيكورك عووك!
صرتنا في ابيي مدفونة
لا جـدك هيلـو لا ابوك!
في ابيـي الموت بالكوم
في ابيـي الدم مسفوك!
في ابـيي الجن متحرك
في ابيي شيطان مفكوك!
يا ساتر اسـتر يا سـاتر
تنحـلا باخـوي واخوك

@@@

الإحـصاء قرب يا اخـوانا
ورونا كيـف حــيعدونا
الطفـشو ضعـفين الفضلو
حيـجلو مهـما يحسـبونا
كم مـرة جاطت حسبـتنا
كم مرة جاطـو وجاطونا
كم مرة قـسمونا وضربو
كم مرة جمـعو وطرحونا
شــالونا من خانة الزيرو
في خانة الماينس ختـونا!

@@@

في النـظري طالعين الاول
في العملي طالعين الطيش!
في الـشارع أجيال بتضيع
وكل كـيلو نقطة تفتـيش!
الشـعب ممنوع ما يرقص
ما يفرفش وسط الحفلات!
والكاكي يرقص على كيفو
بي عصاية وبي رشاشات!
يابـلة كيفـــن نتحـلا
شربكـنا زولن اتشـربك
واتورط جـوه الـشبكات!

@@@

مشروعنا القالو حـضاري
غرقنا في حروب وحروب!
فرقـنا شـرقاً وشـمـال
فرقـنا غـرباً وجنــوب!
لا سلـطة تنفـع لا ثـروة
ما دام ضــاع الانسـان!
يا حليـلو الكان سـوداني
يا حلـيلو الكان سـودان!
الفاتحة على ناس عايشين
لاكيـن زي الأمـــوات!

@@@

وسـدود بالـقـوة تقـوم
وتـهدد اوطـان وتـراث!
الـراي الرسمـي اتنفـذ
ما مهـم رد فعـل الناس!
الصهـين باكـر يـترحل
بالـمـوج أو بالـحراس!
القـاوم خنـقـو البـمبان
القـاوم كـتلو الرصـاص!
منصوري قمعوه ومحسـى
مافيـش لا خـد لا هـات!

@@@

بالميري مسـكون بالـهم
ناس زهـرة يشكن وحواية
غير شاينا كـيفن حنعـيش
بنـربى جـنيات وصـبايا
الكـشة كابوسـنا الـيومي
يا مـاشا فـوقنا يا جـايه
يا اخوانا كيف سـت الشاي
تتـعامل زي سـت انداية؟!
كـم مرة يانـاس كشـونا
ما خـلو لـيـنا الـحبايه!
كـم مـرة طفـقو البـراد
كـم مـرة كـسرو الكبايه
كم كشحو شايات وسـكاكر
كـم دفقـو ازبط جبـنات!

@@@

الدولـة الشمولية اوانطـه
والـكورس بيقـول آمـين
الـدين قلبـوه سـياسـة
حكـمـونا تجـار الـدين
أي فـشل سمـوه البلوى
بس ميـن حيحاسب مين؟!
وجهلـول ادوه حـصـانة
تحمـيهو لى يـوم الـدين
البـنقد حكـمو التكـفـير
ينفـوه من المــــلات!

@@@

إسـلامي وكمان نصراني
فرعونـي ود غابة كمان!
ســودانا متـحف أديان
ســودانا متحف أجناس!
بتفـرتك لـو اتعاليــنا
ومـسكنا جن الطـغـيان!
بتـوحد لـو اتصـافيـنا
وراعـينا حقـوق الإنسان
الحـل واضـح يا اخوانا
مـش محتاج لى تنظيرات!
يـلزمنا التنفـيذ العمـلي
يلزمنا حــسن النـيـات

@@@

وحكومـة اكتر من فاشلة
والـشعـب زي المافيـش !
حكمـوهو باقسى طـواري
لكـنو ضارب التـطنيش !
قمعــوهو صهيـن ما ردا
رفوهو رضـى بالـتهميش !
في الـشارع قبـلان يتفتش
ويتفـرج على كل تفـتيش!

@@@

أوكامـبو بقى اشهـر زول
وسيـرتو في كـل لسـان !
عايز يقبـض الريـس ذاتو
ويخـتو جــوه الليمـان!
اوكامـبو رقصـنا السامبا
أوكامـبو نســانا بطـان!
بالحكــمة لوما حليـتوها
بتـعاقـب كل الـسـودان!

@@@

أوكامـبو من قدم طلــبو
فرتكـنا كيـمان كيــمان!
واحـدين طايرين بالفـرحة
شايفنــو احـسن ما كان!
واحـدين هايجـين فايرين
شاتمـين أوكامبو كـمان!
واحـدين عايزين الحـكمة
شـان يسلم كل السـودان!

@@@

أوكامـبو مـن قام اتـجنن
جنـنا وجـنن نــادوس!
عيـشنا في أكـبر هـرجة
عيشـنا فـي كم كابـوس!
وحكـومة تتحــدى العالم
بخـطاب بالـجن ملبـوس!
والحـل في الحـل السـلمي
المخرج في سـاس يسوس!

@@@

الريس اصـــبح مطلوب
كايسنلو نـسوان راجلات!
ما بنفـع غزغيز الـريش
ما بتنفـع كل الجـوطات
ما بنفـع طـرد البيـغيثو
ما بنفع هرش الخـواجات
ياريس بس اركـب عجلة
ما تفكـر في الطيـارات!

@@@

القـالو عقـلاني وفـاهم
في راسـو اصـبح عيان!
بيقـول قبــل الإنقــاذ
كان بشحد شعب السودان!
يا راجل بس عاين حـولك
اتلـفت فـي كـل مكـان
ملايـين عايشـين باغاثة
في الفاشـر في امدرمان!

@@@

الصورة الكاملة بتزعـجنا
وتفصـيلا اكبر ازعـاج!
تفـكيرنا دايـماً مشـلول
فوق راسنا سيف الحجاج!
وجـهتنا دائماً مجـهولة
رؤيـتنا ملـيانة عجـاج!
الأمـة ساكتـة بتـتفرج
ومثقـف ساكن الابـراج!
ومصيرنا معلق بي شعرة
وقعـتنا صبـحت وقعات!

@@@

نـادوس يا رمز الطـيبة
نـادوس يا وش الخـير
نـادوس يا سكة عديلـة
نـادوس يا خـط السـير
خلصنا مــن الكـابوس
انـقذنا مـن الـكســير
زودنا ببصارة وحـكمـة
شان نبقى يوم بكرة اخير
ونتحـرر مـن الأوهـام
ونتخارج مـن الـورطات
___________________________________________________________

رشدي..شكرا
عبدوس

الرشيد شمس الدين عبدالله كتب:ونزولا عند طلب العزيز عبدوس - وهو يعلم أن طلباته لا يمكن أن ترد - تتحول المعلقة السودانية موديل 2009 إلى بوست عزيزنا ياسر هذا - طبعا بعد إذنه - والحقيقة أعجبتنى إلتفاتة عبدوس الذكية هذه ففى المعلقة الإجابة الشافية لسؤال ياسر الموضوعى ( لماذا إختفت إبتسامة السودانيين ؟؟؟ ) الرشيد شمس الدين

______________________________________________
الشافـع بس الله معــاهو
الشافـع ما لاقـي اللـقمة
الشافـع ما لاقـي دواهـو!
الشافـع أصبـح بكــاي
الشافـع أصبح ضــبلان!
@@@
للهجرة الـباب مفــتوح
الرايـح انـشالله يـروح!
الهاجر من ضـيق الحـال
الهاجر من ضيق الـروح!
الهاجر من فصل جماعـي
بالجملـة أو بالقطاعـي!
@@@
الغـربة صبـحت ملعـونة
الغــربة صبـحت بطـالة!
___________________________________________________________

شويه تفاؤل يا اخونا وانشاء الله وباذن الواحد الاحد نعود تانى للبيت الكبير وتعود إبتسامة السودانيين كااااااملة الدسم .

ومع كلمات استاذنا المبدع الرائع التجانى الحاج موسى
......................................
طفل بصرخ فى البوادى
دابو فى سن الفطام
طفل عز الليل ينادى
يلا نديهو الطعام
***
وقبلما نديهو لقمة
نفتح الاحضان نضمو
شان يحس طعم الأمان
شان نعوضو فقد أمو
وكل بيت نفتح لى بابو
وكل واحد يبقى عمو
وترجع الضحكة لعيونو
وينسى حزنو وينسى همو
قيمة الأوطان أصيلة
فينا من زمنا قبيل
محنة بتعدى وتزول
مافى أبدا مستحيل
وبالعزيمة تهون صعاب
والعسير يصبح يسير
ويرجعو الغايبين سنين
تانى للبيت الكبير
...................................
عاطف عكود