عدنا والشوق مطر

االإخوة الحبّان في كل مكان ... ليكم والله وحشة لاتوصف وأشتاقكم فردا فردا وبوست بوست ... عدت أمس بعد إجازة في الوطن الحبيب إمتدت لشهر ولكني لست أدري من أين دخلت ومن أين خرجت هذه الإجازة التي تحتاج فعلا لإجازة من عناء التعب والشقاء ولقد آمنت أن أحبابنا ناس أحمد محمد أحمد يستحقون جائزة الصبر الكثير والجميل ... وطبعا ـأكيد أحمد هسع بيقول لي :- (عشان تاآاااااااااااااااامنو ) .
أول ملاحظاتي أن معدل الوفيات التي حدثت في عام غيابي وكان لزاما علي مواصلة أهلها كما تعودت سنويا قد إرتفع علي الأقل لخمسة أضعاف ماكان يحدث سنويا !!!! هل هذا يعني أن القيامة قرّبت أم أن قيامة أهلنا في السودان قد قامت فعلا والناس هسي بيعذّبوا فيهم .. لأنه لاأعتقد أن عذاب القبر أو مابعده سيكون أكثر إيلاما علي الأنفس مما يحدث حاليا في الوطن وغايتو أهي دي بروفة بيان بالعمل ونتمني أن تخفف عن أهلنا من عذاب الآخرة .. وإذا لم تكن القيامة قرّبت فأنا متأكد أن الأمور لو سارت بهذا المعدل فحين تقوم القيامة فعلا فلن تجد في أرض الوطن يوم الحساب سوي البشير وبطانته ويالبؤس العذاب حينها ..
أرسل لي اليوم صديقي محمد سوركتي مايلي وقد إخترته لكم لحثكم علي التواصل مع مجموعة شارع الحوادث التي تعني بالحالات الشبيهة عل ذلك يخفف من الآم أهلنا ك-

اول امس كنت فى زياره لمستشفى الخرطوم لمعاودة احد الاصدقاء ...وانا فى قسم حوادث العظام كان بجوارى صبى فى سن 14 سنة ,,وهو مصاب فى حادث حركة ...لفت انتباه الناس بصبره ...وجلده ....وكان مصاب اصابة واضحة فى رجلة ويده اليمنيين ..الا ان دماء كثيرة غطت صدره ...وما اعتقد كان معاهو مرافق ,,,سألت الدكتور قلت ليهو الزول ده طول راقد ..ومافى زول شافو ...قال لى والله نحن قلنا ليهو امشى اعمل صوره ...قلت ليهو يعمل صوره كيف براهو ..مابقدر يتحرك ...قال لى يا استاذ لوعاوز تساعدو امشى شيل الورق واعمل ليهو الصوره ...الورق مع الشرطة بره ..مشيت لى ناس الشرطة ...قالوا الورق مع الرقيب بجى هسة ...رحعت للدكتور ...قلت ليهو الورق مع الرقيب ..والزول ده بنزف ..قال لى ياخى انا وزالله متعاطف معاهو لكن اعمل شنو ..رجعت ومعى شخص اخر للتخفيف عن الشاب ...وجدته مغطى (ذهب الى رحمة مولاه)...................

ألف سلامه ياهندسه والفين سلام، بركه بالوصول، نسال الله جبر كسر الوطن، زي الحال ده لا كان لا حصل كما قال عم عبدالرحيم، تحياتنا ونتمني عوده الغائبين بعد انتهاء موسم الأعياد والإجازات

عودا حميدا يا باشمهندس و حمدا لله على السلامة و إقامة طيبة إن شاء الله
دى حكومة الإعجاز و الحريق بالجاز
 نسال الله السلامة
 سلامى و تحياتى للجميع
عثمان بخلن

مُساهمة من طرف عبد الرحمن الزين2 في السبت نوفمبر 16, 2013 12:04 am
.



يا   اخوانا  والله  الكلام  ده  عيب...عيب...عيب...انتو عاوزين  رشدي البرتكانه   يشمت  فينا...وامكن  عثمان بخلن  يقول  شوفتو...اول ما مشيت البحر الجماعه نامو...ود  فراج..انته دايما الدينمو...البطاريه نزلت والا المدام ادتك العين الحاره  يا  المنبر  يا...... ود  عكود..شنو يا اخ  عاوز  تقول  فشلنا....  بعدك.. الجمل..ما  قصرته  لكن  زيد الابنص...خالد ود ابرق  بطل تلغرافات..  ود كرار..زا~ر الليل..برضو زياراتك اخر الليالي تسعدنا..حماده ما قاعد يقصر  لكن مالاقي مشجعين حتي لي اهلي والا مريخ شندي ما عارف...الاء الغالية  طلت وإختفت...اما ناس كندا ما قاعدين يقصروا لكن الملاعب فاضيه..زي مواصلات .....

والله عيب...
ادخلوا...علي فكره الدخول مجانا  لكن بعد كده الغياب والخروج بدخلكم في احراجات..
قلته لي عندو  نزله  يا حماده  الف  سلامه  يارشدي ان شاء  الله عدوينك  رغم انو ما عندك اعداء..لكن أكل ناس محمد صالح والسحوق وقاشوره  ما بنفع معاك  انته بتأكلك دكتوره بت عز..بتوزن  كلو جرام.  ومحتوياته....بس انته اجري سك لي الشطوط...الشطوط دي ما عندك ليها بطن   رشدي..اصحابك ديل كانو معانا في الجاهليه وبطونهم  عندها  مناعه   تفرم ام فتت وكبدة الإبل النيه  ..لكن انته حاشاك..
المهم  المنبر  نايم  نوم..
عليك الله طل علينا  وبستف لينا الجماعه كلهم..
لن نسمح ان يضمحل-حلوه  بيضمحل دي- هذا المنبر او يتلاشي..
والله علي ما اقول شهيد..
عبدوس..من القلب الي الكي بورد..لن اراجع ما  شخبطت في بوست العزيز  ابراهيم..مع تقديري لظروفه....


عاد  الحبيب المنتظرعودا حميدا  مستطاب
الف حمدا  لله علي السلامه   بس طمنا  علي اللوزات  لانو البرد قالو كان  شديد  حاره الشطه والا جراي الحصان...الاجابه الصحيحه  تقرأ سورة البقره بالمقلوب..
نخليك يا رشدي تاخد نفس بس ما  تتطول..
محبتي واحترامي وتقديري الذي تعرف..
عثمان عبد الرحمن  ليك وحشه   نورت مطرحك..ودفراج شايفك من بعيد...خلدي..ما قلنا ما دايريين تلغرافات..معزتي..حماده الجماعه وصلوا...بس برضو خليك ماسك الضمان...

حمدا لله على السلامة و عودا حميدا يا الرشيد.
 
منتظرين انطباعاتك عن بلدنا الحبيبة و ملاحظاتك عن التغييرات التى لاحظتها هذه المرة.

osman abdel rahman كتب:عودا حميدا يا باشمهندس  و حمدا لله على السلامة و إقامة طيبة إن شاء الله
دى حكومة الإعجاز و الحريق بالجاز
 نسال الله السلامة
 سلامى و تحياتى للجميع
عثمان بخلن

وعاد بخلن أيضاً ، يا مرحباً يا مرحباً ، هلموا يا أحبه نعيدها سيرتها الأولي

الأحباب خالد , عثمان بخلن , عبدوس , أحمد
لكم وللمنتدي والله وحشة لاتوصف وأسعدني جدا مروركم الأنيق كالعادة ولكني أفتقد الغائبين وأرجو الإطمئنان عليهم بقيادة عاطف القوز , ودكرار , ود فراج , ود راشد ,كركب , الجمل , آلاء , أبراهيم خير , بدرالدين , بابكر , ووووووووووووووووووووووووووووووووووووووووووووووووووووووووووووووووووووووووووووووو
وعووووووووووووووووووووووووووووووووووووك ..

سنرجع يوماً إلى حينا

ونغرق في دافئات المنى

سنرجع مهما يمر الزمان

وتنأى المسافات ما بيننا

فيا قلب مهلاً ولا ترتمي

على درب عودتنا موهنا

يعز علينا غداً أن تعود

رفوف الطيور ونحن هنا

حمداً لله علي سلامتك يا باشمهندس الرشيد ..

كبارنـا ..الكابتن عبدالرحمن الزين , والكابتن احمد محمد احمد , وعثمان بخلن , وعاطف , وخالد , وإبراهيم خير ..وبقية العقد الفريد

أما ترون كيف هو وجودكم بيننا مهم ...؟؟ وأرجو أن يحتذي بكم كل بقية الكبار , ويعرفوا أنفسهم بالشباب الطامحين إلي حياة جديدة خالية من الحزن والألم والحرمان .. ما أقسي القصة التي ساقها حبيبنا الرشيد والتي تحكي عن كيف قتل إنصراف الناس ذاك الشباب النازف ..لا حول ولا قوة إلا بالله

هل نعيش حياة تخلو من الإهتمام بالآخرين ..؟؟ هل تجمدت مشاعرنا فصرنا جماداً لا يحس ولا يعي..؟؟ وهل نكرس لحياة يأكل فيها القوي منا الضعيف.. ؟؟

إن دعامة الأمن هو صلاح الحياة الإجتماعية بين الناس , ودعامة الأمن هي إطعام الجائع , وهو مسح الدمعة عن المحرومين , وإكساء العاري , والتبسم في وجه الأخ , ونبذ الفرقة والإستعلاء علي الناس , نحن سودانيين وكفي , لا يفرق بيننا إختلاف الدين , أو الثقافة , أو القبيلة , فمرحباً بالجميع دون تمييز , وكفي بالمرء أن يكون محباً للآخرين.

طلتك بالدنيا يا الرشيد ..

مرحبا بحضورك الأنيق كالعادة حبيبنا ود فراج وقد كنت أمنّي النفس في إجازتي للقياك والتعرف عليك عن قرب ولذلك حضرت تأبين حبيبنا الراحل المقيم أسامة مكي في داره العامرة رغم فقده وذلك بمناسبة مرور عام علي رحيله الفاجع وكانت النفس تهفو للقياك هناك ولكني علمت أنك بالإسكندرية ولكنك شاركت في التأبين بكلمة رصينة ألقيت نيابة عنك وكانت إحدي كرامات الراحل أن تحكي عنه وأنت لم تكن تعرفه أو رأيته حتي إلا من سيرته العطرة شأن كل الصالحين ...
معرفة الناس كنز ومعرفتك من أكبر كنوز الدنيا .. سلمت حبيبنا وطاب أسامة في أعلي عليين مع الشهداء والصديقين شأن كل الخالدين ولكم مودتي التي تعرفون ..

أشعر بالإطراء المتناهي وأنا أقرأ كل تلك الحفاوة من القطب البحري الرشيد شمس الدين ...

أتمني من الله أن أكون عند حسن ظنك يا أخي الرشيد ..

كنت أتمني أن تكون مساهمتي في حفل التأبين أكثر من كلمة أقولها وقد أملاها علي ما رأيته من حبكم للفقيد , والناس لا تجتمع في حب أحد الا أن يكون قد حباه الله بشيء مميز. فقد قال الله تعالي لسيدنا موسي ((وألقيت عليك محبة مني ولتصنع علي عيني)) .. صدق الله العظيم. ومعني الآية أن كل من يري موسي يحبه ,وهذا ما حدث لإمرأة فرعون وفرعون من قبلها. فقد أحبوه منذ النظرة الأولي

أما عن الفقيد أسامة (رحمه الله) فإن الأمانة والتأمل تحتم علينا أن نكتب في شأنه , وما رأيته من عزيمة الجمع في الأسكلة مع الحبيب عاطف كان ملفتاً للنظر , ولفت نظري وسمعي كلمة قالها المهندس يعقوب في عجالة لم يلتفت لها الناس , قال يعقوب مخاطباً الجمع : والله لو تعلمون حلاوة زيارة اليتامي وتفقد أحوالهم ومواساتهم لوجدتم كل المتعة في الأمر .. وقد قالها بكل جوارحه , فأدركت مدي عمق تأثير الفقيد أسامة في المقربين منه من الرجال.

أعانكم الله ونحن علي أثركم في مسح الدمعة عن اليتامي والمحرومين ... جمعنا الله بك يا أخي الرشيد في كامل صحتك وبهاءك.

الاخوه الاحباء.نحنا سعداء بعود حبيبنا الباشمهندس الانسانى الرشيد سالما.كما نرجو ان يسلم الله اهلنا فى السودان من ماهم عليه .والله المستعان.ودام الله التواصل بيننا