عدنا والعود احمد

اللهم ارحم موتانا واشفى مرضانا واجمع الشمل نرحب بكل الاخوه الاعضاء الجدد الهم زد وبارك والشوق بحر
عاطف صديق عكود

حمدالله على السلامه ،، بركة العدت وان شاء الله ابوبكر وسوكارنو يظهروا والآخرون،،،
جديد المنتدى فى الاسبوع الفات ....
امس 22 تمانية اكمل المنتدى 4 شهور وحقيقة الاسبوع الاخير كان حافل ما شاء الله ،
ظهروا أخوة اعزاء ومعدل التسجيل زاد شوية وهذا من فضل الله،،،
نقدالله الامين، جمال منصور، حامد محمد حامد، عبدالرحمن الزين، جعفر قريش واخ منتظرين منو اسهامات سجّل باسم
mu7ammad1986 ياريت تعرفنا اكتر يا محمد، ولا انسى أمل كرار ابراهيم فرح (حسب ما قيل لى)
احداث جانبية،،، عود محمود من العزيز عاطف صديق،،،،
واختفاء مؤقت من امجد كرار،،اجازة وسودان وجرى شديد اظنو فى زقاقات بحرى
ونعود ان شاء الله
ودام الود

ألف مرحبا حبيبنا عاطف صديق ... البيت محروس (وسيده ) يكوس ... جبر الله كسركم وأحسن عزاءكم
وجعلها اخر الأحزان ...فعلا العود أحمد ... ونعتذر على الدخول ( الضفارى ) قبل استئذان أصحاب البيت ..... لك الود الكثير ودمت ....

الرشيد شمس الدين

اهلا...بالدماء الحارة...الشبابيه مرحبا بعاطف و انشاءالله ما تكون هلالابى ذى عمك ملك التغطيه(التقر)...والله انا و اخوانى الكشاف(رشدى و آوى).نفسنا انقطع مع المنتدى وفى انتظاركم خصوصا ما فوق الخمسين اللياقه بتكون تعبانه شديد.فى انتظار مساهمتكم خاصة وانتم تستمعون بالاجازة السعيده بالسودان العزيز.

الاخوان الاعزاء خالد ,الرشيد,سيف والله سلامات

اخونا خالد سلمك الله ومشكور على اخبار جديد المنتدى واكيد الاعزاء نقدالله الامين، جمال منصور، حامد محمد حامد، عبدالرحمن الزين، جعفر قريش و mu7ammad1986 اضافة واثراء للمنتدى .

الاخ العزيز الرشيد البيت بيتك من غير استئذان ...... وخليك ( ضفارى )على طول .

اخونا سيف...... من ناحية هلالابى صدق هلالابى اكتر منو!!!! ..... اما حكاية ...الدماء الحارة...الشبابيه و ما فوق الخمسين ...والله مافى طريقة الا نصفر العداد و انتو الخير والبركه .
عاطف عكود

عاطف العزيز وطبعا من المفروض ان اقول ابني العزيز لكن يا عاطف عمك التقر علمنا انو ما نجيب سيرة العمر دي المهم مرحب بيك عائدا ومرحب بي متطفلا في غياب صاحب الدار لكن اهو ابننا رشدي ما بريح - شوفته كثير التلج ده كيف يا عاطف- المهم اتمني اني ما اسرح لكن بما ان لي صداقة عظيمه مع عمك بعتبروني عندكم واحد من الاسره رغم انو نحن برضو نسايب وود عمكم معرس مننا وحضر معانا حولية جدنا الشيخ عبد الرازق ابو قرون بود بانقا - مش حوش بانقا- والتي حضرها خليفة ام ضوا بان- ما علينا ما قلته ليك خايف اسرح- في احد الايام حضرت الي الخرطوم وطبعا ما كان في موبيلات وعشان اقابل التقر وللاخوه التقر ه محمد صالح عبد الله المهندس الهلالابي واحسن زول بلعب كونكان في السودان حسب ما قال رشدي وعمك ده انا حافتح ليه بوست خاص- انا افتح لي منو والا اخلي منو- والله ورطوني وو رطوا روحكم- ياخي حاقول الحكايه المهم قابلت التقر مع العم العزيز سيد احمد وطلعنا عملنا شوية مشاوير قام صالح قال لي اسمع ما نمشي نتغدي عند ناس سيد احمد قلته ليه مافي مانع المهم م سودان لاين اتصل بيهم وقال ليهم عبد الرحمن الزين حيتغدي معانا.... وصلنا البيت في المنشيه
حوالي الثالثه بعد الظهر وحاتك يا عاطف اشوف ليك صفره ممتدة لاكثر من اربعه امتار ما بقدر اقول ليك شنو الفيها لكن انته اسالني شنو المافيها وبعد التحايا والمجاملات من الاسره الكريمه عرفته سر الصفره العارمه فعمك الوقت داك كان خاطب بت علي الزين.......... وبي جاه الموك نلوك... معذره هذا لا ينفي كرم ال عكود فكم استمتعنا ولن عودة لكرم ال عكود حفظهم الله مودتي يا عاطف

الاخ الفاضل عاطف...ود حلتنا...باعتبار الريده لحى الشهداء...

انا حمدلته ليك السلامه فى بوستك الرئيس...بس الظاهر المشرف خالد( ود الاستاذ) دمج البوست القديم مع البوست ده....

حمد لله على السلامة...وتقبل الله عزائكم....

والله انا برضو كنت فى اجازه فى السودان لمدة 20 يوم..

الاجازه فى السودان بقت ذى امتحان الشهادة ماترفع راسك من الورقة لقايت مايقول ليك المراقب انتهى الزمن...

الأخ عاطف,تحياتنا وأشواقنا,ألف حمدللة علي السلامة,وأحسن اللة عزائكم,ونرجو منك حتة لكذة لحبيبنا التقر ملك التغطية للظهور في الكتيبة
وألف مرحبأ ومرحب بالأخ عبد الحفيظ ألينتو في دارة ووسط أهلة

Atif Siddig Akoud كتب:اللهم ارحم موتانا واشفى مرضانا واجمع الشمل نرحب بكل الاخوه الاعضاء الجدد الهم زد وبارك والشوق بحر
عاطف صديق عكود

عدنااليوم و بحمدالله للتواصل من الدوحه!!!! .
ودام التواصل من كل بقاع المعموره وتانى الشوق بحر
عاطف عكود

حمدا لله على السلامة وتحياتنا لكل الاخوة بقطر.

مشكور كابتن احمد سلمك الله من كل شر , وتحياتك وصلت لناس الدوحه .
عاطف عكود

حمدالله ألف على سلامة العودة حبيبنا عاطف القوز وأعتقد أنك يادوبك محتاج لإجازة للراحة من شقاء إلإجازة فى الوطن الغالى ....نيابة عن كل الزملاء لك جزيل الشكر على عمق المواصلة فى السودان وقضاء حوائج الناس وتمثيلنا خير تمثيل فى كل الواجبات الضخمة وعودة المرضى من زملائنا - شفاهم الله . لا عدمناك عاطف وأنت تقوم بأعباء تنوء عن حملها الجبال الراسيات ..... لك الود حبيبنا والتحايا موصولة لكل الزملاء فى دوحة الخير ....

الرشيد شمس الدين

تحياتى للسأل منى وما سأل ذاتو!!
حمدللك بلسلامه...
عدت يادوب للراحات وتفكفكته من ابو الضر انا البفكنى منو شنو؟
التاشيرة قالو جاهزه بس فى انتظار الدعوه بتاعت شهر 8
يعنى قربنا نتفكفك.....يا فرده
والنفس تتفتح للمناكفات...شايف فاتنى كتير...لكن بلحقكم...
ولنا عودة كان ربنا سهل.

أبن الخاله عاطف,تحياتي وأشواقي وألف حمدللة علي السلامة ... تحياتي لكل الاخوه بقطر وقول لي بنبوني عاوزين تلفونه الجديد

الحبيب ود السيمت تسلم من كل شر, وتحياتك وصلت لنصف الاخوان بالدوحه لانو النصف الباقى +1 فى ربوع سودانا الحبيب مع موسم الاجازات .
ودام التواصل
عاطف عكود

الاخ عاطف ..كل عام وانتم بخير
وحمدا لله علي سلامة العودة ...وانشاء الله سيدوم الوصل علي مساحة المنتدي المتقد بحضوركم ومشاركاتكم ...وياهلا