رسالة من عضو جديد (برمائى)

m
الاخوة اعضاء المنتدى دون فرز
التحية والاحترام نذفها لكم ولمنتداكم العامر باذن الله والذى اسعدنا بعد طول غياب وانقطاع عن اخوة اعزاء واصدقاء افاضل نكن لهم المحبة والاحترام لما وجدناه منهم طوال سنوات الخدمة بالخطوط البحرية التى جمعتنا برا وبحرا (طبعا انا من ناس البر لكن كنت اكثر اختلاطا وصداقة بناس البحر ..يعنى برمائى)
نسال الله ان يوفقنا جميعا فى التواصل دون انقطاع .
وارجو فى هذه السانحة ان ارحب بكم جميعا وحقيقة لقد سعدت كثيرا بهذا المنتدى خاصة عندما ابحرت فى ذكريات الاخوة عاطف عكود - خالد عبد الحميد - الرشيد شمس الدين - جنيدابى (جنى) - عبد الرحمن الزين - الينتو - عبد الحميد عيسى * وسوف نتواصل متمنيا ان ينضم الينا بقية الاصدقاء والله المستعان

اخوكم/مبارك (كركب)

يالف مليون مراحب بالاخ الاديب الفنان الشاعر مبارك عصملي ابن توتي البار وعاشق بورتسودان والبحر وناس البحر..هذا فعلا دارك ومطرحك فلا تحرمناوهذا الجمع الكريم من ابداعاتك..ولي قدام زي مابقول ود عكود..
الف مراحب بالباشمهندس مهند وتحياتنا عبرك الي القابضين علي الجمر في الميمونه ابدا- باذن الله -الغاليه النيل الابيض.. اتحفونا واسعدونا علي امل ان نضحك ونكف عن البكاء..وابقو داخلين علي قول العزيز ابو صبا
عمكم عبد الرحمن

اشكرك كثيرا على ردك الجميل وتعابيرك الحلوة وما خيبت ظنى كنت اتوقع منك هذا الرد
وياحليلك وحليل انتورب وناسها الطيبين طبعا تانى ما اظنى اعبر البحر خلاص اتملينا عيال والحمد لله ..وحقيقة مشتاقين ليك يا ابو عابر ولكلامك العسل ودمعاتك الحنينة التى تعبر عن دواخل انسان طيب رزين لك كل الود والاحترام .
مبارك

حبيبنا الغالى كركب ( المكركب ) ..
أشرقت الأنوار وهلت البشائر والله بقدومك الميمون عزيزنا كركب لأنك بحق من جيل الزمن الجميل لسودانلاين ... سعدت والله بالطلة البهية رغم أننا نحتاج أن نرى صورة حديثة لك نشوف فيها ماذا فعلت بك الأيام ؟؟؟؟؟؟
بالمناسبة ياحبيبنا عبدوس , كركب يمثل خزنة أسرار أيام مابعد الزمن الجميل لسودانلاين ولذلك نتوقع أن نسمع منه شهادة حقيقية لمدى الدمار الذى أحدث فيها فى زمن المحوقلين الردئ وأنا أعلم حقا كيف حاول أن يقف أمام الطوفان
فى زمن عز فيه قول الحق .... لذلك نتوقع أن نرى منه الدرر ...
مرحبا بك( كراكب ) العزيز و بيتك ومطرخك ونحن فى الإنتظار ...

الرشيد شمس الدين

بعدما نسينا الجراح بعدما الشوق استراح
بعدما فكرنا ننسي ننسي ماضينا اللي راح
عدّت ادميت الجراح عدّت ليه احييتها ذكري
بعدما ضيّعت عشره بعدما ضيّعت جيره
حتي الصّباح ما عاد صباح والليل بكي وحكي قصتك
اما القمر لبس السواد واعلن حداد يوم فرقتك
يا حبيبي تعال تعال نعيد الماضي اللي راح

اتخيلوا القصيده دي انا بتذكرها من ايام الثانوي وهي قصيده طويله من كلمات اخونا مولانا جمال النيل ، وقد
قام بتلحينها واداءها الاخ المبدع مبارك ( كركب ).
اذا كان كركب الانتو عرفتوهو ايام الزمن الجميل بسودان لاين فكركب بتاعي انا من ايام الزمن
الجميل بحي العظمه بورسودان ايام الساحه الشعبيه والدار والمولد ونادي التحدّي والشعله والمارد
والتقر وعميره والصيني ووش القطر وحسن القوصي وناس احمد طيره وحسن عقده وشريف ود
ابوعقرب والكوبري وسقاله هارون ومخبازه هارون بديم سواكن ولو قعدت اكتب من هنا ولحدي
الصباح مش حأخلص .
عليه فترحيبي به يختلف عن ترحيبكم حيث اننا اتربّينا سوا منذ نعومه اظافري وخشونه اظافره ،
وانا اعرف عنه ادقّ التفتصيل الاسريه منذ الطفوله ...وعندما نزل المعاش ( الاجباري ) كان اكبر ابناءه
في الروضه .
الف مرحب بيك في المنتدي والله المنتدي نوّر وفي انتظار الدرر وبدخوله الي المنتدي فقد انفتح
لنا باب جديد لن ينتهي من الحكاوي والقصص العجيبه .

اخوك جنّي

عبدالمنعم جنيدابي كتب:بعدما نسينا الجراح بعدما الشوق استراح
بعدما فكرنا ننسي ننسي ماضينا اللي راح
عدّت ادميت الجراح عدّت ليه احييتها ذكري
بعدما ضيّعت عشره بعدما ضيّعت جيره
حتي الصّباح ما عاد صباح والليل بكي وحكي قصتك
اما القمر لبس السواد واعلن حداد يوم فرقتك
يا حبيبي تعال تعال نعيد الماضي اللي راح
اتخيلوا القصيده دي انا بتذكرها من ايام الثانوي وهي قصيده طويله من كلمات اخونا مولانا جمال النيل ، وقد
قام بتلحينها واداءها الاخ المبدع مبارك ( كركب ).
الف مرحب بيك في المنتدي والله المنتدي نوّر وفي انتظار الدرر وبدخوله الي المنتدي فقد انفتح
لنا باب جديد لن ينتهي من الحكاوي والقصص العجيبه .
اخوك جنّي

قلت ليكم عزيزنا كركب اضافة لمنتدانا العامر وخير شاهد على ذلك كلام الغالى جنى اعلاه , وكلام العزيز عبدالرحمن الزين (الفنان الشاعر ابن توتى وعاشق بورتسودان ) وكلام حبيبنا الرشيد ( بانك من جيل الزمن الجميل ) الف مرحب بيك اخونا العزيزالبرمائى شديد مبارك (كركب ) فى دارك ودون شك انت اضافة للمنتدى وفى انتظار الكثير المثير من دررك
ودام التواصل
عاطف عكود

الاخوة الاحباء
الرشيد – جنى وعاطف وجميع الاعضاء فى انحاء المعمورة دون فرز لكم اجمل التحايا العطرة مشبعة بنسيم البحر الاحمر
من بورتسودان (الميناء الام) حيث زكرياتكم الخالدة باذن الله .

اخى الرشيد .. الصورة جاية انشاء الله لكن قد اكل منا الدهر وشرب واشتعل الراس شيبا .. كيف ولا وقد عاصرنا الطوفان
وبعده الحرمان من الغالية (سودانلاين) المبكى عليها .. وقد شائت الاقدار ان نرى بام اعيننا مدى الدمار والخراب الذى الم بها
بل ساقتنا الاقدار بان نقف ونتصدى للطغيان .. حتى اصابنا الغثيان .. وكظمنا الغيظ مما راينا من ظلم وبطش من ادارات توالت
بعد غياب الابرار والحادبين المخلصين من ابنائها .. ووجدنا انفسنا مع الفئة الباغية من الزملاء الحاقدين .. نتصارع معهم لانقاذها
ولكن دون جدوى فقد كانوا اقوى ويستمدون قوتهم من الدولة فى غياب الرقابة الحكومية التى انشغلت بهموم البلاد الاخرى .. وقد كذ بونا وصدقوهم .. واتهمونا بالمعارضين .. وهم لايعلمون مدى انتمائنا لها واخلاصنا الذى استمد من حبنا وعشقنا لها .. تجاوز العقدين ..لانهم فى حقيقتهم اصحاب مصلحة استغلوا مواقعهم السياسية فى تضليل الحكومة .. وللاسف ينتهى بهم المطاف بفصلهم بعد ما يتبين للحكومة خرابهم ودمارهم لها .. لكن بعد تشويه سمعتها ..وهكذا توالت الادارات وكل واحدة تلعن اخراها .. حتى انهارت سودانلاين
تماما .. اخى الرشيد ماكنت انوى الخوض فى هذه الماساة وقد تبين اخيرا الحق من الباطل. ولكن بعد خراب مالطا ..
ولو قدر لى ان اخوض فيها فاسال الله ان اكون صادقا وحريصا من التجريح والاساءة لانها ليست من شيمنا .. ويكفى انهم اساءوا انفسهم بانفسهم ... وان اتناول الحقائق بومضوعية واتجرد من الذات .. ولن اسمى احدا .. بل بالاشارات حتى لانسىء لاحد ..فمن ظلنا فالله احق به ...وربما فى تبين الحقائق وتشخيص المرض وتحيله تكن فائدة لاجيال جديدة موعودة بسودانلاين جديد..
اخى جنى .. حلوة نعومة اظافرك .. وخشونة اظافرى .... سوف احكى لهم يوما شكلتنا فى السبعينات ..خليها يومين تلاتة ونعود .. ولا احكى ليهم يوم جيتك من انتورب وانت فى مروى و (روتردام)قلت لى انا ضابح ليك تعال ولقيته منقة من غرب افريقيا قدر الشمامة (قلب التور)..

ونتواصل باذن الله
اخوكم/كركب

مبارك عمر عصملى (كركب) كتب:الاخوة الاحباء

اخى جنى .. حلوة نعومة اظافرك .. وخشونة اظافرى .... سوف احكى لهم يوما شكلتنا فى السبعينات ..خليها يومين تلاتة ونعود .. ولا احكى ليهم يوم جيتك من انتورب وانت فى مروى و (روتردام)قلت لى انا ضابح ليك تعال ولقيته منقة من غرب افريقيا قدر الشمامة (قلب التور)..

ونتواصل باذن الله
اخوكم/كركب

الاخ الحبيب كركب
كنا عايزين نخليك شويه لحدي ما تروّق في المنتدي ،، ولكن بما انك ابتديت وعلي ذكر المنقه هاكم
دي :
جاءني الاخ مبارك في ميناء روتردام للمبيت معنا بالباخره . وفي الغرفه احضرت له سبت مليان
منقه كما وضعت بجانبه اناء للراجع من المنقه . بدانا في الونسه والدردشه وصاحبك واقع ليك في
المنقه ضرب شديد . بعد الانهاء رفعت الاناء الموضوع للراجع لمضايرته ... وكانت المفاجاه بان
الاناء فاااااااااااارغ تماما ولا يوجد به اي آثارلراجع للمنقه ..لا بذر ولا قشر.. وتقول لي خروف .
ولك تحياتي اخي مبارك
جني

الف مرحب بالجيل الفريد , بالجيل البرمائى الاصبل.
الف مرحب بالاخ مبارك بيتك ومطرحك.

لك الود...

خالد عبدالحميد كتب:

ويا حبيبنا عاطف

باشمهندس الرشيد تحياتى وفى انتظار كتاباتك عن نادى سودان لاين الاخوه الاعزاء (حسن الدومه,الشوش,اولاد القوصى,عوض بدوى,كركب,جاكات,لهم التحيه وللمرحوم عبد الغفار الرحمه والمغفره)
عاطف

واللسته دى كان بتقبل الزيادة،، رغم انو لكل زول حكاوى و ذكريات،،،اسمح لى ازيد ليك قريبى عادل صالح ،، صلاح جعفر ،، وفى زول اسمو " لواء"،،، ولاتنس ال
milk shake بتاع البعاشره،،، ايام فى بورسودان ... يخيل لى اى واحد فيهم بحتاج بوست
يعطيكم العافية اجمعين

الاقتباس ده من سبتمبر/ اكتوبر 2008 من مداخلتين بينى وعاطف صديق
ونعيده هنا ابتهاجا بالظهورالانيق لى كركب وفى انتظار الآتين
ونعوووووووووود

شكرا للاخ ود كرار والاخ خالد عبد الحميد على ترحابهم
وبالمناسبة يالرشيد الصورة دى حديثة 2010
تحياتى للجميع

لا حول ولا قوة إلا بالله العلى العظيم ... دا منو ياكركب الفى الصورة دى ؟؟؟؟؟؟؟؟
والله فى الأول إتخيلتك عم عمر عصملى شخصيا ...مالك لحقت الزينين ياأبوى ؟؟؟؟؟؟
هل هذا تأثير شرف أم نوارى ؟؟؟ والله الصورة خلتنى أحس بعمق المعاناة التى واجهتكم .... معليش , حبيبنا ولا يهمك الجاتك فى شكلك سامحتك ..... لكن مادام الروح هى نفس الروح .... مامشكلة ....المشكلة نك لحقت أمات طه هى المشكلة ... ورينى حل للمشكلة ... دمت حبيبنا ...

الرشيد شمس الدين

قال الروح قال .. هم ديل خلو فينا حاجة..تعرف يالرشيد من يوم الاثنين وانا بضحك .. وماقادر اسوى حاجة .. امبارح كنت عاوز اتفضح فى صلاة العصر .. ضحكت لكن بسرعة كتمتها وماعارف الجماعة حسو بى ..غايتو حيقولو جنا ....الشيب هين راس مالو صبغة ب 3 جنيه ... هل تعلم يارشدى الفرق بين الاول والثانى ..فرق السما والارض .. الاول مريض نفسيا واهوج (قد المركب وقال معليش) وانا فى زمنو استقلت 98... لكن قام رجعنى الثانى فى 99 وبدا بداية طيبة لكن لحسوهو الجماعة فى النهاية (والحقيقة انا ما لاقانى زول ذكى فى مستواهو .. كان عندو فرصة لكن خمشوهوا (وللاسف جماعة الاول).. وهل تصدق هو الرفدنى فى النهاية 2002 ..