فى إنتظار عبدالحمـــــيد عيسى

مجرد مشروع بوست ،،بعد أن تردد اسم الباشمهندس فى اسفير المنتدى ولتسهيل مهمة القائمين على الدعوة
البوست اهو جاهز ،،،،
وتمتــــــــــــــــــــــــــــــد الدعوة لكل الما وصلوا لهذا الملتقى بعد
عبدالحميد عيسى ،،،ابقى جاى

اولا مليون سلام للاخ العزيز الفنان عبدالحميد عيسي ..فعبد الحميد رجل التقيته في البحر علي ظهر السفن كما ملاقاتنا كلنا وكانت لنا ايام جميلة ما زالت عالقة بالذاكرة لما تخللته تلكم الايام من احلي واروع واجمل الايام وطبعا بوجود عبد الحميد ومن معه وبرضو للعلم فقط عبد الحميد يتحدث الانجليزيه احسن زول وبذكر مرة جاتني غضبة بحرية وقررت النزول في الميناء القادم ومافي بحر تاني ليوم القيامة (يا ريت كان نزلت كان هسع يكون عندي 100 ركشة )*فعبدالحميد كتب لي الاستقاله طبعا بلانجليزي لانو الكابتن كان خواجه ...والله يا عبد الحميد موجوده معي حتي هذه اللحظه رغم ظهور كل عوامل التعرية عليها........وحقيقه ما مضي لن يعود حتي لو كان امبارح...
بتذكر مرة ونحن دخولا لميناء ليفربوول وكنت في البردج ومعي البايلوت والضباب عامل مولد وهيصة والاخ عبد الحميد كان موجودا معي لحظتها وقام فجاة سالني عن معني كلمة ليفربوول طبعا اكيد السؤال وراه لغز حاضر وجاهز فاحترت وقلت ليهو مااظن عندها معني...فقال لي كلمة ليفر معناها شنو قلت ليهو كبده قال وبوول معنلها حوض او بركة اذن هي بركة الاكباد يا عزيزي ...التحيه لك عزيزي الباشمهندس عبدالحميد ...........سلام

من بدايات هذا المنتدى ،،اكّدنا انو الحمد لله أن حصلنا زمن التكنلوجيا التى جعلت هذا التواصل عبر المحيطات ممكنا ،،
ما كان خاطرة ابتدأت من كبيرنا عبدالرحمن الزين فى اوروبا، عبرت برجاء من احمد محمد احمد فى الخرطوم ،،الى الشارقة حيث اتى رشيدنا بخبر يقين ،،انتقل حديث الذكريات لى العزيز الجمل فى دوحة الخير
كل ده فى يومين ،،، فتأمل!!!
وبنهاية اليوم(هنا فى امريكا ) يسعدنى ان اكون اول المرحبين بآخر تسجيلات المنتدى من بريطانيا العظمى
الباشمهندس الفنان عبد الحميد عيسى عبدالحميد
الف مرحب ،حبابك ابقى داخل

و انا يسعدنى ان اكون ثانى المرحبين بالباشمهندس عبد الحميد عيسى و الذى هو اضافة كبيرة للمبدعين من اهل المنبر.

ومن مطار فرانكفورت..ارحب علي استجعال بالعزيز حميد...عاد يا حاج خالد ما داب ما اتوهطنا في البنبر بس ما تنسي تدبل المساند...اكرر المساند ما يقوموا المدامات-ادام الله عزهم واجلهم-يفتكروا انا بطالب بالتدبيل مثني وثلاث الخ... الي ان اعود بالرواقة
يالف مليون مراحب...\
وفي انتظار جني وقاشوره وناس كتار ارقدوا عافية علي قول الن

تخريمة..ناس اوروبا قول اتنين يا عاطف

وسلام مربع ياحميد الحبيب ....إتصلت بعبد الحميد على حسب وعد سابق وضحكنا كثيرا .... وسعدت أكثر بحديث شيق من الذكريات ...ياللضحكة الصافية ياحميد والتى أفتقدتها كثيرا والله وهى مانحتاجه هنا لنغسل هموم بعضنا فى هذا المنتدى العامر .... أرسلت لحميد ( الويب سايت ) فرد برسالة رقيقة يخشى فيها - بتواضعه الجم _ ألا يكون قدر ثقة الناس المرحبين به ولكنى أطمئنه أنه ( أدها وأدود ) كما يقول أولاد بمبة ...نعيد الترحيب بحميد الفنان وفى إنتظارأن نرى مافعلته بلاد الإنجليز فى عربى عبد الحميد ؟؟؟ امل ألا يكون قد أصبح كعربى جوبا ....

الرشيد شمس الدين

مليون مرحب وكمان مرحب اخونا الحبيب عبدالحميد عيسى والله الشوق بحر, وفى انتظار ظهورك وسماع صوت طقطة كى بورتك .
وسجل عندك كمان تانى بنبر بى مسندو جنب بنابر اعمامنا عبدالرحمن وخالد والرشيد واحمد
ودام التواصل
عاطف عكود

غايتو... انا زول باين علي لايوق شديد... وساكرهك يا رشدي يوم دعوتني ان ان اشترك في هذا المنتدي العامر... كمل جميلك كملو..في اشد الشوق لحبيبي عبد الله جاه الرسول....
وحتي يشرفنا عبد الله ساحكي لكم ذكريات..
عبدوس

عبد الله جاه ال رسول... المرحوم حمام.. القبطان ناجي مكي...ولا من شاف ولا من دري.. عمنا احمد التوم...و افواه وارانب وفاتن حمامه وحاجات تانية حامياني...
وعودة
عبدوس

بسم الله الرحمن الرحيم
المقاصيف... الحيطة المايلة ....( حمدنالله عبدالقادر و محمد طاهر ) قطار الهم......انت اللي اتلت بابايا - اه يا بابايا (شويكار و فؤاد المهندس) خطوبة سهير (تحية زروق ) ...ضيف علي العشاء (سدني بواتيه ) ... عودة ديجانقو ( فررانكو نيررو) كلها تعبر عن بعض من كم هائل من اعمال اذاعية و تلفزيونيه وسينمائيه لمجموعات عظيمة من نجوم الفن في الكتابة الراقية والاداء الرائع في التمثيل والاخراج .وهى تذكرننا بذلك الزمن الجميل كما ذكر بعض الاخوان
بس في انتظار عبدالحميد عيسي عبدالحميد .....(هادا كتير الله يهداك يا اخ خالد عبدالحميد متل ما يقولون اهلنا الخلايجة
لكن بالنظرللتجربة التي عشتها طوال الاثنتي عشرة عاما الماضية يبدو لي انها فعلا تستحق التوقف عندها وروايتها فهي بالطبع تصلح لان تكون مسللا شيقا يستفيد منه الاخوان والابناء في مقبل ايامهم باذن الله تعالي
تحياتي لكل من يذكرني بالخير وهم كثر بحمدالله وكم انا شاكر ومقدر لهذه الدعوة فهي تعني بالنسبة لي الشئ الكثير
التحية لك يا خالد عبدالحميد ولعبدالرحمن الزين والرشيد شمس الدين ومحمد احمد طه الجمل واحمد محمد احمد ولكل الاعزاء اينما كانوا بعد الخطوط البحرية السودانية وهيئة الموانئ البحرية

Iam really v. sorry ya Atiff Siddique , I've only read your message after I prepared mine on Google arabic keyboard .I'VE really missed you alot

عبدالحميد عيسي عبدالحميد كتب:بسم الله الرحمن الرحيم
بس في انتظار عبدالحميد عيسي عبدالحميد .....(هادا كتير الله يهداك يا اخ خالد عبدالحميد متل ما يقولون اهلنا الخلايجة

يا سيدى حياك الله ،،لاقيتك فترة قليلة من الزمن فى اسكندرية العزيزة قبل سنين عددا ،وما اظنك تذكر هذا لكن لايحتاج الزول كثير زمن لكى يذكر
الشوامخ من الرجال،،، خصوصا إن كانت تتقاطع بكم الاسماء
وتخريمة لها دخل بالزهايمر ،،،وكأننا التقينا فى بورسودان ،،اشوف طشاش طشاش أبرول كحلى
بناءاً على ما سبق ( هادا والله ما كتير،،،،،متل مايقولون .....مانعلمه عنك يكفى لفتح بوستات ... نكتفى بواحد حاليا ونترك لك حرية النشر كيف تشاء فى هذا الفضاء

عبدالحميد عيسي عبدالحميد كتب:
لكن بالنظرللتجربة التي عشتها طوال الاثنتي عشرة عاما الماضية يبدو لي انها فعلا تستحق التوقف عندها وروايتها فهي بالطبع تصلح لان تكون مسللا شيقا يستفيد منه الاخوان والابناء في مقبل ايامهم باذن الله تعالي

اعتقد ده وعد واضح ونحن فى انتظار الرواية ... تسلسلها... تدّييها لينا على جرعات .. انت بس ابدا والله المستعان
يا عكود اكتب عندك واحد وعد

عبدالحميد عيسي عبدالحميد كتب:
انا شاكر ومقدر لهذه الدعوة فهي تعني بالنسبة لي الشئ الكثير

واخر الحكى الليلة،،، نأسف ان تأخر وصول خبر المنتدى
مع التأكيـــــــــــــــــــــــــــــــد،،، انّك ما مدعو بس،،،، بل صاحب دار تماما
ودى ما مجاملة فهذا شئ معلن من اول يوم ابتدينا فيهو انو جميع من ينتموا للكيان البحرى السودانى هم مُلاك بالاصالة
للدقة لا يوجد شئ للتمليك انما هو تواصل وونسة فى هواء الله الطلق هذا،،،
ويتبع إن شاء الله

ترحيب حار بالاخ الفنان عبدالحميد عيسي فقد امضينا ايام وذكريات جميله
لا تنسي ولا زالت عالقه بالاذهان علي ظهر الباخره دارفور وبالمناسبه هي
الباخره الوحيده التي لا زالت صامده حتي الان وتعمل مع وكاله الخطوط
للسفر والسياحه .
فالف مرحب عبدالحميد عيسي .

كما نشكر كل من سأل عنّا في مده غيابنا التي استمرت 4 شهور وعشره
ايام .

جني عدّه

عبدالحميد عيسي عبدالحميد كتب:Iam really v. sorry ya Atiff Siddique , I've only read your message after I prepared mine on Google arabic keyboard .I'VE really missed you alot

العزيز عبد الحميد ليك وحشة وحمد الله على السلامة وكم سعدنا بظهورك على صفحات المنتدى وفى انتظار مداخلاتك عربى , انجليزى , رسم , شعر , عزف , باى لغة او اى درب من دروب الفن والابداع .
ودام التواصل
عاطف عكود

بالمناسبة