حروف من الغُــــنا السودانى (من جوّة الجوّة)

بوست بلا هدف، سوى وقفات عابرات لى بيت بيتين من ذاكرة الغناء السودانى
للدقّة شعر الغنا،، لعل البوست يعمر بالمارين ويكون خفيف ويوثّق لبعض شعراء الغنا الموهوبين حقا
ويذكرنا ببعض شعرٍ راح فى زحمة الأيام وزمان الغربة والتبريح هذا

مرة شافت في رؤاها طيرة تاكل في جناها
حيطة تتمطّى وتفلّع .. في قفا الزول البناها

----
ومن غير حميد ليكون البداية، بعد وردى الساكن فينا ولا ندرى

شوفته يا ادمن انا بعرف اجبد الدهنسه كيف..لو غلبك تفهم المعني اتصل بالقدام اكان ما عرفو بشرح ليك..التعبير اياه من ابتكارات العزيز حمد النيل حماد.. انا عارفك ما حتلم في حمد النيل.. وعشان مخك ما يمشي بعيد.. اشرح ليك..في سنوات الدراسه في كرواتيا اطلق بعضهم علي العزيز مصطفي كمال..واتمني ان ينضم الينا يوما ما..هو برضو من ناس كندا..الدهنيس..لا ادري مصدر الكلمه..واظنها جايه من كوستي..وتعني ذلك الرجل الذي يحب ان يرضي كل الناس..حسب ما علمت وان كان حمد النيل قد استعملها في اتجاه اخر..غفر الله له-.. تلك كانت ايام ضحكنا واستمتعنا بها..غفر الله لنا..
ما علينا...تحورت الجملة..وفي كل مره احاول ان اجامل اي نسان ينطلق ابو النيل ويقول..ابدوس...بلاش جيم دال...الجيم من جبد والدال من دهنسه...
ما في طريقه اشرح اكتر..
اختصارا وعشان اجبد الدهنسه للادمن..بحثت عن مداخلتك ونكتها...وعاوز اعلق عليها لكن يبدو انني صرفت المتاح لي في المقدمه..ساعود..بس شفته كيف برضو رفعت البوست ..والله عندي كلام كتير..ساعود..
ابدوس

اعود  مرة اخري..اولا  اسف  للخارم بارم..وكما ذكرت العزيزة الاء  يبدو ان هذا بوست للتوثيق...
لكن المجنني...
اغنية سودانية...ونسه..وقطيعه...
اسمعوها او اقرؤوها....

كل الحصل سألونا مره  عشان يعرفو  ظروفنا كيف...وفي رواية  قلوبنا..
جات  سيره  للريد الزمان..اسم الوليف جاب الوليف..
غايتو الكلام جاب الكلام..
وغلبنا من سيرتك نقيف..
ورمينا حبة لوم عليك..
شالو الكلام جابوه ليك...
باين عليك صدقتهم من جوه قلبك ما من عينيك
كان قصدهم يحصل فراق..
من جوه القلوب هم يسعدوا..
الخ الخ
احبابي..
لا ادري..عندما استمع الي الكلمات واتدبرها..  اضحك.. كلمات ساذجة ..ولكن عندما استمع الي اللحن انتشي...
اكرر علي نفسي  نفس السؤال...
لو لم يصدح وردي بالطير المهاجر...من منا  كان  سيعيرها استماعا..
لو لم يلحن كابلي يا سعاد من كان .. سيعرف الدوش..
لو لم يترنم كابلي بحبيبة عمري من كان سيعرف الحسين الحسن
لو لم يصدح ترباس بامي الله  يسلمك من كان سيعرف دار السلام  ام التيجاني حاج موسي التي نعاها كل الشعب السوداني...
ويبقي  السؤال الازلي......هل كنا سنعرف اسماعيل حسن لو لم  يصدح وردي بإشعاره...
هل كنا سنعرف سيف الدولة الحمداني لولا المتنبي..لولا المتنبي هل كنا ستعرف ابو فراس..ابحثوا  في هذا التناقض..شاعر يشهر ملكا..وفنانا يشهر شاعرا..
هترشات.. يا خلدي وكما يقول راشد   ..فتحت نفاجا..بس اكرر القول انا شخصيا  ليس لي لا ناقة ولا جمل في الشعر والغناء..والادب...بس  احيانا  بدخل  نفسي فيما  لا  يعنيني...  اهو من باب  جبيد الدهنسه... الان اكتفشت  انو اصدق  تعبير  لتجبيد الدهنسه  هو  كسير التلج...وينك يا ابو النيل الشغلانه  بسيطه..



اي اي    كسرته تلج للادمن..والماعاجبو يرفدني...ود عكود في السودان..رشدي  صاحبي وود كرار لمن يجي انا بكون نمته..
عمكم..

كسرة1
شكرا الحضور الأنيق لكل من عبر
كسرة2
لها صلة بالبوست
انا غلتان وأقر انو التوثيق ليس بجزء أصيل من فكرة البوست، إن هى الا وقفات عجلى نستقطع بعض ابيات من شعر الغنا، هذا المدهش الذى يعكس ويشكل وجدان الامّة ويحكى المراحل
عودة للبوست//

صحّيتى فى نفسى الوجود ** رجّعتى لعيونى النهار
هذا بيت دائما يبهرنى ولايقدم
كسرة اخيرة
عجبتنى جدا فكرة عبدوس، ان بعض الشعر ساذج وجدا،، لكنها مراحل وحب الناس مذاهب

تأمل فى
اعاين فيهو واضحك** وامشى واجيهو راجع

من أبدع ماإستمعت إليه من الغناء هذه الكلمات من خليل فرح وقد كتبها يصف حفل زواج شاركت فيه بعض بنات الأقاليم مع بنات العاصمة فكانت ( لمّة )  وهو هنا يسمّي بنات الأقاليم
( خيل الضل ) ويسمّي بنات العاصمة ب( الأريل ) وهو الغزلان ..  وقد أعجبتني جدا كلمات الأغنية فقمت بإرسالها إلي إبنتي المبدعة نانسي بدر الدين عجاج في كندا لأنني تخيّلت كم ستكون إضافتها للكلمات الجميلة  وأرجو أن تستمتعوا بها ؟؟
والقصيدة تقول :-

                                                 كلمات الشاعر خليل فرح                                                                                                                                                                

لمّ خيل الضل على الأريل             فى مشارعو الصيد ورد قيّل
القنيص حين شافن  إتخيّل             جرى دمعو ودمّو ساح  سيّل
إنتفض قلبو  وخفق  ميّل               فوق جروح الليل برك شيّل  
                    ------------------
الجمال  إتجلّى  فى شفوفو              كلّو شايل الحنّة فى كفوفو
جلسن والبهرة فى صفوفو              كالحرير وألوانو ورفوفو
                      ___________
حلل الأفراح  بدت  تبهر               كدى وأنوار الخدود تبهر
البساط الأحمدى الأزهر                كلّو در متخفّى او جوهر
                       __________
حفلن قلنا السما  أتجلّى                  والنجم بتضارى فى الحلّة
كالجناين تلقى كل حُلّة                  فيها ورد  ونرجسة  وفُلَة
                    ____________

فيهن السلسال شفا العِلّة                  فيهن العلّة ودوا العلّة  
كلّهن   متبلمات    إلّا                  من لحاظن أرحم الجُلّة
                   -----------------
الكنار صاح والغصون مالت         والرياح صنّت عُقب شالت
العقود فوق  الصدور جالت          والعيون ذى السيوف صالت
                  ____________

الرأيتو  شفى  القلوب  طيّب          والسمعتو وفاتنى فاح طيّب
زيدنى خلّيت قلبى نا عطيّب          والله  طيّب  قلنا  يالطيّب
                   ___________
لسه تايه فى  الدلال  ماضى           هل تناسيت عهدنا الماضى
فى صحيفة قلبى كان ماضى          ماضى خاتم لحظك الماضى
                    -----------------
ميل وعرّض كتّر  أمراضى            بى هواكم   والهوان راضى
جنّ ليلى وهاجت أعراضى            سحّ دمعى وطاشت أغراضى
هذا بعض البى عدا أمراضى         وإنت دارى وغاضى ماك راضى
                 ______________
جسمى ومن زمان قاضى             هاهو  حبّك  بين  أنقاضى
هدّى روعك  لاتقاضى                مابشارعك مابكوس قاضى
                 _____________
المضلل  رشدى  ياهادى              والمكتّر فى الغضا سهادى
الجبين الفى الظلام هادى              والقوام  السيدو  متهادى
                 ---------------

ياحبيبى   فيما    تهديدك                طول عذابى وهجرى مابفيدك
روحى فى إيديك وحاة ريدك           إمتى ضاعت ياسلامة  إيدك

_____________________________________

ولكم مودتي ..

الرشيد شمس الدين

وبمناسبة..نانسي  يا  رشدي...غايتو  الواحد  ما  عارف  يحسدك  كيف..ربنا  يغتيك وال بيتك من شر العين والغين..انته يا  اخوي زمان ما كنته بتحب غناء..حنان النيل..علي ما اذكر...تقول لي زهايمر..
ما علينا...نعود لموضوع نانسي..لم استمع اليها الا عندما اهداني..عمي احمد الزين..اخر ما تبقي لي من اعمام  اطال الله في عمره-..شريط به اغنيتها..  قالو علي شقي  ومجنون...سمعت هذه الاغنية  بصوت الكحلاوي..ولكن اول مرة  تشدني الكلمات...اخيرا عرفت انها من ابداعات وكلمات الكاتب الصحفي المناضل فتحي الضو..لم اتصور ابدا..ولكنها العبقرية..عندما تعطيك تعطيك بلا حدود..
يا حليلينا الضيعنا زمنا في الغربه.....
قبل   سنوات  بتقول لي يا رشدي  ما كفاك يا عبدوس  ارجع...عاوز ارجع لكن لي وين..مصر..السودان...
عارف ربنا لمن يقفلها عليك دائما بحاول يفتح ليك  طاقه  صغنونه...ما  تضحك..امبارح  قابلت  رجل اعمال في ملتقي..سالني..انت من وين..قلت من السودان..وقبل ان يعطيني فرصه...صار يتحدث عن جوبا  وكيف انها جميلة..وشعب طيب...مضياف.......الخ الخ..وسرحت...وتذكرت اغنية...
عاوز روحك  تفرحا..ودع قوم  سيب الخرطوم..سافر  جوبا...
يا تري هل ستكون محطتتنا القادمه اذا امد الله في الاجال..
قطعا ليس هذا هو السؤال..السؤال هو   هل سيقبلون بنا..وكيف نسافر اليها بالجواز الاوربي ام السوداني..
عجبي..
اسفي ان اطلت..
عبدوس..

عبدوس العزيز , لك والله وحشة لاتوصف وأرجو أن يستقر بنا المقام جميعا في سودانا الجديد وفي الخرطوم وليس جوبا بل نتمني أن نكون في السودان الوطن الواحد ماقد كان وماسيكون .... هل هذا حلم كثير علينا ياربنا ياقادر وأنت تعلم مدي شغفنا بوطننا .. نتمني أن نجتمع كلنا في سودان الغد وطن شامخ وطن عاتي وطن خيّر ديمقراطي ... نريد أن تتواجد أنت ياعبدوس وأنا وعابر وخالد وعاطف وحاتم وأبراهيم خير وبدرالدين حسن علي وبابكر يوسف وهباني وحمدالنيل والجمل وأبوبكر وعادل وعادل وسيف الكبير وسيف كمير وآوي ومعتصم ومعتصم وقرين وقريش وأسامة السيمت وأسامة معاوية وبابكر عبد الغني وعلي النور وفيصل وفيصل وسعد كرار وضياء وووووووووووووووووووووووووووووووووووووووووووووووووووووووووووووووووو مالي حسبت أنني أحسب كل السودان ..
كسرة مهمة ياعبدوس ... نانسي نسمة عطرة في زمن قلّت فيه النسمات وهي أميرة الطرب الأصيل كما يقول صديق الأسرة  بدرالدين حسن علي فقط  هناك تصحيح  واجب فشاعر أغنية شقي ومجنون هو فعلا فتحي الضو  ولكنه ليس فتحي الضو المناضل الصحفي هذا ولكنه تطابق في الأسماء فقط وربما حين كتبها فتحي الضو الأول لم يكن الثاني مولودا ولك مودتي ..

الرشيد شمس الدين

ألأحباء عبدوس ورشدى.
لقد سرحت طويلآ مع مداخلاتكم حول حق العودة الى السودان الجديد بعد أن أصبحنا مثل الاجئين الفلسطينين وحلمت حلمآ جميلآ وأنا متيغظ بأننا فى السودان واليوم جمعة وهنالك إتفاق مسبق أن نقضى اليوم فى ضيافة رشدى فى جبل الأولياء إصطحبت بدرالدين معى ومررنا بود الجمل ثم توجهنا من امدرمان الى كابيتان أحمد فى بحرى وعرجنا على حبيبنا عبدوس فى الأزهرى قبل أن نتوجه جميعآ الى جبل ألأولياء.
للأسف قطعت على ألأبنة المشاكسة حياة المذيعة بقناة الفراعين التى أتابعها من ضمن القنوات المصرية منذ أن بدءت ألأزمة السياسية فى مصر فى شهر يونيو الماضى الحلم الجميل الذى كنت أعيشه وأعادتنى الى الواقع المقلق الذى أعيشه الأن.
 كان يوم الأمس السبت يوم غير عادى أصطحبت أخى وصديقى وجارى محمود  يسن عصر هذا اليوم متوجهان الى المركز الأسلامى لحضور عقد قران بنت أخونا ابراهيم الذى سوف يتم قبل صلاة العصر وكان همنا ماذا سوف يحل بالجالية السودانية بعد عشرين عامآ من الأن؟ وحتمية الذوبان فى المجتمع الكندى! فبنتنا سوف تتزوج من باكستانى وتذكرنا بأننا شهدنا عقود قران كثيرة كان العرسان من كل الوان الطيف و من كل الجنسيات ألأخرى والعروسات بناتنا السودانيات، وللأسف يرجع ذلك للتفاوت  الأكاديمى الكبير مابين البنات والأولاد السودانيين فحينما نجد أن البنات الأكثر طموحآ وتعليمآ نجد أن الأولاد للأسف لا تقر بهم عين لم يستفيدوا من فرص التعليم المتاح، الكثيرون منهم اكتفوا بالمرحلة الثانوية، وقليلآ منهم التحقوا بكليات دون الجامعية، والأقل مِن مَن قد أكملوا الدراسة الجامعة ولا زلت أتجرع المرارة عندما ذهبنا فى شهر يونيو الماضى الى حفل تخرج بنتنا من الجامعة وحينما حى رئيس الجامعة الخريجون وقال انه يسعده أن تكون فى هذه القاعة مئة لغة متحدثة وهذه الصورة المزايكية الجميلة للخرجين من جميع الأجناس والسحن، وحينما كان هنالك المئاة من الخرجين من الجاليات الاخرى كان نصيب الجالية السودانية أثنين فقط ولد وبنت!!!!!! للعلم هنالك ثمانية وتسعين جامعة فى كندا تخرج المليون ونصف المليون خريج سنويآ ونصيبنا كجالية يعد على أصابع اليد الواحدة وهذا يدل على مدى الفشل الذى نجنيه من هجرتنا؟
 ألم نهاجر حتى نجد لأبنائنا وبناتنا حياة أفضل وتعليمآ أحسن أم أن ندعهم يكتفون بالحد الأدنى من التعليم وبوظائف متواضعة؟
على الرغم من تجاوز أعداد الأسر السودانية الآاف من الأسر وليس هنالك من يعلم عددهم سوى الحكومة الكندية، ويرجع ذلك لتفكك النسيج الأجتماعى نتيجة للخلافات السياسية والعرقية وحتى الدينية فبعدما كنا نعيش فى وئام ظهر سرطان جديد مايسمى بالوهابية كان معول يهدم أركان الجالية وأننى أنظر اليهم بعين الشفقة فهم ليسوا سوى مغفلين نافعين يستغلهم أخرون يتلقون العطايا من الجماعة على شكل زيارات للحج والعمرة وقليل من المال لا يشتم ريحه هؤلاء المغفلون النافعون، ومن سخرية القدر أن أجد أبآ يرسل أبنه لدراسة الفقه والشريعة فى السعودية وعنده أبواب جامعات مشرعة أبوابها هنا ينهل منها مايريد. قل لى ياهداك الله ماذا سيجنى من دراسة الفكر الوهابى الظلامى؟ أى عمل يمكنه أن يزاوله هنا سوى أن ينضم الى جوقة المغفلون النافعون، فيا لبئس المسعى.      
أسف لأشراككم فى همومنا فلكم من الهموم بما يكفيكم.
ودام الود عامرآ بيننا.‎
‎August 18 , ‎2013 - 5:33:34 AM

أبراهيم خير الحبيب ... حين قرأت مداخلتك عشت معها وتخيلت الزيارة الوهمية التي قمتم بها لنا في جبل أولياء .. صدّقني عشت لحظات رائعة في الخيال وفرحت وسعدت بهذه اللحظات فنحن في الغربة نحاول أن نصطاد لحظات الفرح حتي لو كان خياليا !! رد الله غربتنا جميعا لسودان جديد وطن بالفيهو نتساوي , نحلم , نقرأ نتداوي ... ولك مودتي ..

الرشيد شمس الدين

كل سنة وإنتو طيبين ... أغنية تنتقل بك من حالة الركود إلي حالة الطرب الصاخب دون المرور بمرحلة .. وسطي

الوصيــــــــــــــــــــــــــة ... لحمد الريـــــــــــــــــح

كـم أشتاقكم يا أهلي ....

هكذا نحن السودانيين خلقنا الله ...

نحب العفة .. نكره السفور .. نتذوق جميل القول .. لكلماتنا دفء ونبض .. نصدق في حبنا وبغضنا ... هذه الصفات وضعها فينا خاالقنا ... ليس للحكـام فيها شأن .. ولا للساسة ..

https://www.youtube.com/watch?feature=player_detailpage&v=H3HusMvRcy4