الافطار السنوي للضباط و المهندسين بالخرطوم

ألاخوة الاحباب

افاد اخونا القبطان اسامة مكى بانه قد تم الاتفاق على ان يكون الافطار السنوي للضباط و المهندسين بالخرطوم يوم الثلاثاء 25 رمضان الموافق 15 سبتمبر وذلك بالاسكلة.

وهذا بمناسبة دعوة للجميع والحاضر يحدث الغائب.

انشاء الله دوما مجتمعين على الخير والبركة وفى اتم الصحه والعافية
اللهم اشفى مرضانا وارحم موتانا واجعل البركه فى ذريتهم
وكل عام والجميع بخير .
اللهم ادم مابيننا من تواصل وتراحم ومودة واحترام متبادل
عاطف عكود

ودامت لمّاتكم فى امان الله ،،،متحابين
وادّونا دعواتكم يا صائمين فى حر السودان
ويا كابتن احمد طلبين لو سمحت
1 واصل لينا الدعوة لهذا المنتدى
2 وبما انو الموسم ،، موسم صور فايه رايك تنزل لينا كم صورة من اللمّة إن شاء الله
هل من مثنّى؟؟؟
هنيئا لكم الافطار
تخريمة لازمة"
كلمة هنيئا دى بالذات كانت من ابداعات الاكل على بواخر سودانلاين
وانا كنت مندهش من استخدامها ،،، بنصها او بالتصريف التانى اللى هو - بالهنا -
وسبب الدهشة انو هذه المجاملات الرقيقة ما كانت --ولازالت - بالشئ المعتاد فى السودان
وهنـّاكم الله

بالهناء والشفاء واعاده الله علينا جميعا باليمن والصحة ة والسعادة
.......
تخريمة
العزيز خالد حكاية بالهناء في البواخر دي جات انو اليوغسلاف دايما بقولو برياتنو PIRJATNO لبعضهم البعض عند الاكل ولما كان الميز مختلط ما بين سودانين ويوغسلاف تقبل يمين تقول برياتنو وشمال لم نجد الا بالهناء ولم نستطع التخلص من هذه العادة الجميلة حتي في الاجازات مما يثير استغراب الاهل احيانا...ومعاها تصبح علي خير التي اضطرت والد الاستاذ كمال ليقول له ياود تصبح قط -بكسر القاف- ما تنوم نومك شابكنا بالهنا وتصبحوا علي خير...
نكرر بالهناء يا شباب الخرطوم ولمن تقومو علي التراويح نحنا نبدا نفطر...
محبتي

الاخوة الاحبة عاطف - خالد و كابتن عبد الرحمن

شكرا لدعواتكم الطيبة و كنا نتمنى ان نر ي الجميع مجتمعين في هذا اليوم ولكن ...

انشاء الله يا خالد سنحاو ل التوثيق وانزال الصور .

ألاخوة الاحباب

بحمد الله فقد اقيم الافطار السنوي بحدائق الاسكلة يوم امس الثلاثاء 15 سبتمبر وقد حضره لفيف من الاخوة بينما قام اخرون بالاعتذار.

الحضور:
عبد العظيم حسب الرسول
د. محجوب حسن
عبد الله ابو نضارات
احمد محمد احمد
مرتضى مدحت
هاشم حامد
بشارة هبانى
طارق سيد عبده
عبد العظيم الامين
اسامة محمدالامين
عمر خلف الله
اسامة مكى
حسن رستم
محمد صالح عبد الله (العب)
عوض شبو

و من ناس بورتسودان

كمال العمرى
عبد المعروف ادريس الحسين
ضياء الدين يحي ذكريا

و ارجو ان لا اكون قد نسيت احدا.

و قد كان افطارا جميلا اعقبته جلسة لطيفة تبادل فيها الاخوان الذكريات
و تخللتها بعض القفشات من شبو و عبد المعروف و اسامة مكى.

كما قدم فيها الاخ محجوب حسن (و الذي يعمل مستشارا لوزير النقل للبئة) تنويرا عن القانون البحرى و المؤسسات البئية التى يجري العمل لجعلها حقيقة كما بشر بوجود عدد كبير من الو ظائف ذات الصلة للبحريين فى هذه المؤسسات.

والله ما شاء الله وتبارك الله...لا شك انها فطرة مشهودة ما دامت قد جمعت هذا الكم الراقي...اتمني من الله ان يجمعنا جميعا في احلي اللحظات وبارك الله في كل من يسعي الي ذلك.. اجمل اخباركم انو السيد محمد صالح نور العاصمة..
اكيد الليله ديك ليلة القدر كانت حايمه بي هناك
وكل عام وانتم جميعا بالف خير
تحياتي ومعزتي والشكر لك قبطان احمد لنقل الاخبار الحلوة..لكن الحلو ما يكملش ويييييييييييين الصور
ابو عابر

كل عام و الجميع بالف خير وتمين ولامين يا كابيتانو.

فعلا كانت جلسة و لمة جميلة.

بالنسبة للصور فقد خذلنا الاخ الذى تعهد باحضار الكاميرا ( يمكن كتابة اسمه اذا احببتو ان تشبعوه تقريعا) كما فشلت بضع محاولات للتصوير بالموبايل بسبب ضعف الاضاءة ربما.

الأخ احمد محمد احمد
كل عام أنتم خير
حقيقة نحن الان فى الاكاديمية العربية نفتقد لمثل هذه التجمعات والجلسات الرائعه
مش عارف الحلصل ايه..يبدو رمضان دخل العضم عندنا ..ودمتم

الحبيب احمد محمد احمد لك الشوق محيطات
جميلة لمتكم والمرة دي فاتتنا ان شاءالله ملمومين دايما في الخير والله يديكم العافيه ودي من الحاجات الحلوه والرائعة ...
أذكر في واحدة من مثل هذه الافطارات الرمضانيه كنا قد زرنا كلنا المرحوم النعمان وبعض من اسر من فقدوا ذويهم أو اقعدهم الزمن والمرض
فمادام التواصل موجود كفكرة راسخة لدينا يمكنكم ان تجدوا وتبتكروا الكثير من طرق التواصل والحمد لله أنت واسامه مكي خير من يتولي هذا الامر ودام التواصل

لاخ ياسر
شكرا للمشاركة. نتمنى ان تكون مثل هذه التجمعات عادة لدي للاخوة علي اختلاف مناطقهم.

أخونا الجمل لك الشكر .

فعلا فقد تولد عن الافطار برنامج للزيارات والدعم المادي والمعنوى لبعض اسر الاخوان الذين مضوا.

رمضان كريم اعاده الله على الجميع باليمن والخير والبركات
فقد كان اليوم الافطار الرمضانى السنوى بالخرطوم وكنوع من التغير كان الافطار اليوم فى لذيذ شارع واحد وقد ضم كوكوبه من الزملاء
اسامه مكى ,احمد محمد احمد , خالد الجنيد,سيف الدين مصصطفى , عبدالعظيم حسب الرسول , محمد صالح عبدالله, الطاهر عربى , مرتضى مدحت , اسامه شروم ,عمر خلف الله , اسامه امين , ديل نصف الحضور والحداشر التانين لم يسعفنى الحظ بسماع اصواتهم عبر التلفون فلهم التحيه وفى انتظار الاسماء والتوثيق من اخونا احمد محمد احمد
ودام التواصل
عاطف عكود

سلام اخونا عكود...

انت رمضان دخل العضم ولا اثر على النظر...انت ماشفته مداخلت اخونا احمد فوق ولا شنو.

التحيه لكل الحضور ودايماً ملمومين ورمضان كريم.

ياكابتن احمد..الجماعه عملوا شنو مع ناس نادى الزوارق, انشاء الله رمضان الجاى الافطار يكون عائلى وفى النادى.

لكم الود

ود كرار الغالى
رمضان كريم والظاهر فعلا رمضان دخل الركب ...اقصد دخل العضم واثر فى الركب ( والعتب على النظر ).... مداخلة اخونا احمد دى بتاعه رمضان السنه الفاتت سبتمبر 2009
وبالمناسبه ناس نادى الزوارق كانو مدعويين للافطار لكن ماعارف التفاصيل ! ومازلنا فى انتظار اخونا احمد محمد احمد 2010
ودام التواصل
عاطف عكود

ركب وعضم ونضارات،،سبقتنى ياعكود
امجد الزهمهم خلينا ،،فرق السنة دى يسمو شنو؟؟؟
قالت ام كلثوم ،،،قول للزمان ارجع يا زمان،،،
وانا ما متاكد هل رد الزمان عليها ولا لا؟؟
عموما شخابيط رمضانية
بالهنا لكل الفاطرين ،،فى عامهم ذاك وفى عام الناس هذا
وبالعودة للبوست من اولو ،،يلاقى فيها مداخلات جميلة وناس كانو معانا السنة الفاتت واختفوا
وتخريمة تانية لازمة ،،،صاحب الكاميرا السنة دى برضو!!! شفيق يا راجل
لكم بحر شوق وطن ود

سلام للكل
القهوة مشغولة وسيدها ما داير يعرفنا بضيوفو وشغالين ون تو ثري وامكن فور حيظهر قريبا واخونا ود كرار شايت ليهو اوف سايد في جهة ود عكود والحمد لله علي كل حال
وما امر ابو صبا ببعيد
سلام تاني للكل وسلام مليون للاخوة الذين اجتمعوا في نادي الزوارق وودام التواصل.
ويا خالد فعلا ده من اروع البوستات في هذا المنتدي فهو يحكي تواصل وترابط جميل المعاني وانشاءالله الاختفوا يبينوا ويظهروا..........وقول للزمان ارجع يا زمان .

الاخوة الاحباب عاطف و الجمل و ود كرار و كل الزملاء

رمضان كريم و كل عام و الجميع بخير.

كما اسلف الاخ عاطف فقد كان الافطار الرمضانى السنوى بالخرطوم في يوم الاثنين 30 اغسطس وكنوع من التغيير كان الافطار فى مطعم لذيذ الفاخر بشارع واحد بالعمارات وقدحضره مجموعة من الزملاء هم:

اسامه مكى ,احمد محمد احمد , خالد الجنيد, سيف الدين مصطفى , عبدالعظيم حسب الرسول , محمد صالح عبدالله , الطاهر عربى , مرتضى مدحت , اسامه شروم ,عمر خلف الله , اسامه امين
هاشم حامد بخلين , طارق سيد عبده , ايهاب سلطان , عبد الوهاب ابوزيد , معتصم الحاقد . نصر الدين مصطفى , يحي زين العابدين , عبد الحفيظ النتو , صلاح مصطفى و بضع ضيوف .

(ارجو ان لا اكون قد نسيت احدا فرمضان قد دخل العضم).


و فعلا يا ود كرار فناس نادى الزوارق كانو مدعويين للافطار ولكنهم اعتزروا نسبة لارتباط سابق و قد تم تكليف الاخوين مرتضى مدحت و خالد الجنيد - كلاهما له علاقات جيدة مع ادارة النادي - بالمتابعة معهم.

عاطف عكود كتب:ود كرار الغالى
رمضان كريم والظاهر فعلا رمضان دخل الركب ...اقصد دخل العضم واثر فى الركب ( والعتب على النظر ).... مداخلة اخونا احمد دى بتاعه رمضان السنه الفاتت سبتمبر 2009
عاطف عكود

بالله..... الظاهر انا فاطى سطر اقصد سنه.

نيابة عن اخونا اسامة مكى شفاة الله وعافاة واعادة لنا سالما معافى
انشاء الله سيكون الافطار الرمضانى بالاسكلة يوم الاثنين 8 رمضان الموافق 8-8 وهذه الدعوه لجميع الاخوة بالخرطوم وكل عام والجميع بالف خير.
الغالى ود كرار قبل ما تنط لى فى حلقى الدعوة دى لى رمضان 2011 وكل سنة وانت طيب.
ودام التواصل
عاطف عكود

رمضان كريم , اعاده الله علينا و عليكم بالخير و اليمن و البركات , و بمناسبة الدعوة للافطارالسنوى الجماعى بالاسكلة يوم 8\8\2011م .اتقدم بخالص الشكر و التقدير لكم جميعا لسؤالكم الدائم عن صحة ابنتى . و اطلب منكم الدعوات بان يمن الله عليها بالشفاء
اخوكم خالد الجنيد

رمضان كريم واعاده الله على الجميع باليمن والبركات
اللهم اشفى ابنة اخونا خالد واسبغ عليها ثوب العافية والصحة امين
وتحياتنا للجميع ولو اخرتوه يومين كنا نفطر معاكم
رمضان كريم

رمضان كريم...وتصوموا تفطروا على خير
ونتمنى من المولى عزوجل ان يكون بينكم اخونا أسامه مكى موفور الصحه معافا.
التحايا لكل الاخوان الذين لم نتمكن من ملاقاتهم فى اجازتنا (المس كول).

الاخوة الاعزاء..تحياتي لكم وانتم تتجمعون وتلتقون علي نهج العزيز اسامة املا ان يكون علي راس مائدتكم في العام القادم باذن الله...شايف الاخ محمد محمد صالح -حفظه الله واوصله سالما- قال ليكم لو اخرتوهو يومين بكون معاكم.. انا زيو بس اخروهو شهرين..واكون معكم باذن الله..
نتمني لكم افطارا هنئيا ولحظات سعيدة هانئة اينما افطرتم..
لا يفوتني الا ان اتمني لابنة الاخ خالد عاجل الشفاء ببركة هذا الشهر العظيم
وفي امان الله
ماتنسونا من الصور..وعندي افتراح نرجو ان يتبناه الاخ عاطف اي واحد حضر الافطار وما مشترك في المنتدي عليهو غرامه كبيره متروك لكم تحديدها واي واحد مشترك وما مواظب عليه غرامه برضو اقل نسبيا...اهو ممكن تتطلعو بي فطرة تانية..بس ما تنسوا صاحب الاقتراح..الخازوق يطلعوا كلهم مشتركين..امين..
اخوكم عبد الرحمن

والله يا ود عكود فاقدنك هنا لدرجة ابتدينا نزعل منك ( وكده)رمضان كريم عليكم وانتم تجتمعون في الاسكلا مسطرين بأحرف تعلو كبري شمبات ارتفاعا اجمل معاني التواصل والتوادد .الله يديم حميم الروابط ويجعلها لكم في صفحات مشرقة ليوم اخر...
اخي خالد اسأل الله لأبنتك عاجل الشفاء والعافية مع تحياتي لك ..
الاخ عاطف فرحنا اولا بالحضور فردا فردا ثم الصور ...ودام التواصل

بالهنا PIRJATNO
تخريمة

عبد الرحمن الزين2 كتب:.......

،،،،حكاية بالهناء في البواخر دي جات انو اليوغسلاف دايما بقولو برياتنو PIRJATNO لبعضهم البعض عند الاكل ولما كان الميز مختلط ما بين سودانين ويوغسلاف تقبل يمين تقول برياتنو وشمال لم نجد الا بالهناء ولم نستطع التخلص من هذه العادة الجميلة حتي في الاجازات مما يثير استغراب
.....

وامنياتنا الصادقات بالشفاء التام لابنة الاخ خالد الجنيد ونكرر الترحيب به