شاى بالقِرفة فى شقّة الفاضل محمد الفاضل

غايتو انا قلت أبدا البوست بالعنوان اعلاه وأخلّى الكلام لكل من كان حاضرا فى زمن الشاى الشهير فى شقة الفاضل وعبدالوهاب ابو زيد،،، لهما التحية
الود للجميع قد يتبع

متابعنين وخرمانين وديك يا قعدة في البنبر... بس لحظة اجيب معاي حبيبي اللدود
عمك

تخريمة بي مناسبة مهدي العب لمن كان برلوم ظبط لينا حلة ويكة كاربه في العماره (ه) فحكيت لي جعفر قريش قام قال لي ماجيبوا لينا المواهب دي ... واصل يا سعدون الله ديك العافية

من نعم هذا المنتدى انو ادّانا الفرصه للحديث مع أحبة الزمن الجميل ... خصوصا بعد ما جات أزمان متعددة الاسماء!!
الشاهد انو الاسبوع الفات سعدنا حقا بسماع صوت العزيز الفاضل محمد الفاضل وجات سيرة الشاى والايام ولازلنا فى انتظار وعده بالظهور
أمّا الفردة مهدى فكان من حظّنا انو امبارح القريبة دى سمعنا منو وحليل زمن الحِلل،، حسع بقى يفتش فى زول يظبّط ليهو الكمبيوتر ونحن فى انتظار وعده ايضا
سعد يا فنان واصل الابداع وما تنس عبدالعظيم حسب الرسول كأحد كبار مشجعى الشاى الشهير
الخرمة "وليس التخريمة"
وااااحــــــد شاى وصلّحوووو
واخيرا ( ودالسيمت وجعفر قريش ومهدى وحلّة مظبطة ) فى جملة واحدة؟؟؟!!!
الموضوع فيهو إنّّّّّ
دامت الذكريات،،، نورا وعونا لهذا الزمن وما يأتى

سعدت والله بهذا الحكى الجميل من سعود رغم أنى لا أدرى إن كانت جلسات حقيقية أم أنها من جلسات سعود التخيلية المعهودة ...أسعدنى جدا أن إجترار الذكريات جر معه شخوصا عزيزة لها فى القلوب منازل :-
الفاضل محمد الفاضل الرجل المهذب الفاضل بحديثه النظيف لكأنما دوما يغسله قبل التحدث به ....
أسامة السيمت ...إبنى , ليس مجازا والله ...بكل الأناقة والرقة والظرف ..أملى ألا تكون الغربة الحارة قد غيرت ...
جعفر قريش .... العبد العزيز , إبن أختى وذلك والله يشرفنى جدا .....
ثم ومهدى عثمان شلكاوى ,الذى والله أعرفه مثل جوع بطنى ولذلك لست أرضى أن يقال له العبد فهو والله أبعدنا عن
ذلك ( هذا لا يعنى أن العبد قريش أقربنا لذلك ) ...بالمناسبة مهدى هذا يربطنا رباط القربى الحقيقية فأبوه عثمان (جاسر) كان أقرب الناس لأبى ( رحمه الله ) , أذكر مرة فى يوم جمعة من زمان بعيد فى جبل أولياء طلب منى أبى أن أذهب معه لنهجم على عثمان شلكاوى فى وجبة الفطور , ذهبنا وفاجئناه أننا أتينا لنفطر معه , لم يتردد للحظه وقال لأبى :- ( على الطلاق تسلفنى جنيه ) و أعطاه أبى وبعد لحظات لم تطل كثيرا كان الخروف شهيدا وكنا نأكل أشهى أنواع الشية والمرارة ...حينها قال أبى قولته الشهيرة والتى صارت لى مثلا :- ( الكريم يكرم ضيوفه بقروشهم ) , لله درك عم عثمان ولك أن تفخر بأبيك يا مهدى فوالله كلما قابلته أشم رائحة والدى فيه .....
اسفى شديد للإطالة فقد حرقتنى ( مهدى العب) , أما أنت يا خالد وعبدوس فلا جاء يوم شكركم ...

الرشيد شمس الدين

انته من زمن الخروف بجنيه وبرضه تقولو لينا بودى وعبورى وبوسى غايتو جنس غايتو
بطلو شكشكه وشوفو ليكم مساجد اتعبدوا فيها بدل الشكش.....

واي واي انا بره بس المديدة حرقتني... انا وقعته فوق عمكم عبد الرحمن.. شوف ليك مخارجة يا رشدي الزول ده قاصدك عديل.... عارفك حتقول..عالم جبنات.. لكن يا خوي ما بقدرعلي طولة اللسان دي.... من كل الدرر التي كتبت لم يجد الا حكاية الخروف بجنيه....
محبتي
جدو عبد الرحمن

شوف يا عبدوس , ماتفرح كثير , أنا متأكد إنه مابيننا عامر وإنه ماسورة ما ممكن يكون قاصدنى أنا والدليل إنه الله بيعلم منو القاعد الييقول بورى وبودى وعبورى ومنو الفاتح القاعد يقول ليهو الجامع وجاور وكدا .... الموضوع يا عبدوس إنه ( إياك أعنى وأسمعى يا جارة ) , لأنه البينى وبين ماسورة عامرة والدليل موضوع الخمسمية دولار وموضوع الخمستاشر ألف دولار ولا شنو يا توحة .....

الرشيد شمس الدين

ها ها ها بعتني بالرخيس يا رشدي البرتكانة-- مجرد تصحيح لسعدون- البرتكانة ما البرتقانه ---ورشدي البرتوكانة احب اسم الي نفسي والله وحده يعلم...
واللة انا عارف انو الما بتسماش بعملها ويفتن بيناتنا... لكن صحي يا رشدي انا ذاتي ما حضرت زمن الخروف بي جنيةمعليش يا ناس اسكندرية دخلنا في بوستكم امكن بلا استئذان ولكن معزتنا لكم
والمتداخلين لا تحدها حدود.... المخلص

عبودي
تخريمة خفيفة
اي يا رشدي ...عبودي...
.لكن موضوع خمسميات ودولارات ده عاد موضوع جديد .. انا زمان كل حيلتي اكتب ريبورت .. عسي قادر اللة بقت فيها رشاوي..[b]

الريبورتات يا رشدى خلت الجمل ساكى السماكه.
انحنا يا البرتكانه ما بيناتنا ماديات واوعى اسحق وصاحب بودى وكوكى ودودى يدخلو بيناتنا.
. غايتو ناس الجبل كان سمعو بالبرتكانه دى حيشكو فيك بعد العمر ده.
بابكر نميرى زارنى فى المكتب ولابس ليه بدله رهيبه والدنيا حر وقبل ما اعلق قال لى اسكت عندى كتار وعايذ اتفشه فيهم لأنه قريب ده حيوزعوهم للفلاته.

سلام
الفاتح

الاخ الحبيب الرشيد مهما طالة الغربه حاتكون مكانتك العاليه محفوظه .
تخريمه ...
خالد عبد الحميد: ياجماعه خلونا نمشى للشقة الفاضل محمد الفاضل
نشرب الشاى دا
عشان نقدر نحصّل الفيلم فى سينما مترو
يوسف منقه: ياجماعه انسوا شاي الفاضل دا خلونا نمشى المزربل فلات جوا الحسن وعبدالمولا وفيصل العب وكمال الخواض لي كورس السكند اكيد بيكون عندهم شاي مستورد ... واصل ياسعدون الله يديك العافية

كميوترات تبوظ.. منتدى ما ندخل !! شوق ما عادى
عودة لازمة :
أشوف مهدى محكّـر فى نص البوست ،،،،
شئ أوصاف واشعار سعد كرار
شئ برتكانة!!
وما يشبه التهديد الأنيق من الرشيد ان لا تهبشوا مهدى
انا متحير ،،، كل ده فى مهدى حقّنا ولا ده مهدى تانى
لى عودة إن شاء الله عمّن كان رفيق ربع القرن الماضى

الحبيب سعدون...

بالله ماتنسى حبايبنا ناس الراديو كما يحلو للبعض مناداتهم...ناس خالد مهدى,وعاصم القدال,أيمن ابراهيم,اسماعيل عشكبوت,والشهير سليمان (ج..),والدفعه محسن سعد,حاتم طونى,هانى ميشيل.

وطبعاٌ شاى المغرب مع الحبايب ناس مكوار وضرس ويحى بليل وعلى محجوب,أسامه طرنشات وياسر شاكر والقعدات الشهيره بالعصافره لازم تفرد ليه حلقه خاصه

لك الود

الاخوة الاعزاء جميعا دون فرز سعدنا بلقائكم خلال هذه البوابة الشامخة بوجودكم مع كل التقدىر والتجلة لمؤسسيها ياشباب اتفضلوا الشاى جاهز

تحية عطره للاخ العزيز الباشمهندس/ الفاضل...

والله عارفين الجماعه تقلوا عليك ...لكن اخونا ابو السعود عارف انو لامى البكشه ده كلها وماشى لشقة الكرم والجود...

لك الود والتحايا...

أمجد عابدون

سعدون حبيب الكل
ما تزعل من عمك الشاي ملحوق والقرفة لها طعم خاص مغ الحبايب
لكن غرق باخرة ربانها سوداني.... يجعلنا نعلن الحداد والامنتاع عن شرب اي شي وحتي مكاواة قاشورورة

نسأل الله السلامة ،،، الامر جلل
لكن الترحيب بالقادمين الجدد واجب
ليكبر كومنا ،، نزداد وحدة ونتشايل الهم
كما نتقاسم الذكريات

يا الفاضل،، سلامات،،، أشوفك تتاوق ،،، باقى لى طوّلت علينا ،،، الشاى يكون برد لى حسّع--- يانا منتظرين ومعانا الكل لانو قد يكون فى كورة بعد ده، لك التحايا ولكل الاعزاء فى بورسودان

الاخ خالد والمجموعة
لكم التحايا.اعزائى ما بين الشاى بالقرفة و ولادة العملاق المنتدى شريط ذكريات يصعب حصره .مبتداه الاكاديمية, جله سودان لاين العملاقة حينها ومنتهاه تفرق الاحباب الى حين وتجمعهم الحاضر فى فكرة المنتدى الرائعة فالتحية لكل من فكر وابدع فى بذوغ المنتدى. التحايا موصولة للجميع من بورتسودان الجميله بمجموعتها النشطة اجتماعيا و رياضيا هذه الايام .تفضلو معانا تمرين الثلاثاء بنادى التنس السادسه مساء لتشاهدو كابتن حسين,عمر ساتى,عوض الكريم,عبد المعروف,عبد العزيز,سيداحمد,عبد الرحمن, مرتضى, عوض الله, القلع والمشاورات جاريه مع الجزار لاقناعه بالاشتراك والبقية تاتى

شكرا على المرور يا الفاضل ،، ولا نحن المارّين لانو البوست اصلا بتاعك

Elfadil Mohamed Elfadil كتب:
لكم التحايا.اعزائى ... شريط ذكريات يصعب حصره .مبتداه الاكاديمية, جله سودان لاين العملاقة حينها ومنتهاه تفرق الاحباب الى حين وتجمعهم الحاضر فى فكرة المنتدى

غايتو نعتبر ده وعد بالكتابة ،، الذكريات هى أساس هذا الامر وفعلا يصعب حصرها لكن كدى ابدا لينا لك ولبورسودان الود
التخريمه

أدام الله شبابكم يا ناس بورسودان ،،، لكن-- نادى التنس ده ؟؟ بلعبوا فيهو كوره ولا تنس،،؟؟؟

اعزائى
نادى التنس طبعا بمجهودات بعض الاخوة اصبح المقر المؤقت للجمعية ببورتسودان طبعا ده خبر جديد, به عدة مناشط اهمها التنس وده طبعا ماشبهنا بالرغم من ذلك الاعتراف اخونا كابتن عوض الله متسلبط وساعى ليه مضرب كمان, غايتو نحن بعد التسخين, شابكين فى حاجه تشبه الطايرة , عبدالمعروف بالدلدوم, عمرساتى الا تجيه الكوره عديل فى محله, عوض الكريم استعان بابنه الصغير لزوم شويه حرفنه, مرتضى حالف يرد السيرف ولو ادى الى شد عضلى, عبدالعرير مدرب لياقه ومصر يغلب فى كل الاقيام وطبعا هو الحكم , نزار متحير من بعض السيرفات القاتلة, القلع مشارك ليوم واحد وكابتن حسين على حمد المتفرج الوحيد, غايتو بدايه نشيل بيها الرطوبه ونلم الناس