الزهايمر!!!

الزهايمر،،واضح انو حاجة كده زى القاسم المشترك الاعظم ،، ففى معظم البوستات تلقى أثر من هذا اللعين،،، نحملو احيانا بعض ما ننسى ،،واخرى هو يركبنا مضيعا علينا نص الحكاية،،تجده بى لحمو وشحمو مذكور صراحة ومرات ،،كناية ومستتر ،،حاجات زى العمر! ،،السنين طالت!!الاولاد والمشاغل !! الواحد يعمل شنو ولا شنو !! ياخى انا ما متذكر امبارح اكلت شنو !! واشياء من هذا القبيل،،،،،
لـــــكن،، السبب الخلانى افتح البوست هو انو اكتشفت انو نحن ما برانـــــــــــــــــــــــــا،،، تقول لى ممتاز
ونخش فى الموضوع ::
محل انا شغال معاى واحد خواجة ،امريكانى سيد بلد ومرة مرّة تجى سيرة الزهايمر
قبل كام يوم جو هذا نقل لى تجربتو العملية اول ما شعر انو هو بقى ينسى شوية اشياء بسيطة كما مذكور اعلاه،
مشى لى اخصائى طالبا للمشورة،،، وفعلا قال انو الذاكرة بتحتاج تنشيط وتشغيل لاعادة الحيوية،، كيف؟؟؟
جو ولدهشتى دخل يدو فى درج مكتبو وراح مطلع كوتشينة ،، اى والله ، لاحظ انو فى امريكا دى نحن الكوتشينة بنشوفها طشاش
المهم الفكرة بسيطة :
كل يوم الصباح تطلع كرت واحد وتحفظو
تجى نص النهار تتذكرو
تجى العصرية او المغربية تتذكروا تانى
بكرة " نفس الحركة مع كرت جديد ،تخزنوا فى ادراج الذاكرة فى الصباح،، وتعمل التنشيط بالتذكر كما مذكور
بعد كم يوم تعمل الحركة مع كرتيــن،،، اى نعم كرتـــــــــــــــــــين
وهكذا
دى كانت الحيلة الاولى وجو عرض انو يورينا الاحدث فى عالم الزهايمر ( ده لو ما كان نسى)
ونعد انو نسألوا ان شئتم،،، وده اذا ما نسيت انا
تخريمة: للامانة انا جربت المسألة ولقيتها شغالة تماما
أبعد الله عنّا أجمعين كل ما خبث
ودمتم فى حفظ الله ورعايته

والله للامانة ياود الاستاذ عداك العيب...
لا زلت اتذكر عندما كنا برالمة وكان رفيقي آنذاك اخي محمد سليمان ومعروف عنه إدمان شاي المغرب يعني ممكن أن يفوت يوم عرسو بس ماشاي المغرب ...حلة الفاصوليا كانت مسبكة علي نار هادية واذا به يذكرني بضرورة شرب الشاي مع سعد تبيدي ..شربنا الشاي وعدنا لنجد عشرات الناس يتدافرون امام باب شقتنا حتي اللحظة ماعرفت الحاصل شنو حتي دخلت المطبخ فوجدنا ان الحلة والفاصوليا بقت قطعة واحدة
..تخريمة..
والله ياود الاستاذ لو الواحد بذكر انو يطلع ورقة الكتشينة تلات مرات في اليوم(يمسك الخشب)و مافي داعي للعلاج........

يا وليداتي عليكم الله في داعي للاحراجات دي ما تخلو الطبق مستور...غايتو اكان سمعكم جدو بابكر نميري شيلو شيلتكم..
عبودي وانا بره

خالد عبدالحميد كتب:الزهايمر،،واضح انو حاجة كده زى القاسم المشترك الاعظم ،، ففى معظم البوستات تلقى أثر من هذا اللعين،،، نحملو احيانا بعض ما ننسى ،،واخرى هو يركبنا مضيعا علينا نص الحكاية،،تجده بى لحمو وشحمو مذكور صراحة ومرات ،،كناية ومستتر ،،حاجات زى العمر! ،،السنين طالت!!الاولاد والمشاغل !! الواحد يعمل شنو ولا شنو !! ياخى انا ما متذكر امبارح اكلت شنو !! واشياء من هذا القبيل،،،،،
تخريمة: للامانة انا جربت المسألة ولقيتها شغالة تماما ؟؟؟؟؟؟؟؟؟؟؟؟؟
أبعد الله عنّا أجمعين كل ما خبث
ودمتم فى حفظ الله ورعايته

الاعزاء خالد وراشد وكابتن عبدالرحمن لكم الود كله وحفظ الله الجميع وعندى ليكم سؤال برىء بمناسبة هذا القاسم المشترك الاعظم اللعين شن قولكم فى زول يقيف فى المصلاية وبعد الاقامة لصلاة العشاء يرفع يدية لتكبيرة الاحرام وباعلى صوتة ومن غير ما يشعر بدل الله اكبر ...... يقول الوووووو ؟ دى حالة تنفع معها كوتشينة او حتى ضمنة ؟
افيدونا افادكم الله
ودام التواصل
عاطف عكود

راشد كتب:والله للامانة ياود الاستاذ عداك العيب...
لا زلت اتذكر عندما كنا برالمة وكان رفيقي آنذاك اخي محمد سليمان ومعروف عنه إدمان شاي المغرب يعني ممكن أن يفوت يوم عرسو بس ماشاي المغرب ...حلة الفاصوليا كانت مسبكة علي نار هادية واذا به يذكرني بضرورة شرب الشاي مع سعد تبيدي ..شربنا الشاي وعدنا لنجد عشرات الناس يتدافرون امام باب شقتنا حتي اللحظة ماعرفت الحاصل شنو حتي دخلت المطبخ فوجدنا ان الحلة والفاصوليا بقت قطعة واحدة
..تخريمة..
والله ياود الاستاذ لو الواحد بذكر انو يطلع ورقة الكتشينة تلات مرات في اليوم(يمسك الخشب)و مافي داعي للعلاج........

محمد راشد اذا انت من برلوم عندك اعراض الز... ما اظن كوتشينة بتحلّك
ثانيا الخواجة ما قال تطلع ورقة الكوتشينة تلات مرات ،،،،،انما هى مرة واحدة الصباح وتعمل تخزين للرقم وترجع اثناء اليوم تسترجعه،،،،، تكون قريت كلامى ولغاية ماكتبت مداخلتك نسيت انا كنت كاتب شنو،،،،ده وضع متأزم جدا
لك اشواق بالكوم
تخريمة : راجع صندوق رسايلك الخاصة

عاطف عكود كتب:

الاعزاء خالد وراشد وكابتن عبدالرحمن لكم الود كله وحفظ الله الجميع وعندى ليكم سؤال برىء بمناسبة هذا القاسم المشترك الاعظم اللعين شن قولكم فى زول يقيف فى المصلاية وبعد الاقامة لصلاة العشاء يرفع يدية لتكبيرة الاحرام وباعلى صوتة ومن غير ما يشعر بدل الله اكبر ...... يقول الوووووو ؟ دى حالة تنفع معها كوتشينة او حتى ضمنة ؟
افيدونا افادكم الله
ودام التواصل
عاطف عكود

ده اولا ما سؤال برئ ......... دى كارثة
ساجتهد فى نقل الحالة الى الخواجة جو لعل الاخصائى بتاعو يلقى حل ،، وان كنت اشك فى ذلك ،،، غايتو ان بقى الموضوع وسواس خناس فالعلاج معروف،،، وان بقى الزززز.... كدى جرب الكوتشينة دى ،،،اقول ليك اسمع كلام اخوك انا مجرّب،،، ابدا غايتو بى الدوهات(2s) والتريسات
ديل خُفاف شوية
قد يتبع إن شاء الله إن ما نسينا

حبيبنا ود عكود.. يا خوي الحصل ليك دة ما عندو علاقة بالزهايمر- المفتري عليه- الزهايمر اسالنا نحنا من اعراضو والتي نسيناها طبعا....
المهم وحسب خبراتي المتواضعه دي اعراض ريدة وكما خايف يحرموك من دخول المنبر كنا اديناك التفاصيل والعلاج كمان...
واحتمال يكون فلس لكن دي ما اظنها واردة عند ال عكود..المهم يا ود اخوي ما زهايمر..والزهايمر يبري
وانا برة
عمك عبد الرحمن

الاعزاء الحاج خالد وكبيرنا عبدالرحمن الحمد لله والله يطمنكم انكم شخصتوا الحاله انها ليست بذلك الملعون.... الباقى مقدور عليهو وسوف اعمل خلطه من وصفاتكم المعلن منها او حتى تلك التفاصيل والعلاج التى لم تصرحوا بها علنا ساعمل بها يعنى حبة دوهات على شوية ريدة مع عدد من التريسات .........(دوريدةتريس) وسجن سجن غرامة غرامة !!!!!! .
اما الفلس....... كنا بنقول شنو ؟
ودام التواصل
عاطف منو ؟

اخي الغالي عاطف...لك كل التحايا والامنيات ..يبدو لي ان احسن الواحد مايسمي الحالات باسمائها فانسيان نعمة عظيمة يكفي المرء ادمان حضوركم الحلو ...

العزيز الغالى راشد لقد ادمنا ادمانكم , اوافقك الرأى بان النسيان نعمة احيانا ولكنه ليس بنعمه احيانا اخرى ومثال لذلك نسيانى للرجوع لفنجان قهوتك مع المبدع استاذنا هاشم صديق والمثال الاخر ما ألت اليه حلة الفاصوليا المسبكة علي نار هادية .
ودام التواصل
عاطف عكود

ياسيدي فنجان قهوتنا بل دلال قهوتنا انتم سكرها ونكهتها ...انا مثلك اتمني لو يكون المنتدي صفحات كتاب اتصفحها بعجل حتي اقراء كل انتاج الاقلام الرائعة التي تمدنا بحرارة الشوق للعودة لاحضانها ...
وهذه دعوة للجميع لكل زائر ومعتمر لزيارتنا بالمدينة المنورة
(اوع تقول عندي مكتب عمرة يا عاطف بس فقط قلب مفتوح للجميع)
ولك كل الود

الاخ الغالى راشد ربنا يديك الصحة والعافيه والسعادة والرزق بقدر حبك للناس والتواصل وبقدر روعة قلمك واسلوبك الراقى وقلبك الابيض الكبير فالبذره طيبه , والارض طيبه , والمدينه طيبه , وطيبه طيبه . فلا غرابه ان تكون انت هو انت .... وان تكون علما انت عليه
حفظك الله وربنا يجمعنا بيك فى مدينه المصطفى عليه افضل الصلوات والتسليم.
ودام التواصل
عاطف عكود

الناس الكانو معانا من بداية البوست،، والجداد ،،هذا البوست ابتدا بالخواجة جو والكوتشينة ، قبل يومين سألت جو عن الكوتشينة فاذا بها لاتزال فى درج المكتب والزول كان رايق شويه فحكى لى بكل حماس انو موضوع الكوتشينة شغّال تماما بس تزيد عدد الكروت ( ارجع للمشاركة الاولى فى البوست) لانو ؟؟؟؟ وده المهم
الفكرة تتلخص انو مع السنين واداء نفس الشغل وروتين الحياة الطبيعى فبعض خلايا المخ بتذبٌل او تتلاشى تماما لانها ببساطة ما لاقية حاجة تعملها؟؟!!فانت تمارس نفس الشغل كل يوم حتى وان كان فيهو استخدام للمخ ،، فانت تستخدم نفس الخلايا
موضوع الكوشتينة ومحاولة التذكر تلاتة مرات فى اليوم وزيادة عد الكروت
المقصود منو انو المخ لما يشعر انو فى حوجة لشغل من نوع اخر وتذكر وكده ؟؟!! هنا تبدا خلايا جديدة فى النمو والازدهار وحينها لو عايز تستخدمها فى حصل شنو سنة كده ...ما حتقول ليك لا،،،،انا اخصائية كوشتينة وبس
ويا سبحان الله
مع تحيات الخواجة جو ،،،نتمنى لكم ميلاد خلايا مزدهرة
مودة لا تتلاشى

الغالي ابوصبا...بالله شوف لينا حل غير الكوتشينة دي ..لانو الواحد في حالة ركوض دائم اولا ثانيا الواحد خايف يمسك في موضوع الكوتشينة ويخلي الشغل ( يعني خلوها ترديد يالطيف ) فهي اكثر ثمرا وازيد اجرا اقلو الواحد لو اخد علي الوضع يكون محظوظ دنيا واخرة ...
لك مودتي وللغالية صبا واخوتها ووالدتهم العزيزة كل الود والتحايا
تخريمة:
الواحد مادام بين الفينة واخري بذكر اخوانه واحبابه فالحمد لله ...والله وان كانت هي ليست مسالة تذكر بقدر ماهي مسالة بحث عنهم في الدواخل (فهم دائما ساكنيها)...

راشد كتب:الغالي ابوصبا...بالله شوف لينا حل غير الكوتشينة دي ..
( يعني خلوها ترديد يالطيف )
الواحد مادام بين الفينة واخري بذكر اخوانه واحبابه فالحمد لله ...والله وان كانت هي ليست مسالة تذكر بقدر ماهي مسالة بحث عنهم في الدواخل (فهم دائما ساكنيها)...

يا لطيييييييف
الاعزاء راشد وحاج خالد فى الاول مافهمت اى حاجة الناس دى بتتكلم عن شنو شى كوتشينة ! وشى الخواجة جو! وشى تجديد خلايا ! الى ان رجعت للبوست من الاول ولقيت الموضوع كبير ولى بة العديد من المشاركات والمداخلات وشى دوهات وتريسات وريدة وحاجات تانى حاميانى لم انساها ولم تكن مسالة تذكر بل هى بحث فى الدواخل وكدة على قول حبيبنا راشد ويا لطييييييف .
ودام التواصل
عاطف عكود

اخوتي الاعزاء...
لكم من الشوق مُليئ اكف ابعثرها علي اثار خطاكم..عدت لبوست الزهايمر علني اُبريء نفسي فما دمت عرفت الطريق للبوست فده دليل علي ان الواحد بخير (احدهم سيتهمني بتسللي عبر النفاج يعني طبيت فيه صدفة) وانا لن ابريء ولن ادين فصعب الجزم بالاصابة او عدمها ..الحق يقال هذه زيارة مع سبق الترصد والاصرار لان البوست جميل واحزن أن تخباْ تُقابة المسيد (طبعا مش ود حبوبات)..والذي شدني الي الموضوع أن الاخ العزيز الرشيد نصح اخيه بالتخصص بالمرض والحمد لله الراجل ما اتخصص لانو كان ح يفلس (لا سمح الله) لانو سبق وقلنا المزمهر لو بيعرف يمشي العيادة ويرجع من العيادة ومذكر انو نسي ده يبقي ما مزمهر ده يبقي عاااااااااااااااااااااااااشق ليس إلا.......فعليه البيجي العيادة اليوم امكن سنة مايجيك راجع وهلم جرا...
تخريمة:
افتقدناك نحن اخي عاطف قلما وافتقدك انا اخا ورفيقا وشيفا(Cheif cook) ينثر بهاراً وملحاً علي مساخة ما نكتب ...(لا عليك فليس علي حرج فانا في العيادة)...

راشد كتب:اخوتي الاعزاء...
تخريمة:
افتقدناك نحن اخي عاطف قلما وافتقدك انا اخا ورفيقا وشيفا(Cheif cook) ينثر بهاراً وملحاً علي مسخاة ما نكتب ...(لا عليك فليس علي حرج فانا في العيادة)...

الاخ الحبيب راشد اللة يديك الصحة والعافية والله افتقدكم فردا فردا (بكل جوانب البطانية مافوقها وماتحتها يعنى مشاركين وزوارا ) ولم يمنعنى عنكم الا الشديد القوى وها انذا (حلوة ها انذا دى مش كده ) اعود يارفيقى راشد كشيف استورت لتقديم اشهى اطباق طباخة قلمك المبهر بعبق فلسفة الادب المعتق
ورجعنالكم

الحبيب عاطف
يا سلام يا عاطف .. ما تتخيل دخولك ده عمل فينا شنو ... والله افتقدناك بطريقه ما تتخيلها ويشرفني
ان اكون اول المرحبين بيك بعد عودتك المظفره من تجت البطانيه ... بالله عليك اعمل حسابنا وتاني
ما تطول علينا كده لاننا بصراحه لا نحتمل بعدك عن هذا المنتدي ولا دقيقه واحده .
ويا ها انا ذا دمت شيف كوك ..شيف استورد ... وحتي باشريس .
كما احيي العزيز الاخ راشد الذي لولا جهوده ونشاطه وقلمه الرائع فان هذا المنتدي كان ليتوقف تماما
( يعني شال المنتدي علي ظهره طوال الفتره السابقه ) فلك منّا الف شكر .

جني

هلا هلا،، عاد الاحبة،، كلٌ من حيث ما كان
عاطف الحمد لله الشديد القوى ولى وراح
يا جنى ود عكود ده والله كنا نعلم اسباب غيبتو لكن انت من التقرير الاخبارى بتاع راس السنة ما ظهرت ...إن شاء الله خير وعملا بى كلام المصريين ( نحن اولاد النهارده )

عبدالمنعم جنيدابي كتب:الحبيب عاطف

ما تطول علينا كده لاننا بصراحه لا نحتمل بعدك عن هذا المنتدي ولا دقيقه واحده .
( يعني شال المنتدي علي ظهره طوال الفتره السابقه )
جني

ومن كلامك ذات نفسيهو نقتبس باسم المنتدى انت ذاتك ما تطول
اما راشد فطول عمره جمل الشيل ،،،، لاعدمناك حبيبنا
لكن حقيقة غيبة عبدالرحمن الزين طالت ،،،داير تفتيش بعد كده
واخرون كثر
وطالما نحن فى ضل شجرة الزهمهم فلنا بعض( عتبى ) فى عدم ذكر (اسماء)
تخـــــريمة زهايمرية
قــــــــــــــــــــد نعود

الاعزاء عاطف وخالد وعبد المنعم....
سعيد بعودت الجميع ..ووالله بحثي عنكم ليس لموضيع تقراء فحسب ولكن لافتقادي حضوركم في وبين صفحات المنتدي ..وحمد لله علي ذهاب الشدة والله يرفع عنك وعنا كل شدة ولولا الشديد القوي اكيد ما ح تغيب ياودعكود ولن اقول بيتك ومطرحك وانا الضيف في بيتك ومطرحك فقط اقول ياهلا...وحمد لله علي ظهور الاخ جني بعد ماتواري لفترة...
تخريمة:
ممكن يكون مرحلة بيات شتوي للجميع......................؟؟؟؟؟
تخريمة صغيرونة:
وين ود شلكاوي وود عابدون وود الزين والرشيد (طبعا الفاتح رمي قنبلة وزاغ تاني) ومحمد احمد وواسامة ظهر وقال جاي والبقية طبعا حضور علي منصة كبار الزوار.....عليه عووووووووووووووووووك من قلب غرفة الزمهرة الرئيسية....

الحبايب جنى, ودعكود, ودالاستاذ ود راشد

والله ما شدنى للكتابة اليوم برغم تعبى ودخولى الى المنتدى فى وقت متاخر, الاهذا الزخم الجميل من الحب الاخوى الصافى المتدفق و الذى يجمع قلوب المتداخليين فى هذا البيت العامر...

لكم الود فرداً فرداً

خالد عبدالحميد كتب:هلا هلا،، عاد الاحبة،، كلٌ من حيث ما كان
الغالى ابوصبا سعدنا بسماع صوتك وكمان صوت الحبيب ود السيمت والله يديكم الصحة والعافية

عبدالمنعم جنيدابي كتب:الحبيب عاطف
ما تطول علينا كده لاننا بصراحه لا نحتمل بعدك عن هذا المنتدي ولا دقيقه واحده .
جني

العزيز جنى حلام اقصد جنى حرال
فيها حاجة ؟؟؟
لوابيت تدينا خاطر يبقى انك وريتنا حاجة منك - الحلنقى

وطالما نحن فى ضل شجرة الزهمهم فلنا بعض( عتبى ) فى عدم ذكر (اسماء)
تخـــــريمة زهايمرية
معلوم انو هند بنت عتبة ! لكن مين اسماء دى ؟؟

اسماء عيل صبرى
أخر معلومات الزهمهم ومن موقع هيلث داى نيوز - ان مرضى الزهايمر يشكون من فقدان القدرة على الشم - شفت ياراشد الحكاية جابت ليها شم كمان يعنى سمع وشوف وشم و..حاجات اولى حاميانى ولا شنو يا ود كرار
اللهم احفظ الجميع واغنينا بحلالك عن حرامك اولا وثانيا واخيرا
اخوانا عبدالرحمن الزين واحمد محمد احمد ويييييييييين انتو ؟؟؟؟
ودام التواصل
عاطف عكود

والله ياود عكود ..يبدو لي مرحلة فقدان الشم دي منها والواحد يبقي ذكري بين الاخوان ....الله يستر بكرة ماتقولوا الاعراض وصلت الركب (ربنا يستر)
تخريمة:
قولللللللللللللللللللللللوا يالطيف...
اللهم اجعلنا ممن يلهجون بذكرك اينما كنا وكيفما كان ....